Yela 145
145
Korowii kpɛɛra yel
Kooro Devid yel
1N Naa Korowii
maa dɛ tomɛ, ne n kooro,
mɛɛ jaame saŋ bɛlbwaa
dɛɛ la.
2Tɔpere bɛlbwaa
mɛɛ ba he kpɛɛra.
Mɛɛ kpɛɛre saŋ bɛlbwaa
dɛɛ la.
3N Naa Korowii,
he kan dɛ chɛ kpɛɛra.
He kan haa doa
ɡwaa nɛwɛnyina liire ta.
4Fini bii ɛɛ baɡle waa haa ɛa
baɡle kerekere biirii,
baa bol he wejena
haa ɛa waa.
5Baa bol he jirima,
ne nyɛl ne kpeɡri
haa doa waa.
Mɛɛ lii nyokpowaa haa ɛa
la waa.
6Baa bol he kpeɡri
ne he we-ɛɛla aa do
ɔma kohona waa,
ásɛ n bol he kan
haa doa wa.
7Baa bol he wer
haa doa waa bwaa,
dɛ́ ɡo yela kpɛɛ he suna
haa dɛ sune nɛra nɛɛ
kohona wa.
8N Naa Korowii,
he dɛ nyin yaa dɛ dɔ
tedoma,
he baah aa di warawara,
he nyina aa wola jaɡa dɔe
ɡe do kan.
9He wer tɛ nomɛlbwa,
dɛ dɔ tedoma tɛ kwaa
haa taa bwa.
10N Naa Korowii,
kwaa haa taa bwa ɛɛ
kpɛɛree, ásɛ he nɛra
ba wa aa toɡra
bwa ɡe kpɛɛre.
11Baa bol jirima
he kora aa dɔa waa,
dɛ́ bol kan haa doa wa,
12ásɛ nomɛlbwa jemɛ
he wejena haa dɛ ɛ,
ne jirima he kora
aa dɔa wa.
13He kora dii ta jaɡa dɔe,
hɛɛ di koraa saŋ bɛlbwaa
dɛɛ la.
N Naa Korowii,
he waa dɔ kasinteŋ
hɛɛ teŋɛ he nyobaɡa ta,
dɛ dɔ nyina tɛ kwaa haa
taa bwa.
14He lawɛ nɛra baa chola
dɛɛ ir,
dɛɛ cha banɔ la wenaale
aa lɔ ba nɛ.
15Kwaa haa taa bwa
sie dawɛ he nɛ,
hɛɛ tɛa kondikwaa
saŋ aa chɛa ta.
16He ta tea dɛɛ tɛa kohona,
bɛlbwa dɔ ɡɛ waa dɛ nyin.
17N Naa Korowii,
waa haa dɛ ɛ bwa toɡrɔ,
he dɛ nyin he kontaala
bwa.
18He bɛne banɔ la
baa dɛ yerɛ bwa,
nɛra baa dɛ yerɛ
kasinteŋ ne la.
19Nɛra baa dɛ ɔmɛ la,
he dɛ tɛɛ ba ba konnyina,
dɛ no ba wii dɛɛ lɛɛ ba.
20Nɛra baa dɛ nyin he waa la,
he kpɔ nɔn dɛɛ tɔ ba nɛ,
kɛ nɛnchɔɡa te,
hɛɛ chɔɡ baa.
21Mɛɛ kpɛɛ Korowii
saŋ bɛlbwaa.
Korowii kontaala bwa,
hé kpɛɛ o sɔn
waa do ɡoroŋ la,
saŋ bɛlbwa dɛɛ la.
© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.