ᑎᐱᑦ ᐅᓂᑭᒧᐅᓇ 109
109
1ᐊᑲᐎᔾ ᒋᐱᑐᐛ, ᐅ ᒋᓴᒪᓂᑐᐤ ᓂᒪᒥᒋᒧᐛᐅᓐ᙮
2ᐛᔅ ᐅᑐᓐ ᐅᒥᒋᑥᐤ ᑭᔭ ᐅᑐᓐ ᐅᑭᑭᒋᔭᓯᐤ ᓂ ᐸᔅᒋᑐᓇᔨᔅᑕᑯᐛᓐ:
ᓂᒋ ᒥᒋ ᐊᔨᒧᒥᑯᒡ ᑭᑭᒋᔭᐎ ᒥᑕᔨᔨᐤ ᐅᒡ᙮
3ᓂᒋ ᐛᔅᑲᔅᑲᑯᒡ ᑭᔭ ᐊ ᐛᐧᑲᓱᐛᐎ ᐃᔨᒥᒡ;
ᑭᔭ ᓂᑐᐎ ᓂᒋ ᐃᓯ ᒪᓯᐧᑲᑯᒡ᙮
4ᐊᒋ ᓴᒋᐃᒂᐤ ᓂᒋ ᐅᒋ ᐛᐧᑲᑎᑯᒡ:
ᒪᒃ ᓂ ᐱᔅᑎᓂᑎᓱᓐ ᒐᒋ ᐊᔭᒥᐊᔭᓐ᙮
5ᐊᒋ ᒥᔨᒂᐤ ᑲ ᒥᔽᓯᔨᒡ ᒥᔅᑯᒡ ᓂᒋ ᒥᔨᑯᒡ ᑲ ᒪᔭᑎᓂᔨᒡ,
ᑭᔭ ᐛᐧᑲᓱᐛᐅᓂᔪᐤ ᒥᔅᑯᒡ ᓂ ᓴᒋᐃᐛᐅᓂᔪᐤ᙮
6ᑐᑐᐛᐤ ᒐᒋ ᑎᐸᔨᒥᑯᑦ ᒥᒋ ᐃᔪᐛ,
ᐊᑯᔅ ᑭᔭ ᓴᐃᑕᓇ ᒋᑭ ᓂᐳᐎᔪᐛ ᐅᒥᔪᐅᓂᒡ᙮
7ᐃᔅᐱ ᑎᐸᔅᑯᓇᑭᓄᐅᒐ ᐊᑯᔅ ᒋᑭ ᓂᓱᐅᓇᒋᒪᑭᓄᐤ;
ᑭᔭ ᐅᑦ ᐊᔭᒥᐊᐅᓐ ᒋᑭ ᒥᒋᑥᐛᐅᓄᐎᔪᐤ᙮
8ᐊᑯᔅ ᐅᒋᓯᑲᒪ ᓇᒪ ᒋᑭ ᒋ ᒥᒐᓂᔨᐛ;
ᐊᑯᔅ ᒪᒃ ᑯᑎᑲ ᒋᑭ ᐅᑎᓇᒥᔪᐛ ᐅᑦ ᐊᐸᑎᓯᐅᓐ᙮
9ᐊᑯᔅ ᐅᑦ ᐊᐛᓯᒥᓴ ᒋᑭ ᒋᐅᓴᓄᔪᐛ,
ᑭᔭ ᐎᐛ ᐃᔎᐛ ᑲ ᓂᐱᔨᒋ ᐅᓇᐸᒥᔨᐛ᙮
10ᐊᑯᔅ ᐅᑦ ᐊᐛᓯᒥᓴ ᒧᔅ ᒋᑭ ᐸᐸᑯᓱᐛᔪᐛ ᐊ ᐸᑯᓯᐛᔨᒋ:
ᐊᑯᔅ ᒋᑭ ᓇᓂᑐᐛᐸᑎᒥᔪᐛ ᐅᒥᒋᒥᒥᔨᐛ ᑭᔭ ᐅᓇᓇᐧᑲᒋᐅᓂᔨᒡ᙮
11ᐊᑯᔅ ᐅᑲᒋᓯᐃᐛᐤ ᒋᑭ ᐅᑎᓂᒺᐤ ᒥᓯᐛ ᑲ ᐃᓯ ᐃᔭᔨᒋ:
ᐊᑯᔅ ᒪᒃ ᒪᓐᑕᐤ ᒋᑭ ᒥᔅᑭᒪᐤ ᐅᑦ ᐊᑐᔅᒐᐅᓂᔪᐤ᙮
12ᐊᑯᔅ ᐊᑲᐎᔾ ᐊᐛᓐ ᒋᑭ ᒋᓴᐛᑐᑕᐛᐤ;
ᐊᑲ ᑭᔭ ᐊᐛᓐ ᒋᑭ ᒋᔅᑎᒪᒐᔨᒥᒪᐤ ᑲ ᓇᓇᐧᑲᒋᐅᔨᒋ ᐅᑦ ᐊᐛᓯᒥᔪᐛ᙮
13ᐊᑯᔅ ᐅᑦ ᐊᐛᓯᒥᓴ ᒋᑭ ᒋᒥᔄᑭᓄᐎᐛ;
