Jowulu - 2022 WBT (NT) Non Drama

Jowulu - 2022 WBT (NT) Drama

Farinsiyɛnŋ kiri ǹʼnama wuru konaŋ ni tɔnŋ na tu Yesu kalindaŋ mwɔɔnna kila-a, tu ntiŋ i kí wu-ri, ŋì i fwuu Yuhana sun. Nka sɛli ki ra, Yesu yɛri ki wuru koŋ wu-a kì, ntiŋ wɔ kalindaŋ kiri wuru konaŋ ki wu-a. Yesu niŋ tɔ-i waarinŋ wɔ̀ ru, ntiŋ i po san Yude sɔɔta ki ru, ntiŋ i a pwulu ta Galile sɔɔta ki ru.
Ntiŋ pwulula ki, ntiŋ kakan wuru-i ntiŋ i de Samari sɔɔta ki ru. Niŋ ɲaan ki tɛ, ntiŋ i ta so Samari sɔɔta ki kili bɛɛ ra, nwɔ̀ tɔ i tu Sikari, niŋ mani ki nari Yakuba wɔ ji samaan ki ra kì, ntiŋ ninwɔ̀ wɔri wuru a danshuru Yusufu tɛ. Yakuba wɔ kɔninta ki wuru niŋ mani nu. Yesu tiri yɛlimaan ki so-i niŋ mani nu waarinŋ wɔ̀ ru, ntiŋ i ta sɔɔ niŋ juta ki tɔnŋ na. Niŋ waari ru, sunŋ ki wuru juu-ra so ŋununfaninmwuŋ kɔ. Samarimari bɛɛ i na ju faamaŋ nu. Yesu i ǹʼbi nmari tɛ tu : « Ju po wɔri ńʼtɛ, ŋí a ńʼmwunu. » Niŋ waari ru, ntiŋ wɔ kalindaŋ kiri ta wuru nufinŋ samaŋ nu kili ki ru.
Yesu ǹʼbi wɔ̀ tan-i, tu niŋ Samarimari ki ju wɔri a tɛ, niŋ i bo nmari tɔnŋ sun, nmari tu : « Miŋ i Yawutu, miŋ i ǹʼbi-ri tu míŋ Samaritɔnŋ ju wɔri nʼtɛ wa? » (Yawutu kiri wuru ǹʼtɛ arì fa Samaritɔnŋ kiri i dɛbɛ bi dantenŋ sun kì.)
Yesu i nmari wɔ wulu ki rupwulu tu : « Kirinŋ i kafinŋ wɔ̀ wɔri-ra, a miŋ ji wuru niŋ tɔ-ri, niŋ fa koŋ wɔ̀ i ju ki ceeli-la miŋ gbɛ, a miŋ ji wuru nintiŋ tɔ-a, minki wuru-ra ji mwunu ju ki rafɛ-a ntiŋ gbɛ, ntiŋ i ji wuru-ra ɲaninkulutɔnbi ju ki wɔri miŋ tɛ. »
Nmari tu Yesu tɛ : « Dɔɔkunŋ míŋ ŋuntiŋ? Kulu ábɛɛ gbɛ kì, kɔninta ki i ji cuu. Ábɛɛ po-a niŋ ɲaninkulutɔnbi ju ki wu da? Yibɛɛ Tiŋ cɛɛnni Yakuba ka kɔninta ka tu-i yibɛɛ tɛ, ntiŋ yɛri ki fa a daŋ kiri fa arɔɔ nafulufinŋ kiri i ji mìŋ ju ka mwunu. Ábɛɛ gbɛ-i yibɛɛ tiŋ cɛɛnni Yakuba ki wu niŋ na wa? »
Yesu i nmari rupwulu tu : « Konwɔtiŋ ka ju ka mwunu, jumwunu i faa-ra nintiŋ pa. Nka, míŋ i ju wɔ̀ wɔri-ra, a konwɔtiŋ niŋ mwunu, jumwunu na ntiŋ pa fɛsɛfɛsɛ kili kì. Niŋ bantenŋ i kì, míŋ ju wɔ̀ wɔri-ra, niŋ i ji-a jubyinta ntiŋ ciiru, nwɔ̀ yɛri-ra kì, nka ŋì i wulu-la fɔ ŋì i ɲaninkulutɔnbi kɔbali wɔri ntiŋ tɛ. »
Nmari tu Yesu tɛ : « Míŋ ŋuntiŋ, á niŋ ju ki bɛɛ wɔri míŋ tɛ, nwɔma jumwunu fa míŋ pa kili kì, niŋ fa míŋ fa tu na-a ju faa kwumaŋ kili kì. »
Yesu tu nmari tɛ : « Ta nʼshinŋ ki dɔri na kwumaŋ. » Mari ki tu : « Shuru miŋ gbɛ kì. »
