Zakharia 11
11
Ap onolot het a’bik a’ge erlagapsogo onobouwa wene
1Hat o Libanon yu o. Odouk en hagan laik nouwak oluk ho’goduk hwerik pil lak o.
2Hat e sin yu o. Sin cemara modok ’get a’ge ano e nil lasulat, orlo’buk-orlo’buk lagama re, lo’gu mariselat, his e wo’bi o basan welegep a’ge yu o. E’gelama e modok op a’ge welaga a’ge ebano erlak agama re, lo’gu marogulat, togu lemis o.
3Onodomba enagan e’ga esei a’ge nil lagaimu ebano modok erlak agama re, is domba degelonobogwi a’ge en nge togwi a’ge ebano henesa’go hologulat, ik Yordan iak petne e’gela esei a’ge huk tak a’ge ebano erlagapsogo pegesa holuk, is singa eniak loksogo il-il no’gwi a’ge ebano henesa’go hologulat, togu lemis o.
Is domba degelonobogwi a’ge enebe ’biren en tu wene
4At naik Allah en an mo’gulneselat, “Domba woru a’ge paget polik a’ge ai, degelenebiso lomup o. 5Is ap en domba ai, o’go ’belakpoluk en worogwi a’geat de, wiak togwi ai, e’gin enebam po erlakma en welat, ye, is o’go ’bal horlo a’ge ano en ogo ogulat e, nis ogo nene’gik oruak tak pagathorlogumu re Nenaik ’gain Onuk Logo a’ge wa! Oluk, ogulat togukhwe, is domba ai, degel enebisoat a’geat de, enebe nedeap po erlakma enat oruak o. 6An Allah en ogo, aphwami o ’gwiang yu pam oruak a’ge ai, pobuk mesik emin nedeap enebaik erlagat o. An en demat is-is wiaktak pagathorlogu lemagoluk tagenebasulat, is onuelak ononuk logo a’ge ene’gikmu emak oluk tagenebasulat, tikmu re, is en wiagap enebil lagaihwe, an en is ene’gikmu a’ge delenebik erlagat o,” oluk, Allah enat mo’gulnesi o.
7Mo’gulnosoam, an en is domba o’go ’balogo woru a’ge paget polik a’ge ano, degelenebil denaga legi o. Degelenebil denagalat, domba degelonobogwi a’ge wa’gun ’biren wegirik, mesik onuk, enede en wogontogwi a’ge, oluk tualiselat, ye, mesik onuk, emin hwedik togwi a’ge, oluk tualiselat, takpoluk, wogonoboluk denaga laga.
8Wogonoboluk denagalat, dugwi mesik arat takpoluk, mesik pelelak a’ge pam is domba degelonobogwi a’ge enebe henagan eriano lebik enebegi o. Lebik enebasuam, is domba eriano en an ’gwelaknio enebit oruak a’ge entegistik, mesik emin degelonobu a’ge nebit ago en e, 9is mo’gulentasulat, “An en mesik emin degel honobu nebitmu re, warom holuk waragalat, henebe erlak om holuk erlak agalat, togu lemis o. Ye, is pema ’bulogo ugonobo a’ge ebano ene at mesik einnyo nasulat, at mesik einnyo nasulat togu lemak o,” oluk, mo’gulentegis.
10Mo’gulentegistik, nua’gun onuk, enebe nede en wogentasu a’ge, ano wogo poluk, “Di aphwami yu aphwami ’berlegat enemin wene modok daksogo hwalogo pegi a’ge ano erlak aga o,” oluk, porlologo pegi o. 11Agauwa ai pamat porlologo pegirikmu re, is domba woru a’ge paget polik a’ge enil oruakhwe porlologo pasuam, “Yu tegei yu, re, at Allah enat tegeimu hege o,” oluk, enaluk aga.
12 #
Mat. 27:9,10 #
Mat. 26:15
Enaluk agama, an en is mo’gulentasulat, “an en henebaget yabuk taga legi a’ge o’go woknoum obat opogulat holuk, woknogulat, ye, woknum a’ge erlak op ogulat holuk, uknobogulat, tit o. Mo’gulentesimu, is en o’go uang perak we 30 nagat woknegisa.
13Woknogwiam, at Allah en an mo’gulneselat, uang ai, an nowi werikmu eba at ap ’gwiang a’ge pam sogoluak a’ge hele’giselat oruakma eba, ’gwelebak pei lak o,” oluk, mo’gulnosoam, yabuk taga legi a’ge o’go uang weiyat we perak a’ge 30 woknegisa a’ge ano, woluk at Allah owi werikmu ap ’gwiang a’ge pam sogoluak hele’giselat oruakma ebano ’gwelebak pei legi.
14Asogo tegistik, wa’gun mesik onuk, emin hwedik togwi a’ge, ano wik-wok, “Is Yehuda Israel a’ge enemin, ede hwedik a’ge ano erlak aga o,” oluk, porlologo pegi.
15-16Porlologo pasuam, at Allah en an mo’gulneselat, “Agauwa yogodak yu pamat an en ap domba degelnenebiso a’ge mesik an neiyagai o yema welagai a’ge ebano degelnenebiselat, domba erlak agai a’ge holuk pobirak enebasulat, enemalik nal agai holuk pal enebiselat, eniebil ago holuk het tagenebasulat, enebe op wolom a’ge paget opsogo eiyerak enebasulat, tu erlakma en domba esei oruak a’ge holuk wusogo nasulat, onoyuk osogop emin nak ’gorlologo poluk, nasulom a’ge edikpaikmu re, is ap domba demat opsogo degelonobogwi erlak a’ge ’gela’ge otluk, til lasu lomup o.
17Ap domba opsogo degelonobu erlakma en ukpoluk, lebago ai, we almasogoat oruakma re, ebe nede o! wa’gun pam at e’gik poloksogo woruama re, e’gik sebi agalat, il ’bekhit akhit worogwiam e, il modok ’gorlu agalat, tuak o,” oluk, an mo’gulnesi o.
