Олӧм 46
46
Яков овмӧдчӧ Египетӧ
1Израиль чукӧртіс став ассьыс эмбурсӧ да мӧдӧдчис туйӧ. Бер-Шеваӧ воӧм бӧрын вайис висьяс аслас Исаак батьыслӧн Енлы. 2Войнас Ен чукӧстіс Израильӧс: «Яков, Яков!» Яков вочавидзис: «Ме тані». 3Ен шуис: «Ме – Ен, тэнад батьлӧн Ен. Эн пов мунны Египетӧ. Сэні Ме сета тэсянь чужны унасьыс-уна войтырлы. 4Ме Ачым муна тэкӧд сэтчӧ, и Ачым бӧр петкӧда тэнӧ сэтысь. Тэнсьыд синтӧ аслас киӧн тупкас Ӧсип».
5Яков водзӧ мӧдӧдчис Бер-Шеваысь. Израильлӧн пияныс нуисны батьнысӧ, челядьнысӧ да гӧтыръяснысӧ фараонӧн сетӧм тарантасъясӧн. 6Босьтісны тшӧтш ыж-мӧснысӧ да эмбурсӧ, мый чукӧрмис налӧн Ханаанын. Тадзи Яков став аслас рӧдыскӧд локтіс Египетӧ. 7Ассьыс ныв-писӧ да налысь челядьсӧ – став ассьыс рӧдсӧ вайӧдіс аскӧдыс.
Яковлӧн котыр Египетын
8Египетӧ локтӧм Израиль пиянлӧн нимъясыс татшӧмӧсь. Рувим – Яковлӧн медводдза чужысьыс. 9Рувимлӧн пияныс: Енок, Паллу, Хецрон да Карми. 10Симеонлӧн пияныс: Емуэл, Ямин, Огад, Якин, Цохар да ханаанса аньлӧн Саул пи. 11Левийлӧн пияныс: Гирсон, Кааф да Мерари. 12Иудалӧн пияныс: Ир, Онан, Шелай, Парес да Зерах. Но Ир да Онан кулісны Ханаан муын. Пареслӧн пияныс: Хецрон да Хамул. 13Иссакарлӧн пияныс: Тол, Пув, Иов да Шимрон. 14Завулонлӧн пияныс: Серед, Элон да Яхлеэл. 15Тайӧ Яковлӧн да Лиялӧн пияныс, нӧшта пияныслӧн пияныс – ставнас комын куим морт. Лия чужтіс пиянсӧ да Дина нывсӧ Месопотамияын.
16Гадлӧн пияныс: Цифион, Хагги, Шуни, Эцбон, Эри, Ароди да Арели. 17Асирлӧн пияныс: Имнай, Ишвай, Ишви да Берий. Налӧн вӧлі Серах нима чой. Берийлӧн пияныс: Хевер да Малкиэл. 18Тайӧ Яковлӧн да Зелфалӧн ныв-пиыс, нӧшта ныв-пиыслӧн пияныс – ставнас дас квайт морт. Зелфа вӧлі кесйӧг аньӧн, кодӧс Лаван сетіс Лия нылыслы.
19Ракельлӧн, Яков гӧтырлӧн, пияныс: Ӧсип да Венямин. 20Ӧсиплӧн Египет муын чужисны Манассей да Ефрем, кодъясӧс сылы чужтіс Асената, Он карысь Поти-Пер поплӧн нылыс. 21Веняминлӧн пияныс: Белай, Бекер, Ашбел, [Белайлӧн пияныс:] Гер, Нааман, Эхи, Рош, Муппим, Хуппим да Ард. 22Тайӧ Яковлӧн да Ракельлӧн пияныс, нӧшта пияныслӧн пияныс – ставнас дас нёль морт.
23Данлӧн пиыс вӧлі Хушим. 24Неффалимлӧн пияныс: Яхцеэл, Гуни, Ецер да Шиллем. 25Тайӧ Яковлӧн да Валлалӧн пияныс, нӧшта пияныслӧн пияныс – ставнас сизим морт. Валла вӧлі кесйӧг аньӧн, кодӧс Лаван сетіс Ракель нылыслы.
26Яковсянь чужысьыс, кодъяс локтісны сыкӧд Египетӧ, ставнас вӧлі квайтымын квайт морт. Нӧшта сыкӧд локтісны пияныслӧн гӧтыръяс. 27Египетын Ӧсиплӧн чужис кык пи. Тадзи Яков рӧдысь сизимдас [вит] морт овмӧдчисны Египетӧ.
28Яков ыстіс водзвылас Иудаӧс Ӧсип дінӧ. Иуда петкӧдліс Гошен муӧ туйсӧ, и тадзи найӧ локтісны сэтчӧ. 29Ӧсип аслас тарантасӧн воча петіс Израиль батьыслы. Батьыскӧд аддзысигӧн кутліс-топӧдліс сійӧс, дыр бӧрдіс сылӧн сывъяс. 30Израиль шуис Ӧсиплы: «Но ӧні сэсся верма кувны, ӧд аддзылі тэнӧ. Тэ ловъя!»
31Ӧсип шуис вокъясыслы да батьыслӧн став котырлы: «Ме муна юӧрта фараонлы, мый менам вокъяс да батьлӧн котырыс Ханаан муысь воисны ме дорӧ. 32Шуа сылы, мый ті ыж-мӧс видзысьяс, и аскӧдныд татчӧ вайинныд ыж-мӧснытӧ да эмбурнытӧ. 33Фараон кӧ корас тіянӧс ас ордас да юалас уджныд йылысь, 34висьталӧй, мый ті, сылӧн кесйӧгъяс, том кадсянь батьясныд моз ыж-мӧс видзанныд. Сэки сійӧ кольӧдас тіянӧс Гошен муӧ, ӧд египетсаяс ыж видзысьӧс лыддьӧны пежӧн».
(c) Institute for Bible Translation, Finland, amp Finnish Bible Society, 2023