Ge’ez - 2021 - BSE (NT) Non Drama

Ge’ez - 2021 - BSE (NT) Drama

እምጳውሎስ ዘተሠይመ ሐዋርያሁ ለእግዚእነ ኢየሱስ ክርስቶስ በፈቃደ እግዚአብሔር ወስቴንስ እኁነ። ለማኅበረ እግዚአብሔር ዘብሔረ ቆሮንቶስ እለ ተቀደሱ በኢየሱስ ክርስቶስ ወተሰምዩ ቅዱሳነ ወለኵሎሙ እለ ይጼውዑ ስሞ ለእግዚእነ ኢየሱስ ክርስቶስ ውስተ ኵሉ በሐውርቲሆሙ ወለነሂ ምስሌሆሙ። ጸጋ ወሰላም እምኀበ እግዚአብሔር አቡነ ወእግዚእነ ኢየሱስ ክርስቶስ። ዘልፈ አአኵቶ ለእግዚአብሔር በእንቲኣክሙ ወበእንተ ጸጋሁ ለእግዚአብሔር ዘተውህበ ለክሙ በኢየሱስ ክርስቶስ። እስመ ብዕልክሙ ቦቱ በኵሉ ቃል ወበኵሉ ጥበብ። በከመ ጸንዐ ላዕሌክሙ ስምዑ ለክርስቶስ። ከመ ኢትኅጥኡ ኵሎ ጸጋ ወትኩኑ ፍጹማነ እንዘ ትሴፈዉ ምጽአቶ ለእግዚእነ ኢየሱስ ክርስቶስ። ዘያጸንዐክሙ ለዝሉፉ ዘእንበለ ነውር በዕለተ እግዚእነ ኢየሱስ ክርስቶስ። ጻድቅ እግዚአብሔር ዘጸውዐክሙ ትኩኑ ሱቱፋነ ወልዱ ኢየሱስ ክርስቶስ እግዚእነ።

አስተበቍዐክሙ አኀዊነ በስሙ ለእግዚእነ ኢየሱስ ክርስቶስ ከመ ትበሉ ኵልክሙ አሐደ ቃለ ወኢትተክዙ ወትኩኑ ፍጹማነ ወኢትትፋለጡ ወሀልዉ በአሐዱ ምክር ወበአሐዱ ልብ። ነገሩኒ በእንቲኣክሙ አኀዊነ እምቤተ ቀለዮጳ ከመ ትትካሐዱ ወትትጋዐዙ። ወናሁ እነግረክሙ ዘትብሉ በበይናቲክሙ አነ ዘጳውሎስ ወአነ ዘአጵሎስ ወአነ ዘኬፋ ወአነ ዘክርስቶስ። ተናፈቀኑ ክርስቶስ ወቦኑ ጳውሎስ ተሰቅለ በእንቲኣክሙ ወበስመ ጳውሎስኑ ተጠመቅሙ። አአኵቶ ለእግዚአብሔር ዘኢያጥመቁ እምውስቴትክሙ ዘእንበለ ቀርስጶስ ወጋይዮስ። ከመ አልቦ ዘይብል በስመ ዚኣሁ ተጠመቅነ ወባሕቱ አጥመቁ ቤተ እስጢፋኖስ ወኢየአምር እንከ ለእመ ቦ ባዕድ ዘአጥመቁ። እስመ ኢፈነወኒ ክርስቶስ ለአጥምቆ ዳእሙ ለምህሮ።

ወኢኮነ በጥበበ ነገር ከመ ኢንስዐር መስቀሎ ለክርስቶስ። እስመ ነገረ መስቀሉሰ እበድ ውእቱ በኀበ ኅጉላን ወበኀቤነሰ ለእለ ድኅነ ኀይለ እግዚአብሔር ውእቱ። እስመ ከመዝ ይቤ መጽሐፍ «አነ አኀጕል ጥበቢሆሙ ለጠቢባን ወእሜንን ምክሮሙ ለመካርያን።» መኑ እንከ ጠቢብ ወመኑ እንከ ጸሓፊ ወመኑ ዘየኀሥሦ ለዝ ዓለም አኮኑ አዕበዳ እግዚአብሔር ለጥበበ ዝ ዓለም። እስመ በጥበቡ ለእግዚአብሔር ዘኢየአምርዎ ዓለም በጥበቢሆሙ መከረ እግዚአብሔር ከመ ያድኅኖሙ ለእለ የአምኑ በእበደ ሥጋ። እስመ አይሁድኒ ተአምረ ይሴአሉ ወጽርዕኒ ጥበበ የኀሥሡ። ወንሕነሰ ንሰብክ ክርስቶስሃ ዘተሰቅለ እንዘ ንብል ለአይሁድኒ ይመስሎሙ ዘንጌጊ ወለአረሚኒ ይመስሎሙ ዘነአብድ። ወለነሰ ለእለ ድኅነ እምአይሁድ ወእምአረሚኒ ክርስቶስ ኀይለ እግዚአብሔር ውእቱ ወጥበበ እግዚአብሔር ውእቱ። እስመ እበድ ዘበእንተ እግዚአብሔር ይጠብብ እምዕጓለ እመሕያው ወድካም ዘእንበይነ እግዚአብሔር ይጸንዕ እምዕጓለ እመሕያው።

ርእዩ እንከ አኀዊነ ዘከመ ጸውዐክሙ እስመ ኢኮንክሙ ጠቢባነ ብዙኃነ በሥጋ ወኢኮንክሙ ኀያላነ ብዙኃነ ወኢኮንክሙ በዘመድ ኄራነ ብዙኃነ። ወባሕቱ አብዳኒሁ ለዝ ዓለም ኀረየ እግዚአብሔር ከመ ያስተኀፍሮሙ ለጠቢባን ወድኩማኒሁ ለዝ ዓለም ኀረየ ከመ ያስተኀፍሮሙ ለጽኑዓን። ወለእለ አልቦሙ አዝማድ ወለምኑናን ኀረዮሙ እግዚአብሔር ወለእለ ኢሀለዉ ከመ ያስተኀፍሮሙ ለእለ ሀለዉ። ከመ ኢይትመካሕ ኵሉ ዘሥጋ በቅድመ እግዚአብሔር። ወአንትሙሂ እምኀቤሁ በኢየሱስ ክርስቶስ ወቦቱ ረከብነ ጥበበ እምእግዚአብሔር ወጽድቀ ወቅድሳተ ወመድኀኒተ። ከመ ይኩን በከመ ይቤ መጽሐፍ «ወዘሰ ይትሜካሕ በእግዚአብሔር ለይትመካሕ።»

收聽 ኀበ ሰብአ ቆሮንቶስ 1 1