Jeremiya 41
41
1 # Wona ni ka: 2 Vafu. 25:25. Ku to maheka ti to ngu mtxima wa wutxhanu ni yimbidi, a txi ta Ismayeli mwana Netaniya, mwana Elixama, wa mnoha wa vafumeli, ni vathangeli va tinyimbi ta mfumeli, i ku digumi da vavamna kupata ni ene, ni Gedhaliya mwana Ahikamu, kona Misipa; se va to dya votshe dipawu kona Misipa. 2Se a to khukha Ismayeli mwana Netaniya, kumweko ni vavamna vale va digumi va nga ti ti nayo, va to ya dayisa Gedhaliya, mwana Ahikamu, mwana Xafani, ngu ditxhari; va txi m'dayiseto, awule a nga ti vekilwe txitimwi ka ditiko ngu mfumeli wa Bhabhilona. 3Ismayeli a to dayisa votshe Vajudha vale va nga ti ti ni ene, ni Gedhaliya, kona Misipa, ni Vakaldheya kambe, vanyatiyimbi va nga ti maneka koneyo.
4Ngu mangwanani ka kona, ku to maheka tito, msana ka kuva a ti date Gedhaliya, ti si zivwi ngu m'thu, 5kutota vavamna va Sikemi, Silo, ni Samariya; mtxhanu wa magumi ni mararu a vavamna, na va ti yote siletu sawe, syambalo sawe si ti bhandeletwe ni kuwilelwa; manzani kwawe va ti ni siningo sa sakudya ni sa mphaxo, kasi kuya ningela Nyumbani ka Mkoma. 6Ismayeli mwana Netaniya, a to va hingeta a txi dila, kukhukhela Misipa; mbimo yi a nga manana navo, a to khene:
“Ngonani ka Gedhaliya, mwana Ahikamu!”
7Ku ti ngako va txiya hagari ka didhoropa, a so va daya Ismayeli, mwana Netaniya e va vinza txisimani, ene kumweko ni vavamna vale a nga ti kumweko navo.
8Aniko hagari kwawe ku to maneka digumi da vavamna va nga kha vona:
Mi nga hi dayeni, hi ni tithomba hi nga sisa hahanze, fulaho ni sevhadha, mafura ni wulombe. Ngu kota ya toneto, a to va leka, kha va daya nga ti a nga maha ka maxaka awe. 9Txisima txile a nga vinza ka txona avale a nga va daya, ngu mhaka ya Gedhaliya, ngu txoneto a nga maha mfumeli Asa, ngu mhaka ya Bhahasa, mfumeli wa Israyeli: Ismayeli mwana Netaniya, a to tata txona txisimetxo ngu vofa. 10Se Ismayeli a to tsulisa wukhumbini votshe vathu vale va nga ti sate Misipa; i ku vanana va txisikati va mfumeli, ni votshe vathu vale va nga ti sate Misipa, evo Nebhuzaradhani, mthangeli wa vawoneleli, a nga ti va site ni Gedhaliya, mwana Ahikamu, Ismayeli, mwana Netaniya, a to va tsulisa wukhumbini; a to tsula navo ka vanana va Amoni.
11Mbimo yi a nga tiengisa Johanani, mwana Kareya, ni votshe vathangeli va mabutho a tiyimbi va nga ti ti nayo, wubihi wotshe wu a nga ti wu mahile Ismayeli, mwana Netaniya, 12A to teka votshe vavamna va txi yalwa ni Ismayeli, mwana Netaniya: Va to mmana hafuhi ni mati amangi ma kuho Gibheyoni. 13Kumaheka tito, va txi m'wona votshe vathu va nga ti ti ni Ismayeli, va to tsakela Johanani mwana Kareya, ni votshe vathangeli va yimbi. 14Votshe vathu vale Ismayeli a nga ti va mahile tikhumbi Misipa, va to mu tshuralela ve tsula ka Johanani, mwana Kareya. 15Aniko Ismayeli mwana Netaniya, a so pshwitimuka kumweko ni mtxhanu wa vavamna ni vararu, ngu manzani ka Johanani, ve tsula ka vanana va Amoni.
16Sekoko Johanani, mwana Kareya, a to teka votshe vathangeli va mabutho a nga ti nawo, ni votshe vathu vale a nga ti va honyote ka Ismayeli, mwana Netaniya, kukhukhela Misipa, msana ka kudawa ka Gedhaliya, mwana Ahikamu, tindena ta tiyimbi, vavasikati, vafana, mithenwa, a nga ti va honyote ka Gibheyoni 17Va to khukha va txi ya zumba Geruthi-Ximami, hafuhi ni Bhetlehema, kuva ve wulela ngu kona Egipta, 18ngu mhaka ya Vakaldheya, nguko va ti ti va thava, ngu ku va nga ti ni Ismayeli, mwana Netaniya, awu a nga ti date Gedhaliya, mwana Ahikamu, awule a nga ti vekilwe ditikoni ngu mfumeli wa Bhabhilona.
Okuqokiwe okwamanje:
Jeremiya 41: BEC2016
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
A Bíblia em Txitxopi © Bible Society in Mozambique, 2016.