मती 9
9
ईसू लकवा होड़े नपायतेरा
(मरकूस 2:1-12; लूका 5:17-26)
1हनते ईसू डोंगारेय देगनेन अरू हुडिंग समुंदर पारनेनखन आँयग दोहोना हना कपरनहूम सहररेय कुदा सेनेडा। 2दो हंडा, होड़कू ईसू एचेरे मी होड़ लकवा ञेडतिरिया हाँयग होड़ पटियातेकू तूल अगूतिरिया। ईसू हँकूराः बिसवास ञेलतेडखन लकवा ञेडतिरिया हाँयग होड़ एचेरेय कताया, “ने बेटा, बहालतेम दोहोन। आमराः कसूर बराव एंडायना।”
3हंडाकू दोहोना हँकुःआ नियम चेडदार होड़कू अते अदोम होड़कू अँननकू अँकू कता होड़ेंगा, “नाँयग होड़ भगवान बदीकेडखने कतायतना।”
4मनदो ईसू हँकूराः ओंगोल सुदीकेडखन हँकू एचेरेय कताया, “अपे चिला लगा अपेराः जीवरे बेलूर ओंगोलपे ओंगलुःतना? 5ईंग आमराः कसूर बराव एंडातेरा, माःआन कता लगा सहे, आम रेमकेडखनमे सेन, माःआन कता लगा रिता इदा? 6मनदो अपे नाःआ कता सुदीयपे, मनुवारीग बेटातके चउंदीसरे मनुवाकूराः कसूर बराव एंडा लगा हातपात इदा।” हनते ईसू लकवा ञेडतिरिया हाँयग होड़ एचेरेय कताया, “रिमुःमे अरू आमराः पटिया रेमकेडखन ओड़ाःमे सलाव जुवाः।” 7हनते हाँय रेमनेन अरू अनँयग ओड़ाः तोराय। 8नाःआ कता जमा होड़कू ञेलतेड दो, हँकू मुरुककू बयावयान अरू मनुवाकू नाःआ इयाःआ जंगरे एमेकेरा हाँयग भगवानकू जागतेरा।
ईसू मतीय राःकेरा
(मरकूस 2:13-17; लूका 5:27-32)
9दो ईसू सेन मेला मती ञावीग मलगुजारी गोः होड़, मलगुजारी गोः लगा दोफा दूर कुटीरे दुड़ुःतो ञेलतिडिगखन हाँय एचेरेय कतातेड, “ओतोंग वेगमे।” अरू हाँय रेमनेनखन ईसू देह दूर तोराय।
10तयोमरे ईसू मतीराः ओड़ाःरे जोजोम लगाय दुड़ुःनेन। मुरुक बगरा मलगुजारी गोः होड़कू अरू एटाः कसूर होड़कू हों ईसू अरू आँयगरिकुःआ चेलाकू सुदाकू दुड़ुःनेन। 11दो फरीसी होड़कू नाःआ ञेलतेडखन ईसूरिकुःआ चेलाकू एचेरेकू होंबोरतेड, “अपेरीग गुरुजी चिला लगा मलगुजारी गोः होड़कू अरू एटाः कसूर होड़कू सुदाय जोमता?”
12ईसू नाःआय अयूमतेड दो, हँकू एचेरेय कतातेड, “बेमरिया होड़कू जिड़ीदार ससंघरावा लगा इदा मनदो सुलटीगरेय दोहोनता हाँयके जिड़ीदारराः जरूरी मेर दोहोनता। 13ईंग बेगर गारबार होड़कू राः लगा कोवान, मनदो कसूर होड़कू राः लगायिंग वेगकिया। अपे भगवानराः कागदरे ओजाःतो इदा हना कता नपायतेपे चिडुः, ईंग बलिदान मेरिंग चहाःतना, मनदो होड़कू सोगागोड होड़ेंगकू लगायिंग चहाःतना।”#होसे 6:6
उपास बदीरे सवालराः जबाब
(मरकूस 2:18-20; लूका 5:33-35)
14बतिसमा एमेयीग होड़ एहुनारिकुःआ चेलाकू ईसू एचेरे वेगनेनखनकू होंबोरतेड, “अले, अरू फरीसी होड़कू उपासरेकू दोहोनता, मनदो आमरिकुःआ चेलाकू चिला लगा उपास मेरकू दोहोनता?”
