If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

फरीसियां बिच नीकुदेमुस ना रा इक्क मणू थिया। से यहूदियां रा सरदार थिया जे फरीसी थिया। तिनिये रात्ती यीशु का आई करी तिन्हा जो बोल्लेया, ओ गुरु, असी जाणदे कि परमेश्वर ने तुसा जो असी लोक्कां जो सिखाणे तांइ भेज्जे रा है, किजोकी जदेय जदेय चमत्कार तुसा दिखादें, अगर परमेश्वर तुसा रे कन्ने ना हो तां नी दिखाई सकदे। यीशु ने तिसजो जवाब दित्ता मैं तुसा कने सच्ची-सच्ची बोलदा जे अगर कोई नौए सिरे का नी जम्मे तां परमेश्वर रे राज जो नी दिख्खी सकदा। नीकुदेमुस ने तिसका पुछया, मणू जिस बेल्ले सयाणा होई जाए तां से दुबारा किय्यां जमी सकदा? कै से अपणी मां रे पेट्टा बिच दुबारा जाई करी जन्म लेई सकदा? यीशु ने जवाब दिता मैं तिज्जो सच-सच बोलदा जिस बेल्ले तक कोई मणू पाणी ते पवित्रात्मा कने न जम्मे तिस बेल्ले तिकर से परमेश्वर रे राज बिच नी जाई सकदा। किजोकी इन्सान तां अपणे जदेय इन्सान जो पैदा ही करी सकदा, पर पवित्रात्मा तिसजो इक्क नौई जिन्दगी देई सकदी। हैरान मत हो कि मैं तिज्जो बोल्लेया कि तीजो नौए सिरे का जन्म लैणा जरुरी है। हवा जित्ते चाहन्दी तिते चली आन्दी तू उसेरी अवाज तां सूणदा पर नी जाणदा कि कुते का आंदी है कने कुते जांदी? जेड़ा भी आत्‍मा बिच जम्मेया से इदेया ही है। नीकुदेमुस ने जवाब दित्ता ए गल्लां कियां होई सकदीयां? ए सुणी करी यीशु ने बोल्लेया, तू इस्राएलियों रा गुरु होई करी भी कै इन्हा गल्लां जो भी नी समजदा? मैं तुसा कने सच्ची-सच्ची बोलदा, असी जे जाणदे, से बोलदे, ते जिस जो असी दिखदे तिसेरी ही गवाई दिन्दे, तुसा असा री गवाई पर विश्वास नी करदे, जां मैं तुसा कने दुनिया बिच होणे वाली गल्लां रे बारे बिच बोलदा, तुसा तां ही विश्वास नी करदे, तां जिस बेल्ले मैं तुसा रे कने स्वर्ग री गल्लां बारे बिच बोलणा, तां तुसा किय्यां विश्वास करणा। कोई स्वर्ग बिच नी गेया सिवाय मणू रे पुत्तर, जे मैं ही है, जे स्वर्ग का आये रे हिन। जिस तरिक्के कने मूसा ने बियाबान जगाह् बिच पीतल रे कीड़े जो ऊचे पर चढ़ाया उसी तरिके कने जरुरी है कि मणू रा पुत्तर, जे मैं ही है भी उँचे पर चढ़ाया जाए। तां कि जे कोई तिस पर विश्वास करे से हमेसा री जिन्दगी पाए। किजोकी परमेश्वर ने दुनिया रे लोक्कां कने इन्ना प्यार कित्ती कि तिन्हा ने अपणा इकलौता पुत्तर देई दिता कि जेड़ा तिस पर विश्वास करे से नास न हो पर हमेसा री जिन्दगी पाओ। परमेश्वर ने अपणे पुत्तर जो दुनिया बिच इस तांइ नी भेज्जेया कि दुनिया रे लोक्कां पर सजा रा हुकम दे, पर इस तांइ कि दुनिया रे मणू तिसेरे जरिए छुटकारा पाए। जेड़ा तिस पर विश्वास करदा, तिस पर सजा रा हुकम नी हुन्दा पर जे तिस पर विश्वास नी करदा से दोषी ठहरी चुक्केया इस तांइ कि तिसने परमेश्वर रे इकलौते पुत्तर रे नां पर विश्वास नी कित्ता। ते सजा रे हुकम री वजह ए है कि रौसनी दुनिया अन्दर आई, ते मणूआं ने न्याहरे जो रौसनी का प्यारा मन्नेया किजोकी तिन्हेरे कम्म बुरे थिये। कि जे कोई बुराई करदा से रौसनी कने दुश्मणी रखदा कने रौसनी रे नेड़े नी आंदा, इदेया न हो कि तिसेरे कम्मां पर दोष लगाया जाए पर जे मणू सच्चाई रे रस्ते पर चलदा, से रौसनी रे नेड़े आंदा है ताकि दूए मणू दिख्खी सके कि तिनिये परमेश्वर रे हुकमां जो मन्ने रा है।

