San Marcos 4
4
Jesús tjaago ixin thi bikenga nuatrigo ngataon jngi
(Mt. 13:1-9; Lc. 8:4-8)
1Inaa nchaꞌon Jesús kuexiꞌin kjuague tsjé chujni xrathe ngandeꞌe nda Galilea, ko ixin anto tsjé na̱, mexinxin jeꞌe bengaa naa ntha barko beꞌe ngatauꞌen jinda ko kainxin chujni bithuꞌe na̱ ngandeꞌe nda. 2Kuthimejan Jesús anto tsjé kjuague na̱ ixin thi tuꞌen ko jaꞌin ndachro:
3—Thiꞌin ra thi rundathjo ra: Naa thi xii kjui xa bikenga xa nuatrigo ngataon jngi. 4Ko are jitja xa trigo ngataon jngi thuꞌa nuanchjan binthji ngandeꞌe nthiꞌá ko juii kunthua ko juine ba trigo mee. 5Ko icha nuanchjan binthji thi jii thjao, thi thjinꞌa jinche jii, mexinxin trigo mee anto daka chriꞌin. 6Ko are suji bania sua tuin ndaxeꞌnthe katrigo ko ndaxema ka ixin xruꞌin nueꞌe ka bechunda ka. 7Ko icha nuanchjan binthji ngagaꞌa kanchaꞌa, ko kanchaꞌa icha daka bangi ka ko ikuanchrjandaꞌa katrigo bangi ka, mexinxin xruꞌin bajon ka. 8Aro icha nuanchjan binthji thi jian jinche, ko chrjuin chriꞌin ka, bangi ka ko chrjuin bajon ka trigo. Ko naa nuanchjan bajon naa kan ko the nuanchjan, ko te nuanchjan bajon nii kan nuanchjan ko te bajon naꞌo kan nuanchjan.
9Ko ndachro Jesús:
—Jaꞌa ra xro thiꞌin ra, thinxin ra jian.
Jesús ndachro ixin unda jañaa bakjaago
(Mt. 13:10-17; Lc. 8:9-10)
10Kuthimejan are uchiaon sakjui kainxin chujni, thi ni xra bithuꞌe ngain Jesús kunixin ni theyoo kuinchieꞌe banchiangi na̱ ixin keꞌe ruchro thi kjuaago jeꞌe. 11Ko Jesús ndachro:
—Jaꞌa ra Ndo Dio chjaa ra juachaxin tsunuꞌa ra thi xruꞌin kensen nuꞌe ixin keꞌe ruchro thi thetuꞌan Ndo Dio. Aro ni icha jeꞌo ruxrague na̱ kunixin thi tuꞌen. 12Ko jamee maski tedikon na̱, te na̱ inchin chujni dikonꞌa, ko maski thiꞌin na̱, te na̱ inchin chujni thinꞌa ko thinxinꞌa, ko ja̱ jeꞌe na̱ rukinxin na̱ rukinthuꞌe na̱ thi jianꞌa ncheꞌe na̱ ko rugitjañeꞌe na̱ thi jianꞌa ncheꞌe na̱.
Jesús tjaago keꞌe ruchro thi binga nuatrigo
(Mt. 13:18-23; Lc. 8:11-15)
13Jesús ndachro ngain na̱:
—Ja̱ thinxinꞌa ra thi ndachrjan jiꞌi, ¿kexreen tsinxin ra icha thi tsjaago jaꞌan? 14Thi thenga nuatrigo, mee inchin thi tjaago juajnee Ndo Dio. 15Thi nuatrigo binthji ngaa nthiꞌá, mee inchin chujni thiꞌin juajnee Ndo Dio, aro seꞌa thiꞌin na̱ ko thii nchiijin ko dantsjeꞌe na̱ thi ukuiꞌin na̱. 16Ko ikanxion chujni te na̱ inchin nuatrigo betsinga ngagaꞌa xro, ko mee chujni thiꞌin juajnee Ndo Dio ko anto chee na̱, 17aro ixin chundaꞌa tsjé nueꞌe seꞌa tunchrjeꞌen ka, jañaa chujni kai; ixin thinxinꞌa na̱ jian ko thii thi tangi ko chujni chrjuinꞌa ncheꞌe ngain na̱ ixin dithikaon na̱ juajnee Ndo Dio. Mexinxin ndathinthuꞌe na̱ thi jian juajna bayée na̱. 18Ko ikanxion chujni te na̱ inchin nuatrigo betsinga ngagaꞌa kanchaꞌa, mee inchin chujni ukuiꞌin juajnee Ndo Dio, 19aro ta na̱ juachaon ixin thi jii ngain nunthe jiꞌi, thi thiakuꞌen na̱ tumi ko thi jianꞌa thiakuꞌen nthauꞌe na̱. Kain jiꞌi tanchrjandaꞌa na̱ thinxin na̱ thi jian juajna ko incheꞌa na̱ thi thetuꞌan juajna. 20Ko ikanxion chujni te na̱ inchin nuatrigo betsinga ngain thi chrjuin nche, mee inchin chujni thiꞌin juajnee Ndo Dio ko dayee na̱ juajna ngain anseen na̱ ko ncheꞌe na̱ thi thetuꞌan juajna. Ko jañaa naa nuanchjan dajon naa kan ko the nuanchjan, ko te nuanchjan dajon nii kan nuanchjan ko te dajon naꞌo kan nuanchjan.
