१ कोरिन्थी 10
10
मूर्ति पूजा अन्चील्लाची यदेबे बोङ्बे आर्तेब
1 #
प्रस्थान 13:21,22; प्रस्थान 14:22-29 अत-अची च्योन्यू ङीनजे मेमेयू क्वाने मूक्प नङ्ने जूक्तीदेबे समुद्रजे क्यू अन्द्रदे क्यूत्देबे तोप्दे गीलीदे यब पो नमयूदे स्येस्य यदेबे ङ मन ख्यङ्। 2होर्दे मोशाप्रे-प्रे क्यूत्देबे थमयू क्वादेने मूक्प मेस्ये समुद्रने बप्तिस्मा क्यूक्क ख्य। 3#प्रस्थान 16:35थमयू खोत्तादेने थर् त्या आत्माजे चसे चदे।
4 #
प्रस्थान 17:6; गन्ती 20:11 खोत्तादेने थर्त्या आत्माजे क्यू थूङ्दे, चेनेयलो थमयू प्रे-प्रे प्रब आत्माजे पोलोम्जे क्यू थमयूदे थूङ्दे। ख्रीष्ट ब हम्ब पोलोम् ख्य। 5#गन्ती 14:29,30होरेक्यूल्लीने थमयू नङ्ने ख्यब कूम मीयूप्रे परमेश्वर अन्सूग्, मेस्ये थमयू मी अन्टोङब चनमन नेने नाश क्यूत्दे।
6 #
गन्ती 11:4
जेम्से थमयूदे चेप्र खराब इच्छा ङीनदे अन्चील्लाचीदे यदेबे अम्ब पोयूजे लागि ङीनने बोङ्बे आर्तेजे लागि पीने ख्यङ्। 7#प्रस्थान 32:6थमयू कोइदे मूर्ति पूजा चेप्र नमयूदे अन्चील्लाची। धर्मशास्त्रने येर लिख्दीये ख्यङ्, “मीयू च थूङने टूङ्दे, होर्दे मोजमजा चेने लङ्दे, स्यने लङ्दे।” 8#गन्ती 25:1-18थमयू नङ्ने कोइदे चेप्र वेश्य काम ङीनदे अन्चील्लाचीदे। वेश्य काम चीक्कब क्यूत्देबे तीयाने नूस्यूदे हजार सोम् मी सीये ख्य। 9#गन्ती 21:5,6थमयू नङ्ने कोइदे केरे प्रभुजे जाँच चीत्दे मेस्ये र्वेदे च्यादेबे सीये ख्य, होरप्र ङीनदे प्रभुजे जाँच चे अन्क्यूर्। 10#गन्ती 16:41-49थमयू नङ्ने कोइदे केरे गन्गन् चीत्दे, होर्दे नाश चेब स्वर्गदूतदे थमयूने नाश चीत्दे होरप्र ङीनदे गन्गन् चे अन्क्यूर्।
11थमयू फ्याने क्यूरेब अम्ब साप्ता पोयू नमूना तनजे लागि क्यूत्दे, मेस्ये ङीनने होस्स्यार चेने अम्ब लिख्दीदे। ङीन जेम्से संसार जेन्टब सेमेने फ्योरीक ख्यङ्। 12येरेक्यूत्देबे सूदे ङ चेलाबे मेर्न ख्यङ् यदेबे मन्क्य, हम्ब होस्स्यार क्यूस्स्य, नत्र हम्ब क्यर्बीय।
13मीयूने रख्वब जाँचत्यामे नमयूजे जीयाने रीय सूजो जाँच नमयूने अन्र ख्यङ्। परमेश्वर भर् पर्तेख्वब ख्यङ्। नमयूजे शक्तिदे सैदेख्वब जाँचनेत्यामे पर्तीस्ये पीन्क्य, सूजो सैदे अङ्ख्वब जाँचने पर्तीस्ये अम्पीन्। तर जाँच क्यूप्प अम्ब ट्यादे प्लीम्बब लम्ये बन्दीमीय मेस्ये येर्बे जाँच क्यूप्प नमयूदे हम्बने सैदे खूइय।
मूर्ति पूजाजे भत्यार् मेस्ये प्रभु-भोज
14येरेक्यूत्देबे ङैजे छेब अत-च्योनयू मूर्ति पूस्तेब काम अन्चील्लाबे आलाक् क्यूत्देबे टूङ्। 15ङ नमयूने ज्ञान ख्यब मीयूप्र मन्देबे यीय। ङैदे यब पोने नमयू रङ्सेदेने जाँच ची।
16 #
मत्ती 26:26-28; मर्कूस 14:22-24; लूका 22:19,20 प्रभु-भोजजे पील टेल्देबे परमेश्वरने ङीनदे धन्यवाद पीन्क्य। हम्ब पीलदे थूङ्ब ङीनयू ख्रीष्ट येशूजे काने सामेल् क्यूर ते स्व? मेस्ये फाच्या चीक्कब क्यङ् ङीनदे चब, ङीनब ख्रीष्ट येशूजे ङ्वने सामेल् क्यूर ते स्व? 17क्यङ् तीत्यात्या ख्यङ्, येरेक्यूत्देबे ङीन कूम क्यूल्लीने ङ्व त्या ख्यङ्, चेनेयलो ङीन क्वाने हम्ब तीत्यात्या क्यङ् कोत्देबे चीय।
