Забур 44
44
Пачагьдин мехъериз талукь мани
1Манидаррин чӀехидаз: «Цин цуьквер» манидин макьам ягъиз. Къарагьан миресрин шиир. Мехъерин мани.
2РикӀ верцӀи гафарив ацӀузва,
туькӀуьрзава и мани за пачагьдиз.
Зи чӀал устад катибдин къелем хьиз я.
3Пачагь, вун вири инсанрилай иер я,
алахьзава ви сивелай гьайбат квай гафар.
Аллагьди гьавиляй даим яз
нуьсрет ганва ваз.
4Къуват авайди, тур юкьва тур,
алукӀ жувал гьуьрметни гьайбат.
5Гьайбатдив ацӀана
дапурагдаллаз алад гъалибвал къачуз
гьакъикъатдин, гьахъунин,
умунвилин хатурдай.
Ви эрчӀи гъили къалуррай
чӀехи крар къургъ галай.
6Пачагьдин душманрин рикӀера
сух хьурай ви хци хьелер;
Ви кӀвачерик ярх хьурай халкьар.
7Я Аллагь! Даим я Ви тахт,
Ви пачагьвилин лаш – лаш я гьахъ-дувандин.
8Ваз гьахъ-михьивал кӀан хьана,
такӀан хьана Къанун чӀурун.
Гьавиляй, я Аллагь, ви Аллагьди вавай
гуьцӀна гзаф чӀем шадвилин
ви юлдашривай гуьцӀайдалай.
9Ви парталрикай атир галай
набататрин ни къвезва.
Тавханайра, чӀагурнавай магьидив,
сим алай алатрин авазри шадарзава вун.
10Ви тавханадин ханумрин арада
рушар ава пачагьрин.
Ви эрчӀи гъилихъай
пачагь-ханум акъвазнава
ичӀи къизил алаз вичел Уфирдин.
11Яб акала, руш, фагьума, чӀалаз килиг,
жуван халкьни бубадин кӀвал алуд рикӀелай.
12Пачагьдиз кӀан хьайила ви иервили,
икрама адаз, ам ви агъа я.
13Тирвияр къведа
ваз савкьватар гваз,
халкьдикай тир девлет авайбур
къекъвез жеда ви регьимдихъ.
14И тавханайра пачагьдин руш, свас ава,
адан партал чӀагурнава къизилдив.
15Жуьреба-жуьре рангарин парталар алаз
пачагьдин патав тухузва ам,
адан гуьгъуьнаваз пачагьдин патав
рушар тухузва, адан дуст рушар.
16Абур шаддиз ва хвешидаказ тухузва,
абур гьахьзава тавханадиз пачагьдин.
17Пачагь, ви бан-бубайрин чка
кьада ви рухвайри;
вири уьлкве тирвал вуна абур
регьберар яз эцигда.
18Ийида за ви тӀвар рикӀе
амукьдайвал эвледрин,
гьавиляй халкьари
ваз шукурарда даим яз.
© Институт перевода Библии, 2010-2024