ᑎᐱᑦ ᐅᓂᑭᒧᐅᓇ 119
119
Psalm 119:1-8 (Proper-26 Year B)
1
1ᓱᐛᔨᑕᑯᓱᐅᒡ ᐊᓐᒡ ᑲ ᐸᔭᒋᓯᒡ ᒪᔅᑭᓇᒡ,
ᑲ ᐱᒧᑕᑎᒺᒡ ᐅᐎᓱᐛᐅᓂᔪᐤ ᑎᐸᔨᒋᒐᓱᐛ᙮
2ᓱᐛᔨᑕᑯᓱᐅᒡ ᐊᓐᒡ ᑲ ᑭᓄᐛᔨᑎᒺᒡ ᐅᑎᐸᒋᒧᐅᓂᔪᐛ,
ᑭᔭ ᑲ ᓇᓂᑐᐛᔨᒪᒡ ᒥᓯᐛ ᐅᑕᐃᐛᐛᒡ᙮
3ᓇᒪ ᑭᔭ ᒥᒐᑎᓯᐅ-ᐃᑐᐅᒡ:
ᐱᒧᑕᑎᒺᐅᒡ ᐅᑦ ᐃᓯᑥᐅᓂᔪᐛ᙮
4ᔅᒋ ᐃᑎᓱᐛᓯᓇᓐ ᐃᔭᒂ
ᒐᒋ ᑭᓄᐛᔨᑎᒪᒡ ᒋᑭᒐᔅᒋᒧᐛᐅᓇ᙮
5ᐅ ᑭᒪ ᓂᑦ ᐃᓯᑥᐅᓇ ᒋ ᒋᔅᒋᓄᑕᐃᑯᔭᓐ
ᒐᒋ ᑭᓄᐛᔨᑎᒪᓐ ᒋᑦ ᐃᑎᓱᐛᐅᓇ !
6ᐊᑯ ᒪᒃ ᒐ ᐊᑲ ᓴᒂᔨᒧᔭᓐ,
ᐃᔅᐱ ᒋᔅᑕᔨᑎᒪᓇ ᒥᓯᐛ ᒋᐎᓱᐛᐅᓇ᙮
7ᒋᑭ ᒪᒥᒋᒥᑎᓐ ᐊ ᑯᐃᔅᑯᑕᐊᔭᓐ,
ᐃᔅᐱ ᒋ ᒋᔅᒐᔨᑎᒪᓇ ᒋᑯᐃᔅᑯᑕᑎᓱᐎ-ᑎᐸᔅᑯᓂᒐᐅᓇ᙮
8ᓂᑭ ᑭᓄᐛᔨᑕᓐ ᒋᑦ ᐃᑎᓱᐛᐅᓇ:
ᐅ ᐊᑲᐎᔾ ᒋᒋᐛ ᐛᐱᓂ᙮
2
9ᑕᓐᑕ ᒐᒋ ᐅᒋ ᐸᔭᒋᑕᑦ ᐅᔅᒋᓂᒋᓱᐤ ᐅᑦ ᐃᓯᑥᐅᓐ ?
ᐊ ᐃᔭᒂᒥᓯᑦ ᐊ ᐃᔅᒋᔄᒥᑭᓂᔨᒡ ᒋᑦ ᐃᔨᒧᐅᓂᔪᐤ᙮
10ᒥᓯᐛ ᓂᑕᐃᒡ ᔅᒋ ᐅᒋ ᓇᓂᑐᐛᔨᒥᑎᓐ:
ᐅ ᐊᑲᐎᔾ ᓇᐊᔨᒥ ᒐᒋ ᐅᓂᒥᑎᒪᔭᓐ ᒋᐎᓱᐛᐅᓇ ᐅᒡ᙮
11ᒋᑦ ᐃᔨᒧᐅᓐ ᓂᒋ ᑲᑕᓐ ᓂᑕᐃᒡ,
ᒐ ᐊᑲ ᒋ ᒥᒋᑐᑕᑕᓐ᙮
12ᒋ ᓱᐛᔨᑕᑯᓯᓐ, ᐅ ᑎᐸᔨᒋᒐᓱᐤ:
ᒋᔅᑭᑎᒧᐎ ᒋᑦ ᐃᑎᓱᐛᐅᓇ᙮
13ᓂᑐᓂᒡ ᓂᒋ ᐅᒋ ᐎᑕᓐ
ᒥᓯᐛ ᑎᐸᔅᑯᓂᒐᐅᓇ ᒋᑐᓂᒡ ᑲ ᐅᒋᐱᔨᒋ᙮
14ᓂᒋ ᒥᔽᔨᑕᓐ ᐊ ᐃᑎᔅᑕᒋ ᒋᑎᐸᒋᒧᐅᓇ,
ᐃᔅᐱᔅ ᒥᓯᐛ ᐛᔪᑎᓯᐅᓇ᙮
15ᓂᑭ ᒪᒥᑐᓇᔨᑕᓐ ᒋᐎᓱᐛᐅᓇ,
ᑭᔭ ᓂᑭ ᒋᔅᑕᔨᑕᓐ ᒋᑦ ᐃᓯᑥᐅᓇ᙮
16ᓂᑭ ᒥᔽᔨᑎᒥᐃᓱᓐ ᒋᑦ ᐃᑎᓱᐛᐅᓇ ᐅᒡ:
ᓇᒪᐎᔾ ᓂᑭ ᐅᓂᒋᔅᒋᓯᓐ ᒋᑦ ᐃᔨᒧᐅᓐ᙮
3
17ᒋᓴᐛᑐᑐᐤ ᒋᑦ ᐊᑐᔅᒐᔭᑭᓐ,
ᒐᒋ ᐱᒪᑎᓯᔭᓐ, ᑭᔭ ᒐ ᑭᓄᐛᔨᑎᒪᓐ ᒋᑦ ᐃᔨᒧᐅᓐ᙮
18ᐸᔅᒋᑕᓇ ᓂᔅᒋᓯᒂ, ᒐᒋ ᐛᐸᑎᒪᓐ
ᒪᒥᔅᑲᒡ ᒐᒂᓇ ᒋᐎᓱᐛᐅᓂᒡ ᐅᒋ᙮
19ᓂ ᒪᓐᑕᐅᓐ ᐊᔅᒋᒡ:
ᐊᑲᐎᔾ ᑲᑐᐎ ᒋᑦ ᐃᑐᓱᐛᐅᓇ᙮
20ᓂᑦ ᐊᒐᐧᒄ ᐱᑯᐱᔪᐤ
ᐊ ᐃᔅᐱᔅ ᒋᐛᓴᔨᑕᐧᒃ ᒋᑎᐸᔅᑯᓂᒐᐅᓇ᙮
21ᔅᒋ ᒋᔅᑐᑕᐅᒡ ᐅᒋᔅᑕᔨᒧᐅᒡ ᑲ ᒥᒐᒋᒥᒡ,
ᑲ ᐛᓂᒥᑎᒪᒡ ᒋᑦ ᐃᑎᓱᐛᐅᓇ ᐅᒡ᙮
22ᒥᑕᒂᓇᒧᐎ ᒋᑐᓱᐛᐅᓐ ᑭᔭ ᒪᔭᔨᒐᐅᓐ;
ᐛᔅ ᓂᒋ ᑭᓄᐛᔨᑕᓐ ᒋᑎᐸᒋᒧᐅᓇ᙮
23ᐅᒋᒪᐅᒡ ᑭᔭ ᐊ ᐊᐱᒡ ᓂᒋ ᒪᒋ ᐃᑎᑯᒡ;
ᒪᒃ ᒋᑦ ᐊᑐᔅᒐᔭᑭᓐ ᒋ ᒪᒥᑐᓇᔨᑎᒻ ᒋᑦ ᐃᑎᓱᐛᐅᓇ᙮
24ᒋᑎᐸᒋᒧᐅᓇ ᐊᓯᒡ ᓂ ᒥᔽᔨᑎᒥᐃᑯᓐ;
ᑭᔭ ᓂ ᑭᒐᔅᒋᒥᑯᓐ᙮
4
25ᓂᑦ ᐊᒐᐧᒄ ᐸᓴᑯᒧᐤ ᐊᓯᔅᒋᒡ:
ᐱᒪᒋᐃ ᐊ ᐃᔅᒋᔄᒥᑭᒡ ᒋᑦ ᐃᔨᒧᐅᓐ᙮
