ᑎᐱᑦ ᐅᓂᑭᒧᐅᓇ 132
132
1ᑎᐸᔨᒋᒐᓱᐤ, ᒋᔅᒋᑐᐤ ᑎᐱᑦ, ᑭᔭ ᒥᓯᐛ ᐅᒪᒂᔨᑎᒧᐅᓇ᙮
2ᑲᒋ ᐃᓯ ᒋᒋ ᐃᑕᑦ ᑎᐸᔨᒋᒐᓱᐛ,
ᑭᔭ ᐊᒋ ᓇᔅᑯᒥᒪᑦ ᑲ ᓱᐧᑲᑎᓯᔨᒋ ᐅᒋᓴᒪᓂᑐᒥᔪᐛ ᒐᑭᐸ:
3“ᒐᔅᑎᓇᔅ ᓇᒪᐎᔾ ᓂᑭ ᐱᒐᓐ ᐊ ᒥᒋᐛᐳᐅᒡ ᓂᒡ,
ᓇᒪ ᑭᔭ ᓂᓂᐸᐅᓂᒡ ᓂᑭ ᐃᑐᑕᓐ;
4ᓇᒪᐎᔾ ᓂᑭ ᓂᐸᒪᑕᓐ ᓂᔅᒋᓯᒂ,
ᓇᒪ ᑭᔭ ᓂᑭ ᓯᐸᔭᔨᑕᓐ;
5ᐸᑎᒪ ᒋ ᒥᔅᑭᒪᓇ ᐊᓐᑕ ᒐ ᑕᑦ ᑎᐸᔨᒋᒐᓱᐤ,
ᐊᓐᑕ ᒐ ᑕᔨᒋ ᑲ ᓱᐧᑲᑎᓯᔨᒋ ᐅᒋᓴᒪᓂᑐᒪ ᐃᔅᕋᐃᓪ᙮”
6ᐛᐸᑎᒥᒄ, ᓂᒋ ᐸᑕᓇᓐ ᐊᑉᕋᑕᐃᒡ;
ᓂᒋ ᒥᔅᑲᓇᓐ ᑕᐧᑯᑕᒥᑎᓐ᙮
7“ᓂᑭ ᐱᑐᒐᐛᓇᓐ ᐅᒥᒋᐛᐱᒥᒡ;
ᓂᑭ ᐊᔭᒥᐊᔅᑎᒺᓇᓐ ᐅᑕᐧᑯᔅᑲᒋᑭᓐ᙮
8ᐱᓯᑯᐤ, ᐅᑎᐸᔨᒋᒐᓱᐤ, ᒋᑦ ᐊᔽᐳᐅᓂᒡ;
ᒋᔾ ᑭᔭ ᒋ ᒥᔅᑯᐅᓯᐅᓐ ᐅᑦ ᐊᕐᑯᒻ᙮
9ᐊᑯᔅ ᒋᐱᔅᑎᓂᒐᐅ-ᐃᔨᒥᒡ ᒋᑭ ᐎᔭᑎᒧᒡ ᑯᐃᔅᑯᑕᑎᓯᐅᓂᔪᐤ;
ᑭᔭ ᒋᐸᔭᒋᓯᒥᒡ ᒋᑭ ᒋᔄᐛᐅᒡ ᐊᑕᑈᒡ ᐊ ᒧᒋᒐᔨᑕᒡ᙮”
10ᒋᑦ ᐊᑐᔅᒐᔭᑭᓐ ᑎᐱᑦ ᐅᒡ,
ᐊᑲᐎᔾ ᒂᔅᒋᓂᒻ ᐅᑕᔅᑎᒥᐧᒄ ᒋᑦ ᐊᐱᒋᐊᑭᓐ᙮
11ᑎᐸᔨᒋᒐᓱᐤ ᒋ ᒋᒋ ᐃᑕᐤ ᑕᑈᐅᓂᒡ ᑎᐱᑕ;
ᓇᒪᐎᔾ ᒋᑭ ᒂᔅᒐᔨᑎᒻ;
“ᒋᔭᒡ ᒐ ᐅᒋᐱᔨᒡ ᓂᑭ ᐅᐛᔨᐱᐊᐤ ᒋᒋᓴᐅᒋᒪᐤ ᑕᑎᐳᐛᑭᓂᒡ᙮
12ᐃᔅᐱᔅ ᒋᑦ ᐊᐛᓯᒥᓯᒡ ᑭᓄᐛᔨᑕᒂᐛ ᓂᓂᔅᑯᒥᑐᐅᓂᔪᐤ,
ᑭᔭ ᓂᑎᐸᒋᒧᐅᓂᔪᐤ ᒐ ᒋᔅᑯᑎᒧᐅᒂᐤ;
ᐅᑦ ᐊᐛᓯᒧᐛᐛ ᐊᓯᒡ ᒋᑭ ᐊᐱᔪᐛ ᒋᒋᓴᐅᒋᒪᐅ-ᑕᑎᐳᐛᑭᓂᒡ ᑲᒋᒡ᙮”
13ᐛᔅ ᑎᐸᔨᒋᒐᓱᐤ ᒋ ᐅᐛᔭᐸᑎᒻ ᓴᐃᔭᓂᔪᐤ:
ᒋ ᓂᑐᐛᔨᑎᒻ ᐊᓐᑕ ᒐᒋ ᐎᒋᑦ᙮
14“ᐊᐅᒄ ᐅ ᓂᑦ ᐊᔽᐳᐅᓐ ᒧᓯᓇᐤ:
ᐅᑕ ᓂᑭ ᑕᓐ; ᐛᔅ ᓂ ᓂᑐᐛᔨᑕᓐ᙮
15ᒥᔅᑎᐃ ᓂᑭ ᒥᔽᒋᑎᒺᓐ ᐅᒥᒋᒻ:
ᓂᑭ ᒋᔅᐳᐃᒪᐛ ᐅᒋᔅᑎᒪᒋᓯᒪ ᐸᒂᓯᑭᓇ ᐅᒡ᙮
16ᑭᔭ ᐱᒪᒋᐃᐛᐅᓂᔪᐤ ᓂᑭ ᒋᔅᑭᒧᑎᔨᒪᐛ ᐅᐱᔅᑎᓂᒐᐅ-ᐃᔨᒪ:
ᑭᔭ ᐅᐸᔭᒋᓯᒪ ᒋᑭ ᒋᔄᐛᔪᐛ ᐊᑕᑈᔨᒋ ᐊ ᒧᒋᒐᔨᑎᒥᔨᒋ᙮
17ᐊᑯᑕ ᒐ ᐃᑐᑎᒪᓐ ᐅᑦ ᐊᔅᑭᓐ ᑎᐱᑦ ᒐᒋ ᓴᒋᓂᑕᐅᒋᓂᔨᒡ:
ᓂᑭ ᐎᔨᔅᑎᒧᐛᐤ ᐛᔅᑕᓂᐱᒪᑭᓂᔪᐤ ᓂᑐᒥᔅᑯᓂᑭᓐ᙮
18ᐊᓂᔭ ᑲ ᐛᐧᑲᑎᑯᑦ ᓂᑭ ᒋᔅᑲᒧᑎᔨᒪᐛ ᓴᒂᔨᒧᐅᓂᔪᐤ;
ᒪᒃ ᐎᔾ ᐅᔅᑎᒂᓂᒡ ᐅᒋᓴᐅᒋᒪᐅᑯᓂᔎᐅᓐ ᒋᑭ ᒥᔪᓇᑯᓂᔪᐤ᙮”
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada