1ቈረንተውስት እቂዝ 2
2
ፈወነ 2
1ይፅንወ! ያን ክታጐ ተጣንድ፣ እደረት ምስጢርድየንት#2፡1 ላው ላው ኽፅምትቅ ብራንጥድ እደረት ሚዝርነይ ይጘኵ። ረቂቅ ኣቐው ዊገዙ ቸልጘዝ፣ ዊንም ኽየው ጥቨቭዝ ጋልፅጨ ተቲቀርም። 2ምላሰንድም ክታማኽሊል ፅባ እየሱስ ክርስቶስት ኣየት ያውም ጘጝ ሚስቅልል ሲቅልሽ ክረነውድየንት ጭቝ ኣየት ላየ ኣርቓይቀጘ ዊስን ዊኑን። 3ክታጐ ተጠውድም ዝላዝመ ጐውትዝ፣ እኒዝጘም ጭቕጘ ኣምብድብድሸነውዝ ዊኑ። 4ይክንስኒዝመ ይስቭክቲዝ እማን ኣቐነውድ እደረ ጝመንፈሲዙ ኻይልዝ ደደደድሱጚ እቀ ጥቨቭዝመ ዊገ ኣምርዘነውዝም ዊኒየው። 5እንም ክታእምንትድ እቀ ጥቨቭል ኣዪጝቀ እደረት ኻይልል ሚስርትሸው ኣቓንስ የጝ።
መንፈስዝ ችጝሸው ጥቨቭድ
6ጝታእምንቲዝ ጣጝክረቍ እቂዝ ግን ጥቨቭዙ ቃልዝ ዊግትነኵን፤ ኣነጚ ዊግትነውድ እኝቸን ኣልምሸንቱ ጥቨቭድ፣ ዊንም እኝቸን ኣልምሸንትቍ ድዝቍ ቅመቲዙ ጥቨቭድም ኣየው። 7ዊገድ ግን ይን ዊግትነውድ ሲውርሽ ዊነው እደረት ምስጢር ኣቐው ጥቨቭድየንት የጝ፤ እን ጥቨቭድም እደረ ዚምናኒዝ በውገ ይናክቭርዝ ማጥን ኣስለውድ የጝ። 8እን ኣልሚዝቍ ቅመቲስ ላውቅ እኳ እን ጥቨቭድየንት ኣርቒየውም፤ ኣርቕጝ ዊንጛንመ ክቭርዙ ኣደረድየንት ሲቅልጥጘም ዊንየቍ። 9ኣነጚ መፃፍዝ፦ «እል ቓልየውድየንት፣ ቀርዝ ወሺየውድየንት፣ እቀ እዘንም ኻስቪየውድየንት እደረ ጝት ቀነቊዝ ኣስልኩ» ይሽት ፃፍሽኩ።#እሳ. 64፡4። 10እደረ ግን እኒንት ጝመንፈሲዝ ኣመካይነትዝ ይናጭስ ጋልፅኩ፤ መንፈስም እደረት ጥልቅ ዊገድየንት እኳ ዳቒጝቀ እጝቅትቅ ሚርምረኵ። 11ጝኣቒል ፅበው ጝቕምቱ መንፈሲዝለ እቀ ማኽሊስ ላየ እጅርዙ ኻሰቭድየንት ኣርቐው ኣው እኩ? እኒዝጘም እደረት መንፈሲዝለ፣ እደረት ኻሰቭድየንት ኣርቐው ኣውማውም እጀው። 12ይን እደረቲስ ኣቐው መንፈስድየንት ለምርኑንጚ ኣልሚዙ መንፈስድየንትም ለምሪነቅ፤ እንም እደረ ይናጭስ ኻርነይዝ ነየውድየንት ኣርቕናንስ ማጥን የጝ።
13ነስየ ይን መንፈሳዊ ዊገድየንት መንፈሳውያን እቅዝ ዊግትነውድ እጅሪስ ችጝሸው ጥቨቭዝ ኣዪጝቀ እደረት መንፈሲስ ችጝሸው ጥቨቭዝ የጝ። 14መንፈሳዊ ኣየው እጅር እደረት መንፈሲስ ኣቐው ዊገድየንት ለምረጠ ቸላውም፤ ምላሰንድም እነየው ዊገድ ጝጭስ ኻጝልት የጝ፤ እን ዊገድ ሚርምርሸውድ መንፈስዝ ኣቓንስቅ ተረድሽጠ ቸላውም። 15መንፈሳዊ እጅር ግን እጝቅ ዊገድየንትቅ ሚርምረኵ፤ ጘጝ ጝቕም ግን ኣውማውዝቅ ሚርምርሻውም። 16እንም፦
«ኣደረት እዘንድ ኣርቕጠ ቸለውድ ኣው የጝ?
ጝት ማኽርጠ ቸለውድስ ኣው የጝ?»
ይሽት ፃፍሸጘ የጝ፤ ይን ግን ክርስቶስት እዘን ፃይንኵኑን።#እሳ. 40፡13።
