Bible text: Samoan © Bible Society in the South Pacific www.bible.org.fj/  ℗ 2012 Hosanna

Samoan - BSSP Edition (Non-Drama NT)

Samoan - BSSP Version (Drama NT)

Revised Samoan Catholic Bible © Bible Society of the South Pacific, 2010.

‘Ua tutū i luga i latou uma lava, ‘ua ta‘ita‘i ‘iā te ia ‘iā Pilato. ‘Ona latou momoli ai lea ‘iā te ia ‘ua, fa‘apea atu, “Na matou iloa lenei tagata ‘ua ia fa‘asesē i lo matou nu‘u, ‘ua vavao fo‘i ‘ona avatu o lafoga ‘iā Kaisara, ‘ua fa‘apea mai, o ia lava o le Tupu, o Keriso.”
‘Ona fesili mai lea o Pilato ‘iā te ia, “O oe ‘ea o le tupu o tagata Iutaia?”
‘Ua tali atu Iesu ‘iā te ia, “O lea lava.”
‘Ona fai ane lea o Pilato i le ‘au ositaulaga sili ma le motu o tagata, “‘Ou te lē iloa se mea e sala ai lenei tagata.”
A ‘ua latou finau pea, ‘ua fa‘apea mai, “‘Ua fa‘aoso e ia i le nu‘u, ‘ua a‘oa‘o i Iutaia uma, ‘ua āfua mai i Kalilaia ‘ua o‘o mai ‘i‘inei.”

‘Ua fa‘alogo Pilato, ‘ona fesili ane lea o ia, Pe se tagata Kalilaia o ia? ‘Ua iloa e ia, o ia mai le itū mālō o Herota, ‘ona avatu lea o ia ‘iā Herota, o ia fo‘i sa i Ierusalema i ia ona pō. ‘Ua iloa atu e Herota ‘iā Iesu, ‘ona fiafia tele ai lea o ia; auā ‘ua leva ‘ona fia matamata o ia ‘iā Iesu, ‘ona o mea e tele ‘ua logo mai ‘iā te ia; ‘ua fa‘amoemoe fo‘i o ia na te va‘ava‘ai i se fa‘ailoga e faia e ia. ‘Ua fesili mai o Herota ‘iā Iesu i ‘upu e tele, ‘ae le‘i tali atu Iesu i se ‘upu ‘iā te ia. ‘Ua tutū i luga le ‘au ositaulaga sili ma le ‘au tusi‘upu, ‘ua naunau i moliaga e fa‘asaga ‘iā te ia. ‘Ua fa‘alēaogāina o ia e Herota ma lana ‘au ma tauemu mai ‘iā te ia, ‘ua latou fa‘a‘ofu fo‘i ‘iā te ia i le ‘ofu pupula, ‘ona toe ‘aumai ai lea o ia ‘iā Pilato. ‘Ua toe lelei o Pilato ma Herota i lea lava aso auā sa mua‘i feitaga‘i i lā‘ua.


