San Juan 18
18
Taꞌaa nij tanuu man Jesús a
1Ga̱a quisíj caꞌmii Jesús nu̱ꞌ nana̱ vaa da̱nj, ga̱a ne̱ cavii soꞌ ga̱ nij síí tucuꞌyón snana̱ soꞌ a. Ne̱ caꞌanj nij soꞌ rej xco̱ chráá catu̱u̱n cuꞌna̱j Cedrón, ne̱ cuchiꞌ nij soꞌ ꞌo̱ naa̱ chruun, ne̱ catúj ta̱ranꞌ nij soꞌ a. 2Ne̱ síí cuꞌna̱j Judas síí ta̱cuachén man Jesús rihaan nij síí ta̱j riꞌyunj man Jesús me se a̱j neꞌen soꞌ rej yoꞌ a. ꞌO̱ se a̱j guun queꞌe̱e̱ ndoꞌo cunuu chre̱ꞌ Jesús rej yoꞌ ga̱ nij síí tucuꞌyón snana̱ soꞌ a. 3Dan me se nica̱j Judas man ꞌo̱ xꞌneꞌ tanuu romanó do̱ꞌ, do̱j tanuu nu̱u̱ rihaan nij xrej ata̱ suun noco̱o ga̱ nij síí fariseo do̱ꞌ, caꞌanj soꞌ rej yoꞌ a. Ne̱ nica̱j nij soꞌ agaꞌ yaꞌan do̱ꞌ, caꞌ acaa do̱ꞌ, neê espadá do̱ꞌ, nica̱j nij soꞌ va̱j nij soꞌ rej yoꞌ a. 4Dan me se queneꞌen Jesús nu̱ꞌ se vaa quira̱nꞌ soꞌ, tza̱j ne̱ curiha̱nj soꞌ, ne̱ cataj soꞌ rihaan nij soꞌ a:
―Me síí nanoꞌ soj ga̱ ―taj soꞌ, xnáꞌanj soꞌ man nij soꞌ a.
5Ga̱a ne̱ cataj nij soꞌ rihaan soꞌ a:
―Nanoꞌ núj man Jesús síí cavii chumanꞌ Nazaret a ―taj nij soꞌ rihaan Jesús a.
―ꞌU̱nj me soꞌ á ―taj Jesús rihaan nij soꞌ a.
Dan me se nicu̱nꞌ Judas síí tacuachén man Jesús ga̱ nij soꞌ a. 6Dan me se ga̱a cataj Jesús se vaa maꞌa̱n soꞌ me síí nanoꞌ nij soꞌ, ga̱a ne̱ nu̱ꞌ naxuun nij soꞌ man nij soꞌ, ne̱ naxruꞌ nij soꞌ rihaan yoꞌóó a. 7Ga̱a ne̱ xnáꞌanj uún Jesús man nij soꞌ, cataj soꞌ a:
―Me síí nanoꞌ soj ga̱ ―taj uún Jesús a.
Ga̱a ne̱ cataj uún nij soꞌ a:
―Jesús síí cavii chumanꞌ Nazaret a ―taj uún nij soꞌ a.
8Ga̱a ne̱ cataj Jesús a:
―A̱j cataj xnaꞌanj ꞌu̱nj rihaan soj se vaa ꞌu̱nj me soꞌ ado̱nj. Sese ꞌu̱nj me síí nanoꞌ soj, ne̱ caꞌne̱ꞌ rá soj caꞌa̱nj nij síí nihánj á ―taj Jesús rihaan nij soꞌ a.
9Da̱nj caꞌmii soꞌ rihaan nij tanuu cheꞌé rej caꞌve̱e quisi̱j ya̱ nu̱ꞌ nana̱ caꞌmii soꞌ rihaan Yaꞌanj se vaa ne caꞌa̱nj niꞌya̱ a̱ ꞌó nij síí rqué Yaꞌanj man soꞌ a.