Kain thi jima tsununxin
(Lc. 8:16-18)
21Ko kai ndachro Jesús:
—¿A nchegakaon ni naa xruꞌi kuthimejan tsema ni xruꞌi ngaxiꞌin naa ntha kaja o ngangindeꞌe naa saon? Naꞌi, icha jian nchegakaon ni xruꞌi ixin tsiin ni xruꞌi nui ixin sinchengasaan. 22Mexinxin xruꞌin thi jima ke tsununxinꞌa, ko kain thi xraxaon ni ngain anseen ni ko jima, naa nchaꞌon tsununxin. 23Jaꞌa ra xro thiꞌin ra, thinxin ra jian.
24Kai ndachro:
—Thinxin ra jian thi thiꞌin ra. Ixin thi ncheꞌe ra ngain icha chujni, jañaa sincheꞌe Ndo Dio ngajin ra, ko xra sayéꞌe ra icha. 25Ixin thi uchunda, sayée icha, ko thi xruꞌin chunda, thi nchion chunda xra sachrjeꞌe.
Jesús tjaago kexreen dangi nua
26Kai ndachro Jesús:
—Thi thetuꞌan Ndo Dio mee inchin thenga chujni ngataon jngi. 27Ko thi bikenga sadigejua ko tsukjin xingameꞌe ko datho nchaꞌon ko thie. Ko tsee chriꞌin tse ko dangi, aro thi bikenga nueꞌa kexreen dangi ka. 28Ko nunthe nchegangi ka, saꞌo chriꞌin ntha xijichjeꞌen ka, kuthimejan ninchjan kuthimejan nuanchjan duanito ninchjan. 29Ko are ucha nuanchjan, utaade na̱ katrigo ixin ubithja nchaꞌon sikjejo na̱ thi uguan.
Tsee diꞌin mostaza
(Mt. 13:31-32; Lc. 13:18-19)
30Ko kai ndachro Jesús:
—¿Keꞌe nchao sinthakininxin thi thetuꞌan Ndo Dio? 31Mee inchin tsee diꞌin mostaza ko mee tsee icha nchiin ke kainxin tsee dinga. 32Ko are udinga tsee mee, ka dachrjetaon dangi ka icha ke kain ka, ko yeye dangi chaan ka ko kunthua nchao nchechjian kakee ba ngagaꞌa chaan ntha.
Jesús bandachro keꞌe ruchro thi bakjaago
(Mt. 13:34-35)
33Jesús kjuaago juajnee Ndo Dio kunixin tsjé thi bakuꞌen, ko jeꞌe bakjaago thi nchao bakinxin chujni. 34Ko jeꞌo banichja ngain chujni kunixin tsjé thi bakuꞌen, aro ngain chujnii bandachro keꞌe ruchro thi bakjaago.
Jesús kuenta chrintho ko jinda jikjamangiathe
(Mt. 8:23-27; Lc. 8:22-25)
35Nchaꞌon mee are ndakunthie, Jesús ndache chujni bakao:
—Ji ná tuenxin jinda.
36Kuthimejan Jesús ndache kain chujni ixin usarukji na̱ ko ngaa naa ntha barko bengakaꞌo ni bagakao ko sakjui na̱. Ko kai ruee icha ntha barko. 37Aro kjuabeꞌo chrintho ko chrin suji ko suji kjamangiathe jinda nganito ntha barko ko uchiaon ruxinkajingi ntha jinda. 38Ko Jesús tajijua nuton ntha ko jikjon jaa tajijua, ko chujni bakao jeꞌe binchexingameꞌe na̱ ko ndache na̱:
—¡Suixin ke tjaago! ¿Andusanꞌa ixin ndatexinkanjingi ná jinda?
39Kuthimejan bingathjen Jesús, ko kuetuꞌen chrintho ko jinda ko ndachro:
—¡Tenkua! ¡Ko ndakua tadariꞌi!
Ko tabeta chrintho ko kain xratao tabeꞌe. 40Ko ndachro Jesús ngain chujni bakao:
—¿Unda anto xraon ra? ¿Unda xra chunthiaꞌa ra ngain Ndo Dio?
41Ko jeꞌe na̱ anto xraon na̱, ko ndache choo na̱:
—¿Kensen jiꞌi ixin chrintho ko jinda dithikaon thi ndachro jeꞌe?
Okuqokiwe okwamanje:
San Marcos 4: plsNT
Qhakambisa
Kopisha
Qhathanisa
Dlulisela
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2017, Wycliffe Bible Translators, Inc. All rights reserved.
