१ कोरिन्थी 8
8
मूर्तिने चेर्दीयेब चसे
1जेम्से ङ मुर्तिने चेर्दीयेब चसेजे बारेने यीय, ङीन क्वाप्रेने ज्ञान ख्यङ् यदेबे ङीनदे स्येख्यङ्। ज्ञानदे केन् त्वे चीक्क्य, तर प्रेमदे उन्नती चीस्स्ये पीन्क्य। 2कादेये कोइदे “ङैदे तम्दम्ने चत्या स्येख्यङ्” मेन्लो, ङूदे स्येपर्देब पो अन्स्येब क्यूक्क्य। 3तर कोइ मीदे परमेश्वरने प्रेम चे ख्यङ् यलो परमेश्वरदे हम्ब मीने स्येय।
4येरेक्यूत्देबे मूर्तियूने चेर्दीयेब चसे चक्यूरइ चअन्क्यूर यब पो ङीनदे स्ये ख्यङ्, मुर्ति चैये दी, मेस्ये परमेश्वर तीत्यात्यामे ख्यङ् सूजो त्वो। 5स्वर्गने या पृथ्वीने कूम देवतायू ख्यङ्स्ये यदेब कोइ मीयूदे य ख्यङ्, होर ख्यङ्यलीने अम्बयू क्वाने चैकम्ये अन्लादेब मीन्त्याजे देवतायू मेस्ये प्रभु यबयू ख्यङ्। 6तर ङीनजे लागिब तीत्यात्या प परमेश्वर ख्यङ्, ङूदेने साप्ता थोक सृष्टि चीत्दे, मेस्ये ङीनदे अम्ब जीया परमेश्वरजे लागि चीय। ङीन्जे लागि तीत्यात्या प्रभुब येशू ख्रीष्ट ख्यङ्, ख्रीष्टने क्यूत्देबे साप्ता थोक सृष्टि क्यूत्दे, मेस्ये ङूने क्यूत्देबे ङीनदे अम्ब जीया चीय।
7तर विश्वासीयू क्वाप्रेने अम्ब पोजे ज्ञान त्वो। कोइ मीयूने मुर्ति पूजाजे अन्ज्य म्यूक्री गीले ख्यङ्, यी थमयूदे येर चसे चब तम्दम्ने मूर्तिने चेर्दीयेब चसे चेन मन ख्यङ्, मेस्ये थमयूजे विवेक ज्य त्वोदेबे हम्बदे थमयू अशुद्ध क्यूक्क्य। 8तर परमेश्वरदे थेप् छेब क्यूरने चसेदे चेये चेअङ्खू, चसे अन्चलीने नोक्सान चेये त्वो मेस्ये चलीने फाइदा चेये त्वो।
9तर होस्स्यार क्यूर्, नदे च चीतीङ् रीको चेब कामदे विश्वासने पक्क त्वबयूदे पाप अन्चीस्स्य। 10कादेये विश्वासने पाको त्वब मीयूदे विश्वासने पाको क्यूत्देबे ज्ञान प्रेक्कब मीने मूर्तिजे मन्दिरने चसे चेनब तङ्देयलो, मुर्तिने चेर्दीयेब चसे चने हम्ब मीदेये आँट अन्चेया? 11होरदे नैजे ज्ञानदे चीत्देबे हम्ब विश्वासने पक्क त्वब अत अची-च्योन्जे विश्वास नाश क्यूप्पीय, तर ङूजे लागिये प्रभु ख्रीष्टदे रङ्से जीया पीन्दे। 12जेम्से येर्बे नमयूदे रङ्से अत च्योनयूजे विरुद्धने पाप चीप्प मेस्ये थमयूजे ज्य प्रे अन्ज्य चेलाबे छूर्ते अङ्ख्वब सेम्ने नसे पीम्ब नमयूदे ख्रीष्टजे विरुद्धने पाप चीक्क्य। 13येरेक्यूत्देबे ङैदे चब चसेदे ङैजे अत च्योन पापने पर्तीबीय यलो ङ कलङ्बेये स्य अन्च, नत्र ङैदे रङ्से अत अची-च्योन्यूने पापने नाश क्यूस्से पीन्क्य।
Ghale New Testament © Nepal Bible Society, 2011.