26ᓂᒋ ᐎᑕᓐ ᓂᑦ ᐃᓯᑥᐅᓇ, ᔅᒋ ᐸᑐᐅᓐ ᒪᒃ:
ᒋᔅᑭᑎᒧᐎ ᒋᑦ ᐃᑎᓱᐛᐅᓇ᙮
27ᓂᔅᑐᑎᒥᐃ ᐊ ᐃᔅᒋᔄᒥᑲᒋ ᒋᑭᒐᔅᒋᒧᐛᐅᓇ:
ᐊᑯ ᒐ ᐊᔨᒧᑎᒪᓐ ᒋ ᒪᒥᔅᑲᒡ ᐊᑐᔅᒐᐅᓇ᙮
28ᓂᑦ ᐊᒐᐧᒄ ᑎᒋᓱᐤ ᐊᔅᐱᔅ ᑯᓯᑯᒪᒋᐅᔭᓐ:
ᒥᔅᑯᐅᓯᐃ ᐊ ᐃᔅᒋᔄᒥᑭᒡ ᒋᑦ ᐃᔨᒧᐅᓐ᙮
29ᐃᒐᓇᒧᐎ ᑭᑭᒋᔭᐎ ᐃᓯᑥᐅᓐ;
ᑭᔭ ᒋᓴᐛᑎᓯᐅᓂᒡ ᐸᒋᑎᓇᒧᐎ ᒋᑦ ᐃᑎᓱᐛᐅᓐ᙮
30ᓂᒋ ᐛᐛᔭᐸᑕᓐ ᑲ ᑕᑈᒥᑲᒡ ᐃᓯᑥᐅᓐ:
ᒋᑎᐸᔅᑯᓂᒐᐅᓇ ᓂᒋ ᐎᔨᔅᑎᒪᓱᓐ᙮
31ᓂᒋ ᒋᓯᑕᓐ ᒋᑎᐸᒋᒧᐅᓇ:
ᐅ ᑎᐸᔨᒋᒐᓱᐤ, ᐊᑲᐎᔾ ᓴᒂᔨᒧᐃ
32ᓂᑭ ᐱᒥᐸᑕᓐ ᐊ ᐃᔅᒋᔄᒥᑲᒋ ᒋᑦ ᐃᑎᓱᐛᐅᓇ,
ᐃᔅᐱ ᒥᓯᑕᔨᓇ ᓂᑕᐃ᙮
5
33ᒋᔅᑭᑎᒧᐎ, ᐅ ᑎᐸᔨᒋᒐᓱᐤ ᐊ ᐃᔅᒋᔄᒥᑲᒋ ᒋᑦ ᐃᑎᓱᐛᐅᓇ;
ᐊᑯ ᒐ ᑭᓄᐛᔨᑎᒪᓐ ᐊ ᔎᔭᒡ ᐃᔅᐱᔅ᙮
34ᒥᔨ ᓂᔅᑐᑎᒧᐅᓐ, ᐊᑯ ᒐ ᑭᓄᐛᔨᑎᒪᓐ ᒋᐎᓱᐛᐅᓐ;
ᓂᐦᐃ, ᓂᑭ ᓇᑭᑐᐛᔨᑕᓐ ᒥᓯᐛ ᓂᑕᐃᒡ᙮
35ᑐᑐᐎ ᒐᒋ ᒥᑎᒪᔭᓐ ᒋᐎᓱᐛᐅᓇ;
ᐛᔅ ᐊᐅᒄ ᐊᓐ ᑲ ᒥᔽᔨᑎᒪᓐ᙮
36ᐃᑎᔅᑕ ᓂᑕᐃ ᒋᑎᐸᒋᒧᐅᓂᒡ ᐃᓯ,
ᐊᑲ ᒪᒃ ᒧᔅᑕᓇᒪᒐᐅᓂᒡ ᐃᓯ᙮
37ᒂᔅᒋᓇ ᓂᔅᒋᓯᒂ ᒐ ᐊᑲ ᒋ ᐛᐸᑎᒪᓐ ᒥᒋ ᒐᒂᓇ;
ᒋᓯᐎᓯᐃ ᒪᒃ ᒋᑦ ᐃᓯᑥᐅᓂᒡ᙮
38ᐊᔨᒋᑎᒧᐤ ᒋᑦ ᐃᔨᒧᐅᓂᔪᐤ ᒋᑦ ᐊᑐᔅᒐᔭᑭᓐ,
ᑲ ᐱᔅᑎᓂᑎᓱᑦ ᒋᓇᓂᒋᔅᑕᑯᓯᐅᓂᒡ᙮
39ᐃᒐᓇ ᓂᔅᑐᑎᑯᓯᐅᓐ ᑲ ᑯᔅᑎᒪᓐ;
ᐛᔅ ᒋᑎᐸᔅᑯᓂᒐᐅᓇ ᒥᔽᓯᐛ᙮
40ᐛᐸᑕ, ᓂᒋ ᐱᒂᔨᑕᓐ ᒋᑭᒐᔅᒋᒧᐛᐅᓇ:
ᒋᓯᐎᓯᐃ ᒋᑯᐃᔅᑯᑕᑎᓯᐅᓂᒡ᙮
6
41ᐊᑯᔅ ᒋᒋᔅᑎᒪᒐᔨᒋᒐᐅᓇ ᓂᑭ ᐅᑎᑎᑯᓐ ᒪᒃ, ᐅ ᑎᐸᔨᒋᒐᓱᐤ,
ᒋᐱᒪᒋᐃᐛᐅᓐ ᐅᑦ, ᐊ ᐃᔅᒋᔄᒥᑭᒡ ᒋᑦ ᐃᔨᒧᐅᓐ᙮
42ᐊᑯ ᒐ ᐊᔭᔭᓐ ᒐ ᐅᒋ ᓂᔎᐅᓯᐊᒃ ᐊᓐ ᑲ ᔅᑐᓯᑦ;
ᐛᔅ ᓂ ᒪᒥᓯᑐᑕᓐ ᒋᑦ ᐃᔨᒧᐅᓐ᙮
43ᐊᑲ ᑭᔭ ᒥᑐᓐ ᐅᑎᓇ ᓂᑐᓂᒡ ᐅᒋ ᑲ ᑕᑈᒥᑲᒡ ᐃᔨᒧᐅᓐ;
ᐛᔅ ᓂᒋ ᐊᔅᐸᔨᒧᑕᓐ ᒋᑎᐸᔅᑯᓂᒐᐅᓇ᙮
44ᐊᑯ ᒐ ᑭᓄᐛᔨᑎᒪᓐ ᒋᑦ ᐃᑎᓱᐛᐅᓐ
ᒧᔅ ᑲᒋᒡ ᑭᔭ ᑲᒋᒡ᙮
45ᓂᑭ ᐱᒧᑕᓐ ᒪᒃ ᑎᐸᔨᒥᓱᐅᓂᒡ;
ᐛᔅ ᓂ ᓇᓂᑐᐛᔨᑕᓐ ᒋᒋᔅᑯᑎᒪᒐᐅᓇ᙮
46ᓂᑭ ᐊᔨᒧᑕᓐ ᒋᑎᐸᒋᒧᐅᓇ ᑭᔭ ᐅᑎᔅᑯᐤ ᒋᓴᐅᒋᒪᐅᒡ,
ᓇᒪ ᑭᔭ ᓂᑭ ᓴᒂᔨᒧᓐ᙮
47ᓂᑭ ᒥᔽᔨᑎᒥᐃᑎᓱᓐ ᒋᑦ ᐃᑎᓱᐛᐅᓇ ᐅᒡ,
ᑲ ᓴᒋᑕᔭᓐ᙮
48ᓂᑭ ᐅᐱᓂᔅᒐᔨᔅᑕᓐ ᑭᔭ ᒋᑦ ᐃᑎᓱᐛᐅᓇ ᑲ ᓴᒋᑕᔭᓐ;
ᓂᑭ ᒪᒥᑐᓇᔨᑕᓐ ᒪᒃ ᒋᑦ ᐃᑎᓱᐛᐅᓇ᙮
7
49ᒋᔅᒋ ᑲ ᐃᑎᑦ ᒋᑦ ᐊᑐᔅᒐᔭᑭᓐ,
ᐊᓐᑕ ᑲᒋ ᐅᒋ ᐊᔅᐸᔨᒧᐃᔭᓐ᙮
50ᐊᐅᒄ ᐅᒪ ᑲ ᒥᔽᔨᒧᐃᑯᔭᓐ ᐃᔭᔨᒥᐃᑯᔭᓐ ᒐᒂᓐ:
