San Juan 20
20
Cunuu iꞌna̱ꞌ uún Jesús a
1Dan me se taxre̱j cotungó vaa rmi̱ꞌ doj, ne̱ caꞌanj chana̱ cuꞌna̱j Mariá Magdalena rej ta̱j yuꞌuj rque yuvej yoꞌ, ne̱ queneꞌen noꞌ se vaa ta̱j yaníj yuvej aráán rihaan yuꞌuj yoꞌ a. 2Cheꞌé dan cunánj noꞌ, ne̱ cuchiꞌ noꞌ rihaan síí cuꞌna̱j Simón Pedró do̱ꞌ, rihaan ꞌó síí tucuꞌyón snana̱ Jesús síí ꞌe̱e̱ rá Jesús man do̱ꞌ a. Ne̱ cataj noꞌ rihaan ro̱j soꞌ a:
―Quirii nii man Síí ꞌNi̱j Raꞌa man níꞌ rque yuꞌuj na̱nj á. Ne̱ ne neꞌen núj me rej caꞌanj nica̱j nii man soꞌ a̱ maꞌ ―taj noꞌ rihaan ro̱j soꞌ a.
3Cheꞌé dan cavii Pedró ga̱ ꞌó síí tucuꞌyón snana̱ Jesús yoꞌ, ne̱ caꞌanj ro̱j soꞌ rej ta̱j yuꞌuj yoꞌ a. 4Ne̱ cunánj ro̱j soꞌ, ne̱ yo̱o doj cunánj ꞌó soꞌ rihaan Pedró, ne̱ soꞌ me síí cuchiꞌ asino ya̱a̱n doj tuꞌva yuꞌuj yoꞌ a. 5Ga̱a ne̱ niꞌya̱j soꞌ rque yuꞌuj yoꞌ, ne̱ queneꞌen soꞌ rej na̱j nij yatzíj, tza̱j ne̱ ne catu̱u̱ soꞌ maꞌ. 6Dan me se cuchiꞌ Pedró síí noco̱ꞌ xcó soꞌ, ga̱a ne̱ catúj maꞌa̱n Pedró rque yuꞌuj yoꞌ, ne̱ queneꞌen soꞌ rej na̱j nij yatzíj a. 7Ne̱ queneꞌen soꞌ yatzíj aráán raa̱ Jesús, tza̱j ne̱ nuviꞌ yoꞌ naj rcuaꞌa̱a̱n ga̱ ꞌó nij yatzíj a̱ maꞌ. Tana̱nj rej yaníj quinaj o̱rúnꞌ yoꞌ, ne̱ nacuꞌluꞌ yoꞌ a. 8Dan me se catúj uún ꞌó síí tucuꞌyón snana̱ Jesús síí cuchiꞌ asino ya̱a̱n, ne̱ queneꞌen soꞌ nij yatzíj yoꞌ, ga̱a ne̱ cuchumán rá soꞌ se vaa ya̱ cunuu iꞌna̱ꞌ uún Jesús a. 9ꞌO̱ se ataa nari̱ꞌ ro̱j soꞌ nana̱ no̱ rihaan Danj Yaꞌanj se vaa cavi̱ꞌ Jesús ga̱a ne̱ cunu̱u iꞌna̱ꞌ uún soꞌ a. 10Dan me se cavii uún ro̱j síí tucuꞌyón snana̱ Jesús yoꞌ, quinanꞌ ro̱j soꞌ a.
