Kiembu - 2002 KENBS (NT) Drama

Vîndî îmwe mûndû wetagwa Lazaro wa kuuma îtûûrarî rîa Bethania aarî mûrwaru. Bethania nîkuo Mariamu na mwarwang'ina Maritha maatûûraga, na maarî aa mwarwang'ina na Lazaro. Mariamu nîke vuvarî wacokire gwîtîrîria Mwathani maguta maanungaga waro na akîmûgiria na njuîrî ciake. Mûrwang'ina Lazaro nîke warî mûrwaru. Kwoguo Mariamu na Maritha nîmaatûmanire Jesû akeerwe atîrî, “Mwathani, mûrata waku nîmûrwaru.”
Rîrîa Jesû eegwire ûguo nîwaugire atîrî, “Mûrimû ûyû tîwa gûtûma Lazaro akue, nwatî nîwagûtûma Ngai akumue, atî Mûriû wa Ngai agoocithue na njîra yaguo.”
Jesû nîwendete Maritha, mwarwang'ina wana Lazaro. Nwatî rîrîa ke eegwire atî Lazaro aarî mûrwaru, nîwekarire mîthenya îngî îîrî kûrîa aarî. Nîwacokire akîra arutwa ake atîrî, “Tigani tûcoke Judea.”
Nao arutwa nîmaamûcokerie atîrî, “Mwarimû, ûrenda gûcoka Judea rîngî na nî mîthenya mînini mîvîtûku kuuma andû a kuo menda gûkûriva na mathiga?”
Nake Jesû nîwamerire atîrî, “Na kinthî mûthenya ndwîthagîrwa na mathaa îkûmi na maîrî? Kwoguo mûndû wa wonthe ûthiîcaga mûthenya ndavîngagwa nîûndû nîwonaga ûtheri wa gûkû nthî. Nwatî mûndû wa wonthe ûthiîcaga ûtukû nîavîngagwa nîûndû ndethagîrwa na ûtheri wa kûmûvotithia kwona.” Jesû arîkia kuga ûguo nîwacokire akiuga atîrî, “Mûrata wetû Lazaro nîkwa amamîte nwatî nîngûthiî kûmûkîria.”
Nao arutwa nîmaamwîrire atîrî, “Mwathani, ethîrwa nîkwa amamîte nîakûvona.”
Jesû eendaga kûmeera atî Lazaro aarî mûkuû, nwatî meciragia aaugaga atî Lazaro aarî toro. Kwoguo Jesû nîwacokire akîmeera cararûkû atîrî, “Lazaro nîmûkuû, nwatî nîûndû wenyu nîrîmûkenu nîûndû ndirarî vo. Na nîûndû wa ûguo mue nîmûkûvota kûgîa na wîtîkio. Maûndû mama monthe nîmakûmûguna. Ûkani tûthiî kûrî ke.”
Nake Toma (ûrîa wetagwa Mathatha) nîwacokire akîra arutwa acio engî atîrî, “Ûkani muonthe tûthiîcanie na Mwarimû nîguo tûgakue vamwe nake!”

Rîrîa Jesû aakinyire, nîwethîre Lazaro arî mûthiriu mîthenya îna kuuma athikwa. Îtûûra rîa Bethania rîarî kîndû ta kilomita ithatû kuuma îtûûrarî rîa Jerusalemu, na andû eengî kuuma Judea maarî athiîu kûmîrîria Maritha na Mariamu nîûndû wa gûkuîrwa nî mûrwang'ina.
Rîrîa Maritha eegwire atî Jesû nîaûkîte, nîwathiîre kûmûtûnga nwatî Mariamu nîwatigirwe ekarîte nyomba. Maritha nîwerire Jesû atîrî, “Ûngîrarî vo Mwathani, mûrwaiya ndangîrakuire! Nwatî nîmbîcî atî wana rîu Ngai nîagûkûva kîndû wa kîonthe kîrîa ûkûmwîtia.”
Jesû nîwamwîrire atîrî, “Mûrwanyûkwe nîakaariûka.”
Maritha nîwamûcokerie atîrî, “Nîmbîcî atî nîakaariûka mûthenya wa mûthiia.”
Jesû nîwamwîrire atîrî, “Nie nînie kûriûka na nînie mwoyo. Mûndû wa wonthe ûmbîtîkîtie wana akua nîagaatûûra mwoyo; na mûndû wa wonthe ûtûûraga mwoyo na ûmbîtîkîtie ndarî vingo agaakua. We nîwîtîkîtie ûguo?”
Maritha nîwaugire atîrî, “Ii Mwathani! Nie nîmbîtîkîtie atî we nîwe Mesaya Mûriû wa Ngai ûrîa warî aûke gûkû nthî.”