‘Ona fa‘apotopoto lea e Pilato le ‘au ositaulaga sili ma le ‘au faipule ma le nu‘u, ‘ona fai atu lea o ia ‘iā te i latou, “‘Ua ‘outou ‘aumai lenei tagata ‘iā te a‘u, e peiseaī se fa‘asesē i le nu‘u; fa‘auta mai fo‘i, ‘ua ‘ou su‘esu‘e ‘iā te ia i o ‘outou luma, ‘ou te le‘i iloa se mea e sala ai lenei tagata i mea ‘ua ‘outou molia mai ai ‘iā te ia. A ‘ua lē iloa fo‘i e Herota auā na ia toe ‘auina mai o ia ‘iā te i tatou, fa‘auta, e leai se mea ‘ua faia e ia e tusa ai ‘ona oti o ia. O lenei fo‘i, ‘ou te sasa ‘iā te ia, i le ‘ou tatalaina atu ai.” E ao ‘ina tatalaina e ia o se tasi tagata ‘iā te i latou i le tausamiga.
A ‘ua ‘alaga mai le motu o tagata uma lava, ‘ua fa‘apea mai, “‘Ave ‘ese ia lenā tagata, a ‘ia tatala mai Parapa ‘iā te i matou.” O le tagata lea na tu‘uina i le fale puipui, ‘ona o le fouvale sa faia i le ‘a‘ai ma le fasioti tagata.
‘Ona toe tautala atu ai lea o Pilato, ‘ina ‘ua fia tatalaina atu Iesu. A ‘ua latou ‘alalaga mai, “‘Inā fa‘asatauro ia, ‘inā fa‘asatauro ia ‘iā te ia.”
‘Ua fai atu fa‘atolu fo‘i o ia ‘iā te i latou, “O le a le leaga sa fai e ia? ‘Ou te le‘i iloa se mea e fa‘asalaina ai o ia ‘ia oti; o lea fo‘i ‘ou te sasa ai ‘iā te ia, i le ‘ou tatalaina atu ai.”
A ‘ua latou fa‘atauānau mai ma leo tetele, o fai mai ‘ia fa‘asatauroina o ia; ‘ua mālō o latou leo. ‘Ua fai atu o Pilato, ‘ia faia lo latou mana‘o. ‘Ua tatalaina e ia ‘iā te i latou o lē na tu‘uina atu i le fale puipui ‘ona o le fouvale ma le fasioti tagata ‘ua latou fai mai ai; a ‘ua tu‘uina atu e ia o Iesu i lo latou mana‘o.


‘Ua latou ta‘ita‘i atu ‘iā Iesu, ‘ona latou pu‘e atu lea ‘iā Simona, o le tasi Kurene ‘ua sau mai le vao; ‘ua latou fa‘ae‘e ‘iā te ia le satauro e fa‘afuata ai ma mulimuli ‘iā Iesu.
‘Ua mulimuli atu ‘iā te ia le motu o tagata e to‘atele ma fafine, ē ‘ua taufaitagitu‘i ma taufaitagiauē ‘iā te ia. A ‘ua fāliu Iesu ‘iā te i latou, ‘ua fetalai atu, “Tama fafine a Ierusalema e, sōia le tagi ‘iā te a‘u, a ‘ia ‘outou tagi ‘iā te ‘outou, ‘atoa fo‘i ma a ‘outou fānau. Fa‘auta fo‘i, e o‘o mai ona aso, e fai mai ai tagata, ‘‘Amu‘ia ē ‘ua pā, ma fafine e le‘i fānanau ma susu e le‘i susuina.’ ‘Ona fai atu lea o tagata i mauga, ‘Mafuli mai ia, ‘iā te i matou;’ e fai atu fo‘i i mea maupu‘epu‘e, ‘‘Inā ufiufi ifo ia ‘iā te i matou.’ Auā ‘āfai e faia nei mea i le la‘au mata, se a se mea e fai i le la‘au mago?”
O isi fo‘i pagotatā e to‘alua, ‘ua ta‘ita‘iina atu fa‘atasi ma ia ‘ia fasiotia. ‘Ua latou o‘o atu i le mea e ta‘ua o le mea o i ai le ulupo‘o, ‘ua latou fa‘asatauro ‘iā te ia i lea mea ma ē pagotatā, o le tasi i le itū taumatau ma le tasi i le itū tauagavale. ‘Ona fetalai atu lea o Iesu, “Lo‘u Tamā e, ‘ia e fa‘amāgaloina atu ‘iā te i latou; auā ‘ua latou lē iloa le mea ‘ua latou faia.”
‘Ua tufatufa e i latou ona ‘ofu, ‘ona fai ai lea o le vili. ‘Ua tutū mai le nu‘u ma matamata mai. O le ‘au faipule fo‘i ‘ua tauemu mai ‘iā te ia fa‘atasi ma i latou, ‘ua fa‘apea mai, “Na fa‘aolaina e ia nisi tagata, ‘inā fa‘aola ia o ia, ‘iā te ia, pe ‘āfai o ia o le Keriso a le Atua o lē ‘ua Filifilia.”
‘Ua tauemu mai fo‘i ‘iā te ia tagata tau; ‘ua ō ane ‘iā te ia ma avatu i ai le vineka, ‘ua fa‘apea atu, “‘Āfai o oe o le tupu o tagata Iutaia, ‘inā fa‘aola ia oe ‘iā te oe.”
Sa i ai fo‘i le ‘upu sa tusia i ona luga, “O LE TUPU LENEI O TAGATA IUTAIA.”
O le tasi fo‘i o ē na pagotatā ‘ua fa‘atautauina, ‘ua ‘upu leaga o ia ‘iā Iesu, ‘ua fa‘apea mai, “‘Āfai o oe o le Keriso, ‘inā fa‘aola ia oe ‘iā te oe ‘atoa ma i mā‘ua nei.”
A ‘ua tali atu le tasi, ‘ua vavao ‘iā te ia, ‘ua fa‘apea atu, “‘E te lē mata‘u ‘ea i le Atua, ‘ina ‘ua tatou sala fa‘atasi? ‘Ua tonu lava la tā sala; auā ‘ua tauia mai i tā‘ua e tusa ma mea na tā faia; a o ia nei, e leai se sala na faia e ia.” ‘Ona fai mai lea o ia ‘iā Iesu, “Le Ali‘i e, ‘ia e manatua mai a‘u, pe a e afio mai i lou mālō.”
‘Ona fetalai atu ai lea o Iesu ‘iā te ia, “E moni, ‘ou te fai atu ‘iā te oe, o le asō tā te fa‘atasi ai ma oe i parataiso.”