Queneꞌen Mariá Magdalena man Jesús a
11Ne̱ canicunꞌ chana̱ cuꞌna̱j Mariá nichru̱nꞌ tuꞌva yuꞌuj yoꞌ, ne̱ taꞌvee ndoꞌo noꞌ, ne̱ ga̱a taꞌvee noꞌ, ne̱ canicunꞌ nitu̱u̱ noꞌ ni̱ꞌyaj noꞌ rque yuꞌuj a. 12Ne̱ queneꞌen noꞌ vi̱j se‑mo̱zó Yaꞌanj nu̱u̱ yatzíj catzi̱i̱, ne̱ ya̱nj ro̱j soꞌ rej cachinꞌ nii man Jesús a. ꞌO̱ soꞌ yáán rej ra̱a̱ Jesús, ne̱ ꞌó soꞌ yáán rej taco̱j Jesús a. 13Ga̱a ne̱ xnáꞌanj ro̱j soꞌ man Mariá, cataj ro̱j soꞌ a:
―Me cheꞌé taꞌveé so̱ꞌ ga̱a maan, noco̱ꞌ ―taj ro̱j soꞌ rihaan noꞌ a.
―Taꞌveé ꞌu̱nj cheꞌé se quirii nii man cúú man Síí ꞌNi̱j Raꞌa manj, ne̱ ne me rej caꞌanj nica̱j nii man soꞌ a̱ maꞌ ―taj noꞌ rihaan ro̱j soꞌ a.
14Síj caꞌmii noꞌ da̱nj, ga̱a ne̱ canica̱j noꞌ rej xco̱ noꞌ, ne̱ queneꞌen noꞌ man Jesús, nicu̱nꞌ soꞌ rihaan noꞌ a. Tza̱j ne̱ ne cunu̱u ya̱a̱n noꞌ man Jesús maꞌ. 15Ga̱a ne̱ xnáꞌanj Jesús man noꞌ, cataj soꞌ a:
―Me cheꞌé taꞌveé so̱ꞌ ga̱a maan, noco̱ꞌ. Me síí nanóꞌ so̱ꞌ ga̱ ―taj Jesús rihaan noꞌ a.
Dan me se guun rá noꞌ se vaa si̱j tumé naa̱ na̱j yoꞌ me síí caꞌmii ga̱ noꞌ, ne̱ cheꞌé dan cataj noꞌ a:
―Señor, sese quirii yaníj so̱ꞌ man soꞌ, ne̱ cata̱j xnaꞌanj so̱ꞌ rihanj me rej caꞌanj nica̱j so̱ꞌ man soꞌ, ne̱ ni̱caj ꞌu̱nj man soꞌ caꞌa̱nj ꞌu̱nj á ―taj noꞌ rihaan síí nicu̱nꞌ rihaan noꞌ a.
16Ga̱a ne̱ cataj Jesús a:
―María ―taj soꞌ a.
Canica̱j noꞌ, cataj noꞌ a:
―Raboni ―taj noꞌ rihaan soꞌ, ne̱ dan me se maestró me raj cata̱a nana̱ caꞌmii noꞌ rihaan soꞌ a.
17Ga̱a ne̱ cataj Jesús rihaan noꞌ a:
―Caꞌne̱ꞌ rá so̱ꞌ, se̱ canó so̱ꞌ doj manj maꞌ. ꞌO̱ se ataa cavi̱i̱ uún ꞌu̱nj quina̱nꞌ ꞌu̱nj rihaan Réj Yaꞌanj, ne̱ me rá ꞌu̱nj caꞌa̱nj so̱ꞌ rihaan nij tinúú ꞌu̱nj a. Cata̱j xnaꞌanj so̱ꞌ rihaan nij soꞌ se vaa cavi̱i̱ ꞌu̱nj quina̱nꞌ ꞌu̱nj rihaan Réj, ne̱ soꞌ me Rej soj uún, ne̱ Yaꞌanj si̱j noco̱ꞌ ꞌu̱nj me soꞌ, ne̱ Yaꞌanj síí noco̱ꞌ soj me uún soꞌ ado̱nj ―taj Jesús rihaan Mariá a.
18Dan me se caꞌanj Mariá Magdalena, ne̱ nataꞌ noꞌ rihaan nij síí tucuꞌyón snana̱ Jesús se vaa queneꞌen noꞌ man Síí ꞌNi̱j Raꞌa man níꞌ, ne̱ nataꞌ noꞌ nij nana̱ cataj Jesús rihaan noꞌ a.
