San Juan 21
21
Nariꞌ tuviꞌ uún Jesús ga̱ chi̱j nij síí tucuꞌyón snana̱ soꞌ a
1Cachén do̱j, ga̱a ne̱ cuchiꞌ uún Jesús rihaan nij síí tucuꞌyón snana̱ soꞌ rej nu̱u̱ na laguaná cuꞌna̱j Tiberias a. Ne̱ nihánj me se vaa quiꞌyaj soꞌ a. 2A̱j cunuu chre̱ꞌ síí cuꞌna̱j Simón Pedró do̱ꞌ, Tomás síí cuꞌna̱j cuaté do̱ꞌ, Natanael síí cavii chumanꞌ Caná chumanꞌ na̱j estadó Galilea do̱ꞌ, ro̱j taꞌníí síí cuꞌna̱j Zebedeo do̱ꞌ, yavíj síí tucuꞌyón snana̱ Jesús do̱ꞌ a. 3Ga̱a ne̱ cataj Simón Pedró rihaan ꞌó nij soꞌ a:
―Caꞌa̱nj ꞌu̱nj ti̱guíj ꞌu̱nj nanj rque na quiri̱j xcuaj, raj chugua̱nj ―taj soꞌ rihaan nij soꞌ a.
―Caꞌa̱nj níꞌ xa̱ꞌ ―taj ꞌó nij soꞌ rihaan Simón Pedró a.
Ga̱a ne̱ cavii nij soꞌ catúj nij soꞌ rque rihoo chéé rihaan na, ne̱ niga̱nꞌ quiꞌyaj suun nij soꞌ, tza̱j ne̱ a̱ ꞌó xcuaj ne quiri̱ꞌ nij soꞌ a̱ maꞌ.
4Dan me se taxre̱j ꞌó güii me se nicunꞌ Jesús tuꞌva na laguaná yoꞌ a. Tza̱j ne̱ ne queneꞌe̱n nij síí tucuꞌyón snana̱ soꞌ se vaa maꞌa̱n soꞌ me síí yoꞌ a̱ maꞌ. 5Dan me se cataj Jesús rihaan nij soꞌ a:
―Tinu̱j, vaa do̱j xcuaj rihaan soj cha̱ níꞌ naꞌ ―taj Jesús, xnáꞌanj soꞌ man nij soꞌ a.
―Taj maꞌ ―taj nij soꞌ a.
6Ga̱a ne̱ cataj Jesús rihaan nij soꞌ a:
―Ti̱guíj soj nanj rque na rej xꞌnu̱j rihoo rej nuva̱ꞌ rihoo, ne̱ quiri̱ꞌ soj xcuaj á ―taj Jesús rihaan nij soꞌ a.
Cheꞌé dan tiguíj nij soꞌ nanj nda̱a vaa cataj Jesús, ne̱ caraa nu̱ꞌ nanj, quiꞌyaj xcuaj, ne̱ ne gu̱un nucua̱j nij soꞌ cuxu̱u̱n nij soꞌ nanj a̱ maꞌ. 7Cheꞌé dan caꞌmii ꞌo̱ síí tucuꞌyón snana̱ Jesús síí ꞌe̱e̱ rá Jesús man rihaan Pedró, cataj soꞌ a:
―Jesús Si̱j ꞌNi̱j Raꞌa man níꞌ me soꞌ chugua̱nj ―taj soꞌ a.
Dan me se cuno Simón Pedró nana̱ se vaa Síí ꞌNi̱j Raꞌa man níꞌ me síí yoꞌ, ga̱a ne̱ cheꞌé se a̱j quirii soꞌ se‑co̱toó soꞌ, cheꞌé dan nanuû raꞌya̱nj soꞌ se‑co̱toó soꞌ, ga̱a ne̱ tagüéj soꞌ man soꞌ rihaan na yoꞌ a.
8Tza̱j ne̱ ꞌó nij soꞌ roꞌ, quináj rque rihoo yoꞌ, ne̱ tiguíj nij soꞌ chruun man rihoo yoꞌ, ne̱ nica̱j nij soꞌ rihoo caꞌanj nij soꞌ nda̱a tuꞌva na laguaná yoꞌ a. Ne̱ o̱rúnꞌ cientó metró tiguíj raꞌa nij soꞌ man rihoo rque na, ne̱ cuxuun nij soꞌ nanj caraa xcuaj yoꞌ rej tuꞌva na a. 9Ne̱ nu̱ꞌ cuchiꞌ nij soꞌ rihaan yoꞌóó, ne̱ queneꞌen nij soꞌ ꞌo̱ yaꞌan nachráj Jesús, ne̱ táá nee̱ xcuaj do̱ꞌ, rachrúún do̱ꞌ, ruvaj yoꞌ a. 10Ga̱a ne̱ cataj Jesús rihaan nij soꞌ a:
―Ni̱caj soj do̱j xcuaj quirii soj caꞌna̱ꞌ soj á ―taj Jesús rihaan nij soꞌ a.
