Забур 64
64
Аллагьдин хъсанвилериз шукур авун
1Манидаррин чӀехидаз. Давудан мани.
2 Сигьандал Ви тариф авун кутугзава Ваз, я Аллагь,
чна жуван вядер кьилиз акъудзава вилик Ви.
3Эй, дуьадин Ван къвезвайди,
вири инсанар Ви патав къведа.
4Зи гунагьри кутазвайла кӀаник зун,
чи чӀуру крарилай гъил къахчузва На.
5Бахтавар я На хкягъайбур, мукьув авурбур
абуру уьмуьр тухун патал Ви гъенера.
Тух жеда чун няметралди КӀвалин Ви,
Ви пак Ибадатханадин.
6Вуна чӀехи краралди жаваб гуда чаз,
я Аллагь, чи Куьмекдар,
Умуд тирди чилин вири пипӀерин
ва лап яргъал гьуьлерин.
7Вуна дагълар эцигна къуватдив Жуван,
къудратдин чӀул юкьваваз.
8На гьуьлерин къал секинарзава,
абурун лепейрин гугрумни
халкьарин велвела.
9Уьмуьр тухузвайбуруз чилин а кьиле
кичӀе жеда Ви керемат-ишарайрикай.
Ярарни хурушумар
ацӀурда шадвилин манийрив Вуна.
10Чилин къайгъу чӀугваз Вуна,
адан къанихвал иликьарзава,
булдиз адаз бегьерар багъишиз.
Аллагьдин селлер цивди ацӀанва,
гун паталди халкьдиз техил,
куьз лагьайтӀа Вуна гьакӀ
туькӀуьрнава ник.
11Вуна адан цанин хулер
ацӀурзава цив, абурун мурцар
сад хьиз ийизва, хъуьтуьлариз марфадив,
адан цӀирериз рухсат гуз.
12Вуна Жуван жумартвилив
йис акьалтӀар ийизва,
Ви фургъунар бегьерривди ацӀанва.
13Кьурум векьи цӀийи хъийизва,
кӀунтӀари, чӀул хьиз, шадвал алукӀнава.
14Чуьллер кьунва суьруьйри,
алукӀнава дерейри техилар.
Кьуд пата шадвиляй манияр лугьузва.
© Институт перевода Библии, 2010-2024