ᐛᔅ ᒋᑦ ᐃᔨᒧᐅᓐ ᓂᒋ ᒋᓱᐅᓯᐃᑯᓐ᙮
51ᑲ ᒋᔅᑕᔨᒥᓱᒡ ᓇᔅᒡ ᓂᒋ ᒥᒪᔭᔨᒥᑯᒡ:
ᐃᔭᐱᒡ ᒪᒃ ᓇᒪ ᓂ ᐅᒋ ᐳᓂᑕᓐ ᒋᑦ ᐃᑎᓱᐛᐅᓐ᙮
52ᓂᒋ ᒋᔅᒋᓐ ᐛᔅᑭᒡ ᒋᑎᐸᔅᑯᓂᒐᐅᓇ, ᐅ ᑎᐸᔨᒋᒐᓱᐤ;
ᓂᒋ ᒥᔽᔨᒧᐃᓱᓐ ᒪᒃ᙮
53ᑯᔅᑕᒋᐅᓐ ᓂᒋ ᐅᑎᑎᓂᑯᓐ,
ᐅᒥᒋᑥᐅᒡ ᐅᒋ ᑲ ᐛᐱᓇᒡ ᒋᐎᓱᐛᐅᓂᔪᐤ᙮
54ᒋᑦ ᐃᑎᓱᐛᐅᓇ ᓂᒋ ᐅᓂᑭᒧᓐ
ᓂᐱᒥᐱᒋᐅᒋᐛᐱᒡ᙮
55ᓂᒋ ᒋᔅᒋᓐ ᒋᑦ ᐃᓯᓂᐧᑲᓱᐅᓐ, ᐅ ᑎᐸᔨᒋᒐᓱᐤ, ᒪᒂᒡ ᐊ ᑎᐱᔅᑲᒡ,
ᑭᔭ ᓂᒋ ᑭᓄᐛᔨᑕᓐ ᒋᐎᓱᐛᐅᓐ᙮
56ᐅᒪ ᓂᒋ ᐊᔭᓐ:
ᐊᒋ ᑭᓄᐛᔨᑎᒪᓐ ᒋᑦ ᐃᑎᓱᐛᐅᓇ᙮
8
57ᒋᔾ ᓂᑎᐱᔨᐛᐅᓯᐅᓐ ᐅ ᑎᐸᔨᒋᒐᓱᐤ:
ᓂᒋ ᐃᔅᒋᔄᓐ ᒐᒋ ᑭᓄᐛᔨᑎᒪᓐ ᒋᑦ ᐃᔨᒧᐅᓇ᙮
58ᓂᒋ ᓂᑐᑎᒪᓐ ᒋᒋᓴᐛᑎᓯᐅᓐ ᒥᓯᐛ ᓂᑕᐃᒡ;
ᒋᔅᑎᒪᒐᔨᒥ ᐊ ᐃᔅᒋᔄᒥᑭᒡ ᒋᑦ ᐃᔨᒧᐅᓐ᙮
59ᓂᒋ ᒪᒥᑐᓇᔨᑕᓐ ᓂᑦ ᐃᓯᑥᐅᓇ,
ᓂᒋ ᐃᔅᐱᔨᑕᓐ ᒪᒃ ᓂᓯᑕ ᒋᑎᐸᒋᒧᐅᓂᒡ ᐃᓯ᙮
60ᓂᒋ ᒋᐱᓐ, ᓇᒪ ᑭᔭ ᓄᒋ ᒋᐱᒋᓐ,
ᒐᒋ ᑭᓄᐛᔨᑎᒪᓐ ᒋᑦ ᐃᑎᓱᐛᐅᓇ᙮
61ᑲ ᒪᒧᐎᒡ ᐅᒪᒋᑥᐅᒡ ᓂᒋ ᒥᔅᑭᒥᑯᒡ;
ᒪᒃ ᓇᒪᐎᔾ ᓄᒋ ᐅᓂᒋᔅᒋᓐ ᒋᐎᓱᐛᐅᓐ᙮
62ᐊ ᐊᐱᑕᑎᐱᔅᑲᒡ ᓂᑭ ᐅᓂᓐ ᒐᒋ ᓂᓇᔅᑯᒥᑕᓐ,
ᒋᑯᐃᔅᑯᑕᑎᓯᐅ-ᑎᐸᔅᑯᓂᒐᐅᓇ ᐅᒡ᙮
63ᓂ ᐎᒐᐛᑭᓂᑐᐛᒡ ᒥᓯᐛ ᐊᓐᒡ ᑲ ᓇᓂᒋᔅᑕᔅᒡ,
ᑭᔭ ᐊᓐᒡ ᑲ ᑭᓄᐛᔨᑕᒡ ᒋᑦ ᐃᑎᓱᐛᐅᓇ᙮
64ᐊᔅᒋᒡ, ᐅ ᑎᐸᔨᒋᒐᓱᐤ, ᓴᑭᔅᒋᓇᐤ ᒋᓱᐛᔨᒋᒐᐅᓐ:
ᒋᔅᑯᑎᒧᐎ ᒋᑦ ᐃᑎᓱᐛᐅᓇ᙮
9
65ᔅᒋ ᒥᔪᑐᑐᐛᐤ ᒋᑦ ᐊᑐᔅᒐᔭᑭᓐ,
ᐅ ᑎᐸᔨᒋᒐᓱᐤ, ᐊ ᐃᔅᒋᔄᒥᑭᒡ ᒋᑦ ᐃᔨᒧᐅᓐ᙮
66ᒋᔅᑯᑎᒧᐎ ᒥᔪ ᑎᐸᔅᑯᓂᒐᐅᓐ ᑭᔭ ᒋᔅᒐᔨᑎᒧᐅᓐ:
ᐛᔅ ᓂᒋ ᑕᑈᑕᓐ ᒋᑦ ᐃᑎᓱᐛᐅᓇ᙮
67ᐊᒺᔭ ᐅᒋ ᒪᒂᔨᑎᒪᓐ ᓂᒋ ᐛᓂᓯᓐ;
ᐊᓄᒡ ᒪᒃ ᓂᒋ ᑭᓄᐛᔨᑕᓐ ᒋᑦ ᐃᔨᒧᐅᓐ᙮
68ᒋ ᒥᔽᑎᓯᓐ, ᒋ ᒥᔪᑐᑕᓐ ᑭᔭ:
ᒋᔅᑯᑎᒧᐎ ᒋᑦ ᐃᑎᓱᐛᐅᓇ᙮
69ᐅᒋᔅᑕᔨᒧᐅᒡ ᓂᒋ ᑭᑭᒋᔭᐛᑕᒋᒥᑯᒡ;
ᒥᒄ ᓂᑭ ᑭᓄᐛᔨᑕᓐ ᒋᐎᓱᐛᐅᓇ ᒥᓯᐛ ᓂᑕᐃᒡ᙮
70ᐅᑕᐃᐛᐤ ᐎᔨᔪᒪᑭᓂᔪᐤ ᒧᔭᒻ ᐱᒥᔾ;
ᒥᒄ ᓂᔾ ᓂ ᒥᔽᔨᑕᓐ ᒋᐎᓱᐛᐅᓐ᙮
71ᒥᔽᓱᐤ ᐊᒋ ᒪᒂᔨᑎᒪᓐ;
ᒐᒋ ᒋᔅᒐᔨᑎᒪᓐ ᒋᑦ ᐃᑎᓱᐛᐅᓇ᙮
72ᐃᑎᓱᐛᐅᓐ ᒋᑐᓂᒡ ᑲ ᐅᒋᐱᔨᒡ ᐊᔪᐛᒃ ᓂ ᒥᔪᔅᑲᑯᓐ
ᐃᔅᐱᔅ ᒥᒐᑥᐤ ᒐᓯᐱᔪᐤ ᐎᔄᐅᓱᓇᔭᒡ ᑭᔭ ᓱᓇᔭᒡ᙮
10
73ᒋᑎᒋᔭ ᓂᒋ ᐅᓯᐃᑯᓐ ᑭᔭ ᓂᒋ ᐃᓯᓇᑯᐃᑯᓐ;
ᒥᔨ ᓂᔅᑐᑎᒧᐅᓐ ᒐᒋ ᒋᔅᒐᔨᑎᒪᓐ ᒋᑦ ᐃᑎᓱᐛᐅᓇ᙮
74ᐊᓐᒡ ᑲ ᓇᓂᒋᔅᑕᔅᒡ ᒋᑭ ᓯᒋᔭᓱᐅᒡ ᐛᐱᒥᑥᐛ;
ᐊᒋ ᐊᔅᐸᔨᒧᑐᑎᒪᓐ ᒋᑦ ᐃᔨᒧᐅᓐ᙮