Curuviꞌ Jesús rihaan nij síí tucuꞌyón snana̱ soꞌ a
19Dan me se rej tiꞌnuu maꞌa̱n güii cotungó yoꞌ me se caráán nij síí tucuꞌyón snana̱ Jesús nij taꞌyaa rihaan veꞌ ma̱n nij soꞌ, cheꞌé se cuchuꞌviꞌ nij soꞌ niꞌya̱j nij soꞌ nij síí uun chij rihaan nij yuvii̱ israelitá a. Ga̱a ne̱ caꞌnaꞌ Jesús, ne̱ canicunꞌ soꞌ tanu̱u̱ rej ma̱n nij soꞌ, ne̱ cataj soꞌ a:
―Ga̱a̱ dínj nimán soj á ―taj Jesús rihaan nij soꞌ a.
20Quisíj caꞌmii soꞌ da̱nj, ga̱a ne̱ tihaa̱n soꞌ raꞌa soꞌ tihaa̱n soꞌ xꞌnúú soꞌ tihaa̱n soꞌ rihaan nij soꞌ a. Ga̱a queneꞌen nij soꞌ nu̱ꞌ yoꞌ, ga̱a ne̱ guun niha̱ꞌ ya̱ rá nimán nij síí tucuꞌyón snana̱ soꞌ niꞌya̱j nij soꞌ man Síí ꞌNi̱j Raꞌa man níꞌ a.
21Dan me se caꞌmii uún Jesús rihaan nij soꞌ, cataj soꞌ a:
―Ga̱a̱ dínj nimán soj á. Ase vaa caꞌnéé Réj manj roꞌ, da̱nj ga̱a̱ caꞌne̱j ꞌu̱nj man soj ado̱nj ―taj Jesús rihaan nij soꞌ a.
22Quisíj caꞌmii Jesús da̱nj, ga̱a ne̱ caꞌyánj Jesús rihaan nij soꞌ, ne̱ cataj soꞌ a:
―Ni̱caj soj Nimán Yaꞌanj nihánj á. 23Ne̱ sese cata̱j soj se vaa navij cacunꞌ tumé me maꞌa̱n yuvii̱, ne̱ navi̱j nu̱ꞌ cacunꞌ tumé soꞌ a. Ne̱ sese cata̱j soj se vaa se̱ navij cacunꞌ tumé me maꞌa̱n yuvii̱, ne̱ veé da̱nj ga̱a̱ quita̱j nu̱ꞌ cacunꞌ tumé soꞌ xráá soꞌ nu̱ꞌ cavii nu̱ꞌ caꞌanj uún a ―taj Jesús rihaan nij síí tucuꞌyón snana̱ soꞌ a.
Queneꞌen Tomás man Jesús a
24Dan me se ꞌo̱ chuvi̱j nij síí tucuꞌyón snana̱ Jesús me Tomás síí cuꞌna̱j cuaté a. Ne̱ nuviꞌ soꞌ ne ga̱ ꞌó nij soꞌ ga̱a cuchiꞌ Jesús rihaan ꞌó nij soꞌ maꞌ. 25Cheꞌé dan cataj xnaꞌanj ꞌó nij síí tucuꞌyón snana̱ Jesús rihaan Tomás se vaa queneꞌen nij soꞌ man Síí ꞌNi̱j Raꞌa man níꞌ a. Tza̱j ne̱ cataj Tomás rihaan nij soꞌ a:
―Sese se̱ queneꞌen ma̱ꞌanj rej catúj caquíí raꞌa soꞌ, ne̱ sese se̱ cutaj raꞌaj rej catúj caquíí raꞌa soꞌ do̱ꞌ, sese se̱ cutaj raꞌaj rej quiranꞌ chiꞌii̱ xꞌnúú soꞌ do̱ꞌ, ne̱ daj chiha̱a̱ míj se̱ cuchumán raj se vaa cunuu iꞌna̱ꞌ uún soꞌ maꞌ ―taj Tomás rihaan nij soꞌ a.
