Luk 19
19
Yezu bɛ nɛ Zasye
1Bhii Yezu natuula kɔ dɛl Yeliko ɛ, nyɛ eezɛkpaa tɔ́ pɛ yii kyee dɛl. 2Kɔ dɛl ɛ tak, ye nabɛ ɛ́ nɛ dhiiti mot, din ɛ lɛ nabɛ ɛ́ Zasye. Nyɛ nadi ɛ́, kukuma bɛnɔŋel ɛ epata e lapo, nyɛ nadi ɛ́, mot ekum. 3Nyɛ nadi esuu ɛbee Yezu, saabɛgɔs kabɛ ɛ́ náá, nyɛ nadi ɛ́ ɛwulalɛpe. Nyɛ nabɛ ɛ́ ààbɛ nɛ tyee nyɛ bee Yezu, etɛɛ náá, bot nadi ɛ́ ɛbuɛpe. 4Tin, nyɛ ɛ́ boozɛwyis kaab tɔ pɛ sok, kɛgo kɔ mɔɔ le di edjóoaa sikomood ɛ, etɛɛ náá, é ghɛŋ Yezu aadhaa tin ɛ, nyɛ neebee nyɛ. 5Dáa Yezu nakum é di'enek ɛ, nyɛ eezɛben mis pɛ ɛko, nyɛ ɛ́ boolɛɛ nɛ Zasye náá: «Lela ɛsul Zasye, etɛɛ náá, ye goka ɛ́ náá, mos, mɛ sulal tɔ ndjaŋ'ɔ.»
6Tin, wɔ gwaa Zasye zɛsul kɔ le kaab ɛ́ kaab. Bhii tak, nyɛ eekɛdisi bɛ nɛ Yezu tɔ ndjaŋ'ɛ nɛ mɛmyaala ɛbuɛpe tɔ lyem. 7Dáa bot nabee deenek ɛ́, bot naadyeebalii ɛbiyoɛpe kɔ ɛsu ɛ Yezu étɛp tak. Bɛ nadi ekeke ɛ́ náá: «Mot'ak eetɔ́ kɛdi tɔ ndjaa mot na mbee dék!» 8Zasye eezɛwyɛl sok bhwoob ɛ Yezu, nyɛ eezɛke nɛ nɛ náá: «Ghɛŋ, gwaka, mɛ ɛpekaa mɛvu mam mɛkɛɛ mɛbá. Ɛkɛɛ wat mɛ waadjɛ bɛdjel ɛ bot. Yɛ bɛ náá, mɛ naanɔɔ epata e mot, dhaa yii mɛ nawaagoka nɛ ɛnɔŋ ɔɔ, mɛ waabulal nyɛ mɛtaŋ mɛ mɛnɔŋ ɛ́ esok ená.» 9Tin, Yezu eezɛke nɛ nɛ náá: «Dwoo pan mos'ak, tsik eeni tɔ ndjaŋ'ak, etɛɛ náá, wɔy pe ɛ́ dha ɛ Abalaam. 10Etɛɛ náá, Sɛɛŋɛlɛ Mɔn Mot nazyɛ ɛ́ zɛsaa bot djas nazewo ze ɔ étɛp ɛtsik bɛ.»