75ᓂ ᒋᔅᒐᔨᑕᓐ, ᐅ ᑎᐸᔨᒋᒐᓱᐤ, ᒋᑎᐸᔅᑯᓂᒐᐅᓇ ᐊ ᑯᐃᔅᑯᑕᔨᑕᒂᒋ,
ᑭᔭ ᑯᐃᔅᑯᑐᐅᓂᒡ ᐊᒋ ᒪᒂᔨᑎᒥᐃᔨᓐ᙮
76ᐊᑯᔅ, ᒋ ᐱᑯᓴᔨᒥᑎᓐ, ᒋᓱᐛᔨᒋᒐᐤ ᒋᓴᐛᑎᓯᐅᓐ ᓂᑭ ᒥᔽᔨᒧᐃᑯᓐ,
ᑲ ᐃᑎᑦ ᒋᑦ ᐊᑐᔅᒐᔭᑭᓐ᙮
77ᐊᑯᔅ ᒋ ᔪᔅᐱ ᒋᔅᑎᒪᒐᔨᒐᐅᓇ ᓂᑭ ᐅᑎᑎᑯᓐ, ᒐᒋ ᐱᒪᑎᓯᔭᓐ;
ᐛᔅ ᒋᐎᓱᐛᐅᓐ ᓂ ᒥᔽᔨᑕᓐ᙮
78ᐊᑯᔅ ᑲ ᒋᔅᑕᔨᒥᓱᒡ ᒋᑭ ᓴᒂᔨᒧᐅᒡ; ᐛᔅ ᓇᔅᒡ ᓂᑐᐎ ᓂᒋ ᑐᑕᑯᒡ:
ᒪᒃ ᓂᔾ ᓂᑭ ᒪᒥᑐᓇᔨᑕᓐ ᒋᑦ ᐃᑎᓱᐛᐅᓇ᙮
79ᐊᑯᔅ ᐊᓐᒡ ᑲ ᓇᓂᒋᔅᒡ, ᓂᑭ ᓇᑎᑯᒡ,
ᐊᓐᒡ ᑭᔭ ᑲ ᒋᔅᒐᔨᑕᒡ ᒋᑎᐸᒋᒧᐅᓇ᙮
80ᐊᑯᔅ ᓂᑕᐃ ᒋᑭ ᓱᑲᔅᑕᐤ ᒋᑦ ᐃᑎᓱᐛᐅᓂᒡ;
ᒐ ᐊᑲ ᒋ ᓴᒂᔨᒧᔭᓐ᙮
11
81ᓂᑦ ᐊᒐᐧᒄ ᒋ ᐛᐎᓴᔨᑎᒻ ᒋ ᐱᒪᒋᐃᐛᐅᓂᔪᐤ;
ᒪᒃ ᓂᑦ ᐊᔅᐸᔨᒧᑐᑕᓐ ᒋᑦ ᐃᔨᒧᐅᓐ᙮
82ᐊᔨᒥᓯᒥᑲᓇ ᓂᔅᒋᓯᒂ ᒋᑦ ᐃᔨᒧᐅᓐ ᐅᒡ,
ᐊ ᐃᔅᒋᔄᔭᓐ, “ᑕᐃᔅᐱ ᒐ ᒥᔽᔨᒧᐃᔨᓐ ?”
83ᐛᔅ ᓂ ᓂᔅᐱᑕᓐ ᐊᒂᐸᑕᒡ ᐃᓴᑯᐃ-ᐎᔭᑭᓐ,
ᐃᔭᐱᒡ ᒪᒃ ᓇᒪᐎᔾ ᓂ ᐅᓂᒋᔅᒋᓐ ᒋᑦ ᐃᑎᓱᐛᐅᓇ᙮
84ᑕᓐ ᐊᑕᑎᓂᔨᒋ ᐅᒋᓯᑲᒪ ᒋᑦ ᐊᑐᔅᒐᔭᑭᓐ ?
ᑕᐃᔅᐱ ᒐ ᑎᐸᔅᑯᓂᑥᐤ ᐊᓐᒡ ᑲ ᓂᓇᐧᑲᒋᐃᒡ ?
85ᑲ ᒋᔅᑕᔨᒥᓱᒡ ᓂᒋ ᒧᓇᐊᒪᑯᒡ ᐛᑎᑯᓇ,
ᐊ ᐊᑲ ᐃᔅᒋᔄᒥᑭᒡ ᒋᐎᓱᐛᐅᓐ᙮
86ᒥᓯᐛ ᒋᑦ ᐃᑎᓱᐛᐅᓇ ᑯᐃᔅᑯᑕᔨᑕᒂᓇ;
ᓇᔅᒡ ᓂ ᓂᓇᐧᑲᒋᐃᑯᒡ; ᐎᒋᐃ᙮
87ᒐᑲᑦ ᓂᒋ ᑯᒋᐱᔨᑯᒡ ᐊᔅᒋᒡ;
ᒪᒃ ᓇᒪᐎᔾ ᓂᒋ ᓂᑭᑕᓐ ᒋᑭᒐᔅᒋᒧᐛᐅᓇ᙮
88ᒋᓯᐎᓯᐃ ᐊᔅᐱᔅ ᓴᒋᐃᐛᐤ ᒋᓴᐛᑎᓯᔨᓐ;
ᐊᑯ ᒐ ᑭᓄᐛᔨᑎᒪᓐ ᐊᓂᔭ ᑎᐸᒋᒧᐅᓇ ᒋᑐᓂᒡ ᑲ ᐅᒋᐱᔨᒋ᙮
12
89ᑲᒋᒡ, ᐅ ᑎᐸᔨᒋᒐᓱᐤ, ᒋᑦ ᐃᔨᒧᐅᓐ ᐎᔨᔅᑕᐤ ᒋᒋᒋᓯᑯᒡ᙮
90ᒋᑯᐃᔅᑯᑐᐅᓐ ᐱᒥᐱᔪᐤ ᒥᓯᐛ ᐊ ᐊᑎ ᐊᓂᔅᒐ ᐱᒪᑎᓯᓇᓄᐅᒡ:
ᔅᒋ ᐊᔨᑎᔅᑕᓐ ᐊᔅᒋᔾ, ᑎᑯᓐ ᒪᒃ᙮
91ᑎᑯᓇ ᐊᓄᒡ ᑲ ᒋᓯᑲᒡ ᒋᔾ ᐊ ᐃᑎᓱᐛᔨᓐ;
ᐛᔅ ᒥᓯᐛ ᒋᔾ ᒋᑦ ᐊᑐᔅᒐᔭᑭᓐ᙮
92ᒥᓱᐤ ᒋᐎᓱᐛᐅᓐ ᐊᑲ ᐅᒋ ᒥᔽᔨᑎᒪᓇᒂ,
ᐊᑯ ᓂᐸ ᓂᓱᐅᓇᑎᓯᓇᐱᓐ ᓂᑦ ᐊᔨᒥᓯᐅᓂᒡ᙮
93ᓇᒪ ᓂᑕ ᓂᑭ ᐅᓂᒋᔅᒋᓐ ᒋᑭᒐᔅᒋᒧᐛᐅᓇ;
ᐛᔅ ᐊᐅᑯᓂᐃ ᑲᒋ ᐅᒋ ᐱᒪᒋᐃᔨᓐ᙮
94ᒋᔾ ᒋ ᑎᐸᔨᒥᓐ, ᐱᒪᒋᐃ;
ᐛᔅ ᓂᒋ ᓇᓂᑐᐛᔨᑕᓐ ᒋᑭᒐᔅᒋᒧᐛᐅᓇ᙮
95ᐅᒥᒋᑥᐅᒡ ᓂᒋ ᐊᔅᑲᒪᑯᒡ ᒐᒋ ᓂᓱᐅᓇᒋᐃᒡ;
ᒪᒃ ᓂᑭ ᓇᑭᑐᐛᔨᑕᓐ ᒋᑎᐸᒋᒧᐅᓇ᙮
96ᓂᒋ ᐛᐸᑕᓐ ᐊ ᐳᓂᐱᔨᒡ ᒥᓯᐛ ᒥᔽᑎᓯᐅᓐ;
ᒪᒃ ᒋᑦ ᐃᑎᓱᐛᐅᓐ ᓇᔅᒡ ᐃᔨᑭᔅᑲᐤ᙮
13
97ᐅ, ᑕᑈ ᓂ ᓴᒋᑕᓐ ᒋᐎᓱᐛᐅᓐ !
