Zapoteco, Yatee

Wdé gok da' ni, wdé Jesusen' gan nbab Galilea. Bi gónele' cheje' gan nbab Judea dan' žénegekle benne' judío wnná bia' ka', benne' nníta'gake' ga na', gótgake' Ḻe'. Ža na' za' žin lni chegak benne' judío ka' kate' žejsá' ḻáže'gake' ka x̱a wdé chégake' wnníta'gake' gan besbíngake' ẕan yo'o lága'do'. Che ḻen benne' biche' Jesusen' ka' belyi'e Ḻe', na' wnnágake':
—Bžoj ga ni, na' wyéj gan nbab Judea nich ḻé'egekle benne' wsedle chio' ka', benne' nníta'gake' ga na', yeḻa' wak ka' da' žono'. Cha' žénele no benne' gónbia'gak benách ka' ḻe', bi žone' ngáche'ze da' žone'. Dan' žono' yeḻa' wak ẕen ki, bḻoe'el kwino' ḻawgak yógo'te benách ka' nich ḻé'egekle' da' žono'.
Ki wnnagak benne' biche'e ka' dan' bi na' chejḻé'gake' chie' Ḻe'. Naž Jesusen' gože' ḻégake':
—Bi na' žin ža chia' nich wḻoe'ela' dan' naka' ḻawgak benách ka', san ža ni naken nich bi da' gonle ḻe'e. Benách ka' nníta'gake' yežlyó nga bi ẕzóagake' ḻe'e cheḻa'ale, san ẕzóagake' neda' cheḻa'ale dan' ẕḻoe'ela' ḻaw kan zej nake', na' da' ẕnnia' nak bian' bi nak chawe' da' žóngake'. Le chej ḻe'e lni na'. Bi cha'a neda' lni na' na'a dan' bi na' žin ža chia'.
Kate' beyóž gože' ḻégake' da' ki, bga'ne' gan nbab Galilea.

Wdé jak benne' biche' Jesusen' ka' lni na', ḻezka' wyeje' Ḻe', kege kwáselo, san ngáche'ze wyeje'. Gan žak lni na', wdiljgak benne' judío wnná bia' ka' Jesusen', na' wnnágake':
—¿Gaẕ zoa bennen'?
Benne' zan bcháḻjgake' da' zanḻe'e kan nak che Jesusen'. Baḻe' wnnágake':
—Nake' chawe'.
Yebaḻe' wnnágake':
—Bi nake' chawe' dan' žon ḻáže'le' benách ka'.
Nitó benne' bi bchaḻje' kwáselo kan nak che Jesusen', dan' benne' zan ka' ẕžébegake' benne' judío wnná bia' ka'.
Kate' ba bžin gachje lni na', bḻa' Jesusen' ḻi'a yodo', na' bsedle' benách ka' nníta'gake' ga na'. Bebán ḻáže'gak benne' judío ka', na' wnnágake':
—¿Nakx̱ chen', žakḻe'e bennen', na' bi nsedle' che yodo'?
Bechebe Jesusen', na' gože' ḻégake':
—Da' žsedla' neda', kege chezan', san naken che X̱ažo Dios, Bennen' bseḻe'e neda'. Cha' žénele no benne' gone' kan žénele Dios, na' gákbe'le' cha' nak che Dios da' žsedla' benách ka' o cha' žakze chia' ẕchaḻja'. Nóte'teze benne' ẕchaḻje' žakze chie', žone' ki nich gápegak benách ka' ḻe' ba la'ne, san bennen' žénele' gápegak benách ka' ba la'ne bennen' bseḻe'e ḻe', benne' ni ẕchaḻje' da' naken dot da' li, na' bi žon ḻaže'e.
’Moisés bdie' ḻo na'le da' bchi'le Dios, san nitole ḻe'e bi žonle kan ẕnna x̱tiže'e. ¿Biẕ chen' žénelele gotle neda'?
Beži'igak benne' zan ka', na' belyi'e Ḻe':
—Da' x̱iwe' žónḻenen le' tẕen. ¿Noẕkze benne' žénele' gote' le'?
Bechebe Jesusen', na' gože' ḻégake':
—To yeḻa' wak bena', na' žebán ḻáže'le yógo'tele. Da' li Moisés benne' chele dan' nžogen ḻo beḻa' chele dan' nak bian' nzi'le x̱tiža' Dios. Kege Moisés na'kze bennen' chele, san wẕi'en ḻo na'gak x̱a x̱ta'we' ka'. Na'a, ḻa'kze nak ža la'y, ẕchogle ḻo beḻa' chegak x̱kwide' byo chele ka' dan' nak bian' zej nbabbe' che Dios. Cha' želzi'be' ḻo beḻa' chégakbe' dan' nak bian' kate' nak ža la'y, nich bi wka'nle ca'ze da' ẕnna da' bchi'le Moisés, ¿ẕža'le neda' dan' beyona' to benne', nich beyake' cháwe'do' kate' nak ža la'y? Bi žaḻa' kon wchi'a ḻáže'le, san le wchi'a ḻaže' kan nak da' li.

