If you would like a copy of this version please contact info@davaraudiobibles.org

Pengo Parja New Testament, CC-BY-SA-4.0, The Love Fellowship. Pengo Parja New Testament, CC-BY-SA-4.0, Davar Partners International, 2021.

Pengo Parja New Testament

Pengo Parja Bible by The Love Fellowship is licensed under Creative Commons Attribution-ShareAlike 4.0 License.

ଯୀଶୁ ଡଙ୍ଗାତାକେ ଦୁମ୍‌ଜି ହାମ୍‌ଦୁର୍ ଆରେ ର ପାଡ଼୍‌କା ନିପଣ୍ ମାନି ଜାର୍ ଦେସ୍‌ତ ହାଚାନ୍। ଆରେ ହୁଡ଼ାଟ୍, ହିର୍କଲ୍ ରଗ୍‌କାଟାକାନିଙ୍ଗ୍‌ ଟାଟିଲାହାଙ୍ଗ୍ ପିଣ୍‌ଜି ଯୀଶୁ ଲାଗାୟ୍ ତାହିୱାତାର୍, ଯୀଶୁ ହେୱାର୍ ପାର୍ତି ହୁଡ଼୍‌ଜି ହେ ହିର୍କଲ୍ ରଗ୍‌କାଟାକାନିଙ୍ଗ୍‌ ୱାଚ୍‍ଚାନ୍, କାଡ଼୍‍ଦେ, ଶାସ୍ ଆହା, ନି ପାପ୍ ୱିଜୁ କେମା ଆତାତ୍।
କେତେକ୍ ଯିହୁଦି ଦରମ୍‌ନି ପଣ୍ଡିତାର୍ ଇଦାଙ୍ଗ୍ ୱେଚାର୍। ହେୱାର୍ ଜାର୍-ଜାର୍‌ବିତ୍ରେ ୱେଚ୍‌ପା ୱେଚ୍‌ପି ଆତାର୍, “ଇୱାନ୍ ଇଲେଗ୍‌ଦି ବେଣ୍ କିନାନା, ହାତେନେ ହେୱାନ୍ ହେ ଈଶ୍ୱରଲେକେ। ଇଦାଙ୍ଗ୍ କାଜିଙ୍ଗ୍ ହେୱାନ୍ ଈଶ୍ୱରତିଙ୍ଗ୍ ନିନ୍ଦା କିନାନା।”
ଯୀଶୁ ହେୱାର୍ ମାନ୍ତି ବାବ୍‌ନା ପୁନ୍‌ଞ୍ଜି ୱେଚ୍‌ଚାନ୍, “ଏପେଙ୍ଗ୍ ଇନା କିଦେଙ୍ଗ୍ ଜାର୍-ଜାର୍ ମାନ୍ତ ଇଲେକେ ବାବିକିନାଦେରା? ଏପେଙ୍ଗ୍ ଅଲପ୍ ବାବିକିଜି ହୁଡ଼ାଟ୍ ‘ଆନେଙ୍ଗ୍ ହିର୍କଲ୍ ରଗ୍‌କାଟାକାନିଙ୍ଗ୍‌ ପାପ୍ ୱିଜୁ କେମା କିତାଙ୍ଗ୍, ଇଞ୍ଜି ୱେଚ୍‌ନାକା ଆଡ଼୍‌ୱା, କି, ନିଙ୍ଗା ନି ଟାଟି ଆସ୍ତି ଇଞ୍ଜ ହାଲା ଇଞ୍ଜି ୱେଚ୍‌ନାକା ଆଡ଼୍‌ୱା।’ ମାତର୍ ପୁର୍ତିତାକେ ପାପ୍ କେମା କିଦେଙ୍ଗ୍ ସରଗ୍‌ତାଙ୍ଗ୍ ୱାଜିମାଚି ମାନାୟ୍ ହିମ୍‍ଣାତି ଆଦିକାର୍ ମାନାତ୍, ଇଦାଙ୍ଗ୍ ହେଲେକେ ଏପେଙ୍ଗ୍ ପୁନ୍‌ଞ୍ଜି ମାନାଟ୍। ଇଦାଙ୍ଗ୍ କାଜିଙ୍ଗ୍ ଯୀଶୁ ହିର୍କଲ୍ ରଗ୍‌ଦାକାନିଙ୍ଗ୍ ୱେଚ୍‌ଚାନ୍, ‘ନିଙ୍ଗା, ଜାର୍ ଟାଟି ଆସ୍ତି ଏନେଙ୍ଗ୍ ମିଞ୍ଜ ହାଲା।’ ”
ହେବେତାଙ୍ଗ୍ ହିର୍କଲ୍ ରଗ୍‌ଦାକାନ୍ ନିଙ୍ଗ୍‌ଞ୍ଜି ତା ଟାଟି ଆସ୍ତି ତାଞ୍ଜ ହାଚାନ୍। ହେବେ ରୁଣ୍ଡାଆତି ମାନାୟାର୍ ହେଦାଙ୍ଗ୍ ହୁଡ଼୍‌ଜି କାବା ଆତାର୍। ଈଶ୍ୱର ମାନାୟ୍ ହିମ୍‌ଣାତିଙ୍ଗ୍ ଇୱିଜୁ ରଗ୍‌ଦାକାରିଙ୍ଗ୍ ହାର୍‌କିନି ଆଦିକାର୍ ହିତାନ୍‌ନା। ହେଦାଙ୍ଗ୍ କାଜିଙ୍ଗ୍ ମାନାୟାର୍ ଈଶ୍ୱରତିଙ୍ଗ୍ ଜୟ୍-ଜୟ୍ କିତାର୍।


