Aŋasa 12
12
1Ekama nɛ e bee sha keniŋi
bee nya kenyi nna.
Ama ekama nɛ e kishi keniŋi
la ewulpo nna.
2Enyɛnpe Ebɔrɛ be kagbene
bee fuli basa lela so nna,
ama e maa sa bekama
nɛ baa kre asheŋ lubi bre
kashuli kikɛ.
3Kumu kpakpaso be asheŋ woraso
maa kuŋ esa,
ama kecheembiya bre
bee shin nɛ esa
bee yili to kiŋkiŋ nna.
4Eche nɛ e kɔ da lela
bee bar mo kul kamusaŋɛ
nɛ kagbenefuli nna,
ama eche nɛ e bee wɔtɔ
mo kul anishinyɔr to bre
du fanɛ kɔrtɔ lubi nna.
5Beshenteŋjipo bee wora asheŋ
nɛ amo be ekpa so nna,
ama belubiworapo bre
bee fule basa nna.
6Belubiworapo be mmalga
bee bar kamɔ nna,
ama basa cheembi bre be mmalga
bee lara esa eyilikpa lubi to nna.
7Belubiworapo baŋ tɔr,
bumo nɛ bumo kanaŋ kikɛ
bee mur nna,
ama basa cheembi bre
be kanaŋ wɔtɔ nna mbaanaayɔ.
8Esa be kanyiasheŋ
e naa sa mo kechɔrɔ,
nɛ kawulisheŋ malɛ
bee shin nɛ baa keni esa jiga.
9Kebaa la ebɔlpo a shuŋ a ji
bɔ keta fo kumu n yili
eyilikpagboŋ nsaa di akoŋ.
10Basa lela bee keni
bumo be asɔbɔya gba so nɛnɛ nna,
ama basa lubi bre
be shɛŋ maŋ wɔ
bumo be asɔbɔya to.
11Bedɔpo nɛ b pere kenishi a shuŋ
maaŋ paŋ kusɔ jiso kikɛ,
ewulpo e naa jija saŋɛ
a bɛ asheŋ fuloŋ so.
12Belubiworapo bee kɔ nna a fin
alubi be kewora,
ama basa cheembi bre
mur achin nna
n yili fanɛ ndibi,
a maa gbuŋgbuŋ to kikɛ.
13Belubiworapo gbagba be mmalga
e naa kilgi a kre bumo,
ama beshenteŋjipo bre
bee lara bumo be amu asheŋ to nna.
14Feeŋ nya kusɔ kama
nɛ fo wora ŋko ŋ kaŋɛ be tɔnɔ.
15Ewulpo nawule
e naa fɛ fanɛ
e kɔ kashenteŋ nna saŋkama.
Enyiashempo bre
bee kaŋ kusoe nna a nu kasotoji.
16Ewulpo e naa nya agbo a puŋi kɔnɔ.
Enyiashempo bre
bee kplaŋ katege so nna.
17Fo baŋ ji kashenteŋ,
basa bee wora asheŋ a niŋi ekpa nna,
ama efɛ bre bee shin nɛ basa
bee wora asheŋ a gbɛto nna.
18Esa nɛ e maa fɛ nfɛra
pɔɛŋ nsaa malga
be mmalga bee besa nna fanɛ
b ka ŋe esa kasaŋɛ nna,
ama enyiashempo be mmalga bre
bee wushi ebesa nna.
19Efɛ maa chɛr nsaa fo ekar,
ama kashenteŋ bre
wɔtɔ nna mbaanaayɔ.
20Efɛ e wɔ basa nɛ baa kre
asheŋ lubi be nfɛra to,
ama bekama nɛ baa kre asheŋ lela bre
kɔ kagbenefuli nna.
21Asheŋ lubi maa tiŋ a tu
basa lela,
ama belubiworapo bre
maaŋ gelge tɔrɔ kikɛ.
22Enyɛnpe Ebɔrɛ kishi befɛpo
be asheŋ ga,
ama mbe kagbene bee fuli
bekama nɛ baa ji kashenteŋ so nna.
23Enyiashempo bee ta
mbe kenyi nna a ŋana,
ama ewulpo bre
bee shin nɛ mbe kawuli
bee di efuli nna.
24Basa nɛ baa pere kenishi a shuŋ
e naŋ ji kuwura;
ntɔl bre bee ta esa nna
a ki kenya.
25Kafɔŋ beeŋ tiŋ n shin nɛ
fo paŋ kagbenefuli,
ama kamalga lela
bee leŋ basa to nna.
26Basa cheembi bee ŋini
bumo teriana ekpa lela nna,
ama belubiworapo bre
be ekpa bee yɛr bumo
kefoe to nna.
27Etɔlpo maa nya
kusɔ nɛ e bee sha kikɛ,
ama esa nɛ e bee pere kenishi
a shuŋ bre beeŋ pɛ mbe anishi
be kabuibi.
28Kecheembiya be ekpa
e kɔ ŋkpa,
luwu maŋ wɔ kumo be
ekpa to kikɛ.
© 2015 GILLBT Ghana Institute of Linguistics, Literacy and Bible Translation