Забур 84
84
Аллагьдин халкь патал ислягьвал тӀалабун
1Манидаррин чӀехидаз. Къарагьан миресрин мани.
2Я Ребби! Вуна Жуван чилиз
регьим къалурна,
Вуна хкана Якьубан эвледар есирдай.
3Вуна гъил къахчуна
Жуван халкьдин чӀуру крарилай,
кӀевна адан гунагьар вири.
Макьамдин ара
4Вуна Ви гъазаб къерехдиз авуна,
иликьарна Жуван хъел цӀай квай.
5Хкваш чун, Аллагь,
чун Хилас ийидайди,
чакай Ваз авай хъел гадара.
6Ваз даим хъел къвез жедани
давамриз хъел несилдилай несилдалди?
7Чал чан хкидачни кьван
Вуна цӀийи кьилелай,
Ви халкь Валди шад хьун патал?
8Ребби! Чаз къалура Ви регьим,
Вав гвай хиласвал це чаз.
9Аллагьди, Реббиди
вуч лугьудатӀа яб гуз жеда завай,
гьикӀ лагьайтӀа Вичин халкьдиз,
Вичиз вафа хуьзвайбуруз,
гаф гузва Ада саламатвал жеда лугьуз,
абур мад гъилера ахмакь тахьурай.
10РикӀивайни, Адав гвай хиласвал
Адахъай кичӀедаз мукьва я.
Мукьвара Адан баркалла
къведа уьлкведиз чи.
11Гьалтда сад-садал регьимни гьакъикъат,
гьахъвилини саламатвили
сада-садаз теменар гуда.
12Хкаж жеда вафа чилелай,
цаварилай гьахъвал килигда агъуз.
13Реббиди рикӀивай гуда чаз хушбахтвал,
чи уьлкведини чаз гуда бегьер.
14Гьахъвал физва Адан вилик кваз,
Адан кӀвачер патал гьазурзава рехъ.
© Институт перевода Библии, 2010-2024