Salmos 61
61
Díos tꞌayakohen chꞌan ti jeheni
Salmo kuènté David
1Jaha Díos kuènténi, tihín ti tꞌéyani itsen,
tjínki̱tsani ti nkehe tjanchahani.
2Ti kjuéje̱xin chjasintajni kjuákꞌeni kꞌuéye̱he̱ni ti jaha
kixin í tsjachahyani, ó chjina ndá chrókꞌuéni.
Tjaké ti jeheni chritaón ijnko ixro̱ noi kixin tsaáxini.
3Jaha mé éxi ijnko tja̱tꞌo̱ imá noi
kixin jaha nchekaá ti jeheni ti siín ti sin nínkaon.
4Tjinkaoni tsjakꞌeni ti ndo̱a nkochríxín
kixin ti kjuachaxin kuèntá mé chrókꞌuayakuenxiáni.
5Jaha Díos kuènténi, ó kuihín ti nkehe ndáchroni,
la jaha mé kjuánjua ti nkehe tsꞌáyéhe̱
ti sin tsjikosáyehe ti ihni̱á.
6Jaha chróchje̱hé itsjé ña̱o chrókjuákꞌe ti rey a
la ko nchónhña nánó chrókjuákꞌe chꞌan.
7Chrókjuákꞌe chꞌan nkochríxín ti itjen jaha Díos
Chrokꞌuayakohén chꞌan la ko chrókjuinki̱tsa chꞌan
kixin jaha kui̱konoéhé chꞌan.
8A̱ndá xi̱kaha chrótsjeni chrókjuikosáyeheni ti ihni̱á nkochríxín.
Kaín ña̱o chrókjuínchexiteyáni ti nkehe ndáchroni.
© 2016, Wycliffe Bible Translators, Inc. All rights reserved.