Аман өһө 9
9
Дириҥ муударас уонна акаары быһыы
1Дириҥ муударас дьиэ туттубута,
дьиэтин сэттэ суоруу баҕаналаабыта;
2дьэ ол кэннэ, этин, минньигэс арыгытын бэлэмнээн,
малааһын аһын-үөлүн тардыбыта;
3чаҕар кыргыттарын ыыталаан,
ким барыта истэрин курдук, куорат дьогдьойор саалыттан:
4«Кэнэннэр миэхэ кэллиннэр!» – диэн биллэртэрбитэ;
уһуну-киэҥи толкуйдаабат тутах өйдөөхтөргө эппитэ:
5«Кэлиҥ, мин астаабыт аспын аһааҥ,
мин бэлэмнээбит минньигэс арыгыбын иһиҥ.
6Уонна аны акаарытык быһыыланымаҥ#9:6 …аны акаарытык быһыыланымаҥ – Эбэтэр, аны акаарылартан араҕыҥ., оттомноохтук олоруҥ,
үтүө өй суолун-ииһин тутуһуҥ.
7Кэрээнэ суоҕу көннөрдөххүнэ, үөҕүллүөҥ,
нэгэйи сэмэлээтэххинэ, сиргэ-буорга тэпсиллиэҥ.
8Кэрээнэ суоҕу сэмэлээмэ, кини эйигин абааһы көрүөҕэ,
эн муударай киһини көннөр, кини эйигин таптыаҕа.
9Муударайга сүбэлээ, оччоҕо ордук муударай буолуоҕа,
көнө киһини үөрэт, оччоҕо өйө-мэйиитэ өссө тобуллуоҕа.
10 Айыы Тойоҥҥо ытыктабыл – билии-көрүү төрдө.
Сибэтиэй Таҥараны билэр киһи үтүө өйдөөх.
11Ким муудараһы ылынар, ол уһун үйэлэниэҕэ,
олоҕун күнүн-дьылын үксэтэн биэриэҕэ.
12Муударай өйдөннөххүнэ, эн бэйэҥ абыраныаҥ,
баламат буоллаххына, эмиэ бэйэҥ алдьаныаҥ».
13Акаары быһыы – баламат дьахтар,
айдааннаах-куйдааннаах, кэрээниттэн тахсыбыт ньүдьү-балай#9:13 Былыргы еврей тылынан суруллубут тиэкис бу кэрчигин ис хоһооно чуолкайа суох. –
14ким барыта көрөрүгэр дьиэтин айаҕар тахсан туран,
биитэр куорат килбэйэр киинигэр үрдүк олбоххо олорон эрэ,
15ааһан иһээччилэри хаһыытыыр,
баран иһэр көнө суолларыттан туората сатыыр,
16«Кэнэннэр миэхэ кэллиннэр!» – диэн ыҥырар;
уһуну-киэҥи толкуйдаабат тутах өйдөөҕү уккуйар:
17«Уоран иһиллэр уу ордук минньигэс,
кистээн сиэниллэр килиэп быдан амтаннаах».
18Бу дьахтар дьиэтигэр киирбит дьон өлөллөрүн,
кини ыалдьыттара үтүгэн түгэҕэр түһэллэрин,
кэр дьэбэр киһи сэрэйэн да көрбөт.
Okuqokiwe okwamanje:
Аман өһө 9: СБК
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Институт перевода Библии, 2008-2022