Kana mɛdhɛɛb mɛ lɔɔd
11Yezu eebaazɛlɛɛ dhiiti kana dum nɛ bot ɛ́ nadi egwak nyɛ ɔ. Nyɛ nadi ɛ́, nyɛ eezekunaa nɛ Yeluzalɛm. Bot nadi egek ɛ́ náá, Ɛyoŋ ɛ Zɛɛb eezekɔ nɛ ɛtuula. 12Tin, Yezu eezɛke nɛ nɔɔ náá: «Mot ngɔt nabyel tɔ mɛbyel mɛ bɛkum ɛ bot ɔ, zokazɛtɔ́ mɛdjoŋ pɛ dhiiti kyee dik ɛtsetaɛpe nɛ dɛl ɛ lɛ, étɛp nyɛ neekɛdjɛaa bóó mɛkoozi. Bhii tak nyɛ ɛ́ zɛbula pɛ dɛl ɛ lɛ. 13Ɛsok nɛ nyɛ nɛ tɔ́, nyɛ eezɛdjóo bot ɛ mɛsa mɛ kam, lik bɛ mot nɛ mot nɛ ɛdhɛɛb ɛ lɔɔd wat nadi nɛ boo mɛtaŋ ɛ. Bhii tak nyɛ eezɛke nɛ nɔɔ náá: “Likeka é liig mɛmbɔ nɛ epata bak, kɛkum dwoo mɛ aaboobula ɛ.” 14Tin, ye kabela náá, bot ɛ kyee dik'ɛ nadi ebhina nyɛ. Wɔ gwaa, bɛ zɛlwom bot nyɛy ààgu, étɛp bot ɛ tak neekɛlɛɛ náá: “Bis ààpakwyɛl náá, mot'enɔk di mɛkoozi mes.”
15Saabɛgɔs náá, bɛ naabatadjɛ nyɛ bóó mɛkoozi. Bhii tak nyɛ eezɛsik pɛ dɛl ɛ lɛ. Dáa nyɛ nakakum ɛ, wɔ gwaa, nyɛ zɛdjóo bot ɛ mɛsa mɛ nyɛ nadjɛ bɛ epata ɔ, étɛp nyɛ needji bɛ bim epata ee nakala kɔ yii nyɛ nalik bɛ nɛ yɛ étɛp ɛliig ɛ mɛmbɔ ɛ. 16Mot ɛsok eezɛzyɛ, nyɛy nɛ nɛ náá: “Mɛkoozi, mɛ eebela mɛdhɛɛb mɛ lɔɔd kam kɔ yii wɔ nalik mɛ nɛ yɛ ɛ.” 17Mɛkoozi eezɛbɔɔza nɛ nɛ náá: “Ɛnyɔɛpe! Wɔ ɛ́ mbɛɛ mot-mɛsa. Dáa ye di náá, wɔ kɛ ɛ́ tɔ etsoŋ dum nɛ bɔɔ esonok ɛ, mɛ eedil wɔ kukuma eghaada kam.” 18Mot bhɔɔba mot ɛsok ɔ eezɛzyɛ yɛ. Nyɛ eezɛke nɛ mɛkoozi mɛ náá: “Mɛkoozi, mɛ eebela mɛdhɛɛb mɛ lɔɔd mɛtɛn kɔ yii wɔ nalik mɛ nɛ yɛ ɛ.” 19Mɛkoozi eezɛbɔɔza nɛ nɛ náá: “Ɛnyɔɛpe wɔy, mɛ eedil wɔ kukuma eghaada etɛn.”
20Nwyak dhiiti mot-mɛsa eezɛzyɛ. Nyɛ eezɛke nɛ mɛkoozi mɛ náá: “Ghɛŋ, beea ɛdhɛɛb ɛ lɔɔd wɔ nalik mɛ nɛ yɛ ɛ. Mɛ ààpabe. Mɛ eekwom yɛ syela tɔ pes kaad. 21Etɛɛ náá, mɛ di ɛ́, nɛ bwoo nɛ nɔ. Wɔy ɛ́ mot ngɔt di náá, wɔ ɛ́ nɛ biyo dhaa tyɛ. Wɔ nɛ dyeebanɔɔ dɔɔ nɛ sa di náá, wɔ ààpakwom ɛ. Wɔ nɛ tɔ́ tɔ epyeeb e baa, kɛnɔɔ edee bɔɔ, ààbɛ náá, wɔy ɛ́ nabɛ yɛ.” 22É di'enek, mɛkoozi ɛ́ boobɔɔza nɛ nɛ náá: “Mbee mot-mɛsa, beta náá, mɛ pɛ́ɛ wɔ nɛ mɛkpa mɔ met. Wɔ nadi egu náá, mam dyeebakɛbɔ́k edee ɛ́ tɔ pyeeb mɛ nadi ààbɛ ɛ. 23Haaa étɛp yé wɔ di àànɔɔ epata bam, kɛwa tɔ eboo mendjaa mɛ di ebaal epata e bot ɛ? Wɔ pe di ɛ́ di tsoŋ mot ɔɔ, pe bula mɛ bula ɛ, mɛ zɛbela ɛ́ edhiiti epata eezekala kɔ yii mɛ nalik ɛ.” 24Bhii tak nyɛ eezɛke nɛ bot ɛ nadi tin ɔ náá: “Dɛkeka nyɛ ɛdhɛɛb ɛ lɔɔd yii nyɛ di nɛ yɛ'enek, da bi ɛ́ djɛ mot bela kam kɔ yii mɛ nadjɛ nyɛ ɛ.” 25Bot ɛ tak eezɛbɔɔza nɛ mɛkoozi tak náá: “Mɛkoozi, nyɛy moo ɛ́ nɛ mɛdhɛɛb mɛ lɔɔd kam!” 26Mɛkoozi eebaazɛbɔɔza náá: “Mɛ lɛɛ bin ɛ́ náá, yɛ ɛ́ pɛ daa bot djas aadi nɛ batsa ɔ, bɛ aabil étɛp ye neebu. Tin, mot aakadi toto ààbɛ nɛ sonok ɔɔ, bɛ waadɛk nyɛ dɔɔ nɛ eghutu-ghutu nyɛ lik nɛ yɛ ɛ. 27Yɛ kabɛ bot ɛ di ebhina mɛ ɔɔ, bot ɛ nadi ààkwyɛl náá, mɛ di mɛkoozi ɔ, dhaka nɛ nɔɔ wak, da bi ɛ́ tsak bɛ é mis mam.”»
Yezu eetɔ́ pɛ Yeluzalɛm
28Bhii bɛ nalii deenek ɛ́, Yezu eezɛbyet tɔ́ pɛ Yeluzalɛm. Nyɛy pɛ sok lɔɔg mɛdhuu mɛ bot. 29Dáa nyɛ nadi, nyɛ moo ekunaa nɛ mɛl mɛ Bhɛtfaze nɛ Bhetani, é ngwoob ɛtsok ɛ pyeeb oliv ɛ, tin, Yezu eezɛlwom bɛdjekel bɛ bɛbá. 30Nyɛy nɛ nɔɔ náá: «Tɔ́ka kɔ dɛl ɛ di pɛ sok'enek. Tuula bi aatuula kɔ dɛl ɛ, bi ɛ́ waabee mɔɔ swooz an tiŋela, ye dinaa, mot dinaa ààpago kɔ lɛ ɔ. Tiika nyɛ, da bi ɛ́ zyɛ mɛ nɛ nɛ wak. 31Mot ɛ́ dji bin náá: “Bi tii nyɛ étɛp yé?” Lɛɛka nyɛ náá: “Yɛ ɛ́ Ghɛŋ ɛ di nɛ gwyes nɛ nɛ.”»
32Bhii tak, bot ɛ nalwomaa ɔ eezɛtɔ́, bɛ kakɛbela esonok djas ɛ́ dáa Yezu nazolɛɛ bɛ ɛ. 33Dáa bɛ nakadi etii mɔɔ swooz an tak ɛ, bɛnakuma tak eezɛdji bɛ náá: «Bi tii mɔɔ swooz an étɛp yé?» 34Wɔ gwaa bɛ zɛbɔɔza nɛ nɔɔ náá: «Yɛ ɛ́ Ghɛŋ ɛ di nɛ gwyes tak.» 35Bɛ eezɛtii mɔɔ swooz an tak. Tin, bɛ eezɛtɔ́ nɛ nɛ pɛ daa Yezu. Bhii tak bɛ eezɛdja endjookuwa bɔɔ kɔ koŋ mɔɔ swooz an tak. Tin, bɛ eezɛgel Yezu kɔ lɛ. 36Dáa bɛ nadi ekɛ ɛ, bot nakadi tin ɛ́ edja endjookuwa bɔɔ gba-gba. 37Dáa bɛ nadi, bɛ moo ekunaa nɛ Yeluzalɛm ɛ, bɛ nadhaŋ ɛ́ pɛ ze di esul pɛ ɛtsok ɛ pyeeb oliv ɛ. Mɛdhuu mɛ bɛdjekel moo tin eduwal Zɛɛb ɛlyelɛpe dum nɛ endem e mɛbwala mɛ bɛ nadi ebee ɛ. 38Bɛ nakeke ɛ́ náá: «Zɛɛb sɛɛ Mɛkoozi mɛ di ezyɛ nɛ din ɛ Ghɛŋ ɔ mɛtel. Egwyem tɔ gwoo, duma nɛ Zɛɛb!»
