मूल स्यूस्स्यायूजे कामजे किताब 10
10
पत्रुस मेस्ये कर्नेलियस
1कैसरियाने कर्नेलियस मीन् ख्यब मी त्या ख्य, ङू इटालिया यब पल्टनजे कप्तान ख्य। 2ङू ईश्वर मन्देब मी ख्य, होर्दे ङूप्रे ङूजे म्हीती क्वाने परमेश्वरप्रे फ ख्य। ङूदे सोरो सेम् यङ्लाबे मीयूने दान पीन ख्य, मेस्ये परमेश्वरने येतार्ने प्रार्थना चेख्य। 3नो गूङ्जे सोम् तब बीलने ङूदे दर्शनने परमेश्वरजे स्वर्गदूत त्यादे ङूतेले रदेबे येरे येनब सोरो ज्य तदे, “कर्नेलियस!”
4फैये फैये ङूदे ङूने चेलाबे लेत्दे मेस्ये यदे, “प्रभु, येमी।”
होर्दे ङूदे ङूने यदे, “नैजे प्रार्थना मेस्ये दूख्प्रेयूने पीनब दान ह्वेरनजे रूप्ने परमेश्वजे खूम्ने फ्योये ख्यङ्। 5जेम्से मीयूने योप्पा सहरने कूल्बी, मेस्ये पत्रुस यब सिमोनने कोबी। 6पत्रुसब खूस्यजे काम चेब सिमोन ट्याने टून ख्यङ्, ङूजे कीम् समुद्रजे नने ख्यङ्।”
7कन्छ्वाब ङूप्रे क्यमब स्वर्गदूत थे चेकीदे, हन्छ्वाब ङूदे रङ्से त्वोयू नङ्ने ङ्ही मेस्ये ङूजे येतार्ने सेवा चेब धर्मी सिपाई त्या कोदे, 8मेस्ये थमयूने साप्ता पो स्योत्देबे योप्पाने कूल्बीदे।
पत्रुसजे दर्शन
9नैदेरेदे थमयू हम्ब सहरजे ट्याने फ्योरब, नोदे बाह्र बजेतेले पत्रुस प्रार्थना चेने कीम्जे कौसीने टेयीदे। 10ङू ठीदेबे चत्या चब सेम् चीत्दे, तर सूजोयूदे चसे तयार चीन्नब बीलने ङू प्रार्थना चीन्नूब दर्शन तङ्दे। 11ङूदे स्वर्ग पूक्येब मेस्ये हैयादे सूर् स्यीनेने ख्यायेब च्यातरप्र त्या चत्या पृथ्वीतेले तल्लीनब तङ्दे। 12हम्ब च्यातरने पृथ्वीने ख्यब साप्ता थर्जे तोप्स्यी जन्तू मेस्ये लोदे स्यून्देबे सने प्रब प्राणी मेस्ये मूजे ययू ख्य। 13होर्दे ङूदे आवाज त्या तदे, “ओ पत्रुस लङ् मेस्ये सेत्देबे च।”
14तर पत्रुसदे यदे, “छ्यो प्रभु, चेनेयलो ङैदे कलङ्बेये पवित्र त्वब या अशुद्ध थोक चैत्याये अन्च ख्यङ्।”
15हम्ब आवाज फेरि ङ्ही खेप् पलोनेये ङूदे तदे, “परमेश्वरदे कम्ब शुद्ध चीक्क ख्यङ् हम्बने नदे अशुद्ध अम्मन्लाची।”
16सोम्फे सेमे येरे क्यूत्दे, मेस्ये हम्ब च्यातर हन्छ्वाबने स्वर्गतेले कूती।
17कन्छ्वाब पत्रुस रङ्सेदे अम्ब दर्शनजे अर्थ च टूङ् यदेबे सेम्-नङ्ने आ-थोम्न ख्य, हन्छ्वाबने कर्नेलियसदे कूल्बेब मीयू सिमोनजे कीम् मल्देबे ख्यो लने मेर्रदे, 18मेस्ये पत्रुस यब सिमोन अने टूङ ख्यङ्देयी?” यदेबे के केन् योन्देबे लोत्दे।
19होर्दे पत्रुस दर्शनजे बारेने विचार चीन्नूब पवित्र आत्मादे ङूने यदे, “ले, मी सोम्दे नने मल्न ख्यङ्। 20लङ्देबे मोप्र मेस्ये चेत्याये अम्मन्लाबे थमयूप्रे प्र चेनेयलो थमयूने ङैदे कूल्बे ख्यङ्।”
21होर्दे पत्रुस मो-तल्रदे, मेस्ये हम्ब मीयू ट्याने गीलीदेबे यदे, “ले, नमयूदे मेलब मी ङने ख्यङ्। नमयू अँने चै कामदे रदे?”
