ረውምየት እቂዝ 5
5
ፈወነ 5
ፅድቅዝ ኣመካይነትዝ ችጝሸው ዲግተዝመ ዲስተዝ
1ነስየ እምንትዝ ፃድቅናንስቅ ይናኣደረ እየሱስ ክርስቶስት ኣመካይነትዝ እደረ ጅቅ ዲግተ ፃይነቅ የጝ።#5፡1 ኽፅምትቍ ላው ላው ብራንጥድ፦ «ዊንም ዲግተ ፃይነቅ ኣነ» ይጘኵ። 2ይን ክርስቶስት ኣምንናንስቅ ጘጝም ነን ፀናቕን ፅብነው ፃገይል ጥውነቅ ፃቭኩ፤ እደረት ክቭርድየንትም ችጝነ ቲስፈ ፃቨነውዝ ማክኽሽነኵን። 3እንዝ ጭቝም ኣየው፤ ይናሚከረይዝም ማክኽሽነኵን፤ ምላሰንድም ሚከረ ኣቕል ችጝሰው ኣቐጘ ኣርቕነኵን። 4ኣቕልም ፅናት ችጝሰው ኣቐጘ፣ ፅናትም ቲስፈ ችጝሰው ኣቐጘ ኣርቕነኵን። 5ይናጭስ ነይሽተው መንፈስ ቅዱስት ኣመካይነትዝ እደረት ፍቅርድ ይናእዘኒል እቻቓንስቅ እኒን ቲስፈድ ኣይቭሳውም።
6ይን ገነ ዝላቐጥ ኣቕን ፅብና ትክክለኘ ግርየድ ችጛንድ ክርስቶስ ኽጥያትኝጢዝ ቺ ክሩ። 7ፃድቅ እጅርዝ ቺ ክረው ችጝጥነ ጭቕጘ ችግርዘው የጝ፤ ኣቕሽም ደግ እጅርዝ ቺ ክርጠ ዲፍረው እጅር ምናልቫች ችጝሽጡ ኣጠት። 8ዊገድ ግን ይን ኽጥያትኝጥ ኣቕን ፅብና ክርስቶስ ይናቺ ክሩ፤ እንም እደረ ይናግል ፃየው ጝቕምቱ ፍቅርድየንት ቓሊሰኵ። 9ነን ጝብሪዝ ፃድቅነውዝየ ኽሽስ ጝዝ ኣመካይነትዝ እደረት ቍጠይስ ቓድንቅ። 10ይን እደረት ፃለታን ኣቕን ፅብና ጝዅርት ክርጘይዝ ኣመካይነትዝ ጝጅቅ ኣርቅሽነውዝየ ኽሽስ እርቅ ችጝነት ግረ ይናቓድትድ ጝዅርት ርዅየይዝ ኣመካይነትዝ ውርጘ ኽይጡ? 11እኒን ጭቝም ኣየው፤ ዊገድ ግን ነን እርቅ ችጝነው ይናኣደረ እየሱስ ክርስቶስት ኣመካይነትዝ እደረትውዝ ቈሽ ማክኽሽነኵን።
ኣዳምት ኣመካይነትዝ ክርጘ፣ ክርስቶስት ኣመካይነትዝ ርዅየ
12እንዝ ማጥን ኽጥያት ላው እጅርዝ ኣመካይነትዝ ኣልሚል ጥወጘ፣ ክርጘም ኽጥያትዝ ኣመካይነትዝ ጥውኩ፤ እኒዝጘም እጝቅ እጅርድቅ ኽጥያት ሰራሻንስቅ ክርጘ እጝቅ እጅርልቅ ተሩ።#ዘፍ. 3፡6። 13ኽግ ይውሽተነዊስ በውገ ኽጥያት ኣልሚል ዊኑ፤ ዊገድ ግን ኽግ እጀዊስ ኽጥያት እጊታውም። 14ኣነጚ ኣዳምቲስ ኪርም ሙሴትል ኣሽ ኣዳምትጘ ኽግ ፋዘነውዝ ኽጥያት ሰራሺየቊል እኳ ክርጘ ኒግሱ፤ ኣዳም እግረ ተርጡዊዝ ተከ ዊኑ።
15ዊገድ ግን እደረት ይውትድ እጅርዙ በደሊዝጘም ኣየው፤ ላው እጅርዙ በደልዝ ኣመካይነትዝ ንቕፀቍ ክርጘውዝየ፣ እደረት ፃገዝመ ላው እጅር እየሱስ ክርስቶስት ፃገዝ ኣመካየንትዝ ችጝሸው ይውትድ ንቕፀቊዝ ኣወይ ቲርፍርፍ ይውሽታው! 16ቈሽም እደረቱ ይውትድ ላው እጅርዙ ኽጥያቲዝ መጠኒዝጘም ኣየው፤ ምላሰንድም ፍርድድ ላው እጅርዙ ኽጥያትድየንት ቲክን ኵነንየ ነሱ፤ እደረት ይውትድ ግን ንቕፀው በደልድልድየንት ቲክን ፅድቅ ነሱ። 17ላው እጅር ኽግ ፋዘነውዝ፣ እን እጅሪዝ ኣመካይነትዝ ክርጘ እጝቅ እጅሪልቅ ኒግሰውዝየ፣ ኽሽስ እደረቱ ቲርፍርፈው ፃገይዝመ ፅድቅዙ ይውቲዝ ለምረቍድ ላው እጅር እየሱስ ክርስቶስት ኣመካይነትዝ ርዅየዝ ኣወይጝ ኒግሳቍ?
18ነስየ ላው እጅርዙ በደልዝ ኣመካይነትዝ እጝቅ እጅርልቅ ኵነንየ ተረጘ፣ እኒዝጘም ላው እጅርዝ ፅድቅዙ ሰቭዝ እጝቅ እጅርድቅ ፅድቅዙ ርዅየ ችጝጡ። 19ላው እጅርዙ ኣዚጠቅ የነውዝ ንቕፀቍድ ኽጥያትኝጥ ኣጘጘ፣ ላው እጅርዙ ኣዚተነውዝ ንቕፀቍድ ፃድቃን ኣጥቍ። 20ኽግ ተራንስቅ በደል ንቕፁ፤ ዊገድ ግን ኽጥያት ንቕፀዊዝ ፃገ እቀጘ ቲርፍርፈው ኣቑ። 21እንም ኣቐውድ ኽጥያት ክርጘዝ ኣመካይነትዝ ኒግሰጘ ይናኣደረ እየሱስ ክርስቶስት ኣመካይነትዝ ቈሽ ዘላልምዙ ርዅየ ችጝሻንስ ማጥን ፃገ ፅድቅዝ ኒግሳንስ የጝ።
