Матай 20
20
Уста үзмин көдләчнр
1– Теңгрин ориг юунла дүңцүлҗ болхмб? Үлгүрлхд: Нег герин эзн өрүн өрлә босад, эврәннь уста үзм тәрсн һазрт көдлх көдләчнриг нәәмәдлхәр йовсмн. 2Өдрт нег цаһан мөңг авхит гиҗ тер көдләчнрлә бооцад, уста үзм урһсн һазрур илгәв. 3Өрүн йисн часла тер базрин талвңд ирәд, көдлмш уга зогсҗасн әмтиг үзв. 4Эзн теднд:
– Тадн бас мини уста үзм урһдг һазр тал йовтн, Би тадна көдлмшин көлситн өгхв, – гив.
Тедн йовцхав. 5Һал үдлә арвн хойр часла, һурвн часла бас тер тиигв. 6Тавн час болад ирхлә, тер дәкәд базрин талвңд ирәд, тенд зогсҗасн әмтиг үзәд:
– Өдрин дуусн көдлмш угаһар ю хәәҗ энд зогсҗахмт? – гиҗ сурв.
7– Маднд күн көдлмш өгчәхш, – гиҗ тедн хәрү өгцхәв.
– Тадн бас мини уста үзм тәрсн һазрур йовцхатн, – гиҗ эзн келв.
8Асхн болад ирхлә, эзн эврәннь һардачдан келҗәнә:
– Көдләчнриг цуглулад, көлсинь өгәд йовулчк. Экләд сүл ирсн көдләчнрт мөңгинь өг, дәкәд түрүн ирсн көдләчнрт җалвинь өгчк.
9Асхн тавн часла ирсн көдләчнр ирәд, күн болһн нег цаһан мөңг авцхав. 10Түрүн ирсн көдләчнр энүнәс ик мөңг авх саната бәәҗ. Зуг эдн бас нег цаһан мөңг авв. 11Мөңгән авчкад, тедн эзнд:
12– Сүл ирсн көдләчнр негхн час көдлв. Чи болхла, тедниг маднла әдлцүлвч. Бидн өдрин дуусн нарнд шатад көдлвидн, – гиҗ һундл өргҗ келцхәв.
13Зуг эзн негнднь иигҗ келв:
– Би чамаг өөлүлсн угав, нөкд минь, чи нанла нег цаһан мөңгәр көдлмш кенәв гиҗ эс келлчи? 14Көлсән авад хәр цааран. Би болхла сүл күүнд бас нег цаһан мөңг өгх санатав, 15би мөңгән эврәннь дурарн күүнд өгх зөв угавий? Намаг өгәнч гиһәд, чи үлү үзҗәнчи?
16Тиигәд сүүлңкнь түрүңк болх, түрүңкнь сүүлңк болх.
Исус эврәннь үклин тускар һурвдад келҗәнә
17Исус Ерусалим балһснур темцҗ йовад, арвн хойр сурһульчнран әмтнәс хооран дуудҗ авад:
18– Ода бидн Ерусалим балһснур йовҗанавидн. Күмни Көвүг ах гелңгүдин болн ном цәәлһәчнрин һарт бәрүлх, тедн Терүг цааҗла харһулхар шиидх, буру номта улсин медәнд өгх. 19Тедн наад бәрәд, малядҗ цокад, кирсд хадасар хадҗ алулх. Болв тер һурвдгч өдртнь әмдрх, – гиҗ Исус теднд онц келв.
Экин эрлһн
20Дәкәд Зебедана гергн көвүдтәһән Исус тал өөрдҗ одад сөгдв. Тер Исусас юм сурхар седҗ.
21– Юн кергтәв танд? – гиҗ Исус сурв.
– Тана орнд эн мини хойр көвүн Тана хаана ширән өөр суух гиҗ үгән өгтн. Негнь – барун талд, дарукнь зун талд суутха! – гиҗ тер күүкд күн келв.
22– Тадн ю сурҗахан эврән медҗәхшит! Мини үзх зовлңгиг тадн дааҗ чадхийт? – гиҗ Исус теднәс сурв.
– Чадхвидн, – гиҗ тедн хәрү өгв.
23– Мини зовлңгиг та хойр даахит, зуг Мини барун эс гиҗ зүн һартм суух зөв Би өгдгов. Эцкимм заасн әмтн тенд суух.
24Наадк арвн сурһульчнр энүг соңсчкад, ах-дү хойриг гемшәцхәв. 25-28Зуг Исус:
– Буру номта хаадуд әмтән даҗрдгинь, нойдуднь әмтн деер эзн болдгинь тадн меднәлмт. Тадн дунд тиим юмн болх зөв уга. Күмни Көвүн әмтиг зархар биш Бийнь теднд заргдхар ирҗ. Тер олн әмтиг килнцәснь сулдххин төлә әмән өгх зөвтә. Тиим кевәр тадн тиигтн: тадна дундас алдр болхар седснь тана зарц болтха. Ахлач болхар седснь мухла болтха, – гиҗ келв.
Хойр сохр күүг эдгәлһн
29-30Тедн Ерихог үлдәһәд һархла, олн әмтн ардаснь дахҗ йовцхав. Хаалһин амнд хойр сохр күн суусн бәәҗ. Тедн Исусиг хаҗуһарнь йовҗ йовхинь соңсад:
– Деед Эзн! Давидин Көвүн мадниг өршәһич! – гиҗ хәәкрцхәв.
31Әмтн тедниг хөрәд, дууһан таттн гиҗ келцхәв, зуг тедн улм чаңһур:
– Деед Эзн! Давидин Көвүн мадниг өршәһич! – гиҗ хәәкрцхәв.
32– Нанас таднд юн кергтә? – гиҗ Исус зогсад тедниг дуудҗ келв.
33– Деед Эзн! Мана нүднд хара орулыч! – гиҗ тедн сурцхав.
34Исус теднд сана зовад, нүднднь һаран күргв. Агчмин зуур тер хойр күүнә нүднд харан орв, тедн Исусиг дахҗ йовцхав.
© Институт перевода Библии, 2002-2023