ଯୀଶୁ ହେବେତାଙ୍ଗ୍ ହାନିହିଙ୍ଗ୍ ମାଥିଉ ତର୍‌ଦାକାନିଙ୍ଗ୍ ସିସ୍ତୁଏନ୍‌ନି ବାହାତାକେ କୁଚ୍‌ଚି ମାଚାକା ହୁଡ଼୍‌ଜି, ଯୀଶୁ ହେୱାନିଙ୍ଗ୍ ୱେଚ୍‌ଚାନ୍, “ନା ପାଚେ ୱା।” ହେବେତାଙ୍ଗ୍ ହେୱାନ୍ ତା କାମାୟ୍ ପିସ୍ତି ତାପାଚେ ହାଚାନ୍।
ତାପାଚେ ଯୀଶୁ ମାଥିଉ ଇଞ୍ଜ ଚିଞ୍ଜେଙ୍ଗ୍ କୁଚ୍‍ଚାର୍, ହେପାଦ୍ନା କେତେକ୍ ସିସ୍ତୁଏନ୍‌ନାକାର୍ ଆରେ ପାପିର୍ ୱାଜି, ତା ଚେଲାହିର୍ ହୁଦାଙ୍ଗ୍ କୁଚ୍‌ଚି ମାଚାର୍। ଇଦାଙ୍ଗ୍ ହୁଡ଼୍‌ଜି ପାରୁସିଦଳ୍‍ନି ମାନାୟାର୍ ଯୀଶୁ ଚେଲାହିରିଙ୍ଗ୍ ୱେଚ୍‌ଚାର୍, ମି ଗୁରୁ ଇନେସ୍‌କିଜି ପାପି ଆରେ ସିସ୍ତୁଏନ୍‌ନାକାର୍ ହୁଦାଙ୍ଗ୍ କୁଚ୍‌ଚି ତିନାନା?
ମାତର୍ ଯୀଶୁ ଇବେଣ୍ ୱେନ୍‌ଞ୍ଜି, ହେୱାରିଙ୍ଗ୍ ୱେଚ୍‌ଚାନ୍, “ହାର୍ଦି ମାନାୟ୍ ଡାକ୍‍ଟର୍ ତାକେ ହାଲୁର୍, ମାତର୍ ବେମାର୍ ନିକାର୍ ଡାକ୍‍ଟର୍ ତାକେ ହାନାର୍।” ଆରେ ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, ଈଶ୍ୱର ଇ ସାସ୍ତର୍‌ନି ୱେଚ୍‌ଚି ବେଣ୍‌ତିଙ୍ଗ୍ ଏପେଙ୍ଗ୍ ପୁନି ଦର୍‌କାର୍, “ଆପ୍‌କା ପୁଜା ବିଦି କିମାଟ୍ ମାତର୍ ଏପେଙ୍ଗ୍ ମାନାୟାରିଙ୍ଗ୍ ସାଇଜ କିୟାଟ୍।” ଆନେଙ୍ଗ୍ ଦରମ୍ ମାନାୟ୍ କାଜିଙ୍ଗ୍ ୱାୱାତାଙ୍ଗ୍‌ନା, ମାତର୍ ପାପିରିଙ୍ଗ୍ ହିର୍‌ବେଦେଙ୍ଗ୍ ୱାତାଙ୍ଗ୍‌ନା।


