Aŋasa 21
21
1Enyɛnpe Ebɔrɛ e naa ŋini Ewura be kagbene ekpa,
fanɛ nchu be kubɔr na.
2Dimɛdi be aworbi beeŋ tiŋ m par mo,
ama Enyɛnpe Ebɔrɛ e nyi esa be kagbene to.
3Kewora kusɔ nɛ k niŋi nɛ kashenteŋji bee par Enyɛnpe Ebɔrɛ a chɔ sarga be kelara.
4Ŋkpensheŋ nɛ kamoowu la alubi be asɔrso nna,
nɛ belubiworapo bee sha amo ga.
5Kewushi eyur ŋ kre asheŋ pɔɛŋ nseŋ wora amo bee bar tɔnɔ nna,
ama brembreŋ be kasheŋwora bee bar ketir nna.
6Kebirkɔshi be kanya maa chɛr nsaa mur,
amo alɛ maa chɛr nsaa yɛr esa luwu to.
7Belubiworapo be kenyaŋɛto a fin basa be kemɔ
e naa yɛr bumo kemur to
ŋkpal b kaa maa sha kewora
kusɔ nɛ k niŋi so.
8Basa nɛ bumo be nfɛra bee ji a biri bumo kikɛ be asheŋ woraso maa niŋi,
ama basa nɛ b maa wora a foe bre be asheŋ kikɛ niŋi nna.
9Kechoŋi be awɔlto be kedese,
bɔ fo nɛ eche elushapo kaa wɔ ebu to.
10Asheŋ lubi bee wora belubiworapo ebel nna,
bumo alɛ maa wu bumo braana kuwɔr.
11Alubiworapo be kasogberge bee ŋini ewulpo asheŋ nna.
Enyiashempo kikɛ bee nya kenyi nna ashi kusɔ nɛ b ŋini mo to.
12Ebɔrɛ nɛ e niŋi na,
nyi kusɔ nɛ k bee wora belubiworapoana pe.
Mo alɛ e naŋ bar bumo kaseto.
13Fo baŋ kini kenu etirpo be kushu,
fo alɛ gba beeŋ shu nɛ basa maaŋ tuge fo.
14Ashiri to be kakɛ beeŋ tiŋ n lɔŋɛ fo nɛ esa nɛ e nya agbo n wɔtɔ fo be kefɛato.
15Asheŋ be keji nɛ amo be ekpa so bee sa belelaworapo kagbenefuli nna,
nsaa shin nɛ belubiworapo malɛ bee nyɔŋkɔŋ to.
16Esa nɛ e maa pin asheŋ to maa chɛr nsaa luri luwu to.
17Kɔnɔbel be kebaa sha ga
nɛ kamooji nɛ kasanuu
bee ta esa nna a ki etirpo.
18Belelaworapo be etɔrɔ bee kilgi nna
a ba belubiworapo so.
19Kiyi to chil be kechena bɔ ketu eche elushapo n chena.
20Enyiashempo bee ji nna a ka a yili echefoso,
ama ewulpo bre bee ji kusɔ nɛ e nya kikɛ nna a loge kachɛ koŋwule.
21Esa kama nɛ e bee wora asheŋ nɛ a niŋi
nsaa sha basa
bee yɔ anishito nna,
nsaa nya kemaŋkura nɛ kebaawɔtɔ lela.
22Enyiashempo koŋwule beeŋ tiŋ ŋ kɔ m pɔɔ kade nɛ b pɔr egbal ŋ kulti so,
n jija asɔ nɛ a bee kuŋ basa nɛ b wɔ kumo to kikɛ.
23Esa kama nɛ e bee tiŋ a keta mbe kɔnɔ nɛ kudonduloŋ,
bee mɔlga mbe kumu ashi asheŋ lubi nɛ tɔrɔ to nna.
24Esa kama nɛ kamoowu nɛ ŋkpensheŋ bɔlɔ mo to,
bee wora basa eyur to nna.
25Etɔlpo nɛ e maa sha kushuŋ,
be asɔ shaso bee yɛr mo luwu to nna,
26ŋkpal manɛ so saŋkikɛ e bee fin kenya kusɔ ko nna.
Ama esa nɛ e bee wora asheŋ niŋiso bre
bee kaa kɔ asɔ nna a kɛ saŋkama.
27Enyɛnpe Ebɔrɛ kishi belubiworapo be sarga ga.
Fɔŋfɔŋ saŋɛ nɛ b nya kumo ekpa lubi so na.
28Efɛ be shɛda maaŋ tiŋ n yili kikɛ,
kashenteŋ be shɛda nawule e naŋ yili.
29Kenyɛn nɛ belubiworapo kɔ a wora asheŋ,
ama basa nɛ baa wora asheŋ niŋiso bre
bee fɛ nfɛra nna pɔɛŋ nsaa wora asheŋ.
30Dimɛdi be kanyiasheŋ kikɛ nɛ asheŋ be kepinto nɛ ŋkre kikɛ maaŋ tiŋ m pɔɔ Enyɛnpe Ebɔrɛ so.
31Kanaŋkama so nɛ fo bela ase;
hale nɛ fo kena to be egbaŋɛ nɛ benapo wora shiriya gba,
Enyɛnpe Ebɔrɛ na e naŋ pɔɔ so.
© 2015 GILLBT Ghana Institute of Linguistics, Literacy and Bible Translation