Marcos 3
3
Makin wanush runata jamay junaqcho Jesús aliyäsishqan
Mateo 12.9-14; Lucas 6.6-11
1Juk kutichömi sinagögaman Jesús yapay yaykurqan. Saychömi makin wanush runapis kaykarqan. 2Saymi Jesústa rikapaykäyarqan jamay junaqcho aliyäsiptinqa say achäquila contran sharkuyänanpaq.
3Saymi makin wanush runata Jesús nirqan: <<Runakunapa puntanman ichiy>>.
4Nirkurnami runakunata tapur nirqan: <<Jamay junaqcho ¿ali kaqtaku o mana ali kaqtaku rurashwan? Runa mayinsita ¿salvashwanku o <wanukusunpis> nishwanku?>>
Sayno niptin manami imatapis niyarqansu. 5Saymi paykunata Jesús rabyash rikärirqan. Mana kuyapäkuq kayashqanta musyarmi selläma lakikushpan makin wanush runata nirqan: <<¡Makikita joqariy!>>
Joqarkuptinmi makin aliyaskirqan. 6Saymi fariseukuna yarquriyashpan Herodespa favornin sharkuq runakunawan Jesústa wanusiyänanpaq wilanakuyarqan.
Aska runakuna qocha kuchunman shuntakäyashqan
7Saypitanami discïpulunkunawan Jesús aywarqan qocha kuchunman. Qepanpami saysika runakuna Galileapita y Judeapita aywayarqan. 8Saynöpis Jesús rurashqankunata musyarmi saysika runakuna aywayarqan Jerusalénpita, Idumeapita, Jordán mayu wak simpanpita, Tiro markapita y Sidón markapitapis. 9Saymi discïpulunkunata Jesús nirqan: <<Runakuna juntapäyämaptin wisänäpaq büquita kamarishla kaykäsiyay>>.
10Aska runakunata aliyäsish kaptinmi lapan qeshyaqkuna imaykanöpapis Jesús yataykuyta munayarqan.#Mar. 4.1; Luc. 5.1-3.
11Jesústa rikayashpanmi supaykuna löcuyäsiyashqan runakunapis puntanman lätakuykur sinchipa niyarqan: <<¡Diospa Surinmi qam kanki!>>
12Sayno niyaptinmi paykunata Jesús olqutuparqan pï kashqantapis mana wilakuyänanpaq.
Chunka ishkay apostolninkunata Jesús akrashqan
Lucas 6.12-16
13Saypita jirkaman Jesús wisarkurmi wakin discïpulunkunata jutinpa jutinpa qayarqan. 14Say qayashqan discïpulunkunami chunka ishkay apostolninkuna kayarqan. Paykunata qayarqan paywan puriyänanpaq, Tayta Diospa wilakuyninta wilakuyänanpaq, 15[qeshyaykaqkunata aliyäsiyänanpaq] y runakunapita supaykunata qarquyänanpaqmi. 16Paykunami kayarqan Simón (paypa jutintami trukasirqan Pedro kananpaq) 17y Zebedeupa surinkuna Santiaguwan Juan. Santiagutawan Juantami kuyay jutinta churaparqan Boanerges nir. Boanerges nishqanqa <<maqakuypa surinkuna>> ninanmi. 18Wakin kaqkunami kayarqan Andrés, Felipe, Bartolomé, Mateo, Tomás, Alfeupa surin Santiago, Tadeo, Zelote nishqan Simón 19y Jesústa rantikuq Judas Iscariote.
Jesúspa contran parlayashqan
Mateo 12.22-32; Lucas 11.14-23; 12.10
20Saypita juk wayiman Jesús yaykuptinmi saymanpis aska runakuna shuntakäyarqan. Saymi tiempun karqansu discïpulunkunawan mikuyänalanpaqpis. 21Jesús sayno kaykashqanta ayllunkuna musyaykurmi löcuyash kaykashqanta yarpäyashpan qorimuq aywayarqan.
22Say junaqkunami ley yachasiqkuna Jerusalénpita chaykur niyarqan: <<Kay runaqa supaykunapa mandaqnin Beelzebúpa#3.22 Beelzebúqa Satanáspa jukaq jutinmi kaykan. munayninwanmi supaykunata qarquykan>>.#Mat. 9.34; 10.25.
23Sayno niyaptinmi say runakunata qayaykasir Jesús tinkusiylapa nirqan: <<¿Imanöpataq Satanás kikinta qarqukunman? 24Juk nacioncho runakuna kikinkunapura chikinakurqa ¿manasuraq wanusinakur ushakäyanman? 25Saynöpis juk wayicho taqkuna chikinakurqa ¿manasuraq wakpa kaypa aywakur ushakäyanman? 26Satanáspis kikinpa contran sharkurqa ushakanqami. 27Kalpayuq runata manaraq pankarqa manami pipis wayinman yaykur imankunatapis apakunmansu. Pankaykurmi isanqa imankunatapis apakunman.#3.27 Kalpayuq runamanmi Satanásta tinkusin. Imankunamanmi munaynincho sararashqan runakunata tinkusin. Satanásta pankaq runamanmi Jesucristo kikinta tinkusikun. Saynöpami tantiyasirqan Satanáspita mas munayyuq kashqanta.
28<<Rasunpami nï: Runakuna jusalikuyashqanta y Diospa contran parlayashqantapis Tayta Dios perdonanqami. 29Espíritu Santupa contran parlayashqantami isanqa imaypis perdonanqasu>>.#3.29 Espíritu Santuqa jusansita kacharir Jesucristuta chaskikunansipaqmi tantiyasimansi (Juan 16.8-11). Saymi Espíritu Santupa contran parlarqa pay tantiyasishqanta mana chaskikur Jesucristuta imaypis chaskikunsu (Hech. 7.51). Jesucristuta chaskikuq kaqmi isanqa perdonash kanqa.#Luc. 12.10.
30Jesús sayno nirqan supay yanapaykashqanta niyaptinmi.
Jesúspa maman y wawqinkuna pï kayashqanpis
Mateo 12.46-50; Lucas 8.19-21
31Saypitanami Jesúspa maman y wawqinkuna wayi punkuman chaykur Jesústa qayasiyarqan. 32Saymi Jesúswan jamaraykaqkuna wilayarqan: <<Mamaykiwan wawqikikunami punkucho shuyaraykäyäshunki>> nir.
33Sayno niyaptinmi Jesús nirqan: <<Mamä y wawqïkuna ¿pï kayashqantapis musyayankiku?>>
34Sayno nirmi paywan jamaraykaqkunata rikärir nirqan: <<Kaychömi mamä y wawqïkuna kaykäyan. 35Pipis Tayta Dios munashqanno kawaq kaqmi wawqï, panï y mamä kaykan>>.
© 2003, Wycliffe Bible Translators, Inc. All rights reserved.