11Cheꞌé dan cavii Simón Pedró, ne̱ cuxuun soꞌ nanj yoꞌ rihaan yoꞌóó a. Ne̱ caraa ꞌo̱ cientó táá yavíj chiha̱a̱ chaꞌnu̱j (153) xcuaj rque nanj yoꞌ a. Ne̱ nda̱ꞌ se ꞌe̱e̱ ndoꞌo nij xcuaj, tza̱j ne̱ ne si̱nꞌ nanj maꞌ.
12Ga̱a ne̱ cataj Jesús rihaan nij soꞌ a:
―Caꞌna̱ꞌ soj, cha̱ ruvá soj á ―taj soꞌ rihaan nij soꞌ a.
Ne̱ a̱ ꞌó nij síí tucuꞌyón snana̱ Jesús ne quisi̱j rá xna̱ꞌanj man soꞌ me síí me soꞌ a. ꞌO̱ se a̱j queneꞌen nij soꞌ se vaa Síí ꞌNi̱j Raꞌa man níꞌ me síí yoꞌ a. 13Ga̱a ne̱ caꞌnaꞌ Jesús, ne̱ nica̱j soꞌ rachrúún do̱ꞌ, nee̱ xcuaj do̱ꞌ, rqué soꞌ man nij soꞌ a.
14Dan me se quisíj vaꞌnu̱j curuviꞌ Jesús rihaan nij síí tucuꞌyón snana̱ soꞌ ga̱a cunuu iꞌna̱ꞌ uún soꞌ a.
Cataj Jesús rihaan Pedró se vaa rque̱ Pedró cha̱ daán Jesús matzinj a
15Dan me se ga̱a quisíj chá ruvá nij soꞌ, ne̱ xnáꞌanj Jesús man Simón Pedró, cataj soꞌ a:
―Cu̱nó so̱ꞌ caꞌmi̱j, Simón taꞌníí Jonás. Doj a̱ ꞌe̱e̱ rá so̱ꞌ manj rihaan nij síí nihánj naꞌ ―taj Jesús, xnáꞌanj soꞌ man Pedró a.
―Neꞌen ma̱ꞌán so̱ꞌ se vaa ꞌe̱e̱ raj mán so̱ꞌ, Señor ―taj Pedró rihaan Jesús a.
―Veꞌé rque̱ so̱ꞌ cha̱ daán ꞌu̱nj matzinj á ―taj Jesús rihaan Pedró a.
16Ga̱a ne̱ xnáꞌanj uún Jesús man Pedró, cataj soꞌ a:
―Cu̱nó so̱ꞌ caꞌmi̱j, Simón taꞌníí Jonás. ꞌE̱e̱ rá so̱ꞌ manj naꞌ ―taj uún Jesús rihaan Pedró a.
―Neꞌen ma̱ꞌán so̱ꞌ se vaa ꞌe̱e̱ raj mán so̱ꞌ, Señor ―taj uún Pedró rihaan Jesús a.
―Veꞌé tu̱mé so̱ꞌ man daán ꞌu̱nj matzinj á ―taj uún Jesús rihaan Pedró a.
17Ga̱a ne̱ cataj uún Jesús rihaan Pedró a:
―Cu̱nó so̱ꞌ caꞌmi̱j, Simón taꞌníí Jonás. ꞌE̱e̱ rá so̱ꞌ manj naꞌ ―taj uún Jesús a.
Ne̱ veé da̱nj quisíj vaꞌnu̱j xnáꞌanj soꞌ da̱nj man Pedró a.
Dan me se quinanó rá Pedró cheꞌé se quisíj vaꞌnu̱j xnáꞌanj Jesús da̱nj man soꞌ a. Ga̱a ne̱ cataj uún soꞌ rihaan Jesús a:
―Neꞌén so̱ꞌ cunuda̱nj, Señor. Ma̱ꞌán so̱ꞌ neꞌen se vaa ꞌe̱e̱ raj mán so̱ꞌ á ―taj Pedró rihaan Jesús a.