Maritha aarîkia kuga ûguo nîwacokire akîthiî agîîta mwarwang'ina Mariamu na makîthiî vandû marî onga na akîmwîra atîrî, “Mwarimû nîwaûka na nîaragwîta.” Rîrîa Mariamu eegwire ûguo nîwaûkîrire na akîvinyûra ya nja kûmûtûnga. (Jesû ndaarî agûtonya gîcagirî, nwatî aarî wa varîa Maritha aamûtûngîte.) Nao Ayahudi arîa maarî na Mariamu kûu nyomba makîmûmîrîria, nîmaamûrûmîrîre vîndî îrîa maamwonire aûkîra na avinyûra ya nja, nîûndû meciragia atî athiîte mbîrîrarî kûrîrîra vo.
Mariamu nîwakinyire varîa Jesû aarî, na amwona nîwegwîthirie nthî magûrûrî make na akîmwîra atîrî, “Ûngîrarî vo Mwathani mûrwaiya ndangîrakuire.”
Rîrîa Jesû oonire Mariamu na arîa maarî nake ûrîa maarîraga, nîwaringirwe nî ntha akîthînîka mûno ngororî yake, na akîmaûria atîrî, “Mûmûthikîte va?”
Nao nîmaamûcokerie atîrî, “Ûka ûkone Mwathani.”
Jesû nîwarîrire. Nao andû nîmaaugire atîrî, “Oneni ûrîa aramwendete!”
Nwatî andû amwe gatagatîrî kao nîmaambîrîrie kûrania atîrî, “Na kinthî mûndû ûyû tîke wavingûrire mûtumumu metho? Nîkwa ke atangîravotire kûgiria Lazaro akue?”

Wa rîngî Jesû nîwathînîkire mûno ngororî yake, na akîthiî mbîrîrarî îrîa yarî ngurunga na yakunîkîtwe na îthiga. Nake nîwerire andû amwe arîa maarûngamîte vo atîrî, “Thengutiani îthiga vo!”
Nwatî Maritha, mwarwang'ina na ûcio wakuîte nîwerire Jesû atîrî, “Mwathani, nîgûkûnunga naaî mûno nîûndû ke nîmûthiriu mîthenya îna kuuma athikwa!”
Jesû nîwamwîrire atîrî, “Na kinthî ndikwîrire wetîkia nîûkwona riiri wa Ngai?” Nao nîmaathengutirie îthiga vo. Jesû nîwacokire akîroria îgûrû na akiuga atîrî, “Vava nînagûcokeria ngatho nîûndû nîûnthikagîrîria. Nie nîmbîcî nîûnthikagîrîria vingo cionthe, nwatî nîrauga ûguo nîguo andû aya marî ava mamenye atî we nîwe wandûmire.” Arîkia kuga ûguo, nîwetanire na mûgambo mûnene atîrî, “Lazaro, uma!” Lazaro nîwaumire arî mwove na itamî njara na magûrû na akovwa na gîtamî ûthiû. Jesû nîwerire andû arîa maarûngamîte vo atîrî, “Mwovoreni na mûreke athiî.”


Ayahudi eengî arîa maathiîte gûcerera Mariamu nîmoonire ûrîa Jesû eekire na makîmwîtîkia. Nwatî amwe gatagatîrî kao nîmeenûkire na makîthiî kwîra Afarisai ûrîa Jesû eekîte. Kwoguo Afarisai na anene a athînjîri-Ngai nîmaagomanire na Kîamma Kîam Ayahudi. Nao nîmaaûranirie atîrî, “Nîtwîka atîa? Mûndû ûyû nîararinga ciama nyîngî mûno! Wona twareka athiî na mbere gwîka maûndû mama, andû onthe nîmakûmwîtîkia. Nao Aroma nîmagûcoka maûke macûkangie hekarû yetû na rûrîrî rwetû!”
Nwatî mûndû ûmwe wa arîa maarî vo wetagwa Kaiafa na warî Mûthînjîri-Ngai ûrîa mûnene mwakarî ûcio, nîwamerire atîrî, “Na kaî mûrî aritu-î! Anga mûtiîcî nî kava mûndû ûmwe akuîre andû gûkîra gwîtîkîra rûrîrî ruonthe rûcûkangue.” Kaiafa akiuga ûguo tîke weîrîte. Nwatî arî ta Mûthînjîri-Ngai ûrîa mûnene mwakarî ûcio, nîwarathire atî Jesû aarî akuîre rûrîrî rwa Ayahudi, na ciana cia Ngai irîa inyagarûkîte kûndû kuonthe, nîguo aicokanîrîrie vamwe na aitue kîndû kîmwe.
Kuuma mûthenya ûcio Ayahudi nîmaavangire ûrîa makûraga Jesû. Kwoguo Jesû ndaacoka kûthiî akîonagwa kûu Judea. Nîwaumire kuo na akîthiî îtûûrarî rîetagwa Efiraimu rîrîa rîarî vakuvî na werû na agîkara kuo marî na arutwa ake.
Vîndî ya kîrugo Kîam pasaka yarî vakuvî. Andû eengî nîmaaumire vûrûrirî ûcio na makîthiî îtûûrarî rîa Jerusalemu nîguo metherie mbere ya kîrugo kîu Kîammbîrîrie. Nao nîmaacaragia Jesû na marûngamîte kûu hekarûrî makaûranagia atîrî, “Mûrona takwa na ma agûka kîrugorî gîkî?” Nao anene a athînjîri-Ngai na Afarisai nîmaathanîte atî mûndû wa wonthe ûkaamenya kûrîa Jesû arî, athiî akamamenyithie nîguo mamûnyite.

聆聽 Joh 11