10Dan me se nica̱j síí cuꞌna̱j Simón Pedró neê espadá, ne̱ quirii soꞌ taneê soꞌ, ne̱ goꞌ soꞌ raa̱ se‑mo̱zó xrej ata̱ suun noco̱o doj, ne̱ veé da̱nj güéj nuj xréé soꞌ rej nuva̱ꞌ soꞌ, quiꞌyaj Pedró a. Ne̱ mozó yoꞌ roꞌ, cuꞌna̱j Malco a. 11Dan me se cataj Jesús rihaan Pedró a:
―Naꞌne̱j sa̱ꞌ so̱ꞌ taneê so̱ꞌ rque nuj á. Dan me se ase vaa ꞌo̱ tazá nu̱u̱ na vinó rqué Réj Yaꞌanj manj coꞌo̱j roꞌ, da̱nj vaa sayuun nihánj rihanj a. Me cheꞌé naꞌvej rá so̱ꞌ coꞌo̱j man yoꞌ ga̱ ―taj Jesús, xnáꞌanj soꞌ man Pedró a.
Caꞌanj nica̱j nii man Jesús rihaan xrej noco̱o cuꞌna̱j Anás a
12Dan me se taꞌaa nij tanuu romanó do̱ꞌ, tanuu uun chij doj do̱ꞌ, nij tanuu nu̱u̱ rihaan nij síí uun chij rihaan nij yuvii̱ israelitá do̱ꞌ, man Jesús, ne̱ numíj nij soꞌ raꞌa soꞌ a. 13Ne̱ asino ya̱a̱n caꞌanj nica̱j nij soꞌ man soꞌ rihaan síí cuꞌna̱j Anás a. Dan me se síí cuꞌna̱j Anás yoꞌ me se rej che̱j síí cuꞌna̱j Caifás me soꞌ, ne̱ Caifás me síí guun xrej ata̱ suun noco̱o doj yoꞌ yoꞌ a. 14Maꞌa̱n Caifás me síí narqué chrej rihaan nij síí uun chij rihaan nij yuvii̱ israelitá se vaa vaa cheꞌé cavi̱ꞌ ꞌo̱ snóꞌo cheꞌé cunuda̱nj nij yuvii̱ israelitá yoꞌ a.
Cataj Pedró se vaa né si̱j noco̱ꞌ man Jesús me soꞌ a
15Dan me se canocoꞌ Simón Pedró do̱ꞌ, ꞌó síí tucuꞌyón snana̱ Jesús do̱ꞌ, rej xco̱ Jesús a. Ne̱ ꞌó soꞌ me se si̱j neꞌen xrej ata̱ suun noco̱o doj man me soꞌ, ne̱ catúj soꞌ ga̱ Jesús taꞌyaa chingá nu̱u̱ tucuá xrej ata̱ suun noco̱o doj a. 16Ne̱ Pedró me se quináj soꞌ xeꞌ rej nichru̱nꞌ taꞌyaa a. Cheꞌé dan curiha̱nj ꞌó síí tucuꞌyón snana̱ Jesús yoꞌ, ne̱ caꞌmii soꞌ ga̱ chana̱ tumé taꞌyaa, ne̱ catúj Pedró uún, quiꞌyaj soꞌ a. 17Dan me se xnáꞌanj chana̱ tumé taꞌyaa man Pedró, cataj noꞌ a:
―Ne̱ nuveé so̱ꞌ me síí tucuꞌyón snana̱ síí nihánj naꞌ ―taj noꞌ, xnáꞌanj noꞌ man Pedró a.
Ne̱ cataj soꞌ a:
―Taj maꞌ ―taj Pedró a.
18Ne̱ nicu̱nꞌ nij mozó do̱ꞌ, nij tanuu do̱ꞌ, rej nachráj nii yaꞌan a. ꞌO̱ se acoj tihaꞌ rej ma̱n nij soꞌ, ne̱ cunuu gu̱u̱n nij soꞌ yaꞌan a. Ne̱ caꞌanj Pedró uún cunu̱u gu̱u̱n maꞌa̱n soꞌ yaꞌan a.
