1ቈረንተውስት እቂዝ 10
10
ፈወነ 10
ጣወት ኣምልከነው ጥውሻው ኣቐጘ
1ይፅንወ! ይናኣቅልድ እጝቅቅ ድምነዝ ገርድሽጝ ዊንጘጘ፣ እጝቅቅም ባኽሪዝ ማኽለማኽል ከርጘጘ ኣርቕትርነ በነኵን።#ዘፀ. 13፡21-22፤ 14፡22-29። 2እጝቅቅም ሙሴ ጅቅ ላው ኣጛንስ ማጥን ጘጝ ድምነይዝመ ጘጝ ባኽርይዝ ጣምቅሽ። 3እጝቅቅም ላው ኣይንት መንፈሳዊ ዅረ ዅ። 4እጝቅቅም ላው ኣይንት መንፈሳዊ ዝይን ዝይ፤ ጛት ቲክና ዊነው መንፈሳዊ ፃፀይስ ዝይጝኵ፤ ጘጝ ፃፀድም ክርስቶስ ዊኑ።#ዘፀ. 17፡6፤ ዘዅ. 25፡1-18። 5ኣነጚ እደረ ጛጊስ ንቕፀቊዝ ዲስ ይየውም፤ ኣቓንስቅም ጝታእርሸድ በራኸይል ሊቭ ሊቭ እዳቑ።#ዘዅ. 14፡29-30።
6ጛይ ጭቓ ማርቕፅጘጘ ይንም ቈሽ ማርቕፃይነጘ እንዛይ ዊቅድ ይናጭስ ጥጝቅቀዙ ተከ ኣቕ።#ዘዅ. 11፡4። 7«ኽዝቭድ ዅጥጘ ዚጥጘ ጐይ፤ ዚቭጥጘም ጕ» ይሽት ፃፍሸጘ፣ ጛጊስ ላው ላውድ ፃቭጘጘ ክትንም ጣወት ኣምልክትርነ።#ዘፀ. 32፡6። 8ጛጊስ ላው ላውድ ሻርሙጥጛንስቅ ላው ግርየዝ ለርን ሻቘ ሽኽ እቅ ኣቢትጘጘ፣ ይንም ሻርሙጥነ ጥውሻውም።#ዘዅ. 25፡1-18። 9ጛጊስም ላው ላውድ ኣደረት ፊትንትንጘጘ፣ ሲቭረዝም ዀሽትጝ ዀሽትጝ ድዝጘጘ ይንም ኣደረት#10፡9 ላው ላው ኽፅምትቍ ብራንጥድ፦ «ክርስቶስት» ይጘኵ። ፈትንትነ ጥውሻውም።#ዘዅ. 21፡5-6። 10ጛጊስም ላው ላውድ ኣጕርምርጘጘ፣ ቂስፈው መላኪዝም ድዝጘጘ፣ ክትንም ኣጕርምርምትርነ።#ዘዅ. 16፡41-49።
11እንቅ እጝቅ ይናጭስ ተከ ኣቓንስ ማጥን ጛግል ችጙ፤ ዚምናኒዙ ኻትሸነይል ፅብነቅ ይናጭስ ጣጝቅቅሰነ ኣቓንስ ማጥንም ፃፍሽኩ። 12እንዝ ማጥን፦ «ፀናቕ ችብጥኩን» የው እጅር ፅብሽ ሊቫየጘ ጣጝቅቅሽነ። 13እጝቅ እጅሪልቅ ችጘው ፊተነይዝለ ቲተው ፊተነ ክታግል ችጚየውም፤ እደረ ኣምንሸው የጝ፤ ጘጝ ክትን ቸልትርኑዊስ ንየ ፊትንሽትርነ በራውም፤ ዊገድ ግን ፊትንሽርናንድ ፊተነድየንት ታግሽተነው ቸልድርናንስ ማጥን ፈነ ጒደነድየንት ክታጭስ ኣስልጡ።
14እንዝ ማጥን ይወደጃንወ! ጣወት ኣምልከነዊስ እክልጥን። 15እኒንት ዊግጠውድ ኣስክስርነቅ ኣቕርናንስቅ የጝ፤ ያን ዊግጠውድየንት ክታቕም ፊርድጥን። 16በርክነው በረከቲዙ ፅወድ ክርስቶስት ብሪጅቅ ኽቭር ፃየው ኣየውመ? ቈርስነው ሚድስ ክርስቶስት ስየይጅቅ ኽቭር ፃየው ኣየውመ?#ማቲ. 26፡26-28፤ ማር. 14፡22-24፤ ሉቃ. 22፡19-20። 17ሚድ ላው ኣቐጘ ይንም ንቕፀቍ ኣቕን ፅብና ላው ኣካል የጝ፤ ምላሰንድም ይን እጝቅቅ ላው ሚድየንት ኣድልሽነኵን።
