१ कोरिन्थी 6
6
विश्वासीयू नङ्ने मुद्दा-मम्ल
1नमयूजे नङ्ने कोइ त्या सूजो च्योनप्रे च्य-जीङ क्यूत्दे यलो न्याय चेजे लागि परमेश्वरजे पवित्र मीयू ट्याने अम्प्रलाबे परमेश्वर अम्मन्देब मी ट्याने प्रने आँट चीक्क्या? 2परमेश्वरजे पवित्र मीयूदे संसारजे न्याय चीक्क्य यब पो च नमयूने था त्वा? कादेये संसारजे न्याय नमयूदेने चे पर्तीय यलो, जीत-जीत मुद्दायूये नमयूदे छीन्दे अङ्ख्वया? 3ङीनदे स्वर्गदूतयूजेये न्याय चीक्क्य यदेबे नमयूने था त्वा? कादेये होरेयलो अम्ब जीयाने क्यूरब पो केन् क्यूक्या? 4येर च्य-चीङयू नमयू नङ्ने ख्यङ् यलो, अम्ब मील्लेजे लागि मण्डलीने गेसेन् त्वब हम्ब मीयू ट्याने चेने प्र? 5अम्ब पोने नमयू त्वा पर्देब ख्यङ्। रङ्से च्योन्यूजे नङ्ने च्य-चीङब मुद्दा छीन्दीमेब ज्य बुद्धिख्यब मी तम्दम्ने नमयूजे अन्द्रने सूत्याये त्वया? 6तर च्योन् त्या सूजो च्योन्जे विरुद्धने अड्डने प्रीय यलो, हम्बये परमेश्वरने विश्वास अन्चेबयूजे खूम्ने!
7नमयू नङ्ने त्यादे त्याजे विरुद्धने मुद्दा चीङ्ब नमयू मुद्दाने फूङ्गप्रने क्यूक्क्य। बरू अन्न्याय क्यूल्ली चैने अन्सैदे? बरू लूर्तीकलीने अन्सैदे? 8तर नमयूदेने अन्-न्याय चे ख्यङ् मेस्ये ठग्ते ख्यङ्, हम्बये रङ्से अत-अची च्योन्यूने!
9परमेश्वरजे राज्यने दुष्टयू क्योबब हक अम्प्रे यदेबे नमयूने था त्वा? नमयूदे धोका अम्प्रेस्स्य, छाडा काम चेबयू, मुर्ति पूस्तेयू, वेश्य काम चेबयू, मदी-मदी मेस्ये पती-पतीजे अन्द्रने प्रे ङ्यूमबयू, पती वेश्ययू, 10खूमान्यू, लोभ चेबयू, चीदे स्य्वबयू, न-प्वेबयू मेस्ये लूट्देबयू परमेश्वरजे राज्यने क्योबब हक प्रेस्स्ये त्वो। 11त्याफे नमयूये येरप्रने ख्य। तर प्रभु येशू ख्रीष्टजे मीनने होर्दे ङीन्जे परमेश्वरजे आत्मादे नमयूने शुद्ध चीम्मीदे, पवित्र चीम्मीदे, मेस्ये दोष त्वब चीम्मीदे।
वेश्य कामजे बारे
12 #
१ कोरिन्थी 10:23
कोइदे यीस्ये, “ङैदे चने चील्लीने क्यूक्क्य।” तर अम्ब साप्ता पोदे नमयूजे फाइदा अन्ची। ङैदेये य ख्व ख्यङ्दे, “ङैदेये चने चील्लीने क्यूक्क्य”, तर ङ कम्ब पोजेये त्वो क्यूत्देबे अन्टोङ्। 13“चसे ख्वाजेजे लागि ख्यङ्, ख्वाजे चसेजे लागि ख्यङ्।” तर परमेश्वरदे अम्ब ङ्हीनेने नाश चीक्क्य। ङीन्जे ङ्व वेश्य काम चेजे लागि दी, तर प्रभुजे लागि ख्यङ्, मेस्ये प्रभु ङीन्जे ङ्वजे लागि ख्यङ्। 14परमेश्वरजे रङ्से शक्तिदे प्रभु येशू सीइली सोम्बो चीम्मीदे, मेस्ये ङीननेये ङूजे शक्तिदे सोम्बो चीम्मीय। 15नमयूजे ङ्व ख्रीष्ट येशूजे अङ्गयू ख्यङ् यदेबे नमयूने था त्वा? होरेक्यूल्लो ख्रीष्टजे अङ्ग टेल्देबे वेश्यजे अङ्ग चे औ? अम्ब क्यूरने अङ्खू। 16#उत्पत्ति 2:24वेश्य काम चेबप्रे सूमीदे वेश्य काम चीक्क्य, ङू हम्बप्रेने ङ्व-त्या क्यूक्क्य यब पो नमयूने था त्वा? धर्मशास्त्रने येरे लिख्दीये ख्यङ्, “हम्ब मी ङ्ही ङ्व-त्या क्यूक्क्य।” 17तर प्रभुप्रे सू त्या क्यूत्देबे प्रीय हम्बब प्रभुप्रे आत्माने त्या क्यूक्क्य।
18वेश्य कामदे आलाक् क्यूर्। मीदे चेब सूजो साप्ता पाप कामयू रङ्से ङ्वजे फीने चीक्क्य, तर वेश्य काम चेब मीदे रङ्से ङ्वजे विरुद्धने पाप चेब क्यूक्क्य। 19#१ कोरिन्थी 3:16; २ कोरिन्थी 6:16नमयूजे ङ्व पवित्र आत्माजे मन्दिर ख्यङ्, हम्ब पवित्र आत्मा परमेश्वरदे नमयूने पीन ख्यङ्, मेस्ये ङू नमयूजे नङ्ने बास टूङ ख्यङ् यदेबे नमयूने था त्वा? नमयूजे रङ्से ङ्वये नमयूजे ते ख्यङ्। 20परमेश्वरदे नमयूने लू फादेबे कीने ख्यङ्। येरेक्यूत्देबे नमयूजे ङ्वदे परमेश्वरजे महिमा ची।
Ghale New Testament © Nepal Bible Society, 2011.