ହେପାଦ୍ନା ଡୁବନ୍‌ହିନି ଯୋହନ ଚେଲାହିର୍ ଯୀଶୁ ଲାଗାୟ୍ ୱାଜି ୱେଚ୍‌ଚାର୍, “ଆପେଙ୍ଗ୍ ଆରେ ପାରୁସିଦଳ୍‍ନି ମାନାୟାର୍ ତିନ୍‌ୱାଦାଙ୍ଗ୍ ଉଣ୍‌ୱାଦାଙ୍ଗ୍ ଉପାସ୍ କିନାପା, ମାତର୍ ମି ଚେଲାର୍ ଇନା କିଦେଙ୍ଗ୍ ଉପାସ୍ କିଉରା?”
ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ବର ନିପ୍‍ଣାକାର୍ ହୁଦାଙ୍ଗ୍ ବର ମାନିହିଙ୍ଗ୍ ହେୱାର୍ ଇନାକା ତିନ୍‌ୱାଦାଙ୍ଗ୍ ଉଣ୍‌ୱାଦାଙ୍ଗ୍ ଉପାସ୍ କିଜି ଦୁକ୍‌ତାଙ୍ଗ୍ ମାନାର୍‌କି? ମାତର୍ ଦିନ୍ ୱାନାତ୍, ଏଚେକାଡ଼୍‌ଦ ହେୱାର୍‌ତାଙ୍ଗ୍ ବରଙ୍ଗ୍ ବିନେକିନାର୍, ହେପାଦ୍ନା ହେ ଦିନ୍ ହେୱାର୍ ତିନ୍‌ୱାଦାଙ୍ଗ୍ ଉଣ୍‌ୱାଦାଙ୍ଗ୍ ଉପାସ୍ କିନାର୍। ଇନେର୍ ପୁଃନିହେନ୍ଦ୍ରାନି ଅଟିବାନା ପାନିହେନ୍ଦ୍ରାତାକେ ମେହାଇକିଜି ସିଲାଇ କିଉର୍; ମାତର୍ ପୁଃନିହେନ୍ଦ୍ରାନି ଅଟିବାନା ପାନିହେନ୍ଦ୍ରାତାକେ ମେହାଇ କିତିସ୍ କେଞ୍ଜ୍‍ନାତ୍, ତାପାଚେ ମେହାଇକିତି ଅଟିବାନା ଯବର୍ କିଜି କେଞ୍ଜ୍‍ନାତ୍। ହେଲେକେ ଆରେ ଇନେର୍ ପୁଃନି ଅଙ୍ଗୁର୍ ରାସ୍ ପାନି ତଲ୍‌ମଣାତାକେ ଇଟୁର୍। ଯଦି ହେ ତଲ୍‌ମଣାତାକେ ଅଙ୍ଗୁର୍ ରାସ୍ ଇଡ଼୍‌ତିସ୍ ପୁଲାଆଜି କେଞ୍ଜ୍‍ନାତ୍, ଇନେସ୍‌କି ହେ ତଲ୍‌ମଣା ପାନାକାଆୱାଦାଙ୍ଗ୍ କେଞ୍ଜ୍‍ନାତ୍। ଅଙ୍ଗୁର୍ ରାସ୍ ଆରେ ତଲ୍‌ମଣା ରିଣ୍ଡାଙ୍ଗ୍ ପା ନଷ୍ଟ ଆନିକ୍। ଇନେସ୍‌କି ପୁଃନି ଅଙ୍ଗୁର୍ ରାସ୍ ପୁନି ତଲ୍‌ମଣା ତ ଇଟ୍‌ନି ଦର୍‌କାର୍। ଏନେଙ୍ଗ୍ କିତିସ୍ ଅଙ୍ଗୁର୍ ରାସ୍ ଆରେ ତଲ୍‌ମଣା ପା ନଷ୍ଟ ଆଉକ୍।”