‘Ua o‘o i le tutonu o le lā, ‘ona pogisā uma ai lea o le nu‘u, ‘ua o‘o lava i le itūlā e tolu. ‘Ua fa‘apouliuliina fo‘i le lā; o le ‘ie puipui fo‘i o le malumalu ‘ua saeluagalemuina. ‘Ona vala‘au ai lea o Iesu, ‘ua leo tele, ‘ua fa‘apea atu, “Lo‘u Tamā e, ‘ou te tu‘uina atu lo‘u nei agaga i ou ‘a‘ao;” ‘Ua ia fetalai atu ia ‘upu, ‘ona tō ai lea o lana mānava.
‘Ua iloa e le ta‘ita‘i o le to‘aselau le mea ‘ua faia, ‘ona vivi‘i atu lea o ia i le Atua, ‘ua fa‘apea atu, “E moni o le tagata amiotonu lenei.”
O tagata uma o ē ‘ua potopoto e maimoa i lea mea, ‘ua va‘ava‘ai i mea ‘ua faia, ‘ona pōpō lea o i latou i o latou lava fatafata ma toe fo‘i atu. ‘Ua tutū mamao atu fo‘i tagata uma o ē sa masani ma ia, ‘atoa ma fafine o ē na mulimuli mai ‘iā te ia mai Kalilaia, ‘ua va‘ava‘ai mai i latou i ia mea.


Fa‘auta fo‘i, o le tagata e igoa ‘iā Iosefa, o ia o le faipule, o le tagata amio lelei ma le tonu; e le‘i ‘auai i la latou pule ma la latou mea na fai, o le Arimataia o ia o le ‘a‘ai lea o tagata Iutaia, o ia fo‘i sa fa‘atalitali atu i le mālō o le Atua. O ia lea ‘ua alu atu ‘iā Pilato ma fa‘anoi atu i le tino o Iesu. ‘Ua ‘ave ifo e ia le tino o Iesu i lalo ma aui lea i le ‘ie lino, ‘ona tu‘u ai lea i le tu‘ugamau na foa i le papa, e le‘i tu‘u ai lava se tasi. O le aso lea o le sauniga, ‘ua latalata le sapati.
‘Ua mulimuli atu fo‘i fafine o ē na ō mai ma ia mai Kalilaia, ‘ua latou va‘ava‘ai i le tu‘ugamau ma le tu‘uina i ai o lona tino. ‘Ua latou toe fo‘i atu, ‘ua sauni mea manogi ma suāu‘u manogi.
‘Ua latou mālōlō fo‘i i le sapati e tusa ma le poloa‘iga.

收聽 Luka 23