San Marcos 5
5
Thi Gadareno bechunda espíritu jianꞌa
(Mt. 8:28-34; Lc. 8:26-39)
1Ko are bathujin na̱ jinda ko biji na̱ ngain nunthe Gadara, 2Jesús banianxin ntha barko ko naa xii bechunda espíritu jianꞌa juii ngain Jesús. 3Xii jiꞌi beꞌe xa ngayee chinthiꞌi chujni texrabaa, ko xruꞌin chujni bakixiꞌin batse xa, maski chiacadena bakiaxin na̱ xa. 4Ixin utsjé nthiꞌa kuia na̱ raa ko ruthee kunixin chia, aro jeꞌe xa bakunchrintaon xa chia ko bagaaña xa chia bakiaxin na̱ raa. Mexinxin xruꞌin kensen bakixiꞌin batse xa. 5Ko nchaꞌon ko thie bakji xa ngagaꞌa jna ko ngayee chinthiꞌi chujni texrabaa ko bakuyao xa ko bancheniꞌi xa nthauꞌe xa kunixin xro. 6Ko are xra kjínxin bikon xa Jesús, kuinga xa juii xa ngain Jesús ko bethuxin xa ngathexin kon; 7ko ndachro xa:
—¿Unda dixinthe ngajin? Jaꞌa Jesús, Xeꞌen Ndo Dio, ndo thjen ngajni. ¡Nthatsaꞌan ñao ixin Ndo Dio nchegetanꞌa na tangi!
8Jañaa ndachro espíritu jianꞌa jiꞌi ixin Jesús udindachro:
—¡Jaꞌa espíritu jianꞌa, sathjixin ngain xii jiꞌi!
9Ko Jesús banchiangi:
—¿Kexreen diꞌin jaꞌa?
Ko espíritu jianꞌa ndachro:
—Jaꞌan diꞌin na Legión ixin jaꞌan ná anto tsjé ná.
10Ko espíritu jianꞌa anto binchetseꞌen ñao Jesús ixin rugantsjexinꞌa ngain nunthe yaa. 11Ko nthi̱ꞌa̱ chiaon binthe anto tsjé kukuchi tenea ba chiaon ruthee jna. 12Mexinxin kain espíritu jianꞌa binchetseꞌen ñao Jesús ko ndachro:
—Ruaꞌan ni ra ngain kukuchi taꞌa ko tanchrjanda ni ra sixiꞌin ná ngain ba.
13Ko Jesús bajon juachaxin, ko kain espíritu jianꞌa bachrjexin ngain xii mee, ko sabinthexiꞌin espíritu ngain kukuchi taꞌa. Ko binthe inchin yoo no̱ kukuchi, ko kainxin kukuchi kuanthjen ba thi yasuꞌe ko binthetsiangi ba jinda ko ndabinthegeꞌen ba.
14Kuthimejan kain chujni bakingaria kukuchi xraon na̱ ko kuinga na̱ kjui na̱ ngain chujni te ngain rajna ko ni te ngain jngi ixin kuekin na̱ thi kuꞌen. Ko chujni juii ixin rutsjeꞌe na̱ keꞌe kuꞌen. 15Ko are chujni biji na̱ thi jii Jesús ko bikon na̱ thi xii bechunda tsjé espíritu jianꞌa ixin ujingaa xa lunthue xa ko undakua jii xa, kain na̱ anto xraon na̱. 16Ko kain chujni bikon thi kuꞌen jiꞌi kuekin na̱ ngain icha chujni thi kuꞌen thi xii bechunda tsjé espíritu jianꞌa ko thi kuꞌen kain kukuchi. 17Ko chujni kuexiꞌin na̱ binchetseꞌen na̱ ñao Jesús ixin sarukjixin nuntheꞌe na̱.
18Ko are Jesús jitani ntha barko, thi xii bechunda tsjé espíritu jianꞌa binchetseꞌen ñao Jesús ixin rukanchrjanda rukji ngain. 19Ko Jesús bithuexinꞌa, ko ndachro:
—Sathji ngain ni nchiandui ko thekiꞌin na̱ kain thi bincheꞌe Ndo Dio ngajin, ko kexreen kuiakunuaꞌa ndo.
20Kuthimejan xii jiꞌi sakjui xa bakekiin xa chujni nunthe Decápolis kain thi bincheꞌe Jesús ngain xa. Ko kain chujni bakiseꞌen na̱ are bakiꞌin na̱ jiꞌi.