इसेरे बाद यीशु कने तिसेरे चेल्‍ले यहूदियां प्रदेश बिच आए कने से तित्ते तिन्हा कने रेई करी बपतिस्मा दैणे लगया। यूहन्ना भी शालेम रे नेड़े सामरिया प्रदेश रे एनोन नां रे ग्रां बिच बपतिस्मा दिंदा थिया किजोकी तित्ते बड्डा वरी पाणी थिया कने मणू आई करी बपतिस्मा लिन्दे थिये। यूहन्ना तिस बेल्ले तिकर जेलखाने बिच नी पायरा थिया। तित्ते यूहन्ना रे चेल्‍लेयां रा कुसी यहूदी कने शुद्वीकरण रे बारे बिच बहस होई गयी। कने यूहन्ना रे चेल्‍लेयां ने यूहन्ना रे नेड़े आई करी तिसजो बोल्लेया ओ गुरु, जे मणू यरदन रे पार तेरे कने थिया कने जिसेरे बारे बिच तू गवाई दित्ती, दिख, से बपतिस्मा दिन्दा है, कने सब तिसेरे का आंदे हिन। यूहन्ना ने जवाब दित्ता, जिस बेल्ले तक मणू जो स्वर्ग का हक्क ना दित्तेया जाए, तिस बेल्ले तक सेह कुछ भी नी पाई सकदा तुसा ता अप्पु ही मेरे गवाह हिन कि मैं बोल्लेया मैं मसीह यीशु नी पर तिसेरे अग्गे भेजेरा है दूल्हा ही दुल्हन कने ब्याह करदा। दुल्हे रा दोस्त तिसेरे आणे रा इंतजार करदा ते जां दूल्हा ब्याह बिच पूजी जांदा तां तिसेरा दोस्त तिसेरे पुजणे री गल्ल पर खुस हुंदा। ए सुणी करी मिन्जो भी तैसी ही खुसी मिल्लेया करदी है। जरुरी है कि से बधे, ते मैं घटां। जे स्वर्ग का आन्दा से सबणी का जादा बधी करी है, ते जे दुनिया का आन्दा से दुनिया रा है, ते दुनिया री ही गल्लां करदा जे स्वर्ग का आन्दा, से सबणी का उप्पर है। जे किच्‍छ तिसने दिख्खेया ते सूणेया, तिसेरी ही गवाई दिंदा है ते किच्‍छ मणू तिसेरी गवाई जो नी मनदे, पर जिनिए तिसेरी गवाई मन्नी लेई, तिनिए इस गल्ल पर छाप लगाई दित्ती कि परमेश्वर सच्चे हिन। किजोकी जिस जो परमेश्वर ने भेज्जे रा है से परमेश्वर री गल्लां बोलदा किजोकी से पवित्रात्मा नाप्पी-तोल्ली करी नी दिंदा। “पिता” अपणे पुत्तर कने प्यार रखदा, ते तिन्हा ने सारी चीजां पुत्तर रे हत्थां अन्दर देई दित्ते री हिन, जे परमेश्वर रे पुत्तर पर विश्वास करदा, हमेसा री जिन्दगी तिसेरी है, पर जे परमेश्वर रे पुत्तर री नी मनदा, तिनिए हमेसा री जिन्दगी नी दिखणी, पर परमेश्वर ने तिसजो सजा दैणी।

收聽 यूहन्ना 3