18 #
लेवी 7:6
इस्राएलीयूजे धर्म मेस्ये छ्यप्ने ले: परमेश्वरने बलि चेर्दीयेब चसे चबयू, परमेश्वरने पूस्तेब टेप्रेने सामेल् अन्क्यूर या? 19होरेक्यूल्लो ङैदे च येन ख्यङ् स्व? मूर्तिने चेर्तीयेब से चत्या ख्यङ्या स्व? या मूर्ति यब चत्या ख्यङ्या स्व? 20#व्यवस्था 32:17होरे दी, तर ङैदे यमेब पोब च यलो, मूर्ति पूजा चेबयूदे चैजे बलि पीन्क्य, हम्ब परमेश्वरने दी, तर छेत्-प्रेतयूने चर्दीय, मेस्ये नमयू छेत्-प्रेतयूप्रे सामेल् क्यूस्स्य अम्मन्। 21नमयूदे प्रभुजे पीलप्रे होर्दे छेत्-प्रेतजे पीलप्रे सामेल् क्यूत्देबे थर् ङ्ही पीलदे थूङ् अङ्खू। होरप्रने नमयूदे प्रभुजे टेबूलप्रे होर्दे छेत्-प्रेतयूजे टेबूलप्रे सामेल् क्यूत्देबे थर् ङ्हीजेने च अङ्खू। 22#व्यवस्था 32:21ङीनदे प्रभुने प्रो लङ्से पीनया? ङीन प्रभुयली बोल्यो ख्यया?
विश्वासीयूजे स्वतन्त्रता
23 #
१ कोरिन्थी 6:12
“साप्ता थोकने चेक्यूक्क्य”, तर साप्ता थोकदे भलो अन्ची। “साप्ता थोकने चेक्यूक्क्य”, यदेबे यीय तर साप्ता पोदे ङीनने सूधार चेब काम अन्ची। 24सूदेये रङ्से भलो अम्मेल्स्य तर सूजोयूजे भलो मेल्स्य। 25स्य सोङब नेने च सोङ्क्य हम्ब ज्य प्रे अन्ज्य छूर्ते ख्वब रङ्से बुद्धिजे लागि चैये ल्वे-स्य्वे अन्चील्लाबे च खूइय। 26#भजनसंग्रह 24:1चेनेयलो “पृथ्वी मेस्ये अम्ब पृथ्वीने ख्यब साप्ता थोकयू परमप्रभुजेने ख्यङ्।”
27कादेये प्रभुने विश्वास अन्चेब कोइ मीदे नमयूने भत्यार् चने निम्तो चीप्प, न प्रदीङ् रदेयलो नैजे खूम्ने चजे लागि चैसे येम्मीय ज्य प्रे अन्ज्य छूर्ते ख्वब बुद्धिजे लागि चैये अन्लोल्लाबे चेबी। 28तर कोइ मीदे “अम्बब मुर्तिने बलि पीनब चसे ख्यङ्” यदेयलो हम्ब स्योम्मेब मीजे लागि मेस्ये ज्य प्रे अन्ज्य छूर्ते ख्वब बुद्धिजे लागि हम्ब चसे अन्चलाची। 29नैजे ज्य प्रे अन्ज्य छूर्ते ख्वब बुद्धिजे लागि दी, तर ङूजे ज्य प्रे अन्ज्य छूर्ते ख्वब बुद्धिजे लागि। सूजोजे ज्य प्रे अन्ज्य छूर्ते ख्वब बुद्धि ङैदे प्रेब हकने चेने न्याय चे? 30कादेये धन्यवाद पीन्देबे चसे चेन ख्यङ्यलो, धन्यवाद पीन्देबे चब चसेजे लागि सूजो मीदे ङैने चैने दोष चे?
31येरेक्यूत्देबे नमयूदे या चैनू या थूङ्नू या चने-चील्लीने साप्ताने परमेश्वरजे महिमाजे लागि ची। 32यहूदीयू ख्यङ्लीने या ग्रीकयू ख्यङ्लीने या, परमेश्वरजे मण्डली ख्यङ्लीने, सूनेये बाधा पीनब काम अन्चील्लाची। 33केर्बे ङैदे चेब साप्ता कामयूने मीयू क्वानेने सूग्लाबे चेने ङैये बोङ् चीक्क्य, थमयूजे उद्धार क्यूस्स्य यदेबे ङ रङ्सेजे भलो अम्मल्, तर कूम मीयूजे भलो मेल्क्य।
Ghale New Testament © Nepal Bible Society, 2011.