Yũwánĩ Tã búkũ rĩ vé rĩ ã ũlũngárá
Tã búkũ rĩ vé rĩ ã ũlũngárá
Yũwánĩ ri Yẹ́sụ̃ vé ꞌbá áyúãyũ rĩ pi vé ọ́gụ́pị. Sĩ búkũ ꞌdĩri Yãhụ́dị̃ rĩ pi ẽ ĩzã kozú, ãzini ꞌbá Yẹ́sụ̃ ri ẹ̃ꞌyị̃ꞌbá gí rĩ pi ẽ ĩzã kozú. Ũlũ tã kárákará Yẹ́sụ̃ ní ꞌoó ãyãzú ãyãyã rĩ pi rá, ãzini ũlũ tã Yẹ́sụ̃ ní ímbá rĩ pi rá, ꞌbo sĩ tã Yẹ́sụ̃ vé rĩ pi ã ụrụkọꞌbée kuyé. Yũwánĩ lũ kĩnĩ, Yẹ́sụ̃ adri ꞌyéŋá ꞌbá áda kuyé, ĩri kpá Múngú ꞌi.
Búkũ rĩ vé íꞌdóngárá iꞌda kĩnĩ, Yẹ́sụ̃ ri ụ́ꞌdụ́kọ́ Múngú vé ni ꞌbá rĩ pi ní, ĩrivé drãngárá, ĩri rọ̃bọ̃ŋọ̃ ꞌbá rĩ pi vé ũnjĩkãnyã ũjĩípi ni. Yẹ́sụ̃ ri Mãsíyã nẹ́bị̃ rĩ pi ní tã ni ũlũú búkũ Múngú vé Ũndĩ Ụ̃kụ rĩ rụzú rĩ agá ꞌyoó kínĩ, ĩri ímụ́ rá rĩ ꞌi. Cápĩtã 13-17 agá, Yũwánĩ ũlũ tã Yẹ́sụ̃ ní ívé ꞌbá ꞌî pámvú ũbĩꞌbá rĩ pi lẽzú rĩ, ãzini ũlũ tã ĩri ní kộpi ẽ ẹ́sị́ ũmĩzú ũndréŋá ꞌdãri sĩ ị́sụ́ ãkũdẽ rụkí drĩ ĩri kuyé rĩ. Búkũ rĩ vé ụ̃dụ̃ gé, ũlũ tã ĩ ní lịị́ Yẹ́sụ̃ drị̃gé rĩ vé tã, ĩrivé gbãngárá pẹtị alambaku sị́gé rĩ vé tã, ĩrivé íngángárá gõó ídri rú drãngárá gálésĩ rĩ vé tã, ãzini ĩri ní ꞌi iꞌdazú ívé ꞌbá ꞌî pámvú ũbĩꞌbá rĩ pi ẹndrẹtị gé vú be kárákará rĩ vé tã.
© 2017, Wycliffe Bible Translators, Inc. All rights reserved.