ኻወርየታኒዙ ሰቭ 6
6
ፈወነ 6
ላጝጠ ዘቝንጢዝ ማርፅሽተነውድ
1ምመናኒዝ እግዘድ ንቕፃ ፊራ ዊነው ኣይንት ወራቲዝ፣ ግሪክስ ተረቍ ኣይዅዳንድ ይዅዳት ኻግሪዝቍ ኣይዅዳኒል ኣጕርምርም፤ ምላሰንድም ግሪ ጨቨቅ ኣድለነው እርዳተይስ ጝታልጀጊርዳንድዛት ቸለል ይጛ ዊንጛንስቅ የጝ። 2እንዝ ማጥን ፅጭ ሊጘ ኻወርየታንድዛይ እጝቅትቅ ኣኽቭጝ እንት ይ፦ «ይን መድ ኣድልነ ማጥን እደረት ቃልድ ክንሰነው በርነ ጥውሻውም። 3ይናፅን ክታችወ! ጝታባኽሪዙ ቀስነይዝ ሚዝርሽተቍ መንፈስ ቅዱስዝመ ጥቨቭዝ እቻቐቍ ላጝጠ እቅ ማርፅጥን፤ ይንም እኒን ሰቪል ጛት ይምንቅ። 4ይን ግን ፃልየነውዝመ እደረት ቃልድ ኣግልግለነውዝ ቲጊንቅ» ይ።
5እን ዊገድም ጝታእጝቅትቅ ዲስ ሹ፦ ኣቓንስቅም እምንትዝመ መንፈስ ቅዱስዝ እቻቐው እስጢፋነውስት፣ ፊልበውስት፣ ብረኰረስት፣ ኒቃሩነት፣ ጢመነት፣ በርምየናስመ ኣይዅዳነ ኻይማነውቲል ጥው ዊነው ኣንፀውኪየቱ ኒቈላወስት ማርፅ። 6እንዛትም ነስጝ ኻወርየታኒዝጐ ኣልስ፤ ጛይም ፃልይጝ ጝታናንጣንድዛት ጝታዲጊል እቝርጝ በርክ።
7እደረት ቃልድም ፈራቓ ፊሩ፤ እየሩሳልየምስም ምመናኒዙ እግዘድ ንቕፃ ፊሩ፤ ካኽነጣኒስም ንቕፀቍ ኣምንጝ ኣደረ ትጐ ዋጥር።
ኣይዅዳንድ እስጢፋነውስት ፃይጘጘ
8እስጢፋነውስም ፃገዝመ ኻይልዝ እቻቕ ኽዝቪዝ ማኽሊዝ ታምራንዝመ ዲንቅሰቍ ምልክታንዝ ፃቫ ዊኑ። 9ኣይንድም «ኻርነይ ፈቊዙ» ይሽተው ምኵራቪዝቍ እቅ ቀርየነስ፣ እስክንድርየስ፣ ቈሽም ኪልቅየስመ እስየት ኣውራጅጢስቅ ተረቍ እቅ እስጢፋነውስት ተቃውምሽጛ ተከራክርሽጥጘ ኪርም። 10ኣነጚ እስጢፋነውስ ዊግታ ዊነው ጥቨቪዝመ መንፈሲዝ ተቋቍምሸነው ቸሊየቍም። 11ኣይንድ፦ «ሙሴትም እደረትም ዛሻ ጭቕ ዊቅ ዊግታንድ ወሽንኵኑን» ይጝ ዊግተቍ እቅ ስውርዝ ኣስል። 12እንት ሽጝም ኽዝቭድየንት፣ ሽመቅልድዛት፣ ሙሴት ኽጊዝ ክንሰጥድዛትም ቂስቅስ፤ እስጢፋነውስትም ፃይጝ ሸጐዊል ኣልስ። 13እዛይ ኻሽትዝ ሚዝርድጥጘ ማጥን ኣስልጘቍ እቅድዛትም ነስጝ ችብስ፤ ጛይም፦ «እን እጅርድ እኒን ቅዱስ ስፍረድም ኣነ ወሪትት ኽግድየንት ዛሸነውድ ስሪስቅ በረለም። 14‹ናዝሪትቱ እየሱስ እኒን መቅደስ ጝንድ ፋዝጡ፣ ሙሴ ዲቍስ ነየው ይናስረትድየንትም ላውጥጡ› ያ ዊግታንድ ወሽንኵኑን» ይጛ ሚዝርድ። 15ሸጐዊል ጐይጝ ዊነቍድቅ እስጢፋነውስት ትክ ይጝ ቓልጛንድ ጝጋፅድ መላክ ተክ እትሉ።