ହେପାଦ୍ନା ଯାଇରସ୍‌ ଇଞ୍ଜି ର ମାନାୟ୍ ମାଚାନ୍। ଇନେସ୍‌କି ହେୱାନ୍ ଯିହୁଦିର୍ ପାର୍ତାନା ଇଲ୍‌ନି ମୁକ୍ୟା ମାଚାନ୍। ହେୱାନ୍ ହାଲ୍‌ଜି ଯୀଶୁଙ୍ଗ୍ କାଲ୍ ତାରେନ୍ ସାରାଣ୍ ଏନ୍ତାନ୍, ଆରେ, ବେସି ଗୁୱାରି କିଜି ୱେଚ୍‌ଚାନ୍, ମାଞ୍ଜ୍ କଇ ହାନାତ୍‍ଦେ। ଏନେଙ୍ଗ୍ ମାଞ୍ଜ ୱାଜି ହେଦେଲିଙ୍ଗ୍ ଆସ୍‌ପି ହାର୍ କିୟା ଇନେସ୍‌କି ହେଦେଲ୍ ହାଃନାକା ଜିନାତ୍।
ହେବେତାଙ୍ଗ୍ ଯୀଶୁ ନିଙ୍ଗ୍‌ତାନ୍, ଆରେ ଚେଲାହିର୍ ହୁଦାଙ୍ଗ୍ ଯିହୁଦିର୍ ପାର୍ତାନା ଇଞ୍ଜି ମୁକ୍ୟା ଯାଇରସ୍‌ ପା ତାପାଚେ ପାଚେ ହାଚାନ୍। ହେ ମାନାୟ୍ ଗଉଲି ବିତ୍ରେ ର କଗ୍‌ଲେ ମାଚାତ୍। ହେଦେଲିଙ୍ଗ୍ ବାର ବାର୍ହୁ ପାତେକ୍ ବିଟାଡ଼୍ ରଗ୍ ଆସ୍‍ତି ମାଚାତ୍। ହେ କଗ୍‌ଲେ ଯୀଶୁ ପାଚ୍‌ବାଗାୟ୍ ୱାଜି ତା ଉସ୍‌ପିତି ହେନ୍ଦ୍ରାନି ଅଟିତିଙ୍ଗ୍ ଆସ୍‌ପାତାତ୍। ଇନେସ୍‌କି ହେ ବିଟାଡ଼୍ ରଗ୍ ଆହିଆତି କଗ୍‌ଲେ ବାବିକିଜି ମାଚାତ୍ ଯେ, ଆନେଙ୍ଗ୍ ଯୀଶୁ ଉସ୍‌ପିତି ହେନ୍ଦ୍ରାତିଙ୍ଗ୍ ଆସ୍‌ପିତିସ୍ ଆନେଙ୍ଗ୍ ହାର୍ ଆତାଙ୍ଗ୍‌ମା।
ମାତର୍ ଯୀଶୁ ମାସ୍‌ଜି ହେ କଗ୍‌ଲେଙ୍ଗ୍ ହୁଡ଼୍‌ଜି ୱେଚ୍‌ଚାନ୍, “ଏ କଇ ଏନେଙ୍ଗ୍ ନାଙ୍ଗେଙ୍ଗ୍ ପାର୍ତି କିତ୍‌ତାୟ୍, ହେ ପାର୍ତି ନିଙ୍ଗେଙ୍ଗ୍ ହାର୍ କିତ୍‌ତାତ୍।” ହେଦିନ୍‌ତାଙ୍ଗ୍ ହେ କଗ୍‌ଲେ ରଗ୍‍ତାଙ୍ଗ୍ ହାର୍ ଆତାତ୍।
ତାପାଚେ ଯୀଶୁ ହେବେତାଙ୍ଗ୍ ଯିହୁଦିର୍ ପାର୍ତାନା ଇଲ୍‌ନି ମୁକ୍ୟା ଯାଇରସ୍‌ ଇଞ୍ଜ ଇକାତାନ୍। ଆରେ ହେବେ ହାଃତି ଇଞ୍ଜ ମରି ବାଜା ଆଡ଼୍‌ବାନାକା ଯୀଶୁ ୱେଚାନ୍, ଆରେ କାକୁଲ୍‌ତି ଆଜି ଆଡ଼୍‌ବାନାକା ହୁଡ଼୍‌ତାନ୍। ହେବେତାଙ୍ଗ୍ ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଆଡ଼୍‌ବାମାଟ୍‌ କି ବାଜାମରି କିମାଟ୍, ଏପେଙ୍ଗ୍ ବାର୍ତ ହାଲାଟ୍। ଇନେସ୍‌କି ଗାଡ଼୍‌ଚେ ହାଃୱାତାତ୍‌ନା ମାତର୍ ହୁଞ୍ଚାତ୍‌ନା।” ଇବେଣ୍ ୱେନ୍‌ଞ୍ଜି ମାନାୟାର୍ ଯୀଶୁଙ୍ଗ୍ କିଜ୍ରାଇ କିଜି ଗାଇତାର୍। ମାନାୟାର୍‌ ଇଞ୍ଜାଙ୍ଗ୍ ବାର୍ତ ହାଚି ପାଚେ, ଯୀଶୁ ଗାଡ଼୍‌ଚେ ମାନି ଇଲ୍ ବିତ୍ରେ ହାଚାନ୍। ହେୱାନ୍ ଗାଡ଼୍‌ଚେ କେଇ ଆସ୍ତି ନିକ୍ତାନ୍, ହେବେତାଙ୍ଗ୍ ହେ ଗାଡ଼୍‌ଚେ ଜିବୁନ୍‌ଆଜି ନିଙ୍ଗ୍‌ତାତ୍। ଇ ଗଟାଆତି ବେଣ୍ ହେ ଏରିୟା ସାରା ବିଚାଆତାତ୍।