Naž bchaḻjgak baḻe benne' ka' nníta'gake' ḻo yež Jerusalén, na' wnnágake':
—¿Kege benne' ni bennen' žeyiljgak benne' judío wnná bia' ka' nich gótgake' Ḻe'? Le wia nga. Kwáselo ẕchaḻje', na' bi be žé'gake' Ḻe'. ¿Žákbe'egekle benne' ka', benne' ẕnna biá'gake' žo'o, da' li benne' ni nake' Benne' Criston', Bennen' žaḻa' nna bi'e žo'o? Benne' ni, nnezlžo ga benne' Ḻe'. Kate' yid Benne' Criston', bi nnezle nitó benne' ga benne' Ḻe'.
Wzóa Jesusen' ẕsedle' benách ka' ḻo ẕchil yodo', na' katen' benle' da' ni, wnníe' zižje, na' wnné':
—¿Nónbia'le neda', na' nnézlele ga benne' neda'? Bḻa'a yežlyó nga, kege žakze chia', san Dios na'kze bseḻe'e neda', na' Ḻe', bi nónbia'le-ne'. Neda' nónbi'a-ne', dan' za'a ḻo wlaze' Ḻe', na' Ḻekze' bseḻe'e neda'.
Naž ben byéngake' séngake' Ḻe', san nitó benne' bi bex̱we' Ḻe', dan' bi na' žin ža chie' nich choe'e ḻo ná'gake'. Benne' zan bejḻé'gake' chie', na' wnnágake':
—Kate' ḻa' Benne' Criston', ¿gone' da' zanže yeḻa' wak ka' ka da' žon Benne' ni?

Béngekle benne' yodo' fariseo ka' da' ẕchaḻjgak benách ka' kan nak che Jesusen', na' bx̱oz wnná bia' ka' ḻen benne' yodo' fariseo ka', bséḻa'gake' ni'a ná'gake' nich chejx̱éngake' Ḻe'. Naž Jesusen' wnné':
—Yetó chí'ido'ze sóaḻena' ḻe'e, na' naž yeyá'a gan zoa X̱a', Bennen' bseḻe'e neda'. Yeyiljle neda', san bi yežéḻ-lele neda'. Gan chejsóa' neda' bi gak yidle ḻe'e.
Naž benne' judío ka' belyi'e ljéžgake' ka', na' wnnágake':
—¿Gaẕ chej benne' ni, gan bi yežéḻ-lžo-ne'? ¿Cheje' gan zej nnita' benne' judío ka', benne' zej náslase' dot yežlyó nga, na' wsedle' benne' zi'to' ka'? ¿Biẕ zejḻás dan' wnné': “Yeyiljle neda', na' bi yežéḻ-lele neda'” na' ḻezka': “Gan chejsóa' neda' bi gak yidle ḻe'e”?

Kate' nak ža ze ḻawte ža che lni na', ža na' naken blo, wzó ža' Jesusen'. Wnníe' zižje, na' wnné':
—Cha' zoa no benne' ẕbiž yichj ḻáẕda'we', žaḻa' yide' gan zoa', na' ye'je'. Nóte'teze benne' žejḻi'e chia' neda', gak chie' kan nyejw ḻe'e yiche la'y, da' ẕnnan: “Ḻo yichj ḻáẕdo'w bennen' galj da' gaken ka to nis yego” dan' gon chawen' benách ka', na' gata' yeḻa' nban chégake'.
Bchaḻj Jesusen' da' ni kan nak che Dios Be' La'y, Bennen' žaḻa' yedjsóaḻene' benne' ka' chejḻé'gake' che Jesusen'. Ki wnné' dan' bi na' žin Dios Be' La'y na', dan' bi na' yeyepe Jesusen' gan gake' Benne' blo.

Kate' benne' zan ka' béngekle' da' ki, baḻe' wnnágake':
—Da' li benne' ni nake' bennen' ẕchaḻje' ḻo wláz Dios, bennen' bchebe ḻaže' Dios seḻe'e chežo.
Yebaḻe' wnnágake':
—Benne' ni nake' Benne' Criston'.
Wnnagak yebaḻe benách ka':
—¿Galj Benne' Criston' gan nbab Galilea? Nyejw ḻe'e yiche la'y da' ẕnnan: “Galj Benne' Criston' ladjw ẕi'n ẕa'só Dabí ka', na' gake' benne' yež Belén, da' goken laž Dabín'.”
Ka' goken, gok chóplegak benne' ka' ni'a che Jesusen'. Gónegekle' baḻe' séngake' Jesusen', san nitó benne' bi be bene' chie'.

Naž ni'a na'gak bx̱oz wnná bia' ka' ḻen ni'a na'gak benne' yodo' fariseo ka', bežíngake' gan zej nnita' benne' yodo' wnná bia' ka', na' benne' ki belyi'e ni'a ná'gake' ka', na' wnnágake':
—¿Biẕ chen' bi žedjwa'le-ne'?
Naž bechébegak ni'a ná'gake', na' wnnágake':
—Bi ẕchaḻj nitó benne' kan ẕchaḻj bennen'.
Naž beži'igak benne' yodo' fariseo ka', na' wnnágake':
—¿Be'le latje ben ḻáže'le' ḻe'e? ¿Zoa no benne' wnná bia', o no benne' yodo' fariseo, bejḻi'e chie'? Benne' ki, benne' bi žákgake' x̱tiža' Dios, zej nbage'e ẕia.
Ḻezka' zoa Nikodemo ga na', bennen' bḻe'e gan wzóa Jesusen' to xe'le. Nikodemon' nake' benne' yodo' fariseo, na' gože' ḻégake':
—¿Ẕchogžo che to benne' gate' ni'a che da' bchi'le Dios žo'o cha' bi yénležo chie' zga'ale nich nnézležo biẕ bene'?
Naž beží'igake' yebaḻe' ka', na' belyi'e ḻe':
—¿Nako' le' benne' Galilea? Beḻ da' nyejw ḻe'e yich la'y, na' wio' batkle bžoj nitó benne' ẕchaḻje' ḻo wláz Dios gan nbab Galilea.
Naž che chégake' beyéjgake' lížgake'.

聆聽 ẔWA 7