39Bɛdhiiti eFalizyɛ nadi tɔ mɛdhuu mɛ bot binɔk ɔ zokake nɛ Yezu náá: «Lyoel, lyaka bɛdjekel bɔ náá, bɛ di gwyem.» 40Yezu eezɛbɔɔza nɛ nɔɔ náá: «Beeka, mɛ lɛɛ bin ɛ́ náá, bɛ diyal enuub bɔɔ ɔɔ, mɛkok ɛ́ waatsim é di yɔɔ.»
Yezu ɛpedje kɔ ɛsu ɛ dɛl ɛ Yeluzalɛm
41Dáa Yezu nakum é bhaaz Yeluzalɛm ɛ, beea nyɛ nabee ghaada tak ɛ, wɔ gwaa, nyɛ zokadje kɔ ɛsu ɛ tak. 42Nyɛy náá: «Wɔy Yeluzalɛm, mos wɔ ààpagu dáa wɔ goka nɛ ɛsa, etɛɛ wɔ neebela egwyem ɛ. Nenak, ye moo ɛ́ syela é mis mɔ, wɔ tok nɛ ghwyil ɛbee yɛ. 43Ɛwala ɛpezyɛ, ɛwala di náá, bot ɛ mɛbhuka mɔ aasum peeb étɛp bɛ neelumla dɛɛb nɛ nɔ ɛ. Bɛ waakaal wɔ kuku ɛbwak, da bɛ ɛ́ kɛmaad wɔ é edi djas. 44Bɛ waatwaal wɔ dɔɔ nɛ bɔn bɔ djas. Bɛ aanàkwaalik ɛkok wat kɛla kɔ dhiiti ɛkok, etɛɛ náá, wɔ ààpamɛt ɛwala Zɛɛb zɛkwyee wɔ ɛ.»
Yezu eesɔ bot ɛ di ebɔmsa esa pɛ tɔ kok Ndjaa-ebuwa ɔ
45Yezu naazɛni tɔ kok Ndjaa-ebuwa, wɔ gwaa nyɛ eezɛni esɔ bot ɛ nadi ebɔmsa esa bɔɔ tɔ tak ɔ. 46Nyɛy nɛ bot ɛ tak náá: «Pɛ tɔ Ekwyala, Zɛɛb lɛɛ ɛ́ náá: “Ndjaŋ'am aadjóoaa ɛ́ ndjaa mendjaala.” Yɛ kabɛ biyɔ ɔɔ, bi zeliig yɛ, ye di zɛɛga bot ɛ djii#19.46 Eza 56.7; Zel 7.11.»
47Mɛlu djas Yezu nadi elelyo bot tɔ kok Ndjaa-ebuwa. Tin, eboo bɛghaa-Zɛɛb, nɛ bɛghaŋ ɛ mɛkana mɛ etsi, zɛnɔɔ bɛdhil ɛ bot ɛ dɛl nadi esaa dáa bɛ sa étɛp bɛ neegó Yezu ɛ. 48Deenek bɛ nabɛ ɛ́ ààgu dáa bɛ di egoka nɛ ɛsa, etɛɛ náá, bot djas nadi ekwyɛl ɛgwak mɛlyo mɛ ɛbuɛpe.
© (Active), Wycliffe Bible Translators, Inc. All rights reserved.