―Veꞌé rque̱ so̱ꞌ cha̱ daán ꞌu̱nj matzinj á. 18Cuano̱ nihánj me se cata̱j yá yá ꞌu̱nj rihaan so̱ꞌ se vaa ga̱a mé so̱ꞌ síí tachru̱u̱, ne̱ numíj ma̱ꞌán so̱ꞌ yatzéj catuún so̱ꞌ, ne̱ chéé so̱ꞌ me rej maꞌa̱n guun rá so̱ꞌ a. Tza̱j ne̱ asa̱ꞌ guún so̱ꞌ chii nga̱, ne̱ ti̱cúnꞌ so̱ꞌ raꞌá so̱ꞌ, ne̱ ꞌó soꞌ nu̱míj catuún so̱ꞌ, ne̱ ni̱caj soꞌ mán so̱ꞌ caꞌa̱nj soꞌ me rej maꞌa̱n rá soꞌ caꞌa̱nj soꞌ, ne̱ nda̱ꞌ se naꞌvej rá so̱ꞌ caꞌa̱nj so̱ꞌ, tza̱j ne̱ va̱j so̱ꞌ ado̱nj ―taj Jesús rihaan Pedró a.
19Ne̱ nana̱ cataj Jesús rihaan Pedró roꞌ, taj xnaꞌanj se vaa ticavi̱ꞌ nii man soꞌ, ne̱ cheꞌé dan sa̱ꞌ uxrá caꞌmi̱i̱ yuvii̱ cheꞌé Yaꞌanj, quiꞌya̱j soꞌ a.
Ga̱a ne̱ cataj uún Jesús rihaan Pedró a:
―ꞌO̱ ca̱nocóꞌ so̱ꞌ manj á ―taj Jesús rihaan soꞌ a.
20Ga̱a ne̱ canica̱j Pedró, ne̱ queneꞌen soꞌ man ꞌó síí tucuꞌyón snana̱ Jesús síí ꞌe̱e̱ rá Jesús man a. Soꞌ roꞌ, me síí cayáán rej xꞌnu̱j Jesús ga̱a chá xtiꞌno̱ nij soꞌ ga̱a rque̱, ne̱ soꞌ me síí xnáꞌanj man Jesús me síí ta̱cuachén man Jesús rihaan nij síí ta̱j riꞌyunj man Jesús a. 21Dan me se ga̱a queneꞌen Pedró man síí ꞌe̱e̱ rá Jesús man yoꞌ, ne̱ xnáꞌanj soꞌ man Jesús, cataj soꞌ a:
―Señor, da̱j quira̱nꞌ síí nihánj ga̱ ―taj soꞌ rihaan Jesús a.
22Ga̱a ne̱ cataj Jesús rihaan soꞌ a:
―Ne̱ sese me rá ꞌu̱nj ꞌo̱ ga̱a̱ iꞌna̱ꞌ soꞌ rihaan chumii̱ nda̱a se caꞌna̱ꞌ uún ꞌu̱nj rihaan chumii̱ nihánj, ne̱ né se‑su̱u̱n ma̱ꞌán so̱ꞌ me yoꞌ maꞌ. ꞌO̱ canoco̱ꞌ ma̱ꞌán so̱ꞌ manj á ―taj Jesús rihaan Pedró a.
23Cheꞌé dan chaꞌnuu̱ nana̱ nihánj scaꞌnúj nij tinu̱j nij soꞌ, ne̱ guun rá nij soꞌ se vaa daj chiha̱a̱ míj se̱ caviꞌ síí tucuꞌyón snana̱ Jesús yoꞌ a. Tza̱j ne̱ ne cata̱j Jesús se vaa ya̱ ya̱ se̱ caviꞌ soꞌ maꞌ. Ma̱an se cataj u̱u̱n soꞌ nana̱ a: “Sese me rá ꞌu̱nj ꞌo̱ ga̱a̱ iꞌna̱ꞌ soꞌ rihaan chumii̱ nda̱a se caꞌna̱ꞌ uún ꞌu̱nj rihaan chumii̱ nihánj, ne̱ né se‑su̱u̱n ma̱ꞌán so̱ꞌ me yoꞌ maꞌ”, me nana̱ caꞌmii Jesús a.
24Dan me se síí tucuꞌyón snana̱ Jesús nihánj me se soꞌ me síí cataj xnaꞌanj cheꞌé nu̱ꞌ rasu̱u̱n no̱ rihaan yanj nihánj, ne̱ soꞌ me síí cachrón nana̱ rihaan yanj cheꞌé rasu̱u̱n nihánj ado̱nj. Ne̱ neꞌen núj se vaa ya̱ uxrá vaa nu̱ꞌ nana̱ cataj xnaꞌanj soꞌ na̱nj ado̱nj.
25Ne̱ vaa queꞌe̱e̱ doj rasu̱u̱n quiꞌyaj uún Jesús, tza̱j ne̱ sese cachrón nii nu̱ꞌ nana̱ cheꞌé ꞌo̱ ꞌo̱ nij rasu̱u̱n yoꞌ rihaan yanj nihánj, ne̱ se̱ quisíj chumii̱ nihánj cuma̱n cunuda̱nj nij yanj libró yoꞌ, rá ꞌu̱nj a̱ maꞌ.
© Wycliffe Bible Translators, Inc. 2024 segunda versión electrónica