1 കൊരിന്ത്യഗാറാര് 10
10
സെലേന കുമ്മുഡുവാദ്‌ന പറ്റി
1ഏസ്സ്‌ഗാറാരെ, മോസെ സൊല്ലുപഡി നഡാന്ത നമ്മ് പാട്ടനാമ്‌ക്ക് എന്താറ്റ് എന്റ് നെനേക്കുഡൊ എന്റ് നാന് ആസെപഡ്‌ന്റെ. സാമി അവാര്‌ന മഞ്ച് കുളുസുലു അദിസ്യത്തോഡ നഡാത്തി ബന്താന്. അവാര്‌ന അദിസ്യത്തോഡ സെങ്കഡാല് കഡാത്ത്‌നാന്. 2അത്തെ അവാര് മഞ്ച് കുളുസു മേലേമ് കഡാല് മേലേമ് നഡാന്ത് മോസ്യോഡ എ്ണേന്ത് അയാള് കയിക്കഡി ഇന്താര്. 3സാമി കൊഡുത്ത ഒന്റേ തീനിത്തെ അവാര് തിന്റാദ്, 4ഒന്റേ നീര്‌ത്തെ അവാര് കുഡിത്താദ്. അറേലിന്ത് സാമി അദിസ്യത്തോഡ ബര്‌സ്സ്‌ന ഒന്റേ നീര്‌ത്തെ അവാര് കുഡിത്താദ്. അവാരോഡൊപ്പ ബന്ത ക്‌റ്‌സ്‌ത്ത്‌ന കാട്ടുവാദ്‌ത്തെ അയി അറെ. 5എന്റാല്‌മ് അവാര്‌ല് മുക്കാബാസി ആള്‌ഗാള്‌മ് സാമിക്ക് പിര്യപ്‌ഡിക്കുവ ദിന്‌സ്‌ല് പെ്ളേക്കാലെ. അദ്‌നാലെ സാമി അവാര് സാവുഗാള്‌ന ബെ്ട്ടെകാഡ്‌ല് താനെ ഇലാസി തള്ള്‌നാന്.
6ഈ കാര്യ നമ്മ കണ്ട് പഡിക്ക്യ ബേ്ണ്ടിത്തെ നഡാന്താദ്. എന്ത്‌ക്കെന്റ് സൊന്ന അവാര് കെ്ട്ട ആസെപഡി നഡാന്ത പാസെ നമ്മാമ് കെ്ട്ട ആസെപഡി നഡാക്കാദെ ഇര്‌ക്ക്യ ബേ്ണ്ടിത്തെ. 7<<ജനഗാള് തിന്ന്യാമ് കുഡിക്ക്യാമ് കുക്കാന്ത് നലിന്ത് പമ്പാലിക്ക്യ ഇ്ളാഗ്‌നാര്>>#പയണ 32:6 എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്കുവ പാസെ നിമ്മാമ് അത്തവാള്‌ഗാള്‌ന പാസെ സെലേന കുമ്മുഡുന്റവാര് ആഗദേന്. 8അവാര്‌ല് ലേസ ആള്‌ഗാള് സിക്കാട്ട്‌ക്കിക്കി നഡാന്ത പാസെ നിമ്മാമ് സിക്കാട്ട്‌ക്കിക്കി നഡാക്കാദേന്. ഇത്തെ ഗേന്താദ്‌നാലെ അവാര്‌ല് ഇരുവത്തി മൂണായിര ആള്‌ഗാള് ഒന്റേ നാള് സത്ത് കൊട്ടുനാരല്ല. 9ആണ്ടവാന് ദെ്ണ്ടിക്കമാട്ടാന് എന്റ് നെനേത്ത് മറിസി മറിസി പാവ ഗേന്ത് ആണ്ടവാന്‌ന സോദണെ ഗേന്ത് അവാര് പാമ്പ് കൊത്തി സത്ത് തള്ള്‌നാരല്ല. അദേപാസെ നമ്മാമ് ആണ്ടവാന്‌ന സോദണെ ഗേയ പാങ്കില്ലെ. 10അവാര്‌ല് ലേസ ആള്‌ഗാള് സാമിന സൊല്ലി ങ്കൊറുങ്കൊറുത്താദ്‌നാലെ അളിക്കുവ ദൂദാന് ബന്ത് അവാര്‌ന അളിത്താനല്ല. അദേപാസെ നിമ്മാമ് ങ്കൊറുങ്കൊറുക്കദേന്.
