فِلِبِّي 4 的熱門經文

分享

مَا تِهِمُّوا لِأَيِّ شَيّءْ لَاكِنْ فِي كُلِّ حَالْ، أَشْكُرُوا اللّٰهْ وَ قَدُّمُوا لَيَّهْ طَلَبْكُو بِصَلَاةْ وَ دُعَا.

وَ اللّٰهْ يَنْطِيكُو سَلَامَهْ الْفَايِتْ فِكِرْ النَّاسْ. وَ خَلِّي سَلَامْ اللّٰهْ يَحْفَضْ قُلُوبْكُو وَ أَفْكَارْكُو وَ تَقْعُدُوا ثَابْتِينْ فِي الْمَسِيحْ عِيسَى.

يَا أَخْوَانِي، دِي هِي آخِرْ وَصِيَّةْ النَّنْطِيهَا لَيْكُو. فَكُّرُوا فِي أَيِّ شَيّءْ الصَّحِيحْ وَ الشَّرِيفْ وَ الْعَادِلْ وَ الطَّاهِرْ وَ الْمَحْبُوبْ وَ الْكَرِيمْ وَ الْأَفْضَلْ وَ الْوَاجِبْ لَيَّهْ الشُّكُرْ. وَ كُلَّ شَيّءْ الْمِثِلْ دَا، خُطُّوا أَفْكَارْكُو فَوْقَهْ ثَابْتِينْ.

نَقْدَرْ نِلْحَمَّلْ أَيِّ شَيّءْ بِالْمَسِيحْ وَ هُو يَنْطِينِي قُدْرَةْ.

أَفْرَحَوْا بِرَبِّنَا عِيسَى دَايْماً وَ بَتَّانْ نُقُولْ لَيْكُو، أَفْرَحَوْا!

وَ أَنَا نَعَرِفْ كَدَرْ اللّٰهْ يَنْطِيكُو بِكَتَرَةْ كُلَّ شَيّءْ التِّحْتَاجَوْا لَيَّهْ. أَيْوَى، يَنْطِيكُو مِنْ غُنَايَهْ الْمَجِيدْ بِالْمَسِيحْ عِيسَى.

وَ طَبُّقُوا دَايْماً كُلَّ شَيّءْ الْعَلَّمْتُوهْ مِنِّي وَ لِقِيتُوهْ مِنِّي، كَنْ مِنْ كَلَامِي السِّمِعْتُوهْ وَلَّا مِنْ حَالِي الشِّفْتُوهَا. وَ اللّٰهْ رَبّ السَّلَامْ يُكُونْ مَعَاكُو.

خَلِّي رُوحْكُو تَبْقَى طَوِيلَةْ قِدَّامْ أَيِّ نَادُمْ. رَبِّنَا عِيسَى قَرِيبْ.

نَعَرِفْ كِكَّيْف نِعِيشْ فِي الْمَسْكَنَةْ أَوْ فِي الْغُنَى. أَنَا عَلَّمْت كِكَّيْف نَبْقَى رَضْيَانْ فِي أَيِّ بَكَانْ وَ فِي كُلِّ حَالْ، كَنْ أَنَا شَبْعَانْ وَلَّا جِيعَانْ وَ كَنْ عِنْدِي كَتِيرْ وَلَّا شِيَّةْ.

وَ أَنَا مَا قَاعِدْ نَشْكِي لَيْكُو مِنْ الْمَسْكَنَةْ. أَشَانْ أَنَا عَلَّمْت كِكَّيْف نِعِيشْ فِي أَيِّ حَالْ.