MATTHAI 1
1
Jesu Khrist Suangtute
(Luk 3.23-38)
1Abraham tapa, David tapa, Jesu Khrist khangthubu. 2Abraham in Isak asuang a, Isak in Jakob asuang a, Jakob in Judas leh a-unaute asuang hi. 3Judas in Tamar a pan Perez leh Zerah asuang a, Perez in Erom asuang a, Erom in Aram asuang hi. 4Aram in Amminadab asuang a, Amminadab in Nashon asuang a, Nashon in Salmon asuang hi. 5Salmon in Rahab a pan Boaz asuang a, Boaz in Ruth a pan Obed asuang a, Obed in Jesse asuang hi.
6Jesse in kumpipa David asuang a, kumpipa David in Uria zi a pan Solomon asuang hi. 7Solomon in Rehoboam asuang a, Rehoboam in Abijah asuang a, Abijah in Asa asuang hi. 8Asa in Jehoshaphat asuang a, Jehoshaphat in Jeram asuang a, Jeram in Uzzia asuang hi. 9Uzzia in Jotham asuang a, Jotham in Ahaz asuang a, Ahaz in Hezekiah asuang hi. 10Hezekiah in Manasseh asuang a, Manasseh in Amon asuang a, Amon in Josiah asuang hi. 11Babulon sal a api lai un Josiah in Jekoniah leh a-unaute asuang hi.
12Huan Babulon sal a api nung un Jekoniah in Salathiel asuang a, Salathiel in Zerubbabel asuang hi. 13Zerubbabel in Abiud asuang a, Abiud in Eliakim asuang a, Eliakim in Azor asuang a, 14Azor in Zadok asuang a, Zadok in Akim asuang a, Akim in Eliud asuang hi. 15Eliud in Eleazar asuang a, Eleazar in Mathan asuang a, Mathan in Jakob asuang hi. 16Jakob in Joseph, Mari pasal asuang a, huai Mari lak ah Jesu Khrist ahong piangta hi.
17Huchi in suan tengteng Abraham a pan David tan suan sawm-le-li ahi a, David a pan Babulon a sal a pi ahih tan un, suan sawm-le-li ahi a, Babulon a sal a pi ahih ua pan Khrist tan suan sawm-le-li ahi.
Jesu Khrist Pianna
(Luk 2.1-7)
18Jesu Khrist hong piandan hichibang ahi. Anu Mari leh Joseph akikham lai ua a-omkhawm ma un, Kha Siangthou in agaisak chih atheita uhi. 19Huchi in apasal Joseph, midiktak ahi a, amah daisak a-ut kei a, aguk in tawpsan atum hi. 20Himahleh, huai thute angaihtuah lai in, ngai in, amang in akiang ah Toupa angel ahong kilak a, “Joseph, nang David tapa, na zi Mari neih lau ke'n, anaupai Kha Siangthou a kipan ahi. 21Tapa anei dia, amin ding in Jesu na sa ding; ama'n amite akhelhna ua kipan ahotdam ding ziak in,” achi hi.
22Toupa'n zawlnei kam a:
23“Ngai in, nungak siangthou agai dia, tapa anei dia,
amin Immanuel asa ding uh,” chi a agen ahong tuntheihna ding in huai tengteng ahong om hi.
Huai tuh, “I kiang uah Pathian a-om,” chihna ahi.
24Huchi in Joseph ihmu athoukhia a, Toupa Angel in akiang a thu apiak bang in ahih a, azi aneita hi.
25Himahleh, tapa aneih masiah akithuahpih kei; huan amin Jesu asata hi.
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.