Jesús binchexechon xan nchrichjeꞌen Jairo
(Mt. 9:18-26; Lc. 8:40-56)
21Are Jesús sakjan tuenxin jinda inaa ngain ntha barko, tsjé chujni xrathe ngandeꞌe nda ko bixindajin na̱, mexinxin tabithuꞌe ngandeꞌe nda. 22Ko nthi̱ꞌa̱ biji Jairo, naa xi thetuꞌan ngain niꞌngo, ko are jeꞌe bikon Jesús bethuxin nthajuchjiꞌi chrika ruthee Jesús, 23ko anto binchetseꞌen ñao Jesús ko ndachro:
—Xan nchrichjanꞌna ndajideꞌen xan. Nthatsaꞌan ñao, chjin ná ko thiin raa ngataꞌa xan ixin tsuxrueꞌen xan ko senꞌa xan.
24Kuthimejan Jesús sakjui ngain xii mee. Ko anto tsjé chujni ruee ko anto kunthedugee Jesús ngayee na̱. 25Ko ngayee chujni jithji naa nchrii ubeniꞌi theyoo nano ixin bagengathjinꞌa thi bagengiꞌi jnii nchra. 26Ko ixruꞌin bechunda nchra ixin undabinchexiꞌin nchra kain ngain xi nchexruan bakji nchra, ko kuxruenꞌa nchra ko icha beniꞌi nchra. 27Ko jeꞌe nchra ukuiꞌin nchra ixin Jesús banchexrueꞌen tsjé chujni, mexinxin ngayexin chujni jiruee Jesús kjua raa nchra ko kathe nchra ngandeꞌe lunthue Jesús, 28ixin baxraxaon nchra: “Ja̱ rukathe maski jeꞌo lunthue Jesús, jaꞌan tsuxruaꞌan na.” 29Ko are nchrii mee kathe nchra lunthue Jesús, tabekjio jnii nchra, ko kunuꞌe nchra ixin ukuxrueꞌen nchra. 30Ko Jesús kunuꞌe ixin binchexrueꞌen naa chujni kunixin juachaxiin. Mexinxin jeꞌe ngaria ngain chujni ko banchiangi:
—¿Kensen kathe lunthuna?
31Ko chujni bakao Jesús ndachro na̱:
—Suixin ridikon ixin anto tsjé chujni tuntheedo na̱ ngaka suixin, ko xradanchiangi: “¿Kensen kathe?”
32Aro Jesús tsjeꞌe ngayee na̱ ixin rugikon kensen kathe. 33Kuthimejan thi nchrii kuxrueꞌen xranga nchra ixin juaxraon, ko kjui nchra ko bethuxin nchra ngathexin kon Jesús, ko ndachro nchra kain thi kuꞌen. 34Ko Jesús ndachro ngain nchra:
—Xan nchrichjanꞌna, ukuxruaꞌan ixin jaꞌa chunthia ngajin. Chaꞌa, sathji ko ixruꞌin juachjaon richunda.
35Xra jinichja Jesús are juii kanxion chujni juixin nchianduꞌa Jairo, thi thetuꞌan ngain niꞌngo ko ndachro na̱ ngain:
—Xaꞌan undabeꞌen xan, ixruꞌin dindache Xi tjaago.
36Ko Jesús kuiꞌin thi ndachro na̱, ko jeꞌe ndachro ngain Jairo:
—Xraonꞌa, jeꞌo chunthia.
37Ko Jesús kuanchrjandaꞌa ruruee icha chujni jeꞌo kuanchrjanda Pedro, Jacobo ko Juan, xan choo Jacobo. 38Ko are biji na̱ ngain nchianduꞌa Jairo, thi thetuꞌan ngain niꞌngo, kainxin chujni te nthi̱ꞌa̱ anto tetsjanga na̱ ko teta na̱ juachjaon. 39Ko are Jesús bixiꞌin ndachro:
—¿Unda anto tsjanga ra ko ta ra juachjaon? Xan nchrichjan digenꞌa xan, jeꞌo tajijua xan.
40Ko chujni kjuanuanka na̱ Jesús, aro jeꞌe ndache na̱ ixin kain na̱ rugachrjexin na̱ nchia. Ko jeꞌo bithuꞌe ndudee ko janee xan nchrichjan ko thi nii chujni bakao Jesús, ko bixiꞌin na̱ thi jii xan nchrichjan. 41Ko Jesús tseꞌe raa xan ko ndachro ngain xan:
—¡Talita cumi! —mee ruchro: Xan nchrichjan, jaꞌan rindathjo, dingathjen.
42Ko tuinxon, xan nchrichjan, thi bechunda theyoo nano, bingathjen xan ko nchao kjuixin ruthee xan ko kain chujni anto kuiseꞌen na̱. 43Aro Jesús anto kuetuꞌen na̱ ixin xruꞌin kensen rundache na̱ thi bincheꞌe jeꞌe, ko kai kuetuꞌan ixin ruchjee na̱ xan nchrichjan sine xan.
Okuqokiwe okwamanje:
San Marcos 5: plsNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2017, Wycliffe Bible Translators, Inc. All rights reserved.