ᐊᐅᒄ ᑲ ᒪᒥᑐᓇᔨᑎᒪᓐ ᐃᔅᑭᓐ ᒋᓯᑲᐛ᙮
98ᒋᔾ ᒋᑦ ᐃᑎᓱᐛᐅᓇ ᐅᒋ ᐅᔅᑕ ᔅᒋ ᑭᒐᑕᐛᔨᑎᒥᐃᓐ ᐃᔅᐱᔅ ᐎ ᑲ ᐛᐧᑲᓯᒡ:
ᐛᔅ ᒧᔅ ᓂ ᐎᒐᐅᑯᒡ᙮
99ᐅᔅᑕ ᓂᑦ ᐅᓂᔅᑐᑎᒧᐅᓐ ᐃᔅᐱᔅ ᒥᓯᐛ ᑲ ᒋᔅᑯᑎᒧᐅᒡ:
ᐛᔅ ᒋᑎᐸᒋᒧᐅᓇ ᐊᐅᑯᓂᐃ ᑲ ᒪᒥᑐᓇᔨᑎᒪᓐ᙮
100ᐊᔪᐛᒃ ᓂ ᓂᔅᑐᑕᓐ ᐃᔅᐱᔅ ᐎᐱᒡ ᑲ ᐱᒪᑎᓯᒡ,
ᐊ ᑭᓄᐛᔨᑎᒪᓐ ᒋᑦ ᐃᔨᒧᐅᓐ᙮
101ᓂᒋ ᒋᐱᒋᑕᓐ ᓂᓯᑕ ᒥᓯᐛ ᑕᑐ ᒥᒋᑥᐅᓂᒡ ᐅᒡ,
ᒐᒋ ᑭᓄᐛᔨᑎᒪᓐ ᒋᑦ ᐃᔨᒧᐅᓐ᙮
102ᓇᒪᐎᔾ ᓄᒋ ᓂᑭᑕᓐ ᒋᑎᐸᔅᑯᓂᒐᐅᓇ;
ᐛᔅ ᒋᔾ ᔅᒋ ᒋᔅᑯᑎᒧᐅᓐ᙮
103ᑕᑈ ᓂ ᓯᐅᔅᐱᑕᓐ ᒋᑦ ᐃᔨᒧᐅᓇ !
ᓂᐦᐃ ᐅᔅᑕ ᓂ ᐎᔅᑕᓐ ᐃᔅᐱᔅ ᑲᓯᐛᓯᐛᐳᔾ᙮
104ᒋᑭᒐᔅᒋᒧᐛᐅᓇ ᐅᒋ ᓂ ᑭᔅᒋᑕᓐ ᓂᔅᑐᑎᒧᐅᓐ:
ᐊᐅᒄ ᐅᒋ ᓂ ᐛᐧᑲᑕᓐ ᒥᓯᐛ ᑕᑐᐤ ᒥᒋ ᐃᓯᑥᐅᓐ᙮
14
Psalm 119:105-112 (Proper-10 Year A)
105ᒋᑦ ᐃᔨᒧᐅᓐ ᓂᐛᔅᑕᓂᐱᒪᑭᓐ ᓂᓯᑎᒡ,
ᑭᔭ ᓂᐛᔅᑕᐅᓐ ᐊᓐᑕ ᓂᒪᔅᑭᓇᒡ᙮
106ᓂᒋ ᒋᒋ ᐃᔨᓐ, ᓂᒋ ᑎᐱᑐᑕᓐ ᒪᒃ,
ᒐᒋ ᑭᓄᐛᔨᑎᒪᓐ ᒋᑯᐃᔅᑯᑕᑎᓯᐅ-ᑎᐸᔅᑯᓂᒐᐅᓇ᙮
107ᓇᔅᒡ ᓂ ᒪᒂᔨᑕᓐ:
ᐱᒪᒋᐃᓐ, ᐅ ᑎᐸᔨᒋᒐᓱᐤ ᐊ ᐃᔅᒋᔄᒥᑭᒡ ᒋᑦ ᐊᔭᒧᐅᓐ᙮
108ᐅᑎᓇ, ᒋ ᐱᑯᓴᔨᒥᑎᓐ, ᓇᐊᔨᑎᒧᐤ ᐱᔅᑎᓂᒐᐅᓇ ᓂᑐᓂᒡ ᑲ ᐅᒋᐱᔨᒋ,
ᐅ ᑎᐸᔨᒋᒐᓱᐤ, ᒋᔅᑯᑎᒧᐎ ᒪᒃ ᒋᑎᐸᔅᑯᓂᒐᐅᓇ ᐅᒋ᙮
109ᓂᑦ ᐊᒐᐧᒄ ᒧᔅ ᓂᑎᒋᒡ ᑕᐤ;
ᐃᔭᐱᒡ ᒪᒃ ᓇᒪ ᓂ ᐅᓂᒋᔅᒋᓐ ᒋᑭᒐᔅᒋᒧᐛᐅᓐ᙮
110ᐅᒥᒋᑥᐅᒡ ᓂᒋ ᑕᐱᒂᑯᒡ;
ᐃᔭᐱᒡ ᒪᒃ ᓇᒪ ᓄᒋ ᐛᓂᒥᑎᒪᓐ ᒋᐎᓱᐛᐅᓇ ᐅᒡ᙮
111ᒋᑎᐸᒋᒧᐅᓇ ᓂᒋ ᐅᑎᓇᓐ ᑲᒋᒡ ᒐᒋ ᑎᐱᔨᐛᐅᓯᔭᓐ;
ᐛᔅ ᓂ ᒧᒋᒐᔨᑎᒧᔅᑲᑯᓐ᙮
112ᓂᒋ ᐃᑎᔅᑕᓐ ᓂᑕᐃ ᒐᒋ ᑎᐱᑐᑎᒪᓐ ᒋᑦ ᐃᑎᓱᐛᐅᓇ,
ᐱᐃᒻ ᒐ ᐊᑎ ᐃᔎᔭᒡ᙮
15
113ᓂ ᐛᐧᑲᑕᓐ ᓂᑎᐎ ᐃᑕᔨᑎᒧᐅᓇ:
ᒥᒄ ᒋᑦ ᐃᑎᓱᐛᐅᓐ ᓂ ᓴᒋᑕᓐ᙮
114ᒋᔾ ᐊᑯᑕ ᐊᓯ ᑲᓱᔭᓐ ᑭᔭ ᒋᔾ ᓂᑦ ᐅᑦ ᐊᒂᓇᐅᓱᐛᑭᓐ:
ᓂᑦ ᐊᔅᐸᔨᒧᑐᑕᓐ ᒋᑦ ᐃᔨᒧᐅᓐ᙮
115ᓂᑭᓯᒄ, ᒋᔨᐛᐤ ᑲ ᒥᒋᑐᑎᒪᒄ:
ᐛᔅ ᓂᑭ ᑭᓄᐛᔨᑎᒺᓐ ᐅᑭᒐᔅᒋᒧᐛᐅᓇ ᓂᒋᓴᒪᓂᑐᒻ᙮
116ᓯᑐᓂ ᐊ ᐃᔅᒋᔄᒥᑭᒡ ᒋᑦ ᐃᔨᒧᐅᓐ, ᒐᒋ ᐱᒪᑎᓯᔭᓐ:
ᐊᑲ ᒪᒃ ᓇᐊᔨᒥ ᒐᒋ ᓴᒂᔨᒧᔭᓐ ᓂᑦ ᐊᔅᐸᔨᒧᐅᓂᒡ ᐅᒡ᙮