Yesu tu : « Miŋ sɛli bi-i, ŋi i ǹʼbi tu : ‹ shuru míŋ gbɛ kì. › Sabu miŋ sɔɔ de-i shuru taanŋ ŋununu, miŋ fa shuru wɔ̀ yɛ dɔɔ, niŋ miŋ shinŋ i kì. Miŋ nwɔ̀ bi-i, niŋ i sɛli i. »
Mari ki tu : « Ŋuntiŋ, míŋ i ǹʼja-a ɲaan wɔ̀ tɛ, ábɛɛ i Kirinŋ wɔ cintɔnŋ i. Á sɛli bi ńʼtɛ : Yibɛɛ tiŋ cɛɛnni kiri Kirinŋ gbɛ-i ka tɔnŋ ka sun kwumaŋ, nka ábɛɛ i ǹʼbi-ri tu Kirinŋ kakan ŋì i gbɛ Yerusalɛmu dɔɔkunŋ? »
Yesu tu nmari tɛ : « Mari ki, bili ǹʼna tu, jibi yiri-ra nmaŋ, tɔnŋ ka walima Yerusalɛmu wulu a rama Tiŋ ki gbɛrama ki wu kì. Ábɛɛ i finŋ gbɛ-a, á nwɔ̀ tɔ-a kì, nka yibɛɛ Yawutu kiri i nwɔ̀ gbɛ-a, yibɛɛ i niŋ tɔ-a, sabu mwubi ki i po-a Yawutu kiri gbɛ. Nka waaci yirira i nmaŋ, niŋ yɛri so-i kɔ, Kirinŋ gbɛtɔnŋ sɛlɛsɛli kiri ra na Tiŋ ki gbɛ-ri ɲini fa sɛli wu, sabu Tiŋ ki i konaŋ ni ceeli-la, nwɔ̀ri i ǹʼgbɛ-a ninkunŋ. Kirinŋ i Ɲini i, niŋ ki ra, nwɔ̀ri i ǹʼgbɛ-a, nini kakan-i kí i ǹʼgbɛ ɲini ki wɔ so ki wu, niŋ fa sɛli wu. »
Mari ki tu ntiŋ tɛ : « Míŋ ǹʼtɔ-i tu Kirinŋ Ɲaannakonshimaan ki, ninwɔ̀ i dɔri-ra tu Kirisa, tu niŋ kakan ŋì i na. A ntiŋ na waarinŋ wɔ̀ ru, ntiŋ a na bi ki bataa ɲaanbi yibɛɛ tɛ. »
Yesu tu : «  MÍŊ YƐ, mínwɔ̀ i wulu ki bi-a miŋ tɛ kaa. »
Niŋ waaci ki ru, ntiŋ wɔ kalindaŋ kiri i arì pwulu na. Kí na-i fa Yesu wu wulubi-a nmari tɛ, niŋ i bo kí tɔnŋ sun. Nka kí tɔri tenŋ jɛɛn, kí i ntiŋ nanɔri tu nfɛnŋ na ntiŋ wulubi-a nmari tɛ, walima tu ntiŋ nfɛnŋ ceeli-la nmari gbɛ kì.
Niŋ ma-i, mari ki i awɔ jufaafinŋ ki tu nmaŋ, nmari i tiri kili ki ru, nmari i ta ǹʼbi konaŋ kiri tɛ tu : « Á na maannashɛɛli, shuru bɛɛ i kwumaŋ, ntiŋ míŋ mabi kiri bataa tɔ-i, ntiŋ i yìrì bi míŋ tɛ. Kirisa wɔ̀ wulu bi-i, a niŋ na ji-i ji? » Konaŋ kiri i po kili ki ru, kí i ta Yesu maŋ ki ru.
Niŋ waari ru, kalindaŋ kiri wuru Yesu rafɛ-a, kí i ǹʼbi-ri tu : « Kalimɔɔ, á nufinŋ nu sa! »
Nka ntiŋ tu kí tɛ : « Nufinŋ tɔri numaanna i míŋ gbɛ, ábɛɛ nwɔ̀ tɔ-a kì. »
Kalindaŋ kiri niŋ nama-i waarinŋ wɔ̀ ru, kí tu arìmaŋ tɛ tu : « Koŋ na-i nufinŋ wɔri ntiŋ tɛ kwumaŋ wa? »
Yesu tu : « Nufinŋ wɔ̀ i míŋ pyii-ra, niŋ i ŋí i ńʼcintɔnŋ ki dintɛ bi ki ma, niŋ fa ŋì míŋ bo-i cinŋ wɔ̀ ra, ŋí i niŋ nafaa. Ábɛɛ yɛrima kiri ǹʼbi-a tu : ‹ Ǹʼpyɛ tu-i ɲɛ pyiiraŋ i bilaŋ tɛri waari ki i so kì wa? › Míŋ a ǹʼbi ábɛɛ tɛ, ńʼtu á á ŋununfɛshi, á i ji kiri shɛɛli, bilaŋ ki so-i, ǹʼtɛri waari ki so-i! Dɔnsaŋ, bilaŋ tɛritɔnŋ ki i awɔ sali ki kila-a, ntiŋ i bilanaŋ ki rakɔli bo-ri a tɛ ɲaninkulutɔnbi kɔbali ki tɛ, niŋ ɲaan ki tɛ bilaŋ firitɔnŋ ki fa bilaŋ tɛritɔnŋ ki i yoori-ra arìmaŋ fan. Sabu talinŋ wɔ̀ i ǹʼbi-a tu : ‹ Ǹʼbɛɛ i bilaŋ ki firi-ra, ǹʼtɔri i ǹʼtɛri-ri ›, niŋ talinŋ ki i sɛli i. Míŋ ábɛɛ bo ta-i bilaŋ tɛri, ábɛɛ yɛlinŋ dantenŋ tan nwɔ̀ bi ru kì. Koŋ tɔri ri ǹʼyɛlinŋ ki tan-i, ábɛɛ i po-ri nini dona. »