15दो ईसू हँकू एचेरेय कतातेरा, “बरबाबू सुदाकू दोहोनता हँकुःआ बरतियाकू चिला लगाकू फिकिराःआ? मनदो तोनोंग दिनरे बरबाबू हँकू अतेकू गोःगेयता, दो हनमेला हँकू उपासरेकू दोहोनता।”
ईसू नँवा दूरे उदुःगेतना
(मरकूस 2:21-22; लूका 5:36-39)
16“तोनोंगीग होड़ जुना सोनहेरे नँवा सोनहेराः चिरकूट ओरोय सोःतेरा। नान उड़ीय एचेय दो नँवा सोनहे हिराः जुवाःता अरू जुना सोनहेरे ओरो मेसानेना। 17हनन इया तोनोंगीग होड़ नँवा अंगूरराः रस जुना हेड़ेराः बगलीरे ओरोय सोलोंगतेरा। नान उड़ीय एचेय दो नँवा अंगूरराः रस रंजाव जुवाःता अरू बगली सिराव जुवाःता अरू हना रस तू जुवाःता। मनदो हँकू नँवा रस नँवा बगलीरेकू सोलोंगता दो बनर रस अरू बगली बनसाव जुवाःता।”
अइमीराः नपायगुः अरू आईररीग लँइगराः जियाव रिमुः
(मरकूस 5:21-43; लूका 8:40-56)
18नाःआ कता ईसू बनाड़रा बड़रा मेला मी होड़ अरजी ओड़ाःरीग हातपात होड़ हंडाय वेजेडा। हाँय ईसू काटतरे उकुड़ोमवाडखने कतातेड, “ईंगरीग बिटींग नुँनुँहूय गोएगयना। मनदो आम वेगकियानखन हाँय चोटरे तिःईम मंडाव दो हाँय जियाव जुवाःताय।” 19दो ईसू रेमनेन अरू आँयगरिकुःआ चेलाकू सुदा हाँयराः ओड़ाःकू सेनेडा।
20हंडा होड़कू तलारे मी होड़ अइमी दोहोना। हाँयके बारह बरिस वरीते नहावन दोहोना। हाँयग अइमी ईसू देह दूर सेनेवाडखन हाँयराः सोनहेराः असराय टोँवावतेरा। 21हाँय ओंगोलतेरा, ईंग हाँयराः सोनहे असरायिंग टोँवाव दो ईंग नपाय जुवाःता, माःआन।
22मनदो ईसू उलटावनेनखन हाँयग अइमी एचेरेय कताया, “ने दिदी, अलोम बोर! आम ईंग एचेरेम बिसवासतेरा। हनालगा आम नपाययनाम।” अरू हाँयग अइमी हनन मेलाय नपाययान।
23हनते ईसू अरजी ओड़ाःरीग हातपात होड़राः ओड़ाःरेय सोदोरनेन अरू होड़कू मुरलीकू ओंगा अरूकू चइड़ा हना ञेलकेडखन 24हँकू एचेरेय कतातेड, “अपे सलाव जुवाःपे। नाँयग धंगड़ी मेरेय गोएगगना। नाँय अपीगतनाय।” मनदो हँकू जमा होड़कू हाँयकू लांदावाया। 25जमा होड़कू बहरीय एचे उडुंगतेडकूखन ओड़ाः पेंदारेय बोलोनेना। ईसू हाँयग धंगड़ीराः तिःईय साबतेड अरू हाँय जियाव रेमयान। 26नाःआ सरवन हना देसरिकुःआ मुरुक बगरा होड़कू एचेरे सितरावयान।
बार होड़ अंधा होड़किनराः मेड ईसू नपायतेरा
27हनते ईसू हना अतेय सेन मेला, बार होड़ अंधा होड़किन ईसू देह दूर मुरुक सटीते इयाम घड़ीनकिन सेना अरूकिन कताया, “ने दाऊदरीग नइड़-बाँस होड़, अलिंगमे सोगावा।” 28अरू ईसू ओड़ाःरेय बोलोनेन दो हँकिनाः अंधा होड़किन हाँय एचेरेकिन सेनेडा। दो ईसू हँकिन एचेरेय होंबोरतेड, “अबा ईंग नपाय अवेगोडबाता, माःआन ईंग एचेरेबा बिसवासगेतना जा?”
दो हँकिन कतातेड, “हाव परबू।”
29हनते हाँय हँकिनराः मेड टोँवावतेडखने कताया, “अबाराः बिसवास इया होया जुवाः।” 30दो हँकिनराः मेड नपाययान। हनते ईसू हँकिन सेतावतेडखने कताया, “नाःआ कता अबा तोनोंगीग एचेरे अहाबा कताय।” 31मनदो हँकिन सेनेवाडखन हना देसरे जमा होड़कू एचेरे हाँय बदीरेकिन कतागोतेड।
32हँकिन ईसू अगीतेकिन सेना दो, ईसू एचेरे भूत समसावनेना मी होड़ कोंदा होड़, होड़कू अगूतिरिया। 33ईसू हाँयग भूते उडुंगगोतेड दो, हाँयग होड़ बड़राःआय। जमा होड़कू बयावनेनखनकू कतातेड, “जमा इसराएल राइजरे नाःआ इया अले नुँहू वरी मेरले ञेलगरा।” 34मनदो फरीसी होड़कू कतातेड, “हाँय भूतकूरीग राजाराः जंगरते, भूतकूय उडुंगकूता।”
सेवकिया होड़कू ठुनुहाँ इदानकुःआ
35ईसू एटाः एटाः सहरकून अरू गाँवकूनरे सेनेडखन हँकूराः अरजी ओड़ाःकूनरेय चेडतेडकुःआ। हाँय भगवानराः राइजराः नपाय सरवने परसार उदुःतेरा अरू बेमरियातेकू दोहोना हँकुःआ होड़कूय नपायगोड ञवना। 36हंडा मुरुक बगरा होड़कू दोहोना अरू हँकू बेगर सरवाहातेकू दोहोनता हँकुःआ भेड़ाकू इया कटसियारे अरू बेगर संघरातेकू दोहोना। हनालगा हाँय हँकूय ञेलतेडकूखने सोगावातेडकुःआ। 37हनते हाँय आँयग चेलाकू एचेरेय कतातेड, “हुड़ू दोहोड़रे मुरुक बेलेकिया, मनदो हना ईर लगा होड़कू टुनुहाँ इदानकुःआ। 38हनालगा दोहोड़रीग मालिक भगवान एचेरे बुता होड़कूय वारकू लगापे अरजीगे।”
© (Active) Wycliffe Bible Translators, Inc. All rights reserved.