26Dan me se cachén tu̱nj güii, ne̱ mán uún nij síí tucuꞌyón snana̱ Jesús, ne̱ ya̱nj Tomás ga̱ nij soꞌ a. Ne̱ dan me se xraan vaa nij taꞌyaa, tza̱j ne̱ ta̱j niꞌyo̱n, ne̱ naruviꞌ Jesús tanu̱u̱ yan ma̱n nij soꞌ a. Ne̱ cataj soꞌ a:
―Ga̱a̱ dínj nimán soj á ―taj soꞌ rihaan nij soꞌ a.
27Ga̱a ne̱ cataj soꞌ rihaan Tomás a:
―Tu̱cuaꞌanj so̱ꞌ raꞌá so̱ꞌ nihánj, ga̱a ne̱ xca̱j so̱ꞌ cuentá da̱j vaa raꞌaj, ne̱ cuta̱ꞌ so̱ꞌ raꞌá so̱ꞌ xꞌnúú ꞌu̱nj nihánj rej catúj chruun lanzá, ga̱a ne̱ gu̱un ya̱ ya̱ rá so̱ꞌ se vaa cunuu iꞌna̱ꞌ uún ꞌu̱nj á. Cuchuma̱n rá so̱ꞌ, ni̱ꞌyaj so̱ꞌ manj á ―taj soꞌ rihaan Tomás a.
28Ga̱a ne̱ cataj Tomás rihaan soꞌ a:
―So̱ꞌ me Síí ꞌNi̱j Raꞌa manj, ne̱ so̱ꞌ me Taꞌanj ꞌu̱nj ado̱nj ―taj soꞌ rihaan Jesús a.
29Ga̱a ne̱ cataj Jesús rihaan soꞌ a:
―Cheꞌé se queneꞌen yá so̱ꞌ manj, ga̱a ne̱ amán rá so̱ꞌ niꞌya̱j so̱ꞌ manj na̱nj á. Tza̱j ne̱ vaa cheꞌé gu̱un niha̱ꞌ rá nij síí amán rá niꞌya̱j manj nda̱ꞌ se ne queneꞌe̱n nij soꞌ manj maꞌ. ꞌO̱ se cavi̱i̱ sa̱ꞌ ya̱ nij soꞌ ado̱nj ―taj Jesús rihaan Tomás a.
Nataꞌ Juan me cheꞌé cachrón soꞌ yanj nihánj a
30Dan me se vaa uxrá ꞌó nij suun sa̱ꞌ noco̱o quiꞌyaj Jesús queneꞌen nij síí tucuꞌyón snana̱ soꞌ, tza̱j ne̱ taj va̱j nana̱ cheꞌé ꞌó nij suun sa̱ꞌ noco̱o yoꞌ nó rihaan yanj nihánj maꞌ. 31Tza̱j ne̱ no̱ nana̱ nihánj rihaan yanj nihánj cheꞌé rej ꞌo̱ cuchuma̱n rá soj si̱j naya̱a̱ nana̱ nihánj se vaa Jesús roꞌ, me Síí Caꞌnéé Yaꞌanj Ti̱nanii man Yuvii̱ rihaan Sayuun, ne̱ Taꞌníí Yaꞌanj me ya̱ uún soꞌ ado̱nj. Ne̱ cheꞌé se amán rá soj niꞌya̱j soj man soꞌ roꞌ, cheꞌé dan ga̱a̱ iꞌna̱ꞌ nimán soj rihaan Yaꞌanj nu̱ꞌ cavii nu̱ꞌ caꞌanj cheꞌé maꞌa̱n Jesús chugua̱nj.
© Wycliffe Bible Translators, Inc. 2024 segunda versión electrónica