If you have would like a copy of this version please contact info@davarpartners.org

Text: Dhimal New Testament, CC-BY-SA-4.0, The Love Fellowship. Audio: Dhimal New Testament Audio Bible, CC-BY-SA-4.0, Davar Partners International, The Love Fellowship, 2022

Dhimal New Testament

Dhimal New Testament, by The Love Fellowship is licensed under Creative Commons Attribution-ShareAlike 4.0 License.

निकोदेमस मिङ पाका एमि द्‍याङ हिघाहि। वा यहुदिगेलाइको धार्मिक आगुवा हिघाहि कालाउ फारिसि हिघाहि। निकोदेमस न्हिसिनता येसुकोता लोहि कालाउ वासेहेङ दोअ्हि, “गुरु ज्यु, केलाइ गिनाखे परमेस्वर नासेहेङ केलाइहेङ धिर्पालि दिङगिल्का हि। हाइपालिपानु परमेस्वर नासेहेङ मासाघाइपा भरि नाअ् दोङ पाका चिन्हागेलाइ हासु बुङ पालि माद्वाङ।”
येसु उङकोहेङ उत्तारा पिहि, “जातिङ भारि का नासेहेङ दोअ्खा, हासु बुङ नावा जेन्तेङ जोलोम माजेङनु वा परमेस्वरको सासन आनुभब पालि माद्वाङ।”
निकोदेमस येसुहेङ दोअ्हि, “द्‍याङ बुरातेङ हेसा जोलोम जेङलि द्वाङ? हाइ उङको ताइको आमाइको हामुता दुल्तेङ आरोङ न्हे पल्ति जोलोम जेङलि द्वाङ रो? माको मादोखे।”
येसु उत्तारा पिहि, “जातिङ भारि का नासेहेङ दोअ्खा, चि कालाउ आत्मासो जोलोम माजेङपा थेकापा हासु बुङ परमेस्वरको सासनता दुल्लि माद्वाङ। द्‍याङ खिनिङ जिउहेङ जोलोम पिलि दोअ्खे, कालाउ पबित्तरो आत्मा स्वर्गसो नावा जिबन पिखे। का नासेहेङ नावा जेङतेङ जोलोमलि गोयाङ दोअ्काता माआवाइ। भेरमा जिसो मन्ताचाखे ओसोङ दोलाइखे। नाअ् भेरमाको गाला हिङखेना, कालाउ इङको हिसोसो लोखे कालाउ हिसो हानेखे, इङको मागिस्वाना। पबित्तरो आत्मासो जोलोम जेङका गोताङ द्‍याङ इन्सिकाङ जेङखे।”
निकोदेमस येसुहेङ हिअ्हि, “या हेसा ज्याङ कुनु?”
येसु निकोदेमसहेङ जोबाफ पिहि, “नाअ् इस्राएल सारभिता माहान गुरु हिना, नाअ् बास्ताबता इदोइ काथा बुझिलि गोयाना।” जातिङ भारि का नासेहेङ दोअ्खा, केलाइ जेदोङ गिनाखे इङकोङ दोअ्नाखे, कालाउ केलाइ जेदोङ तिङका हिनाहि इङको कोङ साक्सि पिन्हाखे, कालाउ नेलाइ केलाइको दोअ्का काथाता खाङधुरि मापा सुखेना। का नेलाइहेङ सुमिङता हिका काथागेलाइ दोअ्लाउ बुङ नेलाइ खाङधुरि मापा सुखेना, झन स्वर्गको बारेता काथा दोअ्नु हेसापा खाङधुरि पास्वाना? स्वर्गसो खुअ्तेङ लोका का द्‍याङको चान बाहेक आरु हासु बुङ स्वर्गता हानिका मान्थु। जेसाङ मोसा चाका-मान्दा थामेता पितलको पुय्याँहेङ तोल्हि, एन्साङ पातेङ का द्‍याङको चान बुङ तोल्हिन्हालि गोयाङ। कालाउ जाइ-जाइ का ह्रुता खाङधुरि पाखे, इम्बालाइ दोङ आनान्त जिबन निनावा।
“हाइपालिपानु परमेस्वर सुमिङको द्‍याङगेलाइहेङ इसिका प्रेम पाहि, कालाउ वा दोङ ताइको एमि खिनिङ चान पिहि। कालाउकि वासेहेङ खाङधुरि पाकालाइ हासु बुङ नास माज्याको, भरु वा दोङ आनान्त जिबन निनाको। हाइपालिपानु परमेस्वर ताइको चानहेङ सुमिङको द्‍याङगेलाइहेङ दन्ड पिलि माको, भरु सुमिङको द्‍याङगेलाइहेङ बान्चिपालि दोअ्तेङ दिङगिल्हि। जाइ परमेस्वरको चान ह्रुता खाङधुरि पाखे, इम्बालाइ दन्ड मानिनाङ, भरु वाको ह्रुता खाङधुरि मापाकालाइ चाहि लाम्फाङ दुसिका जेङका हि। हाइपालिपानु इम्बालाइ परमेस्वरको एमि खिनिङ चान ह्रुता खाङधुरि पाका मान्थु। न्ययाको कारन चाहि इदोइ दोङ, थास्साइका चाहि सुमिङता लोका हि। कालाउ द्‍याङगेलाइ थास्साइका खाङतेङ भरु कितिकितिका रेम्नाङ गिखे, हाइपालिपानु इम्बालाइको काम दुस्ट हि। हाइपालिपानु दुस्ट काम पाकालाइ झाराङ थास्साइका मन्दा माताखे। कालाउ थास्साइकाता इम्बालाइको पाका कामगेलाइ तिनाङ दोअ्तेङ थितेङ इम्बालाइ थास्साइकाता मालोखे। कालाउ सत्येता तेअ्का द्‍याङ चाहि थास्साइकाता लोखे कालाउकि परमेस्वरको आग्या केम्तेङ पाका वाको कामगेलाइ द्‍याङगेलाइ खानाको।”