18እስኪ እስራየላንድዛት ኻስቭጥን፤ ምስዋትድየንት ዀቍድ መሰውየይጅቅ ኽቭር ፃየቍ ዊኒየቍመ?#ዘሊ. 7፡6። 19እደስለ ያን ዊግጠውድ ጣወትዝ ሲውሽተው ስየድ እርቫነ ፃይኩ ያመ? ዊንስ ጣወትድ ጝቕም ርቫነ ፃየው የጝ ያመ? 20ኣየውም፤ ዊገድ ግን ኣኽዛቫንድ ምስዋይት ኣልስጘውድ እደረስ ኣዪጝቀ ጋኒናኒዝ የጝ፤ ያንም ጋኒናኒጅቅ ተቫቭርሽትርነ በነቅም። 21ኣደረት ፅወይዝመ ጋኒናኒይዙ ፅወዝ ላብጠ ዚትርነ ቸላይርነቅም፤ ኣደረት መዲስመ ጋኒናኒዙ መዲስ ላብጠ ዅትርነ ቸላይርነቅም። 22ኣደረትመ እንዝ ቀኒስነ? ጝሽመ ይን ኻይልድነቀ?#ዘዳ. 32፡21።
23«እጝቅቅ ፊቅድሽኩ» ዊገድ ግን እጝቅቅ ጣቅማውም፤ «እጝቅቅ ፊቅድሽኩ» ዊገድ ግን እጝቅ ዊገድቅ ኻንፃውም።#1ቈረ. 6፡12። 24ኣውማው እጅርድቅ ጝፃምረይዙ ኣርወድጚ ጝቕምቱ ኣርወድ ጭቝ በኒነ። 25ኽሊነዙ ምርምርል ጥዊጝቀ ኣርየይስ ቂሸው ስየድየንትቅ ዅጥን። 26ምላሰንድም፦ «ዝቨይዝመ ጝኣቒል ፅበውድቅ እጝቅ ኣደረቱ የጝ።»#መዝ. 24፡1። 27ኣምናው እጅር ኣቭንወ ጭጝሽ ክትንም ፊርትርነ በንርንሽ ኽሊነዙ ምርምርል ጥዊጝቀ ክታጭስ ኣልተውድየንትቅ ዅጥን። 28ዊገድ ግን ላውድ፦ «እኒን ጣወትዝ ሲውሽተው የጝ» ይሽ፣ እኒንት ድቈው እጅሪዝ ምላሰንዝ፣ ኽሊነዝቍዝም ስየድየንት ዅትርነ። 29ኽሊነዝ ማጥን ያንድ እድየን እጅሪዙ ኽሊነይዝ ማጥን የነት የጝጚ ክታኽሊነይዝ ማጥን የነትም ኣየው፤ ውር ቃጥ የጝ ይኻርነይድ ላየ እጅሪዙ ኽሊነዝ ዊቅሽተውድ? 30ዅረድየንት እደረት ሚዘንዝ ዀር ኣቐውዝየ እደረት ሚዝየንዘው ዊገይዝ ውር ቃጥ የጝ ዊቅሽጠውድ?
31ነስየ ዅርናንድም ኣነ ዝይርናንድ ዊንም ኣውማው ዊገድቅ ፃቭርናንድ እጝቅ ዊገድየንትቅ እደረ ኪብርጠ ፃቭጥን። 32ኣይዅዳኒዝም ኣነ ኣኽዛቫኒዝ ዊንም እደረት መክንስም እጝቅዝቅ ፅጋ ኣትርነ። 33ያን እጝቅ ዊገይዝቅ ኣውማው እጅርድየንት ዲስ ሽጨ ልቕርጠር ኣቐጘ፣ ክትንም ጘጝት ፃቭጥን፤ ንቕፀቍድ ቓድጛንስ የር ይቕምስ ጣቅመውድየንት ኣዪጝቀ ጛጭስ ጣቅመውድየንት በነኵን።