117ᓯᑐᓂ, ᐊᑯ ᒐ ᐊᔨᒋᑲᐳᐅᔭᓐ;
ᑭᔭ ᒧᓯᓇᐤ ᓂᑭ ᒋᔅᑕᔨᑕᓐ ᒋᑦ ᐃᑎᓱᐛᐅᓇ᙮
118ᔅᒋ ᑕᑯᔅᑲᑕᐅᒡ ᒥᓯᐛ ᑲ ᐛᓂᒥᑎᒪᒡ ᒋᑦ ᐃᓯᑥᐅᓇ ᐅᒡ;
ᐛᔅ ᐅᑭᔭᓯᐅᓄᐛᐤ ᑭᑭᒋᔭᒪᑭᓂᔪᐤ᙮
119ᒋ ᐛᐱᓇᐅᒡ ᒥᓯᐛ ᐅᒥᒋᑥᐅᒡ ᐊᔅᒋᒡ ᒧᔭᒻ ᓯᒂᐱᔅᒋᑭᓐ:
ᐊᐅᒄ ᐅᒋ ᓂ ᓴᒋᑕᓐ ᒋᑎᐸᒋᒧᐅᓇ᙮
120ᓂᔭᔅ ᓇᓇᒥᐱᔪᐤ ᐊᔅᐱᔅ ᑯᔅᑎᑕᓐ,
ᓂ ᑯᔅᑕᓐ ᑭᔭ ᒋᑎᐸᔅᑯᓂᒐᐅᓇ᙮
16
121ᓂᒋ ᑐᑕᓐ ᑎᐸᔅᑯᓂᒐᐅᓐ ᑭᔭ ᐊ ᐃᓯ ᑯᐃᔎᒡ:
ᐊᑲᐎᔾ ᓇᑲᓯ ᒐᒋ ᒥᒋᑐᑐᐅᒡ ᑲ ᐊᔨᒥᐃᒡ᙮
122ᓂᐳᐅᔅᑎᒧᐤ ᒋᑦ ᐊᑐᔅᒐᔭᑭᓐ ᑲ ᒥᔽᓯᔨᒡ ᐅᒡ:
ᐊᑲᐎᔾ ᓇᐊᔨᒥᒡ ᐅᒋᔅᑕᔨᒧᐅᒡ ᒐᒋ ᐊᔨᒥᐃᒡ᙮
123ᓂᑦ ᐃᔅᑭᐱᓐ ᒋᐱᒪᒋᐃᐛᐅᓐ ᐊ ᐊᓯᓂᐛᑕᔭᓐ,
ᑭᔭ ᒋᑯᐃᔅᑯᑕᑎᓯᐅ-ᐃᔨᒧᐅᓐ᙮
124ᑐᑐᐤ ᒋᑦ ᐊᑐᔅᒐᔭᑭᓐ ᐊ ᐃᓯ ᓱᐛᔨᒋᒐᔨᓐ,
ᒋᔅᑯᑎᒧᐎ ᑭᔭ ᒋᑦ ᐃᑎᓱᐛᐅᓇ᙮
125ᓂᔾ ᒋᑦ ᐊᑐᔅᒐᔭᑭᓐ:
ᒥᔨ ᓂᔅᑐᑎᒧᐅᓐ, ᒐᒋ ᒋᔅᒐᔨᑎᒪᓐ ᒋᑎᐸᒋᒧᐅᓇ᙮
126ᓴᔅ ᐅᑎᒋᐱᔪᐤ, ᒋᔾ, ᑎᐸᔨᒋᒐᓱᐤ, ᒐᒋ ᐊᑐᔅᒐᔨᓐ;
ᐛᔅ ᓂᑐᐎ ᒋ ᐃᑕᔨᑕᑯᑕᐅᒡ ᒋᐎᓱᐛᐅᓂᔪᐤ᙮
127ᐊᐅᒄ ᐅᒋ ᐊᔪᐛᒃ ᓂ ᓴᒋᑕᓐ ᒋᑦ ᐃᑎᓱᐛᐅᓇ ᐃᔅᐱᔅ ᐎᔄᐅᓱᓇᔭᐱᔅᒄ;
ᓂᐦᐃ, ᐃᔅᐱᔅ ᓇᔅᒡ ᒪᔪᓯᑦ ᐎᔄᐅᓱᓇᔭᐱᔅᒄ᙮
128ᐊᐅᒄ ᐅᒋ ᓂ ᐃᑕᒋᑕᓐ ᒥᓯᐛ ᒋᑭᒐᔅᒋᒧᐛᐅᓇ ᒋᒋᐛ ᐊ ᑯᐃᔎᒋ;
ᓂ ᐛᐧᑲᑕᓐ ᒪᒃ ᒥᓯᐛ ᑕᑐ ᒥᒋ ᐃᓯᑥᐅᓐ᙮
17
129ᒋᑎᐸᒋᒧᐅᓇ ᒪᒥᔅᑲᑕᔨᑕᑯᓇ:
ᐊᐅᒄ ᐛᒋ ᑭᓄᐛᔨᑕᐧᒃ ᓂᑦ ᐊᒐᐧᒄ᙮
130ᐊ ᐱᑕᐱᔨᒋ ᒋᑦ ᐃᔨᒧᐅᓇ ᐛᔅᑕᓂᒐᒥᑭᓇ;
ᒥᔨᑯᐤ ᓂᔅᑐᑎᒧᐅᓂᔪᐤ ᐊᓐ ᐊᑲ ᑲ ᑭᒐᑕᐛᔨᑕᐧᒃ᙮
131ᓂᒋ ᐸᔅᒋᑐᓇᔨᓐ ᑭᔭ ᓂᒋ ᒋᐱᒋᔭᔭᓐ;
ᐛᔅ ᓂᒋ ᐱᒂᔨᑕᓐ ᒋᑭᒐᔎᐅᓇ᙮
132ᑭᓄᐛᐱᒥ, ᑭᔭ ᒋᔅᑎᒪᒐᔨᒥ,
ᒧᔭᒻ ᑲ ᑐᑐᐅᑥᐤ ᐊᓐᒡ ᑲ ᓴᒋᑕᒡ ᒋᑦ ᐃᓯᓂᐧᑲᓱᐅᓂᔪᐤ᙮
133ᐎᔨᔅᑕ ᓂᑕᐧᑯᔅᒐᐅᓇ ᒋᑦ ᐃᔨᒧᐅᓂᒡ;
ᐊᑯᔅ ᒪᒃ ᐊᑲᐎᔾ ᑭᔭ ᒥᑐᓐ ᓂᑭ ᑎᐸᔨᒥᑯᓐ ᒥᒐᑎᓯᐅᓐ᙮
134ᐎᐧᑯᒋᐃ ᐊ ᐊᔨᒥᐃᑦ ᐃᔪᐤ:
ᐊᑯ ᒐ ᑭᓄᐛᔨᑎᒪᓐ ᒋᑦ ᐃᑎᓱᐛᐅᓇ᙮
135ᐛᓯᓱᔅᑐᐤ ᒋᑦ ᐊᑐᔅᒐᔭᑭᓐ;
ᒋᔅᑯᑎᒧᐎ ᒪᒃ ᒋᑦ ᐃᑎᓱᐛᐅᓇ᙮
136ᓂᐱᔭ ᐊ ᓯᐱᓯᐅᒋ ᐅᒋᑯᐛ ᓂᔅᒋᓯᑯᒡ,
ᐊ ᐊᑲ ᑭᓄᐛᔨᑕᒡ ᒋᐎᓱᐛᐅᓂᔪᐤ᙮