Da̱j caꞌmii Jesús rihaan Anás a
19Dan me se síí cuꞌna̱j Anás síí cayáán xrej ata̱ suun noco̱o doj asi̱j rque̱ doj roꞌ, xnáꞌanj soꞌ man Jesús cheꞌé nij síí tucuꞌyón snana̱ Jesús do̱ꞌ, cheꞌé maꞌa̱n tucuáán tucuꞌyón Jesús man nij soꞌ do̱ꞌ a. 20Ga̱a ne̱ cataj Jesús rihaan nij soꞌ a:
―ꞌU̱nj roꞌ, caꞌmii ranga̱ꞌ rihaan cunuda̱nj nij yuvii̱ a. Nu̱ꞌ güii tucuꞌyón ꞌu̱nj snana̱j rá veꞌ tucuꞌyón níꞌ stucua̱nj Moisés do̱ꞌ, rej ya̱nj nuvií noco̱o do̱ꞌ, ne̱ yoꞌ me rej nuu chre̱ꞌ ta̱ranꞌ nij yuvii̱ israelitá a. Ne̱ taj va̱j nana̱ ne caꞌmi̱i̱ yuve̱ ꞌu̱nj maꞌ. 21Me cheꞌé xnáꞌanj soj manj ga̱. Xna̱ꞌanj soj man nij yuvii̱ cuno nana̱ caꞌmij á. Veé nij soꞌ neꞌen ya̱ da̱j caꞌmii ꞌu̱nj na̱nj á ―taj Jesús rihaan síí cuꞌna̱j Anás yoꞌ a.
22Quisíj caꞌmii Jesús da̱nj, ga̱a ne̱ coxro ꞌo̱ tanuu tumé nuvií noco̱o nicu̱nꞌ rej yoꞌ xruu̱ Jesús, ne̱ cataj soꞌ a:
―Me cheꞌé caꞌmii so̱ꞌ da̱nj rihaan xrej ata̱ suun noco̱o doj ―taj soꞌ, guun yuva̱a̱ soꞌ man Jesús a.
23Ga̱a ne̱ cataj Jesús rihaan soꞌ a:
―Sese caꞌmii chiꞌi̱i̱ ꞌu̱nj, ne̱ cata̱j so̱ꞌ me nana̱ chiꞌi̱i̱ caꞌmij á. Tza̱j ne̱ sese caꞌmii sa̱ꞌ ꞌu̱nj, ne̱ me cheꞌé coxro so̱ꞌ xruú ꞌu̱nj ga̱ ―taj Jesús rihaan tanuu coxro xruu̱ soꞌ a.
24Veé dan, ga̱a ne̱ caꞌnéé síí cuꞌna̱j Anás man Jesús rihaan síí cuꞌna̱j Caifás síí cayáán xrej ata̱ suun noco̱o doj, ne̱ veé ꞌo̱ da̱nj numi̱i soꞌ caꞌanj soꞌ a.
Yavíj cataj Pedró se vaa né si̱j noco̱ꞌ man Jesús me soꞌ maꞌ
25Dan me se nicu̱nꞌ Simón Pedró cunuu gu̱u̱n soꞌ yaꞌan a. Ga̱a ne̱ cataj ꞌo̱ yuvii̱ rihaan soꞌ a:
―Né ꞌo̱ síí tucuꞌyón snana̱ soꞌ mé so̱ꞌ naꞌ ―taj yuvii̱, xnáꞌanj yuvii̱ man soꞌ a.
Ne̱ cataj Pedró a:
―Taj maꞌ ―taj soꞌ a.
26Ga̱a ne̱ xnáꞌanj ꞌo̱ se‑mo̱zó xrej ata̱ suun noco̱o doj man soꞌ, ne̱ tuviꞌ síí güéj xréé quiꞌyaj Pedró me soꞌ, ne̱ cataj soꞌ a:
―Né so̱ꞌ me síí va̱j ga̱ Jesús rque naa̱ chruun queneꞌenj naꞌ ―taj soꞌ, xnáꞌanj soꞌ man Pedró a.
27Ga̱a ne̱ cataj uún Pedró se vaa né tuvi̱ꞌ Jesús me soꞌ a. Ne̱ nu̱ꞌ caꞌmii soꞌ da̱nj, ga̱a ne̱ nu̱ꞌ caguáj taꞌloo a.