22थमयूदे यदे, “ङीने अँने कर्नेलियस मीन् ख्यब कप्तान त्यादे कूल्बे ख्यङ्, ङू सोर्तो, मेस्ये परमेश्वरजे डर येब मी ख्यङ्। यहूदीयू क्वादेने गेसेन् चेब मी ख्यङ्, पवित्र स्वर्गदूत त्या ङूटयाने रदेबे नने ङूजे कीम्ने कोदेबे नैजे अर्ती ङ्यीनब आज्ञा ङूदे प्रे ख्यङ्।” 23होर्दे ङूदे थमयूने नङ्ने ख अने टूङ्ख यदेबे कोदे। थमयू हम्ब मून्दे हैयानेने टूङ्दे।
कर्नेलियसजे कीम्ने पत्रुस
नैदेरेदे पत्रुस थमयूप्रे गीलीदे मेस्ये योप्पाने ख्यब प्रभुने विश्वास चेब कोइ अत-च्योन्यू ङूप्रे गीलीदे। 24नङ्नीरेदे थमयू कैसरिया फ्योइदे। रङ्से नाता-गोतायू मेस्ये सोरो थूनब ख्योन्यू फूङ् पूत्देबे कर्नेलियसदे पत्रुसने रेन्देबे टून ख्य। 25कन्छ्वाब पत्रुस नङ्ने रदे हन्छ्वाब कर्नेलियसदे ङूने तूदेबे तोप्ने स्यूव पीन्दे। 26तर पत्रुसदे ङूने येरे यदेबे लङ्दे, “लङ्, ङ रङ्सेये मीने न।”
27होर्दे पत्रुस ङूप्रे बात् सेते-सेते कीम्नङ्ने गीलीब हैयाने ङूदे कूम मीयू फूङ् क्यून्नब तङ्दे। 28होर्दे पत्रुसदे थमयूने यदे, “सूजो जातजे मीयूप्रे यहूदीयूदे सङ्गत चेने, या थमयूने त्वने प्रब यहूदीजे लागि कोला अन्ज्य क्यूक्क्य यब पो नमयूने थाने ख्यङ्, होरनेयली परमेश्वरदे ङैने कम्ब मीनेये पवित्र त्वब या अशुद्ध अम्मन्लाची यदेबे तन ख्यङ्। 29होरेक्यूत्देबे क्व बितीक्ने चैये अन्-यलाबे ङ नमयू ट्याने रदे। नमयूदे ङैने चेने क्व, जेम्से य स्व?”