ᑭᔭ ᒥᓐ ᐊᑎ ᐊᓂᔅᒐ ᐱᒪᑎᓯᓇᓂᐎᒐ ᐅᑦ ᐃᓯᓂᐧᑲᓱᐅᓐ ᒋᑭ ᑲᓯᓯᓇᐃᑭᓄᐎᔪᐤ᙮
14ᐊᑯᔅ ᐅᒥᒐᑎᓯᐅᓂᔪᐤ ᐅᑕᐎᔭ ᒋᑭ ᒋᔅᒋᑎᒺᐤ ᑎᐸᔨᒋᒐᓱᐤ;
ᐊᑲᐎᔾ ᑭᔭ ᐅᒥᒋᑐᑎᒧᐅᓂᔪᐤ ᐅᑲᐎᔭ ᒋᑭ ᑲᓯᓯᓇᐃᑭᓄᐎᔪᐤ᙮
15ᐊᑯᔅ ᒧᔅ ᒋᑭ ᑭᓄᐛᐸᑎᒺᐤ ᑎᐸᔨᒋᒐᓱᐤ,
ᒐᒋ ᒋᒥᓯᒺᑦ ᐅᒋᔅᒋᑐᑕᑯᓱᐅᓂᔪᐤ ᐊᔅᒋᒡ ᐅᒡ᙮
16ᐊ ᐊᑲ ᐅᒡ ᒋᔅᒋᑦ ᒐᒋ ᐛᐸᑎᔨᐛᑦ ᒋᓴᐛᑎᓯᐅᓂᔪᐤ,
ᒪᒃ ᐊᒋ ᓇᓇᐧᑲᒋᐊᑦ ᑲ ᒋᔅᑎᒪᒋᓯᔨᒋ ᑭᔭ ᑲ ᐅᓂᓯᓂᔨᒋ ᐃᔪᐛ,
ᒐᒋ ᒋ ᓂᐸᐊᑦ ᐊᓂᔭᔪᐛ ᑲ ᐱᑯᑕᐊᔨᒋ᙮
17ᑲᒋ ᐃᓯ ᓴᒋᑕᑦ ᒥᒐᒋᒧᐛᐅᓂᔪᐤ, ᐊᑯᔅ ᒋᑭ ᐅᑎᑎᑯᐤ:
ᑲᒋ ᐃᓯ ᐊᑲ ᒥᔽᔨᑕᐧᒃ ᒥᔽᒋᒧᐅᓂᔪᐤ, ᐊᑯᔅ ᒋᑭ ᔭᐛᐸᑎᒻ᙮
18ᑲᒋ ᐃᓯ ᑭᓄᐛᔨᑎᒪᓱᑦ ᒥᒐᒋᒧᐛᐅᓂᔪᐤ ᒧᔭᒻ ᐊᐱᒋᑕᐅᓂᔪᐤ;
ᐊᑯᔅ ᒋᑭ ᐱᒋᐱᔪᐤ ᐅᑎᒋᓯᒡ ᒧᔭᒻ ᓂᐱᔪᐤ;
ᑭᔭ ᐅᔅᑭᓂᒡ ᒧᔭᒻ ᐱᒥᔪᐤ᙮
19ᐊᑯᔅ ᒋᑭ ᐊᒂᓇᐅᑯᐤ ᒧᔭᒻ ᐊ ᐊᑯᓇᐅᑯᑦ ᐊᐱᒋᑕᐅᓂᔪᐤ,
ᑭᔭ ᒧᔭᒻ ᐱᒂᑕᐅᓂᔪᐤ ᒧᔅ ᑲ ᐱᒂᑕᐅᑕᐧᒃ᙮
20ᐊᑯᔅ ᐅᔭᔪᐤ ᑎᐸᔨᒋᒐᓱᐤ ᒋᑭ ᐃᓯ ᑎᐸᐅᒧᐛᐤ ᑲ ᐛᐧᑲᓯᔨᒋ,
ᑭᔭ ᐊᓂᔭ ᑲ ᒥᒋ ᐊᔨᒧᒪᔨᒋ ᓂᑦ ᐊᒐᒂ᙮
21ᒪᒃ ᐃᑐᑎᒧᐎ, ᐅ ᒋᓴᒪᓂᑐᐤ ᑎᐸᔨᒋᒐᓱᐤ, ᒋᑦ ᐃᓯᓂᐧᑲᓱᐅᓐ ᐅᒡ:
ᐊ ᒥᔽᓯᒡ ᒋᒋᔅᑎᒪᒐᔨᒋᒐᐅᓐ, ᐱᒪᒋᐃ᙮
22ᐛᔅ ᓂ ᒋᔅᑎᒪᑎᓯᓐ ᑭᔭ ᓂ ᐅᐛᓂᓯᓐ,
ᑭᔭ ᓂᑕᐃ ᐱᒡ ᓂᔭᒡ ᒥᔄᑭᓂᐎᐅᐤ᙮
23ᓂ ᐃᒐᐎᓐ ᒧᔭᒻ ᐊ ᑎᑲᔅᑕᑎᒡ ᐊ ᐊᑲ ᓄᒂᒡ:
ᓂ ᒪᒥᔅᑯᒋᐱᔨᓐ ᒧᔭᒻ ᐅᒂᔎᑎᓯᔅ᙮
24ᓂᒋᑯᓇ ᐃᔨᔨᒥᓯᒥᑭᓇ ᐊ ᐊᑲ ᒥᒋᓱᔭᓐ;
ᓂᔭᔅ ᒪᒃ ᑯᐅᐧᑭᑕᒥᑭᓐ᙮
25ᓂᒋ ᒋᔅᑐᑎᒂᒡ ᑭᔭ:
ᐃᔅᐱ ᒪᒃ ᑲᓄᐛᐱᒥᒡ ᒋ ᒂᒂᑎᐱᔎᔪᐅᒡ᙮
26ᐎᒋᐃ, ᐅ ᑎᐸᔨᒋᒐᓱᐤ ᓂᒋᓴᒪᓂᑐᒻ:
ᐅ ᐱᒪᒋᐃ ᑲ ᐃᔅᐱᔅ ᓱᐛᔨᒋᒐᔨᓐ᙮
27ᒐᒋ ᒋᔅᒐᔨᑕᒡ ᐅᐛ ᒋᑎᒋᒡ ᐊ ᐅᒋᐱᔨᒡ;
ᒋᔾ ᑎᐸᔨᒋᒐᓱᐤ, ᐊᒋ ᐃᑐᑎᒥᓐ᙮
28ᐊᑯᔅ ᒋᑭ ᒪᒐᒋᒧᐛᐅᒡ, ᒪᒃ ᒥᔽᒋᒥ ᒋᔾ:
ᐸᓯᑯᑥᐛ, ᐊᑯᔅ ᒋᑭ ᓯᓴᒂᔨᒧᐅᒡ;
ᒪᒃ ᐊᑯᔅ ᒋᑦ ᐊᑐᔅᒐᔭᑭᓐ ᒋᑭ ᒥᔽᔨᑎᒻ᙮
29ᐊᑯᔅ ᑲ ᐎ ᐎᔭᔅᑐᑐᐅᒡ ᒋᑭ ᐊᒂᓇᐅᑯᐅᒡ ᓴᒂᔨᒧᐅᓂᔪᐤ;
ᐊᑯᔅ ᒪᒃ ᒋᑭ ᐊᒂᓇᐅᓱᐅᒡ ᑎᐱᔪᐛ ᐅᓴᒂᔨᒧᐅᓄᐛᐤ ᐅᒋ ᒧᔭᒻ ᐊᑯᐅᓂᔪᐤ᙮
30ᓂᑐᓂᒡ ᓇᔅᒡ ᓂᑭ ᐅᒋ ᒪᒥᒋᒪᐤ ᑎᐸᔨᒋᒐᓱᐤ;
ᓂᐦᐃ, ᓂᑭ ᒪᒥᒋᒪᐤ ᐊᓐᑕ ᐊ ᑕᔨᒋ ᒥᒐᑦ ᐃᔪᐛ᙮
31ᐛᔅ ᒋᑭ ᓂᐳᐤ ᐅᒥᔪᓂᔨᒡ ᐅᒋᔅᑎᒪᑎᓯᐛ,
ᒐᒋ ᐱᒪᒋᐊᑦ ᐊᓂᔭ ᐅᒋ ᑲ ᓂᓱᐅᓇᒋᒪᔨᒋ ᐅᑦ ᐊᒐᐧᑯᔪᐛ᙮
ᓇᔅᑲᐱ ᑲᒪᐅᑕᐱᒡ ᓱᓇᔭᐤ ᑎᐱᔨᐛᐅᓯᔪᐅᒡ ᐊ ᐅᓯᑕᑭᓄᐎᒡ ᐅᔭ ᓇᔅᑲᐱ ᒥᓯᓇᐃᑭᓂᔪᐤ
The Naskapi text is copyright © Naskapi Development Corporation
Naskapi Development Corporation
Kawawachikamach, Québec G0G 2Z0 Canada
New Testament published by the Canadian Bible Society (CBS) © 2007
Canadian Bible Society
10 Carnforth Road, Toronto Ontario M4A 2S4 Canada