Caꞌmii Jesús ga̱ síí cuꞌna̱j Pilató a
28Dan me se nica̱j nij mozó do̱ꞌ, nij tanuu do̱ꞌ, man Jesús curiha̱nj nij soꞌ rej ya̱nj síí cuꞌna̱j Caifás, ne̱ caꞌanj nij soꞌ tucuá suun a. Naꞌya̱a̱n uxrá me yoꞌ a. Ne̱ ne catu̱u̱ nij síí israelitá rá tucuá suun a̱ maꞌ. ꞌO̱ se me rá nij soꞌ cha̱ nij soꞌ Chaꞌanj Pascuá, ne̱ cheꞌé dan ne caꞌve̱j rá nij soꞌ gu̱un chiꞌi̱i̱ nij soꞌ rihaan Yaꞌanj quiꞌya̱j tucuá suun yoꞌ a. 29Cheꞌé dan curiha̱nj maꞌa̱n síí cuꞌna̱j Pilató rej nicu̱nꞌ nij soꞌ a. Ne̱ xnáꞌanj Pilató man nij soꞌ, cataj soꞌ a:
―Me cacunꞌ cuta̱ꞌ soj xráá snóꞌo nihánj, rá soj ga̱ ―taj soꞌ rihaan nij yuvii̱ caꞌnaꞌ ga̱ Jesús a.
30Ga̱a ne̱ cataj nij soꞌ rihaan Pilató a:
―Sese né si̱j ꞌyaj chiꞌi̱i̱ me síí nihánj, ne̱ ne ta̱cuachén núj man soꞌ nda̱a rihaan so̱ꞌ tza̱j maꞌ ―taj nij yuvii̱ rihaan Pilató a.
31Cheꞌé dan cataj Pilató rihaan nij soꞌ a:
―Ni̱caj soj man soꞌ, ne̱ caꞌne̱ꞌ soj cacunꞌ cheꞌé soꞌ, quiꞌya̱j soj nda̱a vaa tucuáán noco̱ꞌ maꞌa̱n soj á ―taj Pilató rihaan nij soꞌ a.
Ga̱a ne̱ cataj nij soꞌ rihaan Pilató a:
―No̱ xcúún soꞌ cavi̱ꞌ soꞌ, rá núj, tza̱j ne̱ naꞌvej rá soj si̱j cavii chumanꞌ Romá ticavi̱ꞌ núj man a̱ ꞌó yuvii̱ a̱ maꞌ ―taj nij soꞌ rihaan Pilató a.
32Cheꞌé se caꞌmii nij soꞌ da̱nj roꞌ, cheꞌé dan quisi̱j ya̱ nu̱ꞌ snana̱ Jesús nana̱ aꞌmii cheꞌé da̱j quiꞌya̱j nii man soꞌ ticavi̱ꞌ nii man soꞌ a.
33Dan me se catúj uún Pilató tucuá suun, ne̱ canacúún soꞌ caꞌna̱ꞌ Jesús, ne̱ xnáꞌanj soꞌ man Jesús, cataj soꞌ a:
―Ma̱ꞌán so̱ꞌ me síí nica̱j suun rey uun chij rihaan nij yuvii̱ israelitá naꞌ ―taj Pilató rihaan Jesús a.
34Ga̱a ne̱ xnáꞌanj Jesús man soꞌ, cataj Jesús a:
―Ma̱ꞌán so̱ꞌ cavii raa̱ nana̱ vaa da̱nj caꞌmii so̱ꞌ naꞌ. Ase ꞌó yuvii̱ cataj xnaꞌanj rihaan so̱ꞌ cheꞌej xa̱ꞌ ―taj Jesús, xnáꞌanj soꞌ man Pilató a.
35Ga̱a ne̱ xnáꞌanj Pilató man soꞌ, cataj soꞌ a:
―Si̱j israelitá mé ꞌu̱nj, rá so̱ꞌ naꞌ. ꞌO̱ se nij tuvíꞌ so̱ꞌ do̱ꞌ, maꞌa̱n nij xrej ata̱ suun noco̱o do̱ꞌ, tacuachén mán so̱ꞌ rihanj á. Me cacunꞌ tumé so̱ꞌ ga̱ ―taj Pilató, xnáꞌanj soꞌ man Jesús a.
