എപസോസുഗാറാര് ഈ ബൊക്കുന പറ്റി സ്‌ന്ന ഒന്റു സേദി
ഈ ബൊക്കുന പറ്റി സ്‌ന്ന ഒന്റു സേദി
<<മേലോഗാത്ത്‌ല്‌മ് ബൂലോഗാത്ത്‌ല്‌മ് ഇര്‌ക്കുവാദ്‌ന ഒട്ടുക്കു ക്‌റ്‌സ്‌ത്ത് ആള്‌വാനെന്റ്‌മ് സാമി മുദാല് താനെ ഓസണെ എ്ഡ്‌ത്തിന്താന്>> (1:10). ഈ കാര്യന പറ്റിത്തെ എപസോസുഗാറാര്‌ക്ക് എ്ള്‌ദ്‌ന എ്ള്‌ത്ത്‌ല് പവുലോസു മുദാല് സൊല്ലുവാദ്. ഏസ്സ് ക്‌റ്‌സ്‌ത്തോഡ ഒന്റായി എല്ലാ മന്‌സാര്‌ഗാള്‌മ് ഒത്തിമുള്ളവാര് ആയ ബേ്ണ്ടി സാമി നെനേത്ത്‌റ്‌ക്കുവ ഈ ദൊഡ്ഡ കാര്യാക്കായി പെ്ളേക്കുഡൊ എന്റ് പവുലോസു സാമിക്ക് പട്ടവാര്‌ക്ക് സൊന്റാന്.
ഒണ്ണാവാദായി സാമി തന്ന് ആള്‌ഗാള്‌ന എത്തെ തെരിന്തെ്ഡ്‌ക്കുവാദ് എന്നുവാദ്‌നാമ്, മഗാന് ഏസ്സ് ക്‌റ്‌സ്‌ത്ത്‌ന ബെത്ത് അവാര് പാവാന എത്തെ തീത്ത് കൊഡുക്കുവാദ് എന്നുവാദ്‌നാമ്, സാമിനിഗാല്‌ന കൊഡുത്തു കൊണ്ടു സാമി സൊല്ലിര്‌ക്കുവ ബാക്ക്‌ന എത്തെ ഒറേപ്പ് മാഡ്‌ന്റാന് എന്നുവാദ്‌നാമ് സൊല്ലികൊണ്ടു ഒത്തിമെ എന്നുവ ദൊഡ്ഡ കാര്യന ഒന്റൊന്റായി പവുലോസു സൊല്ലിര്‌ക്ക്‌ന്റാന്. അവാര് ഏസ്സ് ക്‌റ്‌സ്‌ത്തോഡ ഒന്റായി ഇര്‌ക്കുവ പാസെ അവാര് ആങ്കീങ്ക് ഒത്തിമുള്ളവാരായി താനെ പെ്ളേക്കുഡൊ എന്റ്‌ത്തെ റണ്ടാവാദായി ഈ എ്ള്‌ത്ത്‌ന പഡിക്ക്‌ന്റവാര്‌ക്ക് പവുലോസു സൊല്ലിര്‌ക്കുവാദ്.
ക്‌റ്‌സ്‌ത്തോഡ ഒന്റായി പെ്ളേക്ക്‌ന്റവാര്‌ക്ക് ഇര്‌ക്കുവ ഒത്തിമെന കാട്ട്യ ബേ്ണ്ടി അയി ഒത്തിമെന പവുലോസു പലാദ്‌ക്ക്‌മ് എ്ണേത്ത് സൊന്റാന്. ഒണ്ണാവാദായി ഏസ്സ്‌ഗാറാര് കൂട്ട ഒന്റു സരിഗലന പാസെ എന്റ് സൊല്ലിര്‌ക്ക്‌ന്റാന്. അയി സരിഗലാക്ക് തലെ ക്‌റ്‌സ്‌ത്ത്. റണ്ടാവാദായി അവാര് ഒന്റു ബീ്ഡ്‌ക്ക് സമ എന്റ് സൊല്ലിര്‌ക്ക്‌ന്റാന്. അയി ബീ്ഡ്‌ക്ക് ഇക്കിര്‌ക്കുവ മൂലെകല്ല്‌ത്തെ ക്‌റ്‌സ്‌ത്ത്. മൂണാവാദായി അവാര് പെ്ണ്ട്‌ന പാസേമ് ക്‌റ്‌സ്‌ത്ത് ആളാന്‌ന പാസേമ് എന്റ് സൊന്റാന്. ഇത്തെ മ്‌ഗ്‌ന്ത ദിന്‌സ്‌ല് അര്‌ത്ത മാഡി കാട്ടുവ ഈ എ്ള്‌ത്ത് ക്‌റ്‌സ്‌ത്ത്‌ന ബെത്ത് ഗേന്ത്‌റ്‌ക്കുവ സാമി പ്‌ണ്ണ്യന പറ്റി നെനേക്ക്യ ബെക്ക്‌ന്റ്. ഈ എ്ള്‌ത്ത്‌ല് സൊല്ലിര്‌ക്കുവ എല്ലാദ്‌മ് ക്‌റ്‌സ്‌ത്ത്‌ത്ത് സീവാന്, അയാള് തനാന താനെ കൊഡുത്ത പലി, പാവഗാള്‌ന അയാള് പൊറുക്കുവാദ്, അയാള് പ്‌ണ്ണ്യ ഗേവാദ്, അയാള് സുത്താപ്പ് മാഡുവാദ്‌ക്കെല്ല അഡി ഇര്‌ക്ക്‌ന്റ്.
ഈ ബൊക്കുലു അഡാങ്കിര്‌ക്കുവാദ്
ഈ എ്ള്‌ത്ത്‌ന പറ്റി സ്‌ന്ന ഒന്റു സേദി1:1–2
ക്‌റ്‌സ്‌ത്ത്‌മ് ഏസ്സ്‌ഗാറാര് കൂട്ടാമ്1:3—3:21
ക്‌റ്‌സ്‌ത്തോഡ ഒന്റായി ഇര്‌ക്കുവ പുദ്യ പെ്ളേപ്പ്4:1—6:20
ഈ എ്ള്‌ത്ത് മുഡിക്കുവാദ്6:21–24
New Life Computer Institute