30होर्दे कर्नेलियसदे यदे, “स्यीर्या खूम्दे धन्ने अन्छ्वाबने ङ कीम्जे घडीने सोम् तप्प प्रार्थना चीन्न ख्य, हन्छ्वाब चकिलो कोला ह्वेब मी त्या ङैजे खूम्ने मेर्रदे, 31मेस्ये यदे, ‘कर्नेलियस, परमेश्वरजे खूम्ने नैजे प्रार्थना ङ्यीन्क ख्यङ्, मेस्ये नदे दूख्प्रे मीयूने पीनब दान ह्वे चे ख्यङ्। 32होरेक्यूत्देबे योप्पाने मी कूल्बीदेबे पत्रुस यब सिमोनने कोबी। ङू समुद्रजे नने खूस्स्यजे काम चेब सिमोनजे कीम्ने टून ख्यङ्।’ 33होर्दे ङैदे हन्छ्वाबने नैट्याने मी कूल्पीदे, मेस्ये न ङ्येम्देबे रेमीदे। जेम्से प्रभुदे नने आज्ञा पीनब पोयू क्वाने ङ्यीनने ङी क्वाने परमेश्वरजे खूम्ने फूङ् क्यून्न ख्यङ्।”
34 #
व्यवस्था 10:17
होर्दे पत्रुसदे यदे, “परमेश्वरदे साक्पूजा अन्ची, यब पो तम्दम्ने ङ तङ्न ख्यङ्, 35तर टक्क जातजे मीयू सू परमेश्वरने फैय, मेस्ये ठीक काम चीक्क्य, हम्ब ङूजे खूम्ने ग्रहण चेब लायकजे क्यूक्य। 36परमेश्वरदे इस्राएलजे मीयूने चङ्बेब खबर या ख्रीष्टदे प्रचार चेब शान्तिजे सूगब खबर नमयूने थाने ख्यङ्। ङू खोत्ताजे प्रभु ख्यङ्। 37यूहन्नादे प्रचार चेब बप्तिस्माजे ङ्येदे, गालीलदेमेस्ये सुरु चीत्देबे यहूदियाजे का-मुलुकने प्रचार चेब वचन अम्बने ख्यङ्, 38यी परमेश्वरदे नासरतजे येशूने चून्दीदेबे रङ्से पवित्र आत्मा मेस्ये शक्तिदे अभिषेक चीत्दे। का-मुलुकने येशू गीलीदेबे ङूदे ज्य काम चीत्दे, मेस्ये मीयूने तम् क्यूस्स्ये पीन्दे, मेस्ये शैतानदे दैल्लीनबयूने तम् चीदे चीदे प्रदे, चेनेयलो परमेश्वर ङूप्रे ख्य।
39“होर्दे येशूदे यहूदीयूजे देशने मेस्ये यरूशलेमने चेब साप्ता पोयूजे ङी साक्षी ख्यङ्। ङूने थमयूदे तङ्बोने पील्देबे सेत्दे। 40तर परमेश्वरदे तेस्रो दिनने येशूने सोम्बो चीत्देबे लङ्दे, मेस्ये ङूने तङ्लाबे चीम्मीदे, 41मी क्वानेने दी, तर ङीन सूने परमेश्वरदे साक्षीजे लागि सेल्दे, मेस्ये ङू सीयेबदे सोम्बो क्यूरमेस्ये ङीदे ङूप्रे च-थूङ चीत्दे। 42ङूदे ङीने मीयूने प्रचार चेने, मेस्ये ङू सोम्बो होरदे सीयेबयूजे न्याय चेब क्यूरने परमेश्वरदे चून्दीयेब मी ख्यङ् यदेबे गवाही पीनने आज्ञा चे ख्यङ्। 43अगमवक्तायू क्वादेने ङूजे गवाही पीने ख्यङ्, ङू फ्याने विश्वास चेब मी क्वानेने ङूदे पाप क्षमा पीन्क्य।”
44पत्रुसदे अम्ब पो क्यम्नूब वचन ङ्यीनब मीयू फ्याने पवित्र आत्मा तल्रदे। 45यहूदी तेब मीयू फ्यानेये पवित्र आत्माजे बर पीनब तङ्देबे पत्रुसप्रे रब विश्वास चेब यहूदीयू बेस्से हार्मन्दीकदे। 46चेनेयलो सूजो केने क्यम्देबे हम्बयूदे परमेश्वरजे सार्या चीन्नब थमयूदे तदे। होर्दे पत्रुसदे यदे, 47“ङीनदेप्रने पवित्र आत्मा प्रेब थमयूने क्यूजे बप्तिस्मा पीनजे लागि सूदे रोक्ते खूइय?” 48होर्दे ङूदे थमयूने येशू ख्रीष्टजे मीन्ने बप्तिस्मा कीन् यदेबे आज्ञा चीत्दे। होर्दे थमयूदे पत्रुसने तेदिन हैयानेने टूङ् यदेबे बिन्ती चीत्दे।
Ghale New Testament © Nepal Bible Society, 2011.