एफिसी 3
3
यहूदी तेब मीयूने परमेश्वरजे वचन स्य्वेब मी पावल
1येरेक्यूत्देबे नम यहूदी तेब मीयूजे पक्षने ख्रीष्ट येशूजे सेवा चेब ङ पावल कैदी क्यूर ख्यङ्। 2नमयूजे लागि ङैने पीनेब परमेश्वरजे अनुग्रहजे जिम्मा ङैदे प्ल्ये ख्यङ् यब बारेने नमयूदेये तख्यङ् यदेबे मन्न ख्यङ्। 3परमेश्वरदे रङ्सेजे नङ्सू योजना पूक्देबे ङैने तम्मीदे। अम्बजे बारेने ङैदे नमयूने खूम्ने चिट्ठी ठून्यात्या लिख्दीक ख्यङ्। 4#कलस्सी 1:26,27ङैदे लिख्देब पो छ्योत्देयलो ख्रीष्टजे नङ्सू योजनाजे बारेने ङैदे कन्छ्वासेमे नङ्सू पो स्ये ख्य यब पो नमयूदे क्व ख्यङ्दे। 5हम्ब खूम पुस्ताजे मीयूने था अम्पीन ख्य, दीनी अम्ब पो ङूजे पवित्र मूल स्यूस्स्या मेस्ये अगमवक्तायूने पवित्र आत्मादे तम्मे ख्यङ्। 6या सूगब खबरदेने यहूदी मेस्ये यहूदी तेब मीयूदे प्रे-प्रेने परमेश्वरजे असी प्रे ख्यङ्, ङ्व त्याजे अङ्गयू मेस्ये ख्रीष्ट येशूने क्यूत्देबे चेब कबुलजे गोसारी क्यूर ख्यङ्।
7ङूजे शक्तिजे काम अनुसार ङैने पीनब परमेश्वरजे हम्ब अनुग्रहजे बर अनुसार अम्ब सूगब खबरजे सेवा चेब मी ङ क्यूक्क ख्य। 8परमेश्वरजे पवित्र मीयूनङ्जे ङ सोरो चीद ख्यङ्लीने ख्रीष्टजे बेस्से कूम सम्पत्तिजे सूगब खबर यहूदी तेब मीयूने स्य्वेब बर परमेश्वरदे ङैनेने पीन्दे। 9साप्ता कूरू बन्देब परमेश्वरने जूग्-जूग्मेस्येने फूदेबे हीदेब नङ्सू पो च ख्य, हम्ब मीयू क्वानेने स्य्वेब अनुग्रह ङैने पीन्दे, 10येर्बे मण्डलीदे परमेश्वरजे पीरी-पीरीजे ज्ञान स्वर्गजे नेयूने हुकुम चील्लेबयू मेस्ये अधिकार ख्यबयूजे अन्द्रने तम्मीस्य। 11परमेश्वरदे अम्ब साप्ताने रङ्सेजे कलङ्बेये अन्जेनब योजना ङीनजे प्रभु येशू ख्रीष्टने पूरा चीत्दे। 12ख्रीष्टने चेब विश्वासदे ङीनदे आँट मेस्ये पक्क भर् चीत्देबे ङीन परमेश्वर ट्याने प्र प्रेक्क्य, 13येरेक्यूत्देबे ङ नमयूने बिन्ती चीक्क्य, यी नमयूजे लागि ङैदे भोक्तीनब सकस् तङ्देबे नमयू अन्-आतीलाची। अम्ब नमयूजे लागि फाइदजे पो ख्यङ्।
एफिसी मण्डलीजे लागि प्रार्थना
14येरेक्यूत्देबे ङ प परमेश्वरजे खूम्दे रङ्से पूजी चोदेबे प्रार्थना चीन्न ख्यङ्। 15ङूट्यादे स्वर्ग प्रे पृथ्वीने ख्यब म्हीत्ती क्वादेने मीन् प्रे-ख्यङ्। 16ङ प्रार्थना चीक्क्य, ङूजे महिमाजे सम्पत्ति अनुसारजे शक्तिदे ङूजे आत्मा क्यूत्देबे नमयूजे नङ्-जीयाने बोल्यो बन्दीस्य, 17मेस्ये विश्वासदे चीत्देबे ख्रीष्ट नमयूजे सेम्ने बास चीस्स्य, मेस्ये प्रेम चीत्देबे छ चोदेबे दोरो क्यूरने, 18परमेश्वरजे पवित्र मीयूप्रे ख्रीष्टजे प्रेमजे चौडाई, रेङ, फेर मेस्ये गहिरो कोला टोङ् यदेबे स्येब शक्ति प्रे खूस्य। 19ज्ञानदे मेल अन्ख्वब हम्ब प्रेमने नमयूदे था प्रे खूस्य, होर्दे परमेश्वरजे प्रेमदे नमयूने भरीपूर्न क्यूर खूस्य।
20ङीन नङ्ने काम चेब ङूजे शक्तिदे ङीनदे स्य यली थेप् मेस्ये मन्न-यली बेस्से थेप् पीन खूइय, 21हम्ब परमेश्वरजे महिमा मण्डलीने मेस्ये येशू ख्रीष्टने जूग्-जूग्सेमे येतार्ने क्यूस्स्य। आमेन।
Ghale New Testament © Nepal Bible Society, 2011.