Саалтыр 56
56
1Хуор салайааччытыгар. «Өлөрүмэ» матыыбынан. Давид, Саултан күрэнэн баран, хайа хаспаҕар саһа сылдьан ыллаабыт ырыата.
2Абыраа миигин, Айыы Таҥара, абыраа миигин;
Эйиэхэ дууһам эрэнэр.
Аан алдьархай буурҕата намырыар диэри,
Эн кынатыҥ күлүгэр мин хорҕойуом.
3Үрдүктэн Үрдүк Таҥараны мин ыҥырабын,
миэхэ үтүөнү оҥорор Таҥараны.
4Кини, халлаантан көмө ыытан, миигин быыһыаҕа,
оттон миигин күөмчүлээччилэри саатырдыаҕа. Села
Таҥара бигэ тапталын, кырдьыгын ыытыаҕа.
5Мин хахайдар ортолоругар,
киһини мэҥиэстээччилэр быыстарыгар баарбын;
кинилэр тиистэрэ – үҥүү да ырба,
тыллара – кыырыктаах кылыс.
6Халлааннар уҥуордарынан айхаллан, Айыы Таҥара,
бүтүн сир үрдүнэн көһүннүн Эн килбиэниҥ.
7Барар суолбар миэхэ угаайы оҥорбуттар,
ону көрөн, дууһам санньыйда.
Мин иннибэр иин хаспыттар,
ол эрэн, онно бэйэлэрэ түстүлэр. Села
8Мин сүрэҕим бэлэм, Айыы Таҥара,
мин сүрэҕим бэлэм.
Эйигин айхаллаан, мин ырыа ыллыам.
9Уһугун, дууһам миэнэ!
Уһуктуҥ, арфа уонна лира!
Мин сарыалы уһугуннарыам.
10Норуоттар ортолоругар, Айыы Тойон, Эйиэхэ махтаныам,
омуктар ортолоругар Эйигин айхаллыам.
11Эн бигэ тапталыҥ халлааннары аһара барар,
Эн кырдьыгыҥ былыттардыын быысаһар.
12Халлааннар уҥуордарынан айхаллан, Айыы Таҥара,
бүтүн сир үрдүнэн көһүннүн Эн килбиэниҥ.
© Институт перевода Библии, 2008-2022