Забур 68
68
Вичин геле къекъвезвай касдин дуьа
1Манидаррин чӀехидаз. «Цин цуьк» манидин макьам ягъиз. Давудан дуьа.
2Куьмек це заз, я Аллагь,
зи гардандив кьван агакьнава яд.
3Дерин лиледа акӀанва зун, даях авач.
Гьахьна цин дегьнейриз, селдин кӀаник акатна зун.
4Гьарайдай кьван галатна зун,
зи туьтуьнай акъатна кьур,
шехьна жуван чӀурна вилер –
умуд кутур вилер жуван Аллагьдик.
5Са себебни авачиз зун такӀанбур
зи кьилеллай чӀарарилай гзаф хьанва.
Мягькем хьанва душманар,
гьахъ галачиз къекъвезвайбур геле зи,
жува къакъуд тавурди за вахгун лазим я.
6Аллагь, чида Ваз ахмакьвал зи,
зи тахсирар жедач Вакай чуьнуьхиз.
7Заз килигна регъуь тахьурай
Вак умуд кутунвайбуруз,
я Агъа, я Къуватрин Ребби!
Заз килигна беябур тахьурай
къекъвезвайбур Вахъ, Исраилдин Аллагьдихъ.
8Куьз лагьайтӀа Ви хатурдай эхда за ахмурар,
алчук хьанва зи чинал русвагьвал.
9Жуван стхайризни зун негьнавай кас хьанва;
чаради хьанва зи дидедин рухвайриз.
10Куьз лагьайтӀа Ви КӀвалихъ чӀугвазвай гъайради
незва зун къеняй.
Вакай чӀурукӀа рахазвайбурун
алчах гафар, зи намусдик хкуьрдай, аватнава зал.
11Сив хуьдай чӀавуз жуван чандихъ шехьайла зун,
и кардай заз ахмурнай.
12За жувал ших алукӀайла,
абурун сиве кьиса хьана гьатна зун.
13Ацукьнавай варарив закай суьгьбет ийизва,
хъивегьдайбуру закай мани лугьузва.
14Ребби! Вуна хийир патал майилзавай береда
зи дуьаяр Вахъди я.
Жуван чӀехи регьимдалди жаваб це зи дад-бидаддиз
хиласвилив, я Аллагь.
15Акъуда зун уьлендай,
зав цик акатиз вугумир,
хилас жез це заз душманрикай зи,
цин дегьнейрикай!
16Зун цин селлерик акат тавурай,
дегьнеди зун туькьуьн тавурай,
фуру зи винелай сив агал тавурай!
17Ребби, заз жаваб це! Ви регьим заз хуш я!
Жуван чӀехи регьим гваз захъди элкъуьра.
18Ви лукӀракай Жуван чин чуьнуьхмир,
куьз лагьайтӀа зал бедбахтвилер уьцӀенва.
Тади ая, жаваб це заз!
19Зи мукьув ша, хилас ая зун,
зи душманрикай азад ая зун!
20Ваз чизва, заз гьикӀ нифрет ийизватӀа,
чизва Ваз зи айибни, зи русвагьвал,
Ви вилик ква зи вири душманар.
21Русвагьвили ханва зи рикӀ, барбатӀ хьанва зун.
Вилив хвенай за, дердиникай хабар кьада лагьана,
амма хьанач,
вилив хвенай за теселли гудайбур,
амма жагъанач гьабурни.
22Суфра кутуна гана заз хуьрек,
заз къаних хьанвайла, сирке гана.
23Абурун суварин суфраяр
абурун вилик желедиз элкъуьй,
аваданвал абурун дустариз чартмадиз элкъуьй.
24Абурун вилерал мичӀ акьалтрай,
зурзурай абурун беденар акъваз тавуна!
25Жуван хъел ичӀир ая абурал,
Ви хъилен цӀу кьада абур!
26ИчӀи хьурай абурун кӀвалер,
абурун алачухра чан алай касни тамукьрай!
27Куьз лагьайтӀа абур геле къекъвезва
На ягъайбурун,
азабрикай рахазва
Вуна ярхар авурбурун.
28Абурун вири гунагьрай
жерме ая,
абуруз чеб гьахъардай делилар
жагъун тавурай.
29Уьмуьрдин ктабда абурулай цӀар чӀугурай,
гьахъ-михьибурухъ галаз ана кхьин тавурай.
30Зун лагьайтӀа тӀалдик ква, азиятдик ква.
Ви куьмекди, Аллагь, зун хкажрай!
31Аллагьдин ТӀварцӀин
тарифда за манида,
хкажда ам разивилелди, хатур кьаз.
32Реббидиз хуш жеда и кар
яцралай,
кикерни крчар алай
жегьил жунгавдилайни.
33Зулумдик квайбуруз акурла шад жеда.
Къекъвезвайбур Аллагьдихъ,
чан атурай рикӀерал куь!
34Вучиз лагьайтӀа муьгьтежвиле авайбурун
ван къвезва Реббидиз,
Ада вичин лукӀар кваз такьуна тазвач.
35Адан тарифрай цаварини чилери,
гьуьлерини ана авай кьван вирибуру!
36Вучиз лагьайтӀа Аллагьди азад ийида Сигьан,
Ягьудатдин шегьерар эхцигда.
Жеда анра уьмуьр тухуз,
агъавалда абурал
37Адан лукӀарин эвледри,
абуруз а чил ирс жеда,
Адан тӀвар кӀандайбур
жеда анра уьмуьр тухуз.
© Институт перевода Библии, 2010-2024