Niŋ kili ki ru, Samaritɔnŋ mwɔɔnna i bili Yesu ra niŋ mari ki wɔ wulu kiri bira, tu : « Míŋ bi finŋ woo finŋ ma-i, ntiŋ niŋ bataa tɔ-i, ntiŋ i yìrì bi míŋ tɛ. » Niŋ ki ra, Samaritɔnŋ kiri namaan ki Yesu tɛ, kí i ntiŋ nafɛ tu ntiŋ tu arì fan. Niŋ ki ra, ntiŋ i sunŋ fuuli ma kí fan. Yesu wɔ wulu kiri i ji sababu koŋ mwɔɔnna mwɔɔnna i bili ntiŋ na sɛbɛ. Kí i ǹʼbi mari ki tɛ tu : « Yibɛɛ bili-i ntiŋ na mɔɔn wulu kiri bira, niŋ bantenŋ i kì, yibɛɛ yɛrima kiri ntiŋ bi wulu kiri rama-i, niŋ i yibɛɛ bili ǹʼna tu mìntiŋ ki juniɲa Mwutɔnŋ ki i. »


Niŋ sunŋ fuuli ki kɔɔtɛ, Yesu i a pwulu tiri Galile. Yesu yɛri ki wuru ǹʼbi-a tu : « Kirinŋ wɔ cintɔnŋ gbɛbi kila-a a yɛri wɔ konanbi ki kanfɛ kì. » Nka, ntiŋ a pwulu so-i Galile waarinŋ wɔ̀ ru, niŋ mani nu tɔnŋ kiri i ntiŋ paka shɔ, sabu kíbɛɛ yɛrima kiri wuru ɲaannabyɛ ki ru Yerusalɛmu, kí fani i ji ntiŋ wɔ bi mamaan kiri bataa ja-ri.
Ntiŋ i a pwulu de Kana kili ki ru Galile sɔɔta ki ru sɛbɛ, ntiŋ ju ki ji wuru dunfɛnŋ ki i kili wɔ̀ ra. Niŋ ta wuru fa sɔɔta ki jɛntɔnŋ bɛɛ wu Kafarinawumu kili ki ra, niŋ danshuru kiramaan wuru-i. Niŋ ǹʼnama-i waarinŋ wɔ̀ ru tu Yesu po Yude sɔɔta ki ru, ntiŋ i a pwulu na Galile, ntiŋ i ta ntiŋ nafɛ tu ntiŋ na a danshuru ki kene, ninwɔ̀ i nfaanna beeni.
Yesu tu ntiŋ tɛ tu : « A ábɛɛ taanmashɛ ri fa botɔnsunbi ri ja kì, ábɛɛ so-a bilinabi ma-i kì wa? »
Nka jɛntɔnŋ ki i ǹʼbi tu : « Ŋuntiŋ, á na jona, míŋ danshuru ki fa na beeni kì. »
Yesu tu ntiŋ tɛ tu : « Tiri, miŋ danshuru ki ɲaninkulutɔnŋ yɛ. » Sɔɔta ki jɛntɔnŋ ki i bili Yesu wɔ wulu ki ra, ntiŋ i tiri awɔ mani ki ru.
Ŋì i ntiŋ tu saa ki fan, ntiŋ tɛ baara matɔnŋ mwɔɔnna i ntiŋ ŋununafu, kí i ǹʼsunjo ntiŋ tɛ tu : « Miŋ danshuru ki kene-i. » Ntiŋ i kí ranɔri tu waarinŋ danwɔ ru afinŋ danshuru ki pari. Kí i ntiŋ nupwulu tu : « Ciŋ bilana, waaci tentɔnŋ ki waari ki ru, shii ki po san-i daŋ ki ru. » Daŋ ki tiŋ ki i ǹʼja tu Yesu ǹʼbi-ri afinŋ tɛ mìŋ waaci tenŋ ki ru tu : « Miŋ danshuru ki ɲaninkulutɔnŋ yɛ. » Niŋ mani nu, ntiŋ i bilinabi ma, ŋì i bo ntiŋ wɔ kaninsuntɔnŋ kiri bataa sun. Niŋ i Yesu wɔ taanmashɛ fuluntɔnŋ mamaan ki i, ntiŋ pwulumaan ki kɔɔtɛ, ntiŋ i po Yude sɔɔta ki ru, ntiŋ i na Galile.

聆聽 Yuhana 4