Аман өһө 13
13
1Аҕатын үөрэҕин ылынар уолтан муударай киһи тахсар,
оттон хадаар хаата сэмэни истэ да барбат.
2Үтүө киһи тыла-өһө бэйэтигэр үтүөнү эргитэр,
оттон үктэтиилээх өйдөөхтөр күөмчүлүүр эрэ мөккүөрдээхтэр.
3Тылын кыатанааччы олоҕун харыстанар,
үгүһү түөһээччи иэдээҥҥэ түбэһэр.
4Сүрэҕэ суох кэтэһэ саныыр да, киниэхэ биэриэхтэрэ суоҕа,
оттон туруу үлэһит тото-хана аһыаҕа.
5Кырдьыксыт сымыйа тылы абааһы көрөр,
оттон сидьиҥ киһи саакка барыаҕа, сир-буор сирэйдэниэҕэ.
6Көнө суоллааҕы кырдьыга харыстыаҕа,
хара саҥнааҕы кыдьыга алдьатыаҕа.
7Сорох байымсыйар да, турар бэйэтинэн эрэ,
сорох кэриэлийэр да, үбэ-аһа дэлэй.
8Баай халыҥ харчытынан толунан тыыннаах хаалар,
оттон дьадаҥыны саана да барбаттар.
9Үтүө киһи ыһыырынньыга үөрэ-көтө умайыаҕа,
куһаҕан дьон уота умуллуоҕа.
10Бэрдимсийии өстөһүүнү эрэ үөскэтэр,
оттон муударай дьон сүбэлэһэр.
11Дөбөҥнүк көстүбүт үп-ас дөбөҥнүк баранар,
оттон сыранан мунньуллубут – эбиллэ турар.
12Туолан биэрбэт баҕа санаа – сүрэх ааспат бааһа,
оттон ыра санаа туолуута – олох Аал луук маһа.
13Ким этиллибит тылы ылыммат, ол өлөрүн оҥостор#13:13 Ким этиллибит тылы ылыммат, ол өлөрүн оҥостор – Эбэтэр, Ким Таҥара Сокуонун ылыммат, ол өлөрүн оҥостор.,
оттон кэриэһи ытыктааччыга алгыс тосхойор.
14Муударай киһи үөрэҕэ – өлбөт мэҥэ уута –
бар дьону өлүү ситимиттэн өрүһүйүөҕэ#13:14 Бу кэрчик былыргы еврей тылынан суруллубут Библияҕа суох, кэлин гректии тылбааска эбии киирбит..
15Өйдөөх киһи дьон-сэргэ ытыктабылын ылар,
оттон түөкэйдэр суоллара өлүүгэ тиэрдэр.
16Оттомноох тугу барытын толкуйдаан баран оҥорор,
оттон акаары ньүдьү-балайын көрдөрөр.
17Куһаҕан тэҥсик эрэйгэ тэбэр,
эрэбил тэҥсик эйэни тэрийэр.
18Ким үтүө үөрэҕи ылыммат, ол быста дьадайыа, саакка барыа,
оттон сүбэни-аманы ылынааччы ытыктабылга сылдьыа.
19Ыра санааҥ туолуута дууһаҕын дуоһутар;
акаары аньыыттан араҕарын туохтан да ыарырҕатар.
20Муударайдыын бодоруһуоҥ – муударай буолуоҥ,
акаарылыын булсуһуоҥ – куһаҕаны оҥостуоҥ.
21Аньыылааҕы хара дьай батыһар,
оттон көнө киһи үтүө манньаны ылар.
22Үтүө киһи үбэ-аһа оҕолоругар, сиэннэригэр тиксиэҕэ,
оттон аньыылаах киһи баайа көнө киһиэхэ бэриллиэҕэ.
23Дьадаҥылар да сирдэрэ быйаҥнанар эрээри,
үүнүүтүн кэрээнэ суохтар тутан ылаллар#13:23 Былыргы еврей тылынан суруллубут тиэкис бу кэрчигин ис хоһооно чуолкайа суох..
24Уолун чыпчаххайдыан кэрэйэр киһи кинини абааһы көрөр,
оттон оҕотун таптыыр киһи ноһуоратын эрдэттэн көннөрөр.
25Үтүө киһи дуоһуйа аһыаҕа,
оттон хара дьайдаах хам аччык сылдьыаҕа.
Okuqokiwe okwamanje:
Аман өһө 13: СБК
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© Институт перевода Библии, 2008-2022