कालाउ न्हुसो येसु कालाउ वाको चात्यागेलाइ यहुदिया जिल्लाता हानिहि कालाउ इन्ता इम्बालाइ दोफा कोम्हा सोमोइको भाअ्सिङ इन्ताङ बासा हि, कालाउ द्‍याङगेलाइहेङ बप्तिस्ता पिहि। युहान्‍ना बुङ सामारिया प्रेदेसता परिका सालिम नगरको भेरपा एनोन दोअ्का देराता बप्तिस्ता पिघाहि, हाइपालिपानु इन्ता हेन्जा चि हिघाहि कालाउ इन्ता द्‍याङगेलाइ बप्तिस्ता ह्रुलि लोघाखे। ओदोङ बेला थेकापा युहान्‍ना झ्यालखानाता परेका मान्थुघाहि।
कालाउ युहान्नाको चात्यागेलाइसो एमि यहुदि दोफा धार्मिक मुन्धुम चोख्याइलिको बिसोइता तर्क-वितर्क पालि तेङहि। युहान्नाको चात्यागेलाइ लोतेङ युहान्नाहेङ दोअ्हि, गुरु ज्यु, यर्दन झोराको ओदोइ पार जाइ नाङको दोफा हिघाहि, जाइको बारेता नाअ् साक्सि पिन्हा, “खाङसु, वा बप्तिस्ता पिदोङखे कालाउ झाराङ वाकोता हानिदोङखे।”
युहान्‍ना जोबाफ पिहि, हिदोइ बुङ द्‍याङगेलाइ स्वर्गसो मापिपा धाउ वा दोङ हाइ दोङ निङलि माद्वावा। का ख्रिस्ट माको, कालाउ का ते वा खाङतेङ लाम्फा दिङगिल्का खिनिङ हिघा। काङको दोअ्का काथा नेलाइ ताइमिङ हिङका हिसुना। दारा दरवाइनि दोफा बिहु पाखे, कालाउ दाराको लोकोन्दि जाअ्तेङ दाराको काथा हिङतेङ खुसि जेङखे, एसापा दोङ काङको ह्रदय आनन्दहोइ एला भरि पुर्न जेङका हि। येसु हेन्जा बारालि गोयाङ कालाउ का चाहि आसा कोम्लि गोयाङका हि।
स्वर्गसो लोका चाहि झाराङ खाङतेङ माहान हि। प्रिथिबिता जोलोम जेङका द्‍याङगेलाइ चाहि प्रिथिबिता हिखे कालाउ प्रिथिबिकोङ काथा दोअ्खे। कालाउ स्वर्गसो लोका झाराङ खाङतेङ माहान हि। वा जेदोङ तिङका कालाउ हिङका हि, इङको साक्सि वा पिखे कालाउ वाको साक्सि हेन्जाङ द्‍याङगेलाइ माह्रुखे। कालाउ जाइ वाको साक्सि ह्रुका हि, वा चाहि परमेस्वर सत्ये हि दोअ्का काथाको प्रमान पिखे। हाइपालिपानु जाइहेङ परमेस्वर दिङगिल्हि, वा दोङ परमेस्वरको काथा धुइखे, हाइपालिपानु वासेहेङ परमेस्वर पबित्तरो आत्मा भरि पुर्न पिका हि। आबा परमेस्वर चानहेङ प्रेम पाखे कालाउ गोताङ आनेमाने वाकोङ खुरता पिका हि। जाइ परमेस्वरको चान ह्रुता खाङधुरि पाखे, वाको दोफा आनान्त जिबन हि। जाइ परमेस्वरको चानको आग्या माकिखे वा आनान्त जिबन मानिनाङ, कालाउ परमेस्वरको दन्ड वाको ह्रुता परियावा।

聆聽 युहान्‍ना 3