ଯୀଶୁ ହେବେତାଙ୍ଗ୍ ହାନିହିଙ୍ଗ୍ ରିୟାର୍ କାଣାମାନାୟ୍ ପାଚେ-ପାଚେ ହାଲ୍‌ଜି ଗାଜାକାଟ୍ କିଜି ୱେଚେଙ୍ଗ୍ ଲାଗାତାର୍, “ଏ ଦାଉଦ ରାଜା ଲାତ୍ରାନି ଯୀଶୁ, ମାଙ୍ଗେଙ୍ଗ୍ ଦୟାକିଦା।”
ହେବେତାଙ୍ଗ୍ ଯୀଶୁ ଇଞ୍ଜ ହାଚାନ୍, ଆରେ ହେ କାଣା ମାନାୟାର୍ ପା ହେ ଇଞ୍ଜ ହାଚାର୍। ଯୀଶୁ ହେୱାରିଙ୍ଗ୍ ୱେଚ୍‌ଚାନ୍, “ଆନେଙ୍ଗ୍ ମିଙ୍ଗେଙ୍ଗ୍ ହାର୍ କିଦେନ୍ ଇଞ୍ଜି ପାର୍ତି କିନାଦେରା କି?” ଆଁ ମାପୃ, “ଆପେଙ୍ଗ୍ ପାର୍ତି କିଦ୍‌ନାପା।”
ହେବେତାଙ୍ଗ୍ ହେୱାନ୍ ହେୱାର୍ କାଣ୍‍କୁକାଙ୍ଗ୍ ଆସ୍‌ପିସ୍ ୱେଚ୍‌ଚାନ୍, “ମି ପାର୍ତି ହୁଡ଼୍‌ଜି ଆନେଙ୍ଗ୍ ମିଙ୍ଗେଙ୍ଗ୍ ହାର୍ କିତ୍‌ତାଙ୍ଗ୍।” ହେବେତାଙ୍ଗ୍ ହେୱାର୍ କାଣ୍‌କୁ ହୁଡ଼୍‌ଦେଙ୍ଗ୍ ଆଡ଼୍‌ତାର୍। ଆରେ, ଯୀଶୁ ହେୱାରିଙ୍ଗ୍ ଆଦେସ୍ ହିଜି ୱେଚ୍‌ଚାନ୍, “ହୁଡ଼ାଟ୍, ଆନେଙ୍ଗ୍ ମିଙ୍ଗେଙ୍ଗ୍ ହାର୍ କିତି ବିଷୟ ଇନେରିଙ୍ଗ୍ ପା ୱେଚ୍‌ମାଟ୍।” ମାତର୍ ହେୱାର୍ ହସିହାଲ୍‍ଜି ହେ ୱିଜୁ ନିପଣ୍ ହେୱାନ୍ କିତି କାମାୟ୍ ୱେଚ୍‌ଚି ବୁଲଆତାର୍।


ହେ ରିକାର୍ କାଣା ମାନାୟାର୍ ହାର୍ ଆଜି ହାଚି ପାଚେ କେତେକ୍ ହେନି ମାନାୟ୍ ର ତତ୍‌ଲା ବୁତ୍ ଡୁତି ମାନାୟ୍‌ତିଙ୍ଗ୍ ଯୀଶୁ ଲାଗେ ତାହିୱାତାର୍। ଆରେ, ଏଚେପାଦ୍ନା ଯୀଶୁ ହେ ମାନାୟ୍‌ତାଙ୍ଗ୍ ତତ୍‌ଲା ବୁତ୍ଆତ୍ମାତିଙ୍ଗ୍ ପିହିକିତାନ୍, ହେୱାନ୍ ବେଣ୍‌କିଦେଙ୍ଗ୍ ହାଙ୍ଗ୍‌ତାନ୍। ହେବେତାଙ୍ଗ୍ ମାନାୟାର୍ ଚାନିଆ ଆଜି ୱେଚ୍‌ଚାର୍, ଇସ୍ରାଏଲନି ମାନାୟ୍‌ବିତ୍ରେ ଇନାୱେଡ଼ାଙ୍ଗ୍ ପା ଏଲେଙ୍ଗ୍ ଆୱାତାତ୍‌ନା।
ମାତର୍ ପାରୁସିଦଳ୍‍ନି ମାନାୟାର୍ ୱେଚ୍‌ଚାର୍, “ଇୱାନ୍ ଶୟତାନ ଆତ୍ମା ସାଇଜତାଙ୍ଗ୍ ବୁତ୍ଆତ୍ମାକାଙ୍ଗ୍ ପିହିକିନାନା।”
ତାପାଚେ ଯୀଶୁ ସହର୍ ଆରେ ନାସ୍‌କୁ ନାସ୍‌କୁକାଙ୍ଗ୍ ବୁଲାଆଜି ଯିହୁଦିର୍ ପାର୍ତାନା ଇଲ୍‌କୁକାଙ୍ଗ୍ ହାଲ୍‌ଜି ହିକ୍ଷାହିଜି ଈଶ୍ୱର ସାସନ୍ କିନି ରାଜିନି ହାର୍ଦିକାବୁର୍ ଶୁଣାୟ୍ କିଜି ମାଚାନ୍। ଆରେ ବାରବିନି ରଗ୍ ଆରେ ୱିଜୁ ପର୍‌କାର୍ ଦୁକ୍ କଷ୍ଟନିକାରିଙ୍ଗ୍ ହାର୍‍କିତାନ୍।


ଯୀଶୁ ମାନାୟାରିଙ୍ଗ୍ ହୁଡ଼୍‌ଜି ଜିବୁନ୍ କାଡିକିତାନ୍। ଇନେସ୍‌କି ହେୱାର୍ ଗଡ଼ିୟା ହିଲ୍‌ୱି ମେଣ୍ଢାଙ୍ଗ୍ ଲେକେ ମାଚାର୍। ଆରେ ହେୱାର୍ ଚିନ୍‌ବିନ୍ ଆଜି ଦୁକ୍‌କଷ୍ଟ ପାୟାଆଜି ମାଚାର୍। ଯୀଶୁ ତା ଚେଲାରିଙ୍ଗ୍ ୱେଚ୍‌ଚାନ୍, “ତାସ୍ ବେସି ମାନାତ୍ ମାତର୍ ତେଜ୍‌ନାକାର୍‌ ଉଣା, ହେଲେକେ ଈଶ୍ୱର ରାଜିନି ବେଣ୍ ୱେନ୍‌ଞ୍ଜି ପାର୍ତି କିଦେଙ୍ଗ୍ ବେସି ମାନାୟ୍ ମାନାର୍, ମାତର୍ ଈଶ୍ୱର ରାଜିନି ହାର୍ଦିକାବୁର୍ ଶୁଣାୟ୍ କିନାକାର୍ ଉଣା। ଈଶ୍ୱର ସାସନ୍ କିନି ରାଜିନି ତାସ୍ ରୁଣ୍ଡାଇ କିଦେଙ୍ଗ୍ କାମାୟ୍ କିନି ମାନାୟ୍‌ତିଙ୍ଗ୍ ପକ୍ତେଦେଙ୍ଗ୍ ତାସ୍‌ନି ମାଲିକ୍ ଈଶ୍ୱର ଲାଗାୟ୍ ପାର୍ତାନା କିୟାଟ୍।”

聆聽 ମାଥିଉ 9