18
137ᒋ ᑯᐃᔅᑯᑕᑎᓯᓐ, ᐅ ᑎᐸᔨᒋᒐᓱᐤ,
ᑭᔭ ᑯᐃᔎᓂᔪᐛ ᒋᑎᐸᔅᑯᓂᒐᐅᓇ᙮
138ᒋᑎᐸᒋᒧᐅᓇ, ᑲ ᐃᑎᓱᐛᔨᓐ,
ᑯᐃᔅᑯᑕᑎᓯᒪᑭᓇ ᑭᔭ ᓇᔅᒡ ᑯᐃᔅᑯᓂᔪᐛ᙮
139ᓂᒥᔅᑯᐛᔨᑎᒧᐅᓐ ᓂᒋ ᒋᑕᒧᑯᓐ;
ᐛᔅ ᑲ ᐛᐧᑲᓯᒡ ᒋ ᐅᓂᒋᔅᒋᓱᐅᒡ ᒋᑦ ᐃᔨᒧᐅᓇ᙮
140ᒋᑦ ᐃᔨᒧᐅᓐ ᓇᔅᒡ ᐸᔽᑭᓐ:
ᐊᔪᐅᒄ ᐛᒋ ᓴᒋᑕᑦ ᒋᑦ ᐊᑐᔅᒐᔭᑭᓐ᙮
141ᓂᑦ ᐊᐱᔅᑕᔨᑕᑯᓯᓐ ᑭᔭ ᓂᑦ ᐊᑐᐛᔨᒥᑯᐅᓐ;
ᐃᔭᐱᒡ ᒪᒃ ᓇᒪᐎᔾ ᓂ ᐅᓂᒋᔅᒋᓐ ᒋᑦ ᐃᑎᓱᐛᐅᓇ᙮
142ᒋᑯᐃᔅᑯᑕᑎᓯᐅᓐ ᑲᒋᒡ ᑯᐃᔅᑯᑕᑎᓯᒥᑭᓐ,
ᑭᔭ ᒋᑦ ᐃᑎᓱᐛᐅᓐ ᐊᐅᒄ ᑕᑈᐅᓐ᙮
143ᒥᑯᔅᑲᑕᔨᑎᒧᐅᓐ ᑭᔭ ᑯᒂᑕᑎᓯᐅᓐ ᓂᒋ ᐅᑎᑎᓂᑯᓐ;
ᐃᔭᐱᒡ ᒪᒃ ᓂ ᒥᔽᔨᑕᓐ ᒋᑦ ᐃᑎᓱᐛᐅᓇ᙮
144ᐊ ᐃᓯ ᒂᔭᔅᑯᑕᑎᓯᒥᑲᒋ ᒋᑎᐸᒋᒧᐅᓇ ᑲᒋᒡ ᑎᑯᓇ:
ᒥᔨ ᓂᔅᑐᑎᒧᐅᓐ, ᐊᑯ ᒐ ᐱᒪᑎᓯᔭᓐ᙮
19
145ᓂᒋ ᑕᑈᓐ ᒥᓯᐛ ᓂᑕᐃᒡ:
ᓂᑐᑐᐎ ᐅ ᑎᐸᔨᒋᒐᓱᐤ:
ᓂᑭ ᑭᓄᐛᔨᑕᓐ ᒋᑦ ᐃᑎᓱᐛᐅᓇ᙮
146ᔅᒋ ᑕᑈᑎᑎᓐ:
ᐱᒪᒋᐃ, ᐊᑯ ᒐ ᑭᓄᐛᔨᑎᒪᓐ ᒋᑎᐸᒋᒧᐅᓇ᙮
147ᓂ ᓂᑲᓂᐸᔨᔅᑕᓐ ᐱᔭᑕᐸᒋ, ᓂᒋ ᒪᓐ ᒪᒃ:
ᓂᒋ ᐊᔅᐸᔨᒧᑐᑕᓐ ᒋᑦ ᐃᔨᒧᐅᓐ᙮
148ᓂᔅᒋᓯᒂ ᓂᑲᓂᐱᔪᐛ ᓂᐸᐱᐅᓂᒡ,
ᒐᒋ ᒪᒥᑐᓇᔨᑎᒪᓐ ᒋᑦ ᐃᔨᒧᐅᓐ᙮
149ᓂᑐᑐᐎ ᑲ ᐃᓯ ᓴᒋᐃᐛᐤ ᒋᓴᐛᑎᓯᔨᓐ:
ᐅ ᑎᐸᔨᒋᒐᓱᐤ, ᒋᓯᐎᓯᐃ ᐊ ᐃᓯ ᑎᐸᔅᑯᓂᒐᔨᓐ᙮
150ᐸᓱᓇᑯᓯᐅᒡ ᑲ ᓄᓱᔅᑲᒡ ᒪᔭᔨᒐᐅᓂᔪᐤ;
ᔭᐛᐸᑎᒧᒡ ᒋᐎᓱᐛᐅᓂᔪᐤ᙮
151ᒥᒋᒪ ᒋᑦ ᐃᑕᓐ, ᐅ ᑎᐸᔨᒋᒐᓱᐤ;
ᑭᔭ ᒥᓯᐛ ᒋᑦ ᐃᑎᓱᐛᐅᓇ ᑕᑈᒥᑭᓇ
152ᒋᑎᐸᒋᒧᐅᓇ ᐅᒡ, ᐎᐱᒡ ᓂᒋ ᐅᒋ ᒋᔅᒐᔨᑕᓐ,
ᑲᒋᒡ ᐊᒋ ᐎᔨᔅᑕᔨᓐ᙮
20
153ᒪᒥᑐᓂᔨᑕ ᓂᑦ ᐊᔨᒥᐃᑯᓯᐅᓐ, ᑭᔭ ᐎᐧᑯᒋᐃ;
ᐛᔅ ᓇᒪᐎᔾ ᓂ ᐅᓂᒋᔅᒋᓐ ᒋᐎᓱᐛᐅᓐ᙮
154ᐊᔭᒥᐊᔅᑎᒧᐎ, ᑭᔭ ᐎᐧᑯᒋᐃ:
ᐊ ᐃᔅᒋᔄᒥᑲᒡ ᒋᑦ ᐃᔨᒧᐅᓐ᙮
155ᐱᒪᒋᐃᐛᐅᓂᔪᐤ ᔭᐛᐸᑎᒧᒡ ᐅᒥᒋᑥᐅᒡ:
ᐛᔅ ᓇᒪᐎᔾ ᓇᓂᑐᐛᔨᑎᒧᒡ ᒋᑦ ᐃᑎᓱᐛᐅᓇ᙮
156ᒥᒐᓇ ᒋ ᔪᔅᐱ ᒋᔅᑎᒪᒐᔨᒐᐅᓇ, ᐅ ᑎᐸᔨᒋᒐᓱᐤ:
ᒋᓯᐎᓯᐃ ᐊ ᐃᓯ ᑎᐸᔅᑯᓂᒐᔨᓐ
157ᒥᒐᑐᐅᒡ ᑲ ᑯᒂᑕᒋᐃᒡ ᑭᔭ ᑲ ᐛᐧᑲᓯᒡ:
ᐃᔭᐱᒡ ᒪᒃ ᓇᒪ ᓂᑭ ᐳᓂᑕᓐ ᒋᑎᐸᒋᒧᐅᓇ᙮
158ᓂᒋ ᑭᓄᐛᐱᒪᐅᒡ ᑲ ᒥᒋᑐᑕᒡ, ᓂᒋ ᑲᔅᒐᔨᑕᓐ ᒪᒃ;
