Саалтыр 28
28
1Давид псалома.
Айхаллааҥ Айыы Тойону, Таҥара уолаттара,
айхаллааҥ Айыы Тойон кэрэмэн килбиэнин, улуу кыаҕын.
2Айхаллааҥ Айыы Тойон албаннаах аатын,
сүгүрүйүҥ Айыы Тойоҥҥо Кини сибэтиэй сыдьаайыгар.
3 Айыы Тойон саҥата уу үрдүнэн иһиллэр;
албан ааттаах Таҥара этиҥнии ньириһийэр,
Айыы Тойон саҥата улуу байҕал үрдүнэн эҥсиллэр.
4 Айыы Тойон саҥата модун күүстээх,
Айыы Тойон саҥата сүдү бэйэлээх.
5 Айыы Тойон саҥата сыалаах мастары тоһуталыыр;
Айыы Тойон Ливан сыалаах мастарын тоһуталыыр.
6Кини Ливаны тыһаҕастыы ыстаҥалатар,
Сириону эдэр оҕустуу ойуоккалатар.
7 Айыы Тойон саҥата уот төлөнүн саҕар,
8 Айыы Тойон саҥата кураайы дуолу дьигиһитэр,
Айыы Тойон Кадес кураайы дуолун дьигиһитэр.
9 Айыы Тойон саҥата уулаах табалары төрөтөр,
ойуурдары-тыалары сыгынньах хаалларар;
«Албан аат!» – ким барыта Кини Храмыгар саҥа аллайар.
10 Айыы Тойон уу мотуогун үрдүнэн бүрүстүөлгэ олорор,
Айыы Тойон ыраахтааҕылыыр бүрүстүөлүгэр
үйэттэн үйэлэр тухары олорор.
11 Айыы Тойон норуотугар күүстэ-сэниэтэ салгыахтын,
Айыы Тойон, эйэни бэлэхтээн, норуотун алгыахтын.
© Институт перевода Библии, 2008-2022