11അവാര് പെ്ളേപ്പ്‌ല് നഡാന്ത ഈ കാര്യഗാള് നമാക്ക് കണ്ട് പഡിക്ക്യ മുഡിമ്. ഉലഗ അളിവ ഈ കഡേസി കാലാത്ത്‌ല് പെ്ളേക്കുവ നമ്മാമ് ബുദ്ദി പഡിക്ക്യാത്തെ ഇദ്‌ന എ്ള്‌ദി ബെത്ത്‌റ്‌ക്കുവാദ്. 12അദ്‌നാലെ നമ്പിക്കേല് ഒറേപ്പുള്ളവാന് ആയിര്‌ക്ക്‌ന്റെ എന്റ് നെനേക്ക്‌ന്റവാന് അദേ പാവഗാള്‌ക്ക് സിക്കാദിര്‌ക്ക്യ നോഡി കൊള്ളുഡൊ. 13പൊദുവുലു മന്‌സാര്‌ഗാള്‌ക്ക് ബരുവ സോദണെഗാള്‌ത്തെ നിമാക്ക് ബന്ത്‌ദ്. നിമാക്ക് താങ്ക്യ മുഡ്യാത്തത്ത്‌റ സോദണെ ബര്യ സാമി ബ്‌ഡമാട്ടാന്. എന്ത്‌ക്കെന്റ് സൊന്ന സാമി നമ്പ്യ മുഡിന്റവാന്‌ത്തെ. നിമാക്ക് സോദണെ ബര്‌ഗാട്ടി അദ്‌ന താങ്കി തപ്പിസി കഡാക്ക്യ സാമി നിമാന ബിലപഡുസുവാന്.
ആണ്ടവാന് മേസെ
14അദ്‌നാലെ എനാക്ക് മെച്ച്‌പ്‌ഡിത്തവാരെ, സെലെഗാള്‌ന കുമ്മുഡുവാദ്‌ന തള്ളി ഓഡുനു. 15നിമ്മ അറുവുമു ബുദ്ദിമ് ഉള്ളവാര് എന്റ് നെനേത്ത് നാന് നിമാക്ക് സൊന്റെ, നാന് സൊല്ലുവാദ് എന്തെന്റ് നിമ്മ ഓസണെ മാഡി നോഡുനു. 16നമ്മ സാമിക്ക് നണ്ണി സൊല്ലി ആണ്ടവാന് സെമ്പ്‌ലിന്ത് കുഡിക്കാട്ടി ക്‌റ്‌സ്‌ത്ത് തന്ന് സോരെനാലെ ഗേന്ത് തന്ത കാര്യാക്ക് നമ്മ പങ്ക്‌ഗാറാര് ആന്റാമല്ല? നമ്മ ആണ്ടവാന് മാറ്റഡെന മുറുക്കാട്ടി ക്‌റ്‌സ്‌ത്ത് തന്ന് സരിഗലാത്ത്‌ല് ഗേന്ത് തന്ത കാര്യാക്ക് നമ്മ പങ്ക്‌ഗാറാര് ആന്റാമല്ല? 17നമ്മ മുറുത്തു തിന്നുവ ആണ്ടവാന് മാറ്റഡെ ഒന്റുത്തെ. നമ്മ എല്ലാവാര്‌മ് അയി ഒന്റേ അഡേന പങ്കി തിന്നുവാദ്‌നാലെ പല ആള്‌ഗാള് ആയിര്‌ക്കുവ നമ്മ ഒന്റു സരിഗല ആന്റാമ്.
18ഇസ്‌റവേല്‌ഗാറാര് സട്ട്‌മെ്ട്ട്‌ന നെനേത്ത് നോഡുനു: പലി കൊഡുക്കുന്റവാര്‌മ് പലി കൊഡുക്കുവ മദ്‌ല്‌ല് ഗിലാസ ഗേന്റവാര്‌മ് പലി കൊഡുത്ത തീനിന തിന്റ് അദ്‌ക്ക് പങ്ക്‌ഗാറാര് ആന്റാരല്ല? 19നാന് സൊല്ലുവാദ് എന്ത്? സെലേക്ക് മേല്‌സ ബെത്ത ജാദിനഗൊ ഇല്ലെ സെലെഗാള്‌നാഗൊ നാന് മുക്ക്യമാനാദ് എന്റേന? 20ഇല്ലെഗേ ഇല്ലെ, എഗുദാരല്ലാത്ത ജാദിഗാള് പലി കൊഡുക്കുവാദ് സാമിക്കല്ല, സാമ്യല്ലാത്ത ബൂദഗാള്‌ക്ക്‌ത്തെ. ആന നിമ്മ സാമ്യല്ലാത്ത ബൂദഗാള്‌ക്ക് കൂട്ടു എ്ണേന്റവാര് ആയ എനാക്ക് മനേസ്സില്ലെ. 21നിമ്മ ഒന്റേ സമ്യ ആണ്ടവാന് സെമ്പ്‌ലിന്ത്‌മ് ബൂദഗാള് സെമ്പ്‌ലിന്ത്‌മ് കുഡിക്ക്യ പാങ്കില്ലെ. ആണ്ടവാന് ബിര്‌ന്ത്‌ക്ക്‌മ് ബൂദഗാള് ബിര്‌ന്ത്‌ക്ക്‌മ് നിമ്മ പങ്ക്‌ഗാറാര് ആയ പാങ്കില്ലെ. 22നമ്മ ആണ്ടവാന്‌ന മൊനെപഡ്‌സ്‌ന്റാമ? അവാന്‌ന ബ്‌ഡ ദൊഡ്ഡവാരെന്റ് നമ്മ നെനേക്ക്‌ന്റാമ?
എല്ലാമ് സാമി മദ്‌പ്പ്‌ക്ക് ബേ്ണ്ടി ഗേന്
23<<എനാക്ക് എന്ത് ഗേയാമ് തഡേസ ഇല്ലെ>> എന്റ് നിമ്മ സൊല്ലന്റുറു. ആന <<എല്ലാമ് നിമാക്ക് നല്ലാദല്ല>> എന്റ് നാന് സൊല്ലുവെ. <<എനാക്ക് എന്ത് ഗേയാമ് തഡേസ ഇല്ലെ>> എന്റ് നിമ്മ സൊല്ലുന്റുറു. ആന നിമാക്ക് അദെല്ല ഉവഗരപഡമാട്ട. 24ഒന്റൊന്റാള്‌മ് അവനവാന്‌ക്ക് നല്ലാദ് കെ്ഡേക്കുവ കാര്യന താനെ നോഡാദെ അഡ്‌ത്തവാര്‌ക്ക്‌മ് നല്ലാദ് കെ്ഡേക്കുവ കാര്യഗാള് ഗേയ നോഡുഡൊ.
25സന്തെകഡേക്ക്‌റാഗ ബാങ്ക്യ കെ്ഡേക്കുവ ഏദ് തീനിനാമ് നിമ്മ തിന്ന്‌ല. അദ് മേല്‌സ ബെത്താദൊ അല്ലാത്താദൊ എന്റ് സന്തേഗപഡബേ്ഡ. 26എന്ത്‌ക്കെന്റ് സൊന്ന <<ബൂമിമ് ബൂമില് ഇര്‌ക്കുവാദൊട്ടുക്കുമു ആണ്ടവാന്‌ത്ത്‌ത്തെ>>#സാമി പാട്ട് ബൊക്കു 24:1 എന്റ് സാമി സൊല്ലുസുലാക്കാത്ത്‌ല് എ്ള്‌ദിര്‌ക്ക്‌ന്റല്ല.
27ഏസ്സ്‌ഗാറാന് അല്ലാത്ത ഒരുത്താന് ബിര്‌ന്ത്‌ക്ക് ബ്‌ളിത്തദാന നിമാക്ക് പോയ മനേസ്സിന്തദാന പോയി നിമാക്ക് ബീറ്റി തരുവാദ് ഏദ് തീനിനാമ് നിമ്മ തിന്ന്‌ന്. അദ് മേല്‌സ ബെത്താദൊ അല്ലത്താദൊ എന്റ് മനേസ്സ്‌ല് സന്തേഗപഡാദേന്. 28എന്റാല്‌മ് ഒരുത്താന്, <<ഇദ് മേല്‌സ ബെത്താദ്>> എന്റ് നിമാക്ക് സൊന്നദാന അദ്‌ന തിന്ന ബേ്ഡ. എന്ത്‌ക്കെന്റ് സൊന്ന അദ് തിന്നുവാദ് തപ്പെന്റ് അയാള് മനേസ്സ്‌ല് നെനേക്കുവാദ്‌നാലെ അയാള്‌ന നെനേത്ത് നിമ്മ തിന്ന ബേ്ഡ. 29അദ് തപ്പെന്റ് സന്തേഗ പട്ടാദ് നിന്ന് മനേസ്സല്ല, അയാള് മനേസ്സ്‌ത്തെ. എനാക്ക് ഇര്‌ക്കുവ ഉരിമെന അഡ്‌ത്തവാര് സെര്യൊ തപ്പൊ എന്റ് സൊല്ലുവാദ് എന്ത്‌ക്ക്? 30നാന് സാമിക്ക് നണ്ണി സൊല്ലി തിന്നുവ തീനി പേര്‌ല് എനാന കെ്ട്ടവാന് എന്റ് സൊല്ല്യ ബെക്കുവാദ് എന്ത്‌ക്ക്?
31അദ്‌നാലെ നിമ്മ തിന്റാല്‌മ് കുഡിത്താല്‌മ് എന്ത് ഗേന്താല്‌മ് സെരി അദെല്ലാമ് സാമി പേര്‌പെരിമേക്ക് ബേ്ണ്ടി ഗേന്. 32എഗുദാര്‌ക്കൊ എവനഗാറാര്‌ക്കൊ സാമിഗാറാര് കൂട്ടാക്കൊ തൊന്തറെ ബര്‌സ്സാത്ത ദിന്‌സ്‌ല് നിമ്മ പെ്ളേക്ക്‌ന്റവാര് ആയിര്‌ന്. 33എനാക്ക് നല്ലാദ് കെ്ഡേക്കുവ കാര്യന പറ്റി നാന് നെനേക്കുവാദില്ലെ. അഡ്‌ത്തവാര്‌ക്ക് നല്ലാദ് കെ്ഡേക്കുവ കാര്യഗാള്‌നത്തെ നോഡുന്റെ. അത്തെ സാമി അവാര്‌ന കാപാറ്റ്യ ബേ്ണ്ടി നാന് എല്ലാ ദിന്‌സ്‌ല്‌മ് അവാര്‌ന പിര്യപഡ്‌സ്‌ന്റേനല്ല.
New Life Computer Institute