ᐊ ᐊᑲ ᑭᓄᐛᔨᑕᒡ ᒋᑦ ᐃᔨᒧᐅᓂᔪᐤ᙮
159ᒪᒥᑐᓇᔨᑕ ᐊᔅᐱᔅ ᓴᒋᑕᔭᓐ ᒋᑭᒐᔅᒋᒧᐛᐅᓇ:
ᒋᓯᐎᓯᐃ, ᐅ ᑎᐸᔨᒋᒐᓱᐤ, ᐊ ᐃᓯ ᓴᒋᐃᐛᐎ ᒋᓴᐛᑎᓯᔨᓐ᙮
160ᒋᑦ ᐃᔨᒧᐅᓐ ᑕᑈᒥᑭᓐ ᒪᐅᒡ ᐛᔅᑭᒡ ᐅᒡ:
ᑭᔭ ᒥᓯᐛ ᑕᑐ ᒋᑯᐃᔅᑯᑕᑎᓱᐎ ᑎᐸᔅᑯᓂᒐᐅᓇ ᑲᒋᒡ ᐱᒥᐱᔭᐛ᙮
21
161ᐅᒋᒪᐅᒡ ᓂᑐᐎ ᓂᒋ ᐃᓯ ᓂᓇᐧᑲᒋᐃᑯᒡ;
ᒪᒃ ᓂᑕᐃ ᑯᔅᐸᓇᔨᑎᒧᒪᑭᓐ ᒋᑦ ᐃᔨᒧᐅᓐ᙮
162ᓂ ᒥᔽᔨᑕᓐ ᒋᑦ ᐃᔨᒧᐅᓐ,
ᒧᔭᒻ ᐊᐛᓐ ᑲ ᒥᔅᑲᐧᒃ ᒥᔅᑎ ᒥᔅᑲᑥᐅᓂᔪᐤ
163ᓂ ᐛᐧᑲᑕᓐ ᑭᔭ ᒋᒋᐛ ᓂ ᐛᐧᑲᑕᓐ ᑭᑭᒋᔭᐅᓐ;
ᒪᒃ ᒋᐎᓱᐛᐅᓐ ᓂ ᓴᒋᑕᓐ᙮
164ᓂᔄᐅᑕᒡ ᑕᑥᐤ ᒋ ᒪᒥᒋᒥᑎᓐ ᐸᐃᒄ ᒋᓯᑲᐛ,
ᒋᑯᐃᔅᑯᑕᑎᓯᐤ ᑎᐸᔅᑯᓂᒐᐅᓇ ᐅᒡ᙮
165ᒋᒋ ᒋᔭᒪᔨᑎᒧᐅᓂᔪᐤ ᐊᔭᐅᒡ ᐊᓐᒡ ᑲ ᓴᒋᑕᒡ ᒋᑦ ᐃᑎᓱᐛᐅᓂᔪᐤ,
ᓇᒪ ᑭᔭ ᒐᒂᔪᐤ ᒋᑭ ᐊᑐᐛᔨᑎᒥᐃᑯᐅᒡ
166ᑎᐸᔨᒋᒐᓱᐤ, ᓂᒋ ᐊᔅᐸᔨᒧᑐᑕᓐ ᒋᐱᒪᒋᐃᐛᐅᓐ,
ᑭᔭ ᓂᒋ ᐃᑐᑕᓐ ᒋᑦ ᐃᑎᓱᐛᐅᓇ᙮
167ᓂᑦ ᐊᒐᐧᒄ ᒋ ᑭᓄᐛᔨᑎᒻ ᒋᑎᐸᒋᒧᐅᓇ;
ᓇᔅᒡ ᒪᒃ ᓂ ᓴᒋᑕᓐ᙮
168ᓂᒋ ᑭᓄᐛᔨᑕᓐ ᒋᑦ ᐃᑎᓱᐛᐅᓇ ᑭᔭ ᒋᑎᐸᒋᒧᐅᓇ;
ᐛᔅ ᒥᓯᐛ ᓂᑦ ᐃᓯᑥᐅᓇ ᒋ ᐅᑎᔅᑲᐎᔅᑲᑯᓐ᙮
22
169ᐊᑯᔅ ᓂᒪᐅᓐ ᒥᒋᒪ ᒋᑭ ᓇᑎᑯᓐ, ᐅ ᑎᐸᔨᒋᒐᓱᐤ:
ᒥᔨ ᓂᔅᑐᑎᒧᐅᓐ ᐊ ᐃᔅᒋᔄᒥᑲᒡ ᒋᑦ ᐃᔨᒧᐅᓐ
170ᐊᑯᔅ ᓂᓂᑐᑎᒪᒐᐅᓐ ᒋᑭ ᐅᑎᔅᑲᐎᔅᑲᑯᓐ:
ᐎᐧᑯᒋᐃ ᐊᔅᒋᔄᒥᑲᒡ ᒋᑦ ᐃᔨᒧᐅᓐ᙮
171ᓂᑐᓂᒡ ᓂᑭ ᐅᒋ ᒪᒥᒋᒧᐛᓐ,
ᐃᔅᐱ ᒋ ᒋᔅᑯᑎᒧᐎᔨᓇ ᒋᐎᓱᐛᐅᓇ᙮
172ᓂᑕᔨᔾ ᒋᑭ ᐊᔨᒧᑎᒧᒪᑭᓐ ᒋᑦ ᐃᔨᒧᐅᓐ;
ᐛᔅ ᒥᓯᐛ ᒋᑦ ᐃᑎᓱᐛᐅᓇ ᑯᐃᔅᑯᑕᑎᓱᐅᓂᔪᐛ᙮
173ᐊᑯᔅ ᒋᑎᒋᔾ ᓂᑭ ᐎᒋᐃᑯᓐ;
ᐛᔅ ᓂᒋ ᐛᐛᔭᐸᑕᓐ ᒋᑦ ᐃᑎᓱᐛᐅᓇ᙮
174ᓂᒋ ᐱᒂᔨᑕᓐ ᒋᐱᒪᒋᐃᐛᐅᓐ, ᐅ ᑎᐸᔨᒋᒐᓱᐤ;
ᒋᐎᓱᐛᐅᓐ ᑭᔭ ᓂ ᒥᔽᔨᑕᓐ᙮
175ᐊᑯᔅ ᒋᑭ ᐱᒪᑎᓯᐤ ᓂᑦ ᐊᒐᐧᒄ, ᐊᑯ ᒐ ᒪᒥᒋᒥᔅᒃ;
ᐊᑯᔅ ᒪᒃ ᒋᑎᐸᔅᑯᓂᒐᐅᓇ ᓂᑭ ᐎᒋᐃᑯᓐ᙮
176ᓂᒋ ᐛᓂᒥᑎᒪᓐ ᒧᔭᒻ ᑲ ᐅᓂᓯᐧᒃ ᒪᔭᑕᓂᔅ:
ᓇᓂᑐᐛᐱᒻ ᒋᑦ ᐊᑐᔅᒐᔭᑭᓐ; ᐛᔅ ᓇᒪᐎᔾ ᓂ ᐅᓂᒋᔅᒋᓐ ᒋᑦ ᐃᑎᓱᐛᐅᓇ᙮
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada