Pokomo - 2004 Edition (Drama NT)

Yesu kawahana pfamodza hawa wanafund̯iwe kumi na wawii na kawapfa nguvu na mawezo ya kuyavya mpepfo nzuka zonse na kupfoza majwazi. Makisa kawahuma wakasumwiiye Maagu ya Uhaju wa Muungu na kupfonya wajwazi. Kawamba, “Mukwakwendani namutsedzitsukwiiya kiḍechonse. Namutsetsukuya nsimbo, wala munkoḅa, wala chakuḍya. Namutsetsukuya fwedha wala nguo zingine za kuperuya. Mudzepfokaraḅishwa, ikaani nyumba modza mumpaka mudzepfonuka humo mudzini. Na pfaḍepfonse pfa wantu wasipfomupfokea, uyaweni huo mudzi na mukukunte hiḍi ḍukuu ḍya humu maguuni mwenu kuwayanga kwamba wahenda matsowa.” Ndookomu wanafund̯i wanuka wanjia charoni, wakyenda mudzi kwa mudzi, wakisumwiiya *Maagu Mema na kupfonya wantu kula pfantu.


*Herod̯e, haju jwa ḍyimbo ḍya Galilaya epfosikia mambo yonse ya Yesu eyoakihenda, kaḍanganika muno. Koro wantu wangine wekyamba ni Yohana Mut̯opya kafufuka kuyawa kwa wafu. Wangine wekyamba ni *nabii Eliya kat̯upuka na wangine wekyamba ni mumodza jwa manabii wangine wa kae afufukiye kuyawa kwa wafu. Herod̯e kamba, “Yohana nimuhuna kitswa, d̯ubva ayu niyekusikiani maagu dzuuye ni ga?” Ndookomu katsaka muno kumuona Yesu.


Hawa *ntumi wepfouja, wamusumwiiya Yesu hayaḍe yonse wahendeyeyo. Makisa kawahwaa wao heket̯u wenda ḍanda za mudzi wa Betisaiḍa. Ela wantu wenji wepfoviimuka, nao wamuuḅa Yesu. Kawapfokea na kawasumwiiya dzuu ya Uhaju wa Muungu pfamodza na kupfonya weokuwa wajwazi. Hafufi dzuwa kutswa wanafund̯iwe kumi na wawii wamwendea na wamwamba, “Wayatse hawa wantu wende vidzidzi na makonde yeyo hafufi, wakadzilachie kantu na pfantu pfa kuyaa, koro hapfa ni pfantu chit̯u.” Ela Yesu kawambukuya kawamba, “Wapfeni kintu cha kuḍya nywinywi.” Wao wamwamba, “Hwivyonavyo vyonse ni mikahe mitsano na nswi mbii t̯u. Na ntahunaweza kwenda igwiiya kantu hi t̯ut̯a yonse hi!” (Koro kwiwa wayume hafufi elefu nsano.) Yesu kawamba wanafund̯iwe, “Wawekeni vihako hawa wantu kwa mahagha ya wantu miyongo mitsano mitsano.” Wanafund̯iwe wepfohenda hivyo, Yesu kaihwaa hiḍe mikahe myotsano na hiziḍe nswi zombii. Kayowa mbinguni dzuu, kavivodhya, kavivunza-vunza, makisa kawapfa wanafund̯iwe wawagawiye wantu. Wonse waḍya hat̯a wanjia kuviyowani na matso. Na hawa wanafund̯i wavitsowa-tsowa hivi viḍinku visaiyevyo na wapata vikapfu kumi na viwii.


Nsiku modza Yesu ewa pfantu chit̯u jeje na wanafund̯iwe. Yesu kayomba jeje heket̯u makisa kawauza hawa wanafund̯iwe kawamba, “Wantu wanakaa na kwamba mimi ni ga?” Nao wamwambukuya wamwamba, “Wangine wanakwamba u Yohana Mut̯opya. Ela wangine wanakwamba u nabii Eliya na wangine wanakwamba u mumodza jwa hawa manabii wangine wa kae afufukiye.” Nae kawauza kawamba, “Ehe nanywi munakwamba mimi ni ga?” Pet̯ero kamwambukuya kamwamba, “Wewe ndiwe huyu *Kirist̯o atsanijwee ni Muungu.” Ela Yesu kawaseresa watsemwambia muntu yuḍejwonse kwamba jeje ni ga.


Makisa Yesu kawamba, “Mimi *Mwana jwa Ad̯amu ni had̯i nikuntiswe d̯ina muno na nidzizigwe ni wazee, wakohani wakuu na waalimu wa *Sharia. Nidzayagwa, ela nsiku ya hahu nidzafufujwa kuyawa kwa wafu.”


Makisa Yesu kanena nao wonse kawamba, “Yuḍejwonse atsakiye kuniuḅa mimi ni had̯i aziyatse njiaze za kibenaad̯amu, autsukuye muhiwe wa mpatsa kula nsiku na aniuḅe. Koro yuḍejwonse atsakiye kuyapfonya maishaye ya hapfa lumwenguni, anadzitsovya maisha ya kuunga na yuungo. Ela huyuḍe eye t̯ayari kudzitsovya maishaye ya hapfa lumwenguni kwa dzambo ḍyangu, huyo anapata maisha ya kuunga na yuungo. Koro kunawa na faiḍa ga, kwa muntu kujupata lumwengu yuzima kisa ajibat̯e maishaye ambu atsowe maisha ya kuunga na yuungo? Koro yuḍejwonse adzenionea yutswa mimi na mayongweezo yangu, nami mimi Mwana jwa Ad̯amu, nidzamuonea yutswa muntu dzae nidzepfokudza maremboni mwangu na Baba pfamodza na malaika wadheru. Hachi nyakumwambiani, wangine wenu wasumamiyeo hapfa ntawakudzafwa mumpaka wadzepfouona Uhaju wa Muungu.”


Zipfochia chima cha nsiku nane ḅaad̯a ya kusumwiiya hivi, Yesu kamuhwaa Pet̯ero, Yohana na Yakobo, kapfaa nao murimani dzuu akayombe. Epfoakiyomba, Yesu kaperuka shufa, na haya mavwaziye yahenda meupe pee! Iyo saa kut̯upuka wantu wawii na waḍabva kunena nae. Wewa ni nabii Musa na Eliya. Wekiyangaa na marembo ya Muungu na wekinena na Yesu dzuu ya kut̯imiza kaziye, kwa kufwakwe kudzekowa Yerusalemi. Pet̯ero na wenziwe wewa wangora sinzizini, ela wayamuka na wamuona Yesu akiwa kuyangaani na marembo. Na wamuona kasumama pfamodza na hawaḍe wantu wowii. Musa na Eliya wepfowakinuka, Pet̯ero kamwamba Yesu, “Ḅwana, ni urembo kwamba swiswi hupfo hapfa. Hunamumbakia mapaa mahahu. Modza ḍyako, modza ḍya Musa na modza ḍya Eliya.” (Pet̯ero ekinena t̯u, pfasipfo kumanya kwamba kakunenani kintu ga.) Asidzakwisa kunena, kudza wingu ḍiwafinikiziyeḍyo. Hawa wanafund̯i wepfonjia humu winguni washooga muno. Makisa kusikika idzwi kuyawa humu winguni ḍikyamba, “Huyu ni Mwanangu, mutsanwa jwangu, musikiiyeni jeje!” Hiḍi idzwi ḍipfokwaara, Yesu ewa kahafa jeje heket̯u. Na hiviḍe waoneyevyo, hawa wanafund̯i wavinyamaa mya, ntawakuvimwambia yuḍejwonse hizihiziḍe ngera.


Chamukoche Yesu na wanafund̯iwe wepfosuka na murimani wat̯angerwa ni t̯ut̯a nkuu ya wantu. Muntu mumodza kahi ya hi t̯ut̯a kahana na idzwi kuu kamba, “Mwaalimu, ad̯o nakuyomba umuyowe huyu muurani wangu, koro ndiye muurani jeje heket̯u niyenae. Anakaa na kugijwa ni mpepfo nzuka ḅwikira, akabiga idzwi na ikamuicha mpindu akat̯iḍa hat̯a akayawa povu ḍya kanwani. Inamuonesa tsungu na kumuyatsa na d̯ina muno. Niwayomba hawa wanafund̯iwo waimuyavye, ela ntawakuweza.” Yesu kambukuya kamba, “E nywinywi mu wantu munangikiyeo na musio faro t̯i! Amevihivi nagija kukaa nanywi na kumuit̯isia hat̯a ari? Haya muyehe huyu muuraniwo hapfa.” Huyu muurani akwakupfiikwani, hi mpepfo nzuka imuicha na mutsanga na imuhehemesa. Ela Yesu kaibusa, na kamupfonya huyu muurani, makisa kamumumpa babajwe. Wantu wonse wamakiswa ni hu uwezo mukuu wa Muungu.


Wantu wepfowakimakia ya Yesu ahendeyeyo, jeje kawamba wanafund̯iwe, “Pfindiiyani muno haya niyokumwambiani. Mimi Mwana jwa Ad̯amu nidzangizwa mikononi mwa wantu.” Ela wanafund̯iwe ntawakuimuka hivi aneneyevyo. Viwa vifitsika kwao watseviimuka. Nao wekishooga kumuuza maanaye.


Wanafund̯iwe waḍabva kuḍaat̯iana wao na wao, kwamba awee mukuu jwa mwiso kahi yao ni ga. Yesu kahambuya mat̯aro yao. Ndookomu kahwaa mwana kachuchu, kamusumamisa hafufi nae. Makisa kawamba, “Yuḍejwonse adzemupfokea huyu mwana kwa dzambo ḍyangu, kanipfokea mimi. Na huyuḍe adzenipfokea mimi kamupfokea huyu anihumiye. Koro awee muchuchu jwa mwiso kahi yenu, ndiye mukuu.”


Yohana kamwamba, “Ḅwana, huona muntu eyeakiyavya mpepfo nzuka kwa sariḍyo, naswi humuvingira, kwa kwamba si mumodza jwehu.” Ela Yesu kamwamba, “Namutsemuvingira, koro yuḍejwonse asiyekuwa kumupfingani, huyo ka yupfande jwenu.”

Nsiku za Yesu za kuhwajwa kwenda mbinguni zipfofika hafufi, kahuna kwenda Yerusalemi. Kahuma wahumisiwe wamuyongowe, wende mudzi mumodza wa Wasamaria, wakamuelekanyize kula kintu. Ela Wasamaria wadziza kumupfokea, kwa kwamba ewa kakwendani Yerusalemi. Ndookomu wanafund̯iwe wangine, aḍe Yakobo na Yohana wepfoona hivi wamuuza wamwamba, “Ḅwana, unatsaka humuyombe Muungu asusye moho na mbinguni udzeuwatsome?” Ela Yesu kawaperukia, na kawabusa. Makisa Yesu na wanafund̯iwe wenda mudzi ungine.


Yesu na wanafund̯iwe wepfokuwa njiani, muntu mumodza kamwamba Yesu, “Ḅwana, mimi nya t̯ayari kukuuḅa kuḍekwonse udzekokwenda.” Ela Yesu kamwamba, “Hamabworama wana mpango zao, na nyuni wana vitsanza vyao. Ela mimi Mwana jwa Ad̯amu, hat̯a pfantu pfa kujufinikiza yukopfe si kintu.” Makisa Yesu kamwamba muntu yungine, “Niuḅa.” Ela jeje kamwambukuya kamwamba, “Ḅwana, mimi natsaka kukuuḅa, ela niyatsa nguzi nyende nikamuzike baba.” Ela Yesu kamwamba, “Wayatse wafu wawazike wafu wao. Ela wewe enda ukasumwiiye maagu ya Uhaju wa Muungu.” Muntu yungine kamwamba, “Nakuuḅa Ḅwana, ela nguzi niyatsa nikaḍamane na wantu wa nyumbani.” Yesu kamwambukuya kamba, “Yuḍejwonse eyenagija gembe makisa akaḍiyatsa, akakwira nyuma, huyo nkanafaa kwa Uhaju wa Muungu.”

收聽 Luka 9