36Ga̱a ne̱ cataj Jesús a:
―ꞌO̱ se né riha̱a̱n chumii̱ nihánj me rej uun chij ꞌu̱nj maꞌ. Sese rihaan chumii̱ nihánj me rej uun chij ꞌu̱nj, ne̱ gaa tanuu nu̱u̱ rihanj, ne̱ cavii nij tanuu, cunuꞌ nij tanuu, cheꞌé rej se̱ taꞌaa nij síí uun chij rihaan nij yuvii̱ israelitá manj asuun tza̱j ado̱nj. Tza̱j ne̱ né riha̱a̱n chumii̱ nihánj me rej uun chij ꞌu̱nj maꞌ ―taj Jesús a.
37Ga̱a ne̱ xnáꞌanj Pilató man soꞌ, cataj soꞌ a:
―Cheꞌé dan síí nica̱j suun rey mé so̱ꞌ naꞌ. Ya̱ naꞌ ―taj Pilató, xnáꞌanj soꞌ man Jesús a.
Ga̱a ne̱ cataj Jesús rihaan soꞌ a:
―Ya̱ uxrá vaa nana̱ caꞌmii ma̱ꞌán so̱ꞌ se vaa si̱j nica̱j suun rey mej á. Ne̱ nihánj me cata̱j xnaꞌanj ꞌu̱nj rihaan so̱ꞌ me cheꞌé caꞌngaa ꞌu̱nj ne̱ me cheꞌé caꞌnáꞌ ꞌu̱nj rihaan chumii̱ nihánj ado̱nj. Dan me se caꞌnáꞌ ꞌu̱nj cata̱j xnaꞌanj ꞌu̱nj nana̱ ya̱ rihaan yuvii̱ a. Ne̱ cunuda̱nj nij síí uno nana̱ ya̱ roꞌ, uno nana̱ aꞌmij ado̱nj ―taj Jesús rihaan Pilató a.
38Ne̱ cataj Pilató rihaan soꞌ a:
―A̱ me nana̱ cuꞌna̱j nana̱ ya̱ ga̱ ―taj Pilató, xnáꞌanj Pilató man Jesús a.
Caꞌneꞌ Pilató cacunꞌ cheꞌé Jesús a
Ne̱ ga̱a quisíj caꞌmii síí cuꞌna̱j Pilató nana̱ vaa da̱nj ga̱ Jesús, ne̱ curiha̱nj uún soꞌ rej nicu̱nꞌ nij síí uun chij rihaan nij yuvii̱ israelitá, ne̱ cataj soꞌ rihaan nij soꞌ a:
―Taj va̱j a̱ doj cacunꞌ tumé soꞌ naríꞌ ꞌu̱nj a̱ maꞌ. 39Tza̱j ne̱ vaa ꞌo̱ tucuáán noco̱ꞌ níꞌ se vaa rii ꞌu̱nj ꞌo̱ tuviꞌ soj síí ꞌni̱j tagaꞌ ꞌo̱ ꞌo̱ Chaꞌanj Pascuá a. Ne̱ me rá soj quiri̱i̱ ꞌu̱nj man maꞌa̱n síí nihánj síí nica̱j suun rey uun chij rihaan soj si̱j israelitá naꞌ ―taj Pilató, xnáꞌanj soꞌ man nij yuvii̱ a.
40Cheꞌé dan caguáj uún nij yuvii̱, cataj nij soꞌ a:
―Se̱ quirii so̱ꞌ man síí nihánj a̱ maꞌ. Tana̱nj síí cuꞌna̱j Barrabás quiri̱i̱ so̱ꞌ á ―taj nij yuvii̱, caguáj nij yuvii̱ a.
Ne̱ Barrabás me se si̱j guun rá cunu̱ꞌ ga̱ gobiernó me soꞌ a.
© Wycliffe Bible